សេដ្ឋកិច្ចជប៉ុន ចាប់ផ្តើមស្ទុះឡើងវិញ នៅពាក់កណ្តាលឆ្នាំ២០២០
សេដ្ឋកិច្ចជប៉ុន បានផ្តើមស្ទុះឡើងវិញ ចាប់ពីពាក់កណ្តាលឆ្នាំ២០២០នេះ បន្ទាប់ពីបានដើរថយក្រោយ អស់ប្រមាណជា៣ត្រីមាសជាប់គ្នា។ នៅរវាងខែ កក្កដា ដល់ខែកញ្ញា ឆ្នាំ២០២០នេះ ចំណូលដុលក្នុងស្រុករបស់ជប៉ុន បានស្ទុះកើនឡើង ប្រមាណ៥% ដែលនេះគឺដោយសារតែការនាំចេញ បានកើនឡើងវិញ។ តែយ៉ាងណានៅតែមានការបារម្ភថា ត្រីមាសទី៤ចុងឆ្នាំ២០២០ វិបត្តិនៅតែបន្តមានដោយសារតែរលកឆ្លងរាលដាលកូវីដ១៩។
ចុះផ្សាយនៅថ្ងៃ៖
ស្តាប់ - ០២:៥៩
ក្នុងត្រីមាសទី៣ឆ្នាំ២០២០ សេដ្ឋកិច្ចជប៉ុនបានស្ទុះមានកំណើនឡើងវិញយ៉ាងប្រសើរ ដោយចំណូលដុលក្នុងស្រុកសរុប ចន្លោះពីខែកក្កដា ដល់ខែកញ្ញា បានកើនឡើងចំនួន៥%។ នេះគឺជាសញ្ញាវិជ្ជមាន ខណៈដែលកន្លងមក ៣ត្រីមាសជាប់គ្នា សេដ្ឋកិច្ចជប៉ុនបានដើរថយក្រោយ។ ការដើរថយក្រោយនេះ បានចាប់ផ្តើមតាំងតែពីត្រីមាសទី៤ចុងឆ្នាំ២០១៩ ពោលគឺមុនមានវិបត្តិជម្ងឺកូវីដ១៩ទៅទៀត។ នេះក៏ដោយសារតែ ការដំឡើងពន្ធលើតំលៃបន្ថែម (TVA) ពីសំណាក់រដ្ឋាភិបាលជប៉ុន។
ដោយសារតែវិបត្តិកូវីដ១៩ នៅត្រីមាសទី២ឆ្នាំ២០២០ សេដ្ឋកិច្ចជប៉ុនបានដាំក្បាលចុះ ចំនួនប្រមាណ៨,២%។ ប៉ុន្តែសម្រាប់ត្រីមាសទី៣ សេដ្ឋកិច្ចជប៉ុនបានស្ទុះឡើង ខ្ទង់៤,៤% នេះបើផ្អែកតាមអ្នកជំនាញរបស់ទីភ្នាក់ងារ Bloomberg។ យោងតាមតួលេខក្រសួងឧស្សាហកម្មជប៉ុន ផលិតកម្មឧស្សាហកម្មរបស់ជប៉ុន បានកើនឡើងចំនួន៣,៩% រវាងពីខែមិថុនា ដល់ខែកញ្ញា។
យោងតាមអ្នកជំនាញ ការស្ទុះឡើងវិញនៃសេដ្ឋកិច្ចជប៉ុន នៅត្រីមាសទី៣នេះ គឺដោយសារតែការប្រើប្រាស់ក្នុងស្រុកបានស្ទុះកើនឡើងវិញ ចំនួន ៤,៧% នៅក្រោយពេលជប៉ុន បានដកចេញនូវវិធានការបិទខ្ទប់ ដើម្បីបង្ការការឆ្លងរាលដាលកូវីដ១៩។ ស្របពេលនោះដែរ ប្រទេសជាច្រើនក៏បានបើកទ្វារសេដ្ឋកិច្ចឡើងវិញដែរ ដែលធ្វើឲ្យការនាំចេញរបស់ជប៉ុន បានកើនឡើងប្រមាណ៧%។
តែយ៉ាងណា ការវិនិយោគក្នុងស្រុក នៅតែស្ថិតក្នុងកម្រិតអវិជ្ជមានដដែលទេ។ យោងតាមតួលេខរបស់ធនាគារជាតិជប៉ុន ថ្វីបើសហគ្រាសជប៉ុន មានសុទិដ្ឋិនិយមពិតមែន តែក្នុងវិស័យខ្លះ ដូចជាសណ្ឋាគារ ភោជនីយដ្ឋាន និងវិស័យយានយន្តជាដើម គឺនៅតែមានការលំបាក។ លោក Naoya Oshikubo អ្នកវិភាគសេដ្ឋកិច្ចជប៉ុន បានអះអាងថា សេដ្ឋកិច្ចជប៉ុន អាចនឹងជួបឧបសគ្គសាជាថ្មី នៅត្រីមាសទី៤ចុងឆ្នាំ២០២០នេះ ដោយសាររលកឆ្លងរាលដាលកូវីដ១៩ កំពុងតែមានខ្លាំងនៅឯបរទេស។ យោងតាមការព្យាករណ៍ របស់មូលនិធិរូបិយវត្ថុអន្តរជាតិ ជារួមសេដ្ឋកិច្ចជប៉ុននឹងធ្លាក់ចុះ ចំនួន ៥,៣% ក្នុងឆ្នាំ២០២០ មុននឹងមានកំណើនវិជ្ជមានវិញ ប្រមាណ ២,៣% នៅឆ្នាំ២០២១។
ដើម្បីផ្តល់សន្ទុះដល់សេដ្ឋកិច្ច រដ្ឋាភិបាលលោក យូស្ហ៊ីហ៊ីដេ ស៊ូហ្កា បានសម្រេចផ្តល់ប្រាក់ ចំនួន១សែនយ៉េន (៨០០អឺរ៉ូ) ដល់ប្រជាជនម្នាក់ៗ ព្រមទាំងបានបង្កើតកញ្ចប់ថវិកា ជួយសហគ្រាសបង់ការចំណាយលើប្រាក់ខែ ពាក់កណ្តាលដល់បុគ្គលិក។ កាលពីសប្តាហ៍មុន នាយករដ្ឋមន្ត្រីជប៉ុន បានបើកការប្រជុំ ដើម្បីរិះរកវិធានការថ្មីបន្ថែមទៀត ដើម្បីជួយសេដ្ឋកិច្ច ជាពិសេសក្នុងវិស័យទេសចរណ៍ បដិសណ្ឋារកិច្ច ដែលកំពុងប្រឈមនឹងការខាតបង់ខ្លាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ