ជប៉ុនពិចារណាដាក់ក្រុងតូក្យូក្នុងស្ថានភាពអាសន្នក្រោយករណីឆ្លងកូវីដហក់ឡើងខ្លាំង
អភិបាលក្រុងតូក្យូ បានស្នើនៅថ្ងៃសៅរ៍ ទី២ មករាឲ្យរដ្ឋាភិបាលប្រកាសដាក់ទីក្រុងដែលជាបេះដូងនៃប្រទេសមួយនេះក្នុងស្ថានភាពអាសន្នជាថ្មីដោយសារករណីឆ្លងកូវីដហក់ឡើងមកវិញខ្លាំង។ រដ្ឋាភិបាលជប៉ុនរបស់លោក យ៉ូស្ហ៊ីហ៊ីដេ ស៊ូហ្កា កំពុងពិចារណាអំពីសំណើខាងលើ និងគ្រោងផ្តល់ចម្លើយតបវិញក្នុងពេលឆាប់ៗនេះ។
ចុះផ្សាយនៅថ្ងៃ៖
ស្តាប់ - ០២:២១
ចៅហ្វាយក្រុងតូក្យូលោកស្រី យូរីកុ កយកេ (Yuriko Koike) និងអាជ្ញាធរគ្រប់គ្រងតំបន់ក្បែរនោះចំនួន ៣ ផ្សេងទៀត បានអំពាវនាវឲ្យដាក់ទីក្រុងរបស់ពួកគេក្នុងស្ថានភាពអាសន្នក្នុងអំឡុងពេលជួបប្រជុំជាមួយលោក យ៉ាស៊ុតុស្ហី នីស្ហីម៊ុរ៉ា (Yasutoshi Nishimura) ដែលជារដ្ឋមន្ត្រីទទួលបន្ទុកដោះស្រាយវិបត្តិកូវីដ១៩។
លោកស្រីចៅហ្វាយក្រុងតូក្យូបានមានប្រសាសន៍ប្រាប់ក្រុមអ្នកយកព័ត៌មានថា នៅប៉ុន្មានសប្តាហ៍ថ្មីៗនេះ មន្ដ្រីរដ្ឋាភិបាលជប៉ុនជាច្រើនរូបបានស្នើឲ្យបិទភោជនីយដ្ឋាន និងអាជីវកម្មផ្សេងៗទៀត ហើយជំរុញឲ្យប្រជាពលរដ្ឋស្នាក់នៅតែក្នុងផ្ទះ។ វិធានការខាងលើមានឥទ្ធិពលខ្លះក្នុងការទប់ស្កាត់កុំឲ្យការឆ្លងរាលដាលកូវីដមានសន្ទុះលឿនរហួសខ្លាំងពេក។
“ប៉ុន្តែ ដោយពិចារណាលើចំនួនករណីឆ្លង និងស្ថានភាពនៃប្រព័ន្ធវេជ្ជសាស្ត្រនៅតូក្យូ និងតំបន់ជិតខាងនោះទាំងបី យើងបានសម្រេចថាវាពិតជាចាំបាច់ក្នុងការទប់ស្កាត់ការផ្លាស់ទីរបស់ប្រជាជនឲ្យបានឆាប់រហ័សនិងប្រកបដោយភាពតឹងរ៉ឹង”។ លោកស្រី កយកេ បានបន្ថែម។
រដ្ឋមន្ត្រីទទួលបន្ទុកដោះស្រាយវិបត្តិកូវីដរបស់ជប៉ុន លោកនីស្ហីម៊ុរ៉ា បានប្រាប់ថារដ្ឋាភិបាលកណ្តាលជប៉ុនបានពិនិត្យ និងចាត់ទុកករណីឆ្លងកូវីដនាពេលបច្ចុប្បន្នថាមានលក្ខណៈធ្ងន់ធ្ងរ និងគ្រោងពិភាក្សាលើសំណើប្រកាសដាក់ក្រុងតូក្យូ និងតំបន់ក្បែរនោះក្នុងស្ថានភាពអាសន្នឆាប់ៗនេះ។
លោកបានមានប្រសាសន៍ទៀតថា លោកបានបើកភ្លើងខៀវរួចរាល់ហើយដល់អភិបាលក្រុងតូក្យូ និងអាជ្ញាតំបន់ក្បែរនោះឲ្យស្នើសុំដល់អាជីវកម្មនានាឲ្យឆាប់បិទទ្វារលឿនជាមុន និងអំពាវនាវដល់ប្រជាជនឲ្យចៀសវាងចេញក្រៅបើគ្មានការចាំបាច់បន្ទាប់ពីម៉ោង ៨ យប់តទៅ។
គួរជ្រាបថា កាលពីថ្ងៃព្រហស្បតិ៍ ទីក្រុងតូក្យូបានរាយការណ៍ពីអត្រាឆ្លងកូវីដថ្មី ១ ៣ ០០ ករណី ដែលមានចំនួនខ្ពស់ជាងកំណត់ត្រាចាស់កាលពីចុងខែធ្នូដែលមាន ៩៤៩ ករណីទៅទៀត។ ចំណែក ករណីឆ្លងកូវីដនៅទូទាំងប្រទេសជប៉ុនវិញ ក៏បានឈានដល់ការបំបែកកំណត់ត្រាថ្មីផងដែរ។ គិតត្រឹមល្ងាចសៅរ៍ថ្ងៃទី២ មករា ឆ្នាំ ២០២១ នេះ ចំនួនអ្នកឆ្លងកូវីដសរុបនៅជប៉ុនមានចំនួនច្រើនជាង ២៣ ម៉ឺន ៤ ពាន់នាក់ និងមានអ្នកស្លាប់ ៣ ៤៦០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ