ព្រឹត្តិការណ៍ប្រកួតកីឡាអូឡាំពិកនៅតូក្យូ ទំនងជាត្រូវលើកពេលដោយសារកូវីដ១៩
ព្រោះតែវិបត្តិកូវីដ១៩ ការប្រកួតកីឡាអូឡាំពិក នៅទីក្រុងតូក្យូនៃប្រទេសជប៉ុន ដែលនឹងត្រូវប្រព្រឹត្តទៅនាខែកក្កដា ឆ្នាំ២០២០ ខាងមុខ ទំនងជាត្រូវពន្យារពេល។ ប្រទេសជប៉ុន ដែលជាម្ចាស់ផ្ទះរៀបចំព្រឹត្តិការណ៍នេះ មានបំណងចង់រក្សាការប្រកួតតាមកាលកំណត់ ក៏ប៉ុន្តែដោយរងសម្ពាធកាន់តែច្រើននៅថ្ងៃចន្ទ ទី២៣ មីនានេះ ជប៉ុនថា ការលើកពេលទំនងជារឿងជៀសមិនរួចនោះទេ។
ចុះផ្សាយនៅថ្ងៃ៖
ព្រឹត្តិការណ៍ប្រកួតកីឡាអូឡាំពិកឆ្នាំ ២០២០ នៅទីក្រុងតូក្យូ ប្រហែលជាត្រូវពន្យារពេល ដោយជៀសមិនផុតនោះទេ ជាពិសេសបន្ទាប់ពីប្រទេសកាណាដា ព្រមទាំងអូស្ត្រាលី ប្រកាសដកខ្លួន មិនចូលរួមក្នុងការប្រកួតឡើយ។
ការប្រកាសរបស់កាណាដា និងអូស្ត្រាលីនេះ ហាក់កាន់តែដាក់សម្ពាធខ្លាំងឡើងៗ ដល់ប្រទេសជប៉ុន ក៏ដូចជា គណៈកម្មាធិការអូឡាំពិកអន្តរជាតិ ឲ្យយល់ព្រមលើកពេលនៃការប្រកួត។ ជាក់ស្តែង ខុសពីមន្ត្រីជប៉ុន ដែលកាលពីប៉ុន្មានសប្តាហ៍មុន បាននិយាយថា ការប្រកួតកីឡាអូឡាំពិក នៅតែប្រព្រឹត្តធ្វើដូចការគ្រោងទុក លោកនាយករដ្ឋមន្ត្រីជប៉ុនស្ហីនហ្សូ អាបេ ថា ការលើកពេល ប្រហែលជារឿងដែលជៀសមិនបាននោះទេ។
ថ្លែងនៅក្នុងរដ្ឋសភា នៅថ្ងៃចន្ទ ទី២៣ មីនានេះ លោកអាបេ បានមានប្រសាសន៍ ជាលើកដំបូងថា ការពន្យារពេល អាចនឹងកើតឡើង ប្រសិនបើម្យ៉ាង ការប្រកួត មិនអាចប្រព្រឹត្តទៅ តាមបទដ្ឋានពេញលេញត្រឹមត្រូវ ព្រោះតែការឆ្លងរាតត្បាតនៃជំងឺកូវីដ១៩។ ម្យ៉ាងវិញទៀត ដោយសារតែ គេត្រូវគិតដល់សុវត្ថិភាពរបស់កីឡាករជាចំបង។
តែទោះជាបែបនេះក្តី លោកនាយករដ្ឋមន្ត្រីជប៉ុន អាបេ បានទទូចដែរថា ព្រឹត្តិការណ៍ប្រកួតកីឡាអូឡាំពិក អាចនឹងត្រូវលើកពេលបាន ក៏ប៉ុន្តែ គេមិនត្រូវលុបចោលកម្មវិធីប្រកួតទាំងស្រុងជាដាច់ខាត។
ពាក់ព័ន្ធរឿងនេះ គណៈកម្មាធិការអូឡាំពិកអន្តរជាតិ (IOC) បានលើកឡើងថា ការពន្យារពេលនៃការប្រកួត ពិតណាស់ គឺជាសេណារីយ៉ូមួយ ដែលអាចកើតឡើងពិតប្រាកដមែន ដោយហេតុថា ជីវិតមនុស្សសំខាន់ជាងអ្វីៗទាំងអស់។ ដោយឡែក IOC បានទទូចថាដែរ ការលុបចោលកម្មវិធីទាំងសុ្រងតែម្តង នឹងមិនអាចដោះស្រាយបញ្ហាណាមួយ ឬក៏ជួយអ្នកណាម្នាក់បាននោះទេ។
គួររំឭកជូនថា តាមការគ្រោងទុក ការប្រកួតកីឡាអូឡាំពិកនៅតូក្យូ នឹងផ្តើមប្រារព្ធនៅថ្ងៃទី ២៤ ខែកក្កដា ឆ្នាំ ២០២០ ខាងមុខ។ មន្ត្រីជប៉ុន នឹងជួបពិភាក្សាជាមួយ គណៈកម្មាធិការអូឡាំពិកអន្តរជាតិ ជុំវិញជោគវាសនានៃការប្រកួតនេះ ហើយគេរំពឹងថា IOC នឹងសម្រេចជាផ្លូវការ អំពីថាតើគួរ ឬមិនគួរ ពន្យារពេលនៃការប្រកួតកីឡាអូឡាំពិក ក្នុងរយៈពេល ៤ សប្តាហ៍ខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ