អភិបាលតំបន់អូសាកាថាការដង្ហែភ្លើងគប់អូឡាំពិកគួរលុបចោលដោយសារកំណើនកូវីដ
អភិបាលតំបន់អូសាកានៅថ្ងៃព្រហស្បតិ៍ ទី១ មេសាបានស្នើឲ្យលុបចោលការដង្ហែភ្លើងគប់អូឡាំពិកឆ្លងកាត់ទីក្រុងនេះ ដោយសារករណីឆ្លងកូវីដហក់ស្ទុះឡើងខ្ពស់។ ការស្នើឡើងបែបនេះបានធ្វើឲ្យពិធីដង្ហែភ្លើងគប់អូឡាំពិកត្រូវជួបឧបសគ្គធំ ព្រោះការប្រកួតកីឡានៅតូក្យូនឹងត្រូវចាប់បើកក្នុងរយៈពេលមិនដល់បួនខែទៀតនោះទេ។
ចុះផ្សាយនៅថ្ងៃ៖
ស្តាប់ - ០២:២៨
ការអំពាវនាវនេះធ្លាក់មកនៅពេលដែលតំបន់អូសាកា និងតំបន់ចំនួនពីរផ្សេងទៀតនៃប្រទេសជប៉ុនកំពុងប្រឈមនឹងកំណើនករណីឆ្លងកូវីដ ហើយអាជ្ញាធរត្រូវដាក់ចេញនូវវិធានការតឹងរ៉ឹងថ្មីដើម្បីដោះស្រាយបញ្ហានៅចំពោះមុខ។ ចំណាត់ការថ្មីនេះនឹងចូលជាធរមាននៅថ្ងៃចន្ទសប្តាហ៍ក្រោយ និងត្រូវអនុវត្តរហូតដល់ថ្ងៃទី៥ ខែឧសភា។
អភិបាលក្រុងអូសាកាលោកអ៊ីហ្ស៊ីរ៉ូ ម៉ាត់ស៊ូអិ (Ichiro Matsui) បានមានប្រសាសន៍ថា នៅពេលដែលលោកមើលការដង្ហែភ្លើងគប់នៅកន្លែងផ្សេងទៀតក្នុងប្រទេសជប៉ុន ប្រជាជនក៏ទៅប្រមូលផ្តុំគ្នាកកកុញ។ លោកម៉ាត់ស៊ូអិ បានបន្ថែមថាការលុបចោលនូវការដង្ហែគឺជារឿងគួរឲ្យសោកស្តាយខ្លាំងណាស់ ប៉ុន្តែលោកគិតថាគេគួរតែបញ្ឈប់វាក្នុងកាលៈទេសៈដូចបច្ចប្បន្ន។
ដូចគ្នានេះដែរ អភិបាលតំបន់អូសាកាលោកយូហ្ស៊ីម៉ូរ៉ា បានយល់ស្របចំពោះមតិរបស់លោកម៉ាត់ស៊ូអិ ដោយនិយាយថាការបង្ហែភ្លើងគប់ឆ្លងកាត់កណ្តាលក្រុងអូសាកាគួរតែត្រូវលុបចោល។ នៅល្ងាចថ្ងៃព្រហស្បតិ៍ ទី១ មេសា លោកនាយករដ្ឋមន្ត្រីជប៉ុន យ៉ូស្ហ៊ីហ៊ីដេ ស៊ូហ្កា ក៏បានបង្ហាញពីចេតនាចង់លុបចោលការដង្ហែនេះដែរ និងថាកំពុងពិចារណាជុំវិញរឿងនេះ។
អភិបាលតំបន់អូសាកាបានប្រាប់ក្រុមអ្នកសារព័ត៌មាននៅក្នុងសន្និសីទកាសែតមួយថាលោកនៅមិនទាន់បាននិយាយជាមួយមន្ត្រីកីឡាអូឡាំពិកក្រុងតូក្យូឆ្នាំ ២០២០ នៅឡើយទេអំពីបញ្ហានេះ។ ចំណែកអ្នករៀបចំការដង្ហែភ្លើងគប់អូឡាំពិកវិញ បាននិយាយនៅក្នុងសេចក្តីថ្លែងការណ៍មួយថា ពួកគេនឹងបន្តការពិភាក្សាយ៉ាងជិតស្និទ្ធ ជាមួយអាជ្ញាធរតំបន់អូសាកាទាក់ទងនឹងការដង្ហែបញ្ជូនភ្លើងគប់ និងបានសន្យាព្យាយាមប្រកាសលទ្ធផលឲ្យបានឆាប់តាមដែលអាចធ្វើទៅបាន។
សូមរំឭកថាការដង្ហែភ្លើងគប់អូឡាំពិកនៅជប៉ុនបានចាប់ផ្តើមនៅថ្ងៃព្រហស្បតិ៍ ២៥ មីនា ដោយបានចេញដំណើរពីទីក្រុងហ្វូគូស្ហីម៉ា ដើម្បីឈានទៅបើកការប្រកួតនៅតូក្យូ នាថ្ងៃទី ២៣ កក្កដាខាងមុខ។
មុនពេលពិធីដង្ហែចាប់ផ្តើម ក្រុមអ្នករៀបចំបាននិយាយរួចជាស្រេចហើយថា ពួកគេអាចនឹងផ្លាស់ប្តូរផ្លូវប្រសិនបើចាំបាច់។ ប៉ុន្តែក្នុងករណីមានការពន្យារពេលណាមួយវិញនោះ គេត្រូវដឹងថាក្រុមអត្តពលិកចំនួន១ម៉ឺននាក់ នឹងត្រូវជួបឧបសគ្គក្នុងការដឹកដង្ហែភ្លើងគប់ទៅដល់ទីក្រុងតូក្យូឲ្យទាន់ពេលវេលាដែលព្រឹត្តិការណ៍កីឡាអូឡាំពិកត្រូវបើកជាផ្លូវការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ