ជប៉ុន៖ លោកយូស្ហ៊ីហ៊ីដេ ស៊ូហ្កា ត្រូវបានសភាបោះឆ្នោតតែងតាំងជានាយករដ្ឋមន្ត្រីជាផ្លូវការ
ចុះផ្សាយនៅថ្ងៃ៖
ស្តាប់ - ០៧:១៤
នៅថ្ងៃទី១៦កញ្ញានេះ សភាទាំង២របស់ជប៉ុន បានបោះឆ្នោតតែងតាំង លោកយូស្ហ៊ីហ៊ីដេ ស៊ូហ្កា ជានាយករដ្ឋមន្ត្រីថ្មី របស់ជប៉ុន ដើម្បីបន្តតំណែងនេះ បន្ទាប់ពីលោក ស៊ីនហ្សូ អាបេ បានសម្រេចចិត្តលាឈប់ ដោយសារលោក មានបញ្ហាសុខភាព។ មានសំណុំរឿង ជាច្រើន ដែលកំពុងរងចាំ លោកនាយករដ្ឋមន្ត្រីថ្មី ហើយដែលបន្ទាន់បំផុតនោះ គឺការគ្រប់គ្រងការឆ្លងរាលដាលជំងឺកូវីដ១៩ ព្រមទាំងការដោះស្រាយវិបត្តិសេដ្ឋកិច្ចជប៉ុន ដែលកំពុងធ្លាក់ចុះខ្លាំង។ តើលោក យូស្ហ៊ីហ៊ីដេ ស៊ូហ្កា នឹងមានគោលនយោបាយថ្មី ដើម្បីដឹកនាំជប៉ុន ឬមួយលោក គ្រាន់តែមកបន្ត អនុវត្តគោលនយោបាយដែលលោក ស៊ីនហ្សូ អាបេ បានដាក់ចុះ រួមហើយនោះ?
វាជារឿងដែលគេបានរំពឹងទុករួចមកហើយ ថាលោក យូស្ហ៊ីហ៊ីដេ ស៊ូហ្កា វ័យ៧១ឆ្នាំ នឹងក្លាយជានាយករដ្ឋមន្ត្រីថ្មីរបស់ជប៉ុន។ ការបោះឆ្នោតក្នុងសភាទាំង២របស់ជប៉ុន នៅថ្ងៃទី១៦កញ្ញានេះ គឺគេត្រូវការ តែសម្លេងភាគច្រើនសាមញ្ញ ពោលគឺ ៥០បូក១ តែប៉ុណ្ណោះ។
ដូចយើងដឹងហើយ ថាលោក យូស្ហ៊ីហ៊ីដេ ស៊ូហ្កា ត្រូវបានគណបក្សសេរីប្រជាធិបតេយ្យ តែងតាំងឲ្យធ្វើជាបេក្ខជននាយករដ្ឋមន្ត្រី បន្តពីលោកស៊ីនហ្សូ អាបេ ដែលលាឈប់ព្រោះមានជំងឺ។ ហើយគណបក្សនេះ មានសម្លេងភាគច្រើនលើសលប់ក្នុងសភាជាន់ទាប ដោយសហការជាមួយគណបក្សមួយទៀត ឈ្មោះកូម៉េអ៊ីតូ។ ដូច្នេះ សម្លេង៥០បូកមួយ ដើម្បីតែងតាំងលោក យូស្ហ៊ីហ៊ីដេ ស៊ូហ្កា គឺមិនពិបាករកទេ។ ជាងនេះទៀត គឺលទ្ធផលឆ្នោតនៅសភាជាន់ទាប ដែលជាអ្នកកំណត់សន្មត់ចុងក្រោយ ក្នុងករណីដែលសភាជាន់ខ្ពស់បដិសេធ។
លទ្ធផលឆ្នោត បង្ហាញថា លោក យូស្ហ៊ីហ៊ីដេ ស៊ូហ្កា បានទទួលការគាំទ្រ ឲ្យធ្វើជានាយករដ្ឋមន្ត្រីជប៉ុន នៅសភាជាន់ទាប គឺមានសម្លេងឆ្នោត ៣១៤សម្លេង ក្នុងចំណោម៤៦២ ដែលមានន័យថាលោកបានការគាំទ្រ ដល់ទៅ ៦៨%។ ចំណែកនៅសភាជាន់ខ្ពស់វិញ គឺលោកបានសម្លេងឆ្នោតគាំទ្រ ចំនួន៥៩%។
សមាសភាពរដ្ឋាភិបាលថ្មី មិនប្រែប្រួលច្រើន
បើនិយាយពីសមាសភាពរដ្ឋាភិបាលថ្មី គឺមិនមានអ្វីប្រែប្រួលច្រើនទេ។ ប៉ុន្មានម៉ោង ក្រោយសភាជប៉ុន បោះឆ្នោតចប់សព្វគ្រប់ លោក កាតស៊ូណូប៊ុ កាតូ ដែលពីមុនជារដ្ឋមន្ត្រីក្រសួងសុខាភិបាល ហើយឥឡូវបានក្លាយជាអគ្គលេខាធិការ និងជាអ្នកនាំពាក្យរដ្ឋាភិបាលថ្មីនោះ បានប្រកាសអំពីសមាសភាពរដ្ឋាភិបាលថ្មី។ ក្នុងនោះក្រសួងធំៗ គឺរដ្ឋមន្ត្រីដដែលទេ ដូចជាក្រសួងការបរទេស គឺលោក Toshimitsu Motegi លោក Taro Aso នៅក្រសួងសេដ្ឋកិច្ចនិងហិរញ្ញវត្ថុ លោក Shinjiro Koizumi អាយុ៣៩ឆ្នាំរដ្ឋមន្ត្រីក្មេងជាងគេ នៅក្រសួងបរិស្ថាន។
ដោយឡែក ក្រសួងការពារជាតិ នឹងមានរដ្ឋមន្ត្រីថ្មី ឈ្មោះ Nobuo Kishi ដែលតាមពិត គឺជាប្អូនបង្កើត របស់លោក ស៊ីនហ្សូ អាបេ តែលោកបានយកត្រកូលខាងជីតាខាងម្តាយ ដែលធ្លាប់ធ្វើជានាយករដ្ឋមន្ត្រីជប៉ុនដែរ កាលពីជំនាន់ឆ្នាំ១៩៥០។ ចំណែក Taro Kono រដ្ឋមន្ត្រីក្រសួងការពារជាតិ រដ្ឋាភិបាលចាស់ នឹងមកកាន់ក្រសួងធ្វើកំណែទម្រង់រដ្ឋបាលសាធារណៈ។
ដូច្នេះជារួម គឺរដ្ឋាភិបាលថ្មីនេះ មិនខុសពីរដ្ឋាភិបាលមុននោះទេ។ អ្នកវិភាគនយោបាយជប៉ុនខ្លះ លើកឡើងថា គឺជារដ្ឋាភិបាលដដែល ពោលគឺសុទ្ធតែជាមនុស្ស មានទំនោរអភិរក្សនិយម ដែលមកដឹកនាំក្រសួងសំខាន់ៗ ដោយគ្រាន់តែប្តូរនាយករដ្ឋមន្ត្រី ពីលោកស៊ិនហ្សូ អាបេ មកជាលោក យូស្ហ៊ីហ៊ីដេ ស៊ូហ្កា តែប៉ុណ្ណោះ។
មកបន្តការងារដដែល ឬ មានគោលនយោបាយថ្មី?
បើពិនិត្យមើលលើកត្តាជាច្រើន គឺយើងអាចសន្និដ្ឋានបានថា លោកយូស្ហ៊ីហ៊ីដេ ស៊ូហ្កា ត្រូវគេតែងតាំងឲ្យមកបន្តការងារ របស់ស៊ីនហ្សូ អាបេ។ តែយ៉ាងណា ជាមនុស្ស២នាក់ផ្សេងគ្នា ដូច្នេះ គឺវាមិនដូចគ្នាទាំងស្រុងទេ។ កន្លងមកលោក យូស្ហ៊ីហ៊ីដេ ស៊ូហ្កា ជាមនុស្សដែលមិនសូវចេញមុខទេ ដោយស្ថិតនៅពីក្រោយខ្នងលោកស៊ីនហ្សូ អាបេជានិច្ច។ តែចាប់ពីពេលនេះទៅ គឺមិនដូចគ្នាទេ។ លោកយូស្ហ៊ីហ៊ីដេ ស៊ូហ្កា ក្លាយជាអ្នកកាច់ចង្កូតប្រទេស ដោយផ្ទាល់ម្តង។
មានសំណុំរឿងសំខាន់ៗ និងបន្ទាន់ជាច្រើន ដែលកំពុងរងចាំ លោកនាយករដ្ឋមន្ត្រីថ្មី។ ក្នុងនោះ គឺបញ្ហាជំងឺឆ្លងកូវីដ១៩ បញ្ហាវិបត្តិសេដ្ឋកិច្ច ដែលជប៉ុនកំពុងតែដើរថយក្រោយ ព្រមទាំងសំណុំរឿង ការរៀបចំកីឡាអូឡាំពិកនៅឆ្នាំ២០២១ជាដើម។ ក្រៅពីនេះ បញ្ហាវិបត្តិការទូត ភូមិសាស្ត្រនយោបាយ ក៏ជប៉ុនកំពុងស្ថិតនៅក្នុងការលំបាកដែរ ដោយសារតែ ចិន និង អាមេរិក កំពុងសង្រ្គឺតធ្មេញដាក់គ្នា។ ជប៉ុនកំពុងរងចាំមើល តាមដានយ៉ាងយកចិត្តទុកដាក់ ថាតើនរណា នឹងឈ្នះការបោះឆ្នោតប្រធានធិបតីអាមេរិក នៅខែវិច្ឆិកាខាងមុខ ព្រោះថារដ្ឋាភិបាលអាមេរិកថ្មី អាចនឹងធ្វើឲ្យប្រែប្រួល ដល់បរិបទភូមិសាស្ត្រនយោបាយអាស៊ីប៉ាស៊ីហ្វិក។
បើនិយាយពីវិស័យសេដ្ឋកិច្ច អ្នកវិភាគនៅជប៉ុន រំពឹងថា លោក យូស្ហ៊ីហ៊ីដេ ស៊ូហ្កា នឹងប្រហែលជាអនុវត្តបន្ត គោលនយោបាយរបស់លោកស៊ីនហ្សូ អាបេ ដែលគេហៅថា អាបេអេកូណូមិក។ គោលនយោបាយនេះ គឺមានលក្ខណៈទ្រង់ទ្រាយ ជាគោលនយោបាយរូបិយវត្ថុងាយស្រួល ដែលមានន័យថា ធនាគារកណ្តាលចាក់បញ្ចូលសាច់ប្រាក់ ក្នុងសេដ្ឋកិច្ចចំនួនច្រើន ហើយទន្ទឹមនឹងនេះ គឺរក្សាអត្រាការប្រាក់កណ្តាល ឲ្យនៅទាបបំផុត។ ជាមួយនឹងវិបត្តិសេដ្ឋកិច្ចបច្ចុប្បន្ននេះ គេក៏រំពឹងថារដ្ឋាភិបាលជប៉ុនថ្មី នឹងបន្តបើកកញ្ចប់ប្រាក់ ដើម្បីជួយក្នុងគម្រោងចំណាយ និងការវិនិយោគរបស់សហគ្រាសជប៉ុន។
តែយ៉ាងណា មានចំណុចធំៗ យ៉ាងហោចក៏២ដែរ ដែលលោកយូស្ហ៊ីហ៊ីដេ ស៊ូហ្កា បានផ្តល់សារៈសំខាន់ ហើយចង់ធ្វើវាឲ្យបានជោគជ័យ ក្នុងរយៈពេល១ឆ្នាំ នៃការកាន់អំណាចនេះ។ នោះគឺការធ្វើកំណែទម្រង់ រដ្ឋបាលសាធារណៈរបស់ជប៉ុន ដែលលោកធ្លាប់បានលើកឡើងថា វាចាស់គំរិល ដើរមិនទាន់សភាពការណ៍។ ចំណុចមួយទៀត គឺការធ្វើកំណែទម្រង់ បើកចំហរទីផ្សារការងារនៅជប៉ុន ដើម្បីធ្វើយ៉ាងណា ទទួលពលករ ឬនយោជិតមកពីបរទេស ឲ្យបានច្រើន ដោយសារតែជប៉ុនខ្វះកម្លាំងពលកម្ម។
បោះឆ្នោតសភាមុនចប់អាណត្តិ?
យ៉ាងណាក៏ដោយ លោកយូស្ហ៊ីហ៊ីដេ ស៊ូហ្កា អាចកាន់មុខតំណែងនេះ ជំនួសលោកអាបេ បានតែមួយឆ្នាំទេ ដោយនៅឆ្នាំខែតុលា ២០២១ នឹងមានការបោះឆ្នោតសភាអាណត្តិថ្មី។ មានពាក្យចចាមអារ៉ាម ថាមនុស្សធំៗ ក្នុងជួរគណបក្សសេរីប្រជាធិបតេយ្យ ចង់ឲ្យរៀបចំការបោះឆ្នោតសភាមុនអាណត្តិ ដើម្បីពង្រឹងភាពស្របច្បាប់ ឲ្យលោកយូស្ហ៊ីហ៊ីដេ ស៊ូហ្កា អាចដឹកនាំប្រទេសដោយពេញលេញ មិនមែនតែ១ឆ្នាំ ក្នុងនាមជាជនជំនួសលោក ស៊ីនហ្សូ អាបេ។
ឆ្លើយតបនឹងដំណឹងនេះ លោកយូស្ហ៊ីហ៊ីដេ ស៊ូហ្កា បានបដិសេធថា លោកមិនចង់គិតគូររឿងបោះឆ្នោតមុនអាណត្តិអីទេ ព្រោះអាទិភាពការងាររដ្ឋាភិបាលថ្មីនាពេលនេះ គឺដោះស្រាយបញ្ហាបន្ទាន់ រឿងកូវីដ១៩ រឿងវិបត្តិសេដ្ឋកិច្ចជាដើម។ ហើយមួយវិញទៀតនោះ លោកលើកឡើងថា បើរៀបចំការបោះឆ្នោតឆាប់ៗនេះ ក៏ពិបាកដែរ ព្រោះដោយសារតែបញ្ហាឆ្លងរាលដាលជម្ងឺកូវីដ១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ