ជប៉ុន បញ្ចេញថវិការាប់ពាន់លានដុល្លារដើម្បីសង្គ្រោះសេដ្ឋកិច្ចពីវិបត្តិកូវីដ១៩
សភាជប៉ុន នៅថ្ងៃព្រហស្បតិ៍ ទី៣០ មេសា បានសម្រេចអនុម័តលើបញ្ចប់ថវិកាពិសេស ដែលមានតម្លៃប្រមាណជា ២៤០ ពាន់លានដុល្លារ ដើម្បីទប់ទល់នឹងការបំផ្លិចបំផ្លាញសេដ្ឋកិច្ចបង្កឡើងដោយជំងឺរាតត្បាតកូវីដ១៩។ ទន្ទឹមគ្នានេះ រដ្ឋាភិបាលជប៉ុន ក៏បានបង្ហើបផងដែរពីគម្រោង ពន្យារការដាក់ប្រទេសក្នុងភាពអាសន្នក្រោយថ្ងៃទី៦ ឧសភា។
ចុះផ្សាយនៅថ្ងៃ៖
ស្តាប់ - ០២:២៥
កញ្ចប់ថវិកាគ្រាអាសន្នចំនួន ២៤០ ពាន់លានដុល្លារនេះ មានរួមបញ្ចូលនូវវិធានការជាច្រើន ដែលត្រូវបានត្រៀមបម្រុងទុក ដើម្បីជួយទ្រទ្រង់ដល់សេដ្ឋកិច្ចជប៉ុន ដែលមានដំណើររប៉ាក់រពើកស្រាប់ទៅហើយ តាំងតែពីមុនមានការផ្ទុះឡើងនៃមេរោគកូរ៉ូណាថ្មីទៅទៀត។
វិធានការសង្គ្រោះទាំងនោះ មានជាអាទិ៍ ថវិកាទុកជួយបង្កើនការផលិតម៉ាស់សម្រាប់បុគ្គលិកពេទ្យ ការធ្វើឲ្យប្រសើរឡើងនូវសមត្ថភាពធ្វើតេស្តរកកូវីដ១៩ និងការគាំទ្រដល់ការបង្កើនល្បឿនក្នុងការស្រាវជ្រាវបង្កើតវ៉ាក់សាំង និងការផលិតថ្នាំប្រឆាំងនឹងកូវី១៩។
ចំណែកពាក់កណ្តាលនៃថវិកាសរុប គេគ្រោងនឹងទុកសម្រាប់ប្រគល់ឲ្យពលរដ្ឋជប៉ុន។ បើតាមផែនការ រដ្ឋជប៉ុន នឹងប្រគល់សាច់ប្រាក់ចំនួន ១០ម៉ឺនយេន ឬស្មើនឹង ៩៣០ ដុល្លារទៅឲ្យយុវវជន និងកុមារៗជប៉ុនគ្រប់ៗរូប។
គួរជ្រាបថា កញ្ចប់ថវិកាពិសេសចំនួន ២៤០ ពាន់លានដុល្លារ គឺជាផ្នែកមួយនៃថវិកាជំនួយសរុបទាំងអស់ ១ ទ្រីលានដុលា្លរ ឬក៏ស្មើនឹង ១០០ ម៉ឺនលានដុល្លារ ដែលលោកនាយករដ្ឋមន្ត្រីស្ហីនហ្សូ អាបេ បានប្រកាសកាលពីដើមខែមេសា។
នៅគ្រាកន្លងមក លោកអាបេ ធ្លាប់បានសន្យាយ៉ាងម៉ឺងម៉ាត់ថា រដ្ឋាភិបាលរបស់លោកនឹងធ្វើអ្វីៗគ្រប់យ៉ាងទាំងអស់ដែលចាំបាច់ ដោយគ្មានស្ទាក់ស្ទើរឡើយ ក្នុងកិច្ចការដោះស្រាយផលប៉ះពាល់សេដ្ឋកិច្ចបង្កឡើងដោយកូវីដ១៩។
គួរគូសបញ្ជាក់ជូនថា ការរីករាលដាលនៃជំងឺកូវីដ១៩ ក្នុងប្រទេសជប៉ុន មិនធ្ងន់ធ្ងរខ្លាំងដូចនៅអឺរ៉ុប ឬសហរដ្ឋអាមេរិកនោះទេ។ គិតត្រឹមយប់ថ្ងៃទី៣០ មេសា ចំនួនអ្នកឆ្លងកូវីដ១៩ នៅជប៉ុនមានចំនួនប្រមាណ ១ម៉ឺន ៤ ពាន់នាក់ និងស្លាប់ប្រមាណ ៤២៥ នាក់។
ប៉ុន្តែ ការកើនឡើងនៃករណីឆ្លង បានជំរុញឲ្យលោកអាបេ ប្រកាសដាក់ប្រទេស ក្នុងគ្រាអាសន្នរយៈពេលមួយខែ ដែលមានសុពលភាពដល់ថ្ងៃទី ៦ ឧសនាខាងមុខ។ នៅពេលថ្មីៗនេះ ប្រមុខរដ្ឋាភិបាលជប៉ុន បានបង្ហើបផងដែរពីគម្រោងពន្យារការដាក់ប្រទេសក្នុងគ្រាអាសន្នក្រោយថ្ងៃទី ៦ ឧសភា ចំនួនមួយខែបន្ថែមទៀត។
ច្បាប់ដាក់ប្រទេសក្នុងភាពអាសន្ន ផ្តល់សិទ្ធិអំណាចដល់អាជ្ញាធរក្នុងតំបន់របស់ជប៉ុន ក្នុងការស្នើសុំឱ្យប្រជាពលរដ្ឋស្នាក់នៅតែក្នុងផ្ទះ និងអាចស្នើឲ្យអាជីវកម្មនានាបិទទ្វារបាន។ ប៉ុន្តែ រដ្ឋអំណាចជប៉ុន នឹងមិនដាក់ទោសទណ្ឌអ្វីនោះទេ ទៅលើអ្នកដែលមិនគោរពតាមការស្នើសុំរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ