វិស័យអប់រំនៅក្នុងប្រទេសហ្វីលីពីនកំពុងជួបវិបត្តិដោយសារវិបត្តិកូវីដ១៩?
ចុះផ្សាយនៅថ្ងៃ៖
ស្តាប់ - ០៥:៤១
នៅក្នុងប្រទេសហ្វីលីពីន រដ្ឋាភិបាលបានបន្តបិទទ្វារសាលាដោយបារម្ភខ្លាចកូនក្មេងចម្លងជំងឺកូវីដ១៩ ទៅឱពុក ម្តាយដែលមានវ័យចំណាស់។ ឆ្នាំ ២០២១ នេះជាឆ្នាំទី២ ដែលមានកូនសិស្សជាច្រើនលាននាក់បានបន្តរៀនសូត្រតាមអនឡាញ។ រហូតមកដល់ពេលនេះ ប្រធានាធិបតីលោកឌុយទែរតេបន្តទាត់ចោលលើសំណើសុំឲ្យបើកសាលារៀនឡើងវិញ ទោះបីជាសាលារៀនស្ថិតនៅក្នុងតំបន់មិនសូវមានករណីឆ្លងជំងឺកូវីដ១៩ ក៏ដោយ។ អ្វីដែលក្រុមអ្នកជំនាញបារម្ភ គឺវិបត្តិអប់រំដែលកើតចេញពីការបន្តបិទសាលារៀនពេលនេះ។
រឿងបិទសាលារៀន និងឲ្យកូនសិស្សរៀនពីចម្ងាយ ឬរៀនតាមអនឡាញ គឺជាវិធានការមួយដែលត្រូវបានប្រទេសសឹងតែទាំងអស់លើលោកយកទៅអនុវត្ត មិនថាប្រទេសអ្នកមាន ឬប្រទេសអ្នកក្រ។ គោលដៅនៃការអនុវត្តវិធានការមួយនេះ គឺដើម្បីទប់ស្កាត់នឹងការឆ្លងរាលដាលនៃជំងឺកូវីដ១៩ដែលបានផ្ទុះដំបូងនៅដើមឆ្នាំ ២០២០។ ក្នុងរយៈពេលជិត ២ឆ្នាំនៃវត្តមានកូវីដ១៩ និងបន្តដោយកូវីដ១៩ បំប្លែងខ្លួន ការបិទ ហើយបើក និងការបើក ហើយបិទសាលារៀនជារឿងមួយធម្មតាទៅហើយសម្រាប់ប្រទេសខ្លះដោយផ្អែកលើស្ថានភាពជាក់ស្តែងនៃជំងឺកូវីដ១៩។ អ្វីជាការកត់សម្គាល់នៅពេលនេះ មានប្រទេសខ្លះបានបើកសាលារៀនឡើងវិញទាំងស្រុង និងប្រទេសខ្លះទៀតបានបើកតែមួយភាគ។ បន្ទាប់មក នៅមានប្រទេសមួយចំនួនតូចបន្តបិទសាលារៀនទាំងស្រុងតាំងពីដើមទីមកដល់សព្វថ្ងៃ ក្នុងនោះក៏មានប្រទេសហ្វីលីពីនមួយដែរ។
រហូតមកដល់ពេលនេះ ប្រធានាធិបតីហ្វីលីពីនលោកឌុយទែរតេបានបដិសេធលើសំណើសុំបើកសាលារៀនឡើងវិញ សូម្បីតែសាលាបឋមសិក្សា និងសាលាមធ្យមសិក្សាក៏លោកឌុយទែរតេមិនព្រមដែរ។ ប្រធានាធិបតីហ្វីលីពីនរូបនេះបានលើកយកហេតុផលទៅពន្យល់ថា គឺខ្លាចកូនសិស្សឆ្លងកូវីដ១៩ រួចចម្លងជំងឺនេះទៅមនុស្សចាស់ ពិសេសឱពុក ម្តាយរបស់ពួកគេ។ ហេតុផលលើកឡើងដោយលោកឌុយទែរតេមិនខុសទេ ព្រោះមនុស្សចាស់ជាក្រុមមនុស្សដែលងាយរងគ្រោះខ្លាំងដោយជំងឺកូវីដ១៩។ នៅក្នុងរយៈពេលបិទសាលានេះ រដ្ឋាភិបាលបានរៀបចំឲ្យមានការរៀនសូត្រពីចម្ងាយ ឬហៅរៀនសូត្រតាមអនឡាញ ហើយដើម្បីពង្រឹងបន្ថែមលើការសិក្សា រៀនសូត្ររបៀបនេះ ក្រសួងអប់រំបានបង្កើតឡើងនូវកម្មវិធីអប់រំរួមមួយកាលពីខែតុលា ឆ្នាំ ២០២០។
កម្មវិធីអប់រំរួមមួយនេះត្រូវបានចែកចេញជា ៣ ផ្នែក គឺវគ្គរៀនសូត្រតាមអនឡាញ ការបញ្ជូនឯកសារមេរៀន និងការផ្សាយមេរៀនតាមកញ្ចក់ទូរទស្សន៍។ តែអ្វីដែលរដ្ឋាភិបាលហាក់បានមើលរំលងនោះនៅត្រង់ថា មានកូនសិស្សភាគច្រើនគ្មានម៉ាស៊ីនកុំព្យូទ័រ ឬគ្មានអ៊ីនធ័រនែតនៅផ្ទះទេ។ នេះជារឿងមួយ និងគ្រាន់ជារឿងមួយជ្រុងនៃបញ្ហាប៉ុណ្ណោះ។ រឿង និងបញ្ហាដែលសំខាន់ជាងនេះនាពេលបច្ចុប្បន្ន គឺការដែលក្រសួងអប់រំក្តាប់មិនបានពីចំនួនកូនសិស្សដែលរៀនតាមអនឡាញ លទ្ធភាពដែលកូនសិស្សអាចរៀនតាមអនឡាញ និងចំណេះដឹងពិតប្រាកដដែលកូនសិស្សទទួលបានពីការរៀនតាមអនឡាញ។ នេះដោយមិនបានរាប់បញ្ចូលនូវចំនួនកូនសិស្សដែលដល់អាយុចូលរៀនដោយផ្តើមរៀនតាមអនឡាញទេ។
« ខ្ញុំចង់ទៅសាលា។ ខ្ញុំមិនដឹងថា ថ្នាក់រៀនមានរាងដូចម្តេច ខ្ញុំមិនដែលឃើញវាទាល់តែសោះ » នេះជាសម្តីរបស់កុមារីម្នាក់អាយុ ៧ឆ្នាំឈ្មោះគីលី ឡារ៉ូប៊ី។ កុមារីរូបនេះបានរអ៊ូរទាំដែលមិនចេះអាន ក្រោយពីបានរៀនថ្នាក់មត្តេយ្យតាមអនឡាញអស់រយៈពេល ១ឆ្នាំ។ លោក Isy Faingold អ្នកទទួលខុសត្រូវផ្នែកអប់រំរបស់អង្គការ Unicef ប្រចាំហ្វីលីពីនបានថ្លែងថា មានឱពុក ម្តាយជាង ៨០% កំពុងបារម្ភពីការទទួលបានការរៀនសូត្រតិចតួចរបស់កូនៗពួកគេ។ ក្នុងចំណោមឱពុក ម្តាយទាំងជាង ៨០% នេះ មាន ២ភាគ៣ ចង់ឲ្យបើកសាលារៀនឡើងវិញនៅតាមតំបន់ដែលមិនសូវមានករណីឆ្លងកូវីដ១៩។ គួរបញ្ជាក់ថា ចំនួនកូនសិស្សចុះឈ្មោះចូលរៀនក្នុងឆ្នាំសិក្សា ២០២០ មានការធ្លាក់ចុះខ្លាំង បើធៀបនឹងឆ្នាំសិក្សា ២០១៩ ពោលមុនការផ្ទុះជំងឺកូវីដ១៩។
អ្វីដែលលោក Isy Faingold បារម្ភ គឺខ្លាចតែសិស្សភាគច្រើនបោះបង់សាលាដោយមិនត្រឡប់វិញតែម្តង។ ក្រៅពីធ្វើឲ្យការអប់រំមានគុណភាពធ្លាក់ចុះ ការសិក្សា រៀនសូត្រតាមអនឡាញក៏នឹងធ្វើឲ្យប៉ះពាល់ដល់សុខភាពផ្លូវចិត្ត និងការអភិវឌ្ឍន៍របស់កុមារដែរ។ តាមលោក Isy Faingold ឆ្នាំសិក្សាដំបូងជាមូលដ្ឋានគ្រឹះសម្រាប់អ្នកដល់អាយុចូលសាលា និងថា គឺក្រុមសិស្សប្រភេទនេះដែលជាអ្នករងគ្រោះខ្លាំងជាងគេដោយការបិទសាលារៀន។ តែលោកស្រី Josefina Almarez នាយិកាសាលាមួយបានចេញមុខការពារលើការបង្រៀនតាមអនឡាញរបស់រដ្ឋាភិបាលដោយបញ្ជាក់ថា គ្មានកុមារណាម្នាក់ត្រូវបានបំភ្លេចចោលនៅក្នុងឆ្នាំសិក្សាដំបូងទេ ទោះបីជាការរៀនសូត្រដំបូងនេះបានធ្វើឡើងតាមអនឡាញក៏ដោយ។ ទោះជាយ៉ាងនេះក្តី ការសម្រេចបន្តបិទសាលារបស់រដ្ឋាភិបាលពេលនេះកំពុងបន្តទទួលការរិះគន់យ៉ាងខ្លាំង។
លោកស្រី Mercedes Arzadon សាស្រ្តាចារ្យនៅសកលវិទ្យាល័យបានយល់ឃើញថា វាគួរឲ្យអស់សំណើចដែលរដ្ឋាភិបាលបន្តបិទសាលាគ្មានកំណត់ពេល ខណៈដែលមានប្រទេសជិតខាងផ្សេងដូចយ៉ាងឥណ្ឌូណេស៊ីបានសម្រេចបើកសាលាឡើងវិញដោយសុវត្ថិភាព។ បើយោងតាមសេណារីយ៉ូសុទិដ្ឋិនិយម ហ្វីលីពីនអាចនឹងបើកសាលាឡើងវិញនៅឆ្នាំ ២០២២ នេះជាការបញ្ជាក់របស់លោក Isy Faingold។ តែបើកឡើងវិញ ឬក៏មិនបើកឡើងវិញ វាអាចអាស្រ័យលើកត្តាពីរជាសត្យានុម័ត ទី១ អត្រាអ្នកឆ្លងកូវីដ១៩ ប្រចាំថ្ងៃ និងទី២ អត្រាចំនួនអ្នកចាក់វ៉ាក់សាំង។ នៅចំពោះមុខពេលនេះ មេរោគបំប្លែងខ្លួនដែលតាកំពុងធ្វើចរាចរណ៍ខ្លាំង ហើយមានចំនួនពលរដ្ឋផ្ទាំងស៊ីបតែប្រមាណ ២០% ប៉ុណ្ណោះដែលបានចាក់វ៉ាក់សាំងគ្រប់ចំនួន ២ដូស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ