វិបត្តិកូវីដ១៩ បានធ្វើឲ្យសេដ្ឋកិច្ចជប៉ុនដាំក្បាលចុះចំនួន ៤,៨% ក្នុងឆ្នាំ ២០២០
នៅក្នុងប្រទេសជប៉ុន ផលិតផលសរុបក្នុងស្រុកនាឆ្នាំ ២០២០ កន្លងទៅបានធ្លាក់ចុះចំនួន ៤,៨%។ គឺជាការដាំក្បាលចុះប្រចាំឆ្នាំលើកទី១ ដែលប្រទេសមហាអំណាចសេដ្ឋកិច្ចទី៣ ក្នុងលោកមួយនេះមិនធ្លាប់ជួបតាំងពីឆ្នាំ ២០០៩។ ក៏ដូចជានៅក្នុងប្រទេសជាច្រើនក្នុងលោកដែរ វិបត្តិកូវីដ១៩ ជាអ្នកទទួលខុសត្រូវនៃការធ្លាក់ចុះសេដ្ឋកិច្ចជប៉ុនយ៉ាងគំហុកក្នុងឆ្នាំ ២០២០។ សម្រាប់ឆ្នាំ ២០២១ នេះ រដ្ឋាភិបាលសង្ឃឹមទទួលបានកំណើនសេដ្ឋកិច្ចវិជ្ជមាន ទោះបីជាប្រទេសកំពុងស្ថិតក្នុងស្ថានភាពអាសន្នកូវីដ១៩ រហូតដល់ថ្ងៃទី៧ មីនាខាងមុខក៏ដោយ។
ចុះផ្សាយនៅថ្ងៃ៖
ស្តាប់ - ០២:២៧
នៅដើមឆ្នាំ ២០២០ ពិសេសពីខែមេសាដល់ដំណាច់ខែមិថុនា ជប៉ុនបានស្គាល់កំណើនសេដ្ឋកិច្ចអវិជ្ជមានដល់ទៅ ៨,៣% ក្រោមសូន្យ។ គឺជារយៈពេលដែលប្រទេសកំពុងស្ថិតក្នុងស្ថានភាពអាសន្នកូវីដ១៩។ តែចាប់ពីពាក់កណ្តាលឆ្នាំ ២០២០ ជប៉ុនចាប់ផ្តើមទទួលបានកំណើនសេដ្ឋកិច្ចវិជ្ជមានបន្តិចឡើងវិញ។ នេះដោយសារមានកត្តាសំខាន់ចំនួន ៣ ទី១ វិស័យនាំចេញបានកើនឡើង ទី២ ការចំណាយរបស់ប្រជាជនក៏មានការកើនឡើង និងទី៣ ការវិនិយោគក្រៅពីលំនៅដ្ឋានក៏មានការកើនឡើងដែរ។ ទោះជាយ៉ាងនេះក្តី និងបើគិតពេញមួយឆ្នាំ ២០២០ ផលិតផលសរុបក្នុងស្រុករបស់ប្រទេសមហាអំណាចសេដ្ឋកិច្ចទី៣ ក្នុងលោកមួយនេះបានធ្លាក់ចុះដល់ទៅ ៤,៨%។
សម្រាប់ឆ្នាំ ២០២១ ត្រូវបានអង្គការមូលនិធិរូបិយវត្ថុអន្តរជាតិព្យាករណ៍ថា ផលិតផលសរុបក្នុងស្រុករបស់ជប៉ុនមាន ៣,១%។ តែបើតាមការព្យាករណ៍របស់ធនាគារកណ្តាលជប៉ុន គឺអាចមាន ៣,៩%។ ក្រុមអ្នកសេដ្ឋវិទូក៏បានសម្លឹងឃើញពីកំណើនសេដ្ឋកិច្ចវិជ្ជមានរបស់ជប៉ុនក្នុងឆ្នាំ ២០២១ ដែរ។ តែបានប្រមើលមើលពីការធ្លាក់ចុះផលិតផលសរុបនៅត្រីមាសទី១ ដើមឆ្នាំ ២០២១ នេះដោយសារតែវិធានការដាក់ប្រទេសក្នុងស្ថានភាពអាសន្នកូវីដ១៩ របស់រដ្ឋាភិបាលតាំងពីដើមខែមករារហូតដល់ថ្ងៃទី៧ មីនាខាងមុខ។ ក្តីសង្ឃឹមទទួលបានកំណើនសេដ្ឋកិច្ចវិជ្ជមានក្នុងឆ្នាំ ២០២១ អាស្រ័យទាំងស្រុងលើស្ថានភាពកូវីដ១៩។
បើស្ថានភាពជំងឺឆ្លងមួយនេះមានភាពប្រសើរឡើង វិស័យជាច្រើននឹងផ្តើមមានដំណើរការជាថ្មី ហើយការចំណាយរបស់ប្រជាជនក៏នឹងចាប់ផ្តើមមានសន្ទុះឡើងវិញចាប់ពីខែមេសាខាងមុខ។ ទន្ទឹមគ្នានេះ ផែនការផ្តល់សន្ទុះមានទឹកប្រាក់ច្រើនពាន់លានដុល្លាររបស់រដ្ឋាភិបាលដែលបានអនុម័តកាលពីខែធ្នូ ឆ្នាំ ២០២០ ក៏ជាកត្តាដើម្បីជួយស្រោចស្រង់សេដ្ឋកិច្ចដែរ។ តែអ្វីដែលនៅជាក្តីបារម្ភរបស់ក្រុមអ្នកសេដ្ឋវិទូ គឺយុទ្ធនាការ និងភាពយឺតយ៉ាវក្នុងការចាក់វ៉ាក់សាំងបង្ការកូវីដ១៩ នៅជប៉ុន។ គឺទើបតែនៅថ្ងៃអាទិត្យ ទី១៤ កុម្ភៈដែលជប៉ុនបានអនុញ្ញាតឲ្យប្រើវ៉ាក់សាំងផលិតដោយមន្ទីរពិសោសធន៍ Pfizer-BioNTech៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ