ពលរដ្ឋហុងកុងបាតុកម្មជុំវិញសភា មុនពេលពិភាក្សាច្បាប់ស្តីពីភ្លេងជាតិ
ចុះផ្សាយនៅថ្ងៃ៖
ស្តាប់ - ០៧:៥៤
ថ្ងៃទី២៧ ខែឧសភា ហុងកុងពង្រាយប៉ូលិសជុំវិញសភាដើម្បីទប់ទល់នឹងបាតុកម្ម មុនពេលសភាពិភាក្សាច្បាប់ស្តីពីភ្លេងជាតិចិន ដែលជាច្បាប់ដ៏ចម្រូងចម្រាសមួយទៀត បន្ថែមពីលើច្បាប់សន្តិសុខជាតិ។ ទាក់ទងនឹងច្បាប់សន្តិសុខជាតិហុងកុងនេះ ប្រធានាធិបតីសហរដ្ឋអាមេរិក លោក ដូណាល់ ត្រាំ បានព្រមានរដ្ឋបាលរបបក្រុងប៉េកាំងថា វាអាចនឹងធ្វើឱ្យហុងកុង បាត់បង់តំណែងជាមជ្ឈមណ្ឌលហិរញ្ញវត្ថុអន្តរជាតិ ហើយលោក ត្រាំ និយាយទៀតថា អាមេរិកនឹងចាត់វិធានការឆាប់ៗ ដើម្បីឆ្លើយតបនឹងច្បាប់សន្តិសុខជាតិហុងកុងនេះ។
ច្បាប់ថ្មី ស្តីពី ភ្លេងជាតិចិន បណ្តាលឱ្យមានការខឹងសម្បារបន្ថែមទៀត ពីសំណាក់ពលរដ្ឋហុងកុង។ ពួកគេប្រមូលនាំគ្នារាប់រយនាក់ ក្រោកឈរធ្វើបាតុកម្ម ស្រែកតវ៉ាទាមទារ ព័ទ្ធជុំវិញសភាតែម្តង។ ប៉ុន្តែដំណឹងចុងក្រោយ គឺ នគរបាលហុងកុង បានបាញ់ឧស្ម័នបង្ហូរទឹកភ្នែកបំបែងហ្វូងបាតុករ ហើយមនុស្ស ១៨០នាក់ត្រូវប៉ូលីសចាប់ខ្លួន ទៀតផង។ នេះបើតាមសារព័ត៌មានសិង្ហបុរី Channel NewsAsia។
តើពង្រាងច្បាប់ថ្មីស្តីពីភ្លេងជាតិ មានចែងពីអ្វីខ្លះ បានជាបង្កភាពចម្រូងចម្រាសយ៉ាងដូច្នេះ?
យោងតាមមតិរបស់ក្រុមបាតុករ ចំណុចសំខាន់ ដែលបង្កការមិនពេញចិត្តពីសំណាក់ពលរដ្ឋហុងកុង ព្រោះតែ ពង្រាងច្បាប់នេះ បានរំលោភបំពានសិទ្ធសេរីភាព និងផ្ទុយប្រាសចាកពី ធម្មនុញ្ញជាមូលដ្ឋានរបស់តំបន់ស្វ័យតហុងកុង និងបង្ខូចដល់គោលការណ៍ប្រទេសមួយប្រព័ន្ធពីរ។
សេចក្តីព្រាងច្បាប់ស្តីពីភ្លេងជាតិនេះ មានចែងពីការចែងដាក់ទោសឧក្រិដ្ឋចំពោះអ្នកដែលហ៊ានជេរប្រមាថ ឬមាក់ងាយចំពោះទង់ជាតិ និងចម្រៀងជាតិចិន, ត្រូវមានទោសព្រហ្មទណ្ឌចំពោះជនល្មើស ដែលអាចនឹងត្រូវផ្តន្ទាទោសឱ្យជាប់ពន្ធនាគាររហូតដល់៣ឆ្នាំ ហើយអាចនឹងត្រូវពិន័យជាប្រាក់ ប្រមាណ ៥ម៉ឺនដុល្លារហុងកុង គឺទំនងជាស្មើនឹង ៦ ៤៥០ ដុល្លារអាមេរិក។
មិនតែប៉ុណ្ណោះ សេចក្តីព្រាងច្បាប់ស្តីពីភ្លេងជាតិនេះ ក៏មានចែងពីកាតព្វកិច្ចត្រូវតែអនុវត្ត ចំពោះបុគ្គលឯកជននិងស្ថាប័ននានានៅហុងកុង ដែលត្រូវតែគោរព និងត្រូវសូត្រច្រៀងតាមផង នៅក្នុងកម្មវិធីសំខាន់ៗ និងពិធីផ្លូវការ ជាដើម។ លើសពីនេះទៅទៀត ពង្រាងច្បាប់ ក៏មានខចែងពីការអប់រំបង្រៀន ឱ្យច្រៀងចម្រៀងជាតិចិន សម្រាប់កុមារនៅបណ្តាបឋមសិក្សា និងមធ្យមសិក្សា ក្នុងមុខវិជ្ជាប្រវត្តិសាស្ត្រនិងសីលធម៌ ទៀតផង។ ចំណុចទាំងនេះហើយ វាបានបង្កជាក្តីព្រួយបារម្ភ និងការខឹងសម្បារខ្លាំង ហាក់ដូចជាយកប្រេងជះលើភ្លើង ខណៈដែលពលរដ្ឋហុងកុងកំពុងតែក្តៅជួលស្រាប់ផង ដ្បិតខឹងនឹងច្បាប់សន្តិសុខជាតិ អនុម័តដោយរដ្ឋអំណាចចិន។
ជាក់ស្តែងទៅ សេចក្តីព្រាងច្បាប់ ស្តីពី ភ្លេចជាតិ នេះ បានត្រូវរៀបចំជជែកពិភាក្សាម្តងរួចហើយ កាលពីសប្តាហ៍មុន ក្នុងពេលដំណាលគ្នានឹងសភាប្រជាជនចិនជជែកនិងអនុម័តពី ច្បាប់សន្តិសុខជាតិ ដែលគ្រោងត្រូវអនុវត្តនៅហុងកុង។ ថ្ងៃពុធ ទី២៧ឧសភា ជាការជជែកដេញដោលគ្នា ជាលើកទី២ ហើយបើតាមគម្រោង សភាហុងកុងនឹងជជែកគ្នាម្តងទៀត គម្រប់លើកទីបី មុននឹងសម្រេចប្រកាសឱ្យប្រើ នៅខែក្រោយ នារដូវក្តៅ។
ចំពោះអ្នកតំណាងរាស្ត្រដែលគាំទ្រខាងលិទ្ធិប្រជាធិបតេយ្យ និងចំពោះក្រុមបាតុករប្រឆាំងវិញ គឺពួកគេយល់ថា គ្មានចាំបាច់ត្រូវពិភាក្សាអ្វីទេ ព្រោះវាខុសច្បាប់ធម្មនុញ្ញស្រេចទៅហើយ។ ទន្ទឹមនឹងគ្នានេះ ចៅក្រមហុងកុង ដ៏ចាស់វស្សាមួយរូប បានប្រាប់កាសែត Reuters ក្នុងន័យចំអកផង ថា នេះជាលើកទី១ហើយ ដែលគាត់មើលឃើញថា ពង្រាងច្បាប់សម្រាប់ហុងកុង ហាក់មិនមែនសរសេរដោយអ្នកតំណាងរាស្ត្រហុងកុងទេ តែរៀបចំតាក់តែងដោយ រដ្ឋអំណាចក្រុងប៉េកាំង តែម្តង។ ចឹងច្បាប់នេះ អាក្រក់អាក្រីណាស់។ នេះបើតាមលោកចៅក្រមរូបនោះ ដែលសុំលាក់ឈ្មោះ។
ចំណែក ថ្នាក់ដឹកនាំអាជ្ញាធរហុងកុង ទាំងលោកស្រី ការី ឡាំ និងទាំងអនុប្រធានរបស់គាត់ សុទ្ធតែអះអាងថា សេចក្តីព្រាងច្បាប់ថ្មីនេះ គ្មានប៉ះពាល់អ្វីទេដល់សេរីភាពបញ្ចេញមតិ ហើយក្តីបារម្ភថាខ្លាចឱ្យខូចខាតដល់ធម្មនុញ្ញជាមូលដ្ឋានរបស់ហុងកុងនោះ គឺជាការព្រួយបារម្ភដោយគ្មានមូលដ្ឋានសោះ។ នេះបើតាមជំហរនៃថ្នាក់ដឹកនាំអាជ្ញាធរហុងកុង ដែលមាននិន្នាការគាំទ្រចិនប៉េកាំង។
សំណុំរឿងហុងកុងនេះ បានត្រូវវិមានប្រធានាធិបតីសហរដ្ឋអាមេរិក យកចិត្តទុកដាក់តាមដានយ៉ាងខ្លាំង។ លោក ដូណាល់ ត្រាំ ពីថ្ងៃអង្គារ៍ បានព្រមានថា អាមេរិកនឹងចាត់វិធានការឆាប់ៗ ដើម្បីឆ្លើយតបនឹងរដ្ឋអំណាចប៉េកាំងទៀតផង។ តើវិធានការរបស់សហរដ្ឋអាមេរិកនេះ មានអ្វីខ្លះទៅ?
ការព្រមានចាត់វិធានការជាដំបូង គឺធ្លាយចេញពីមាត់អ្នកនាំពាក្យវិមានប្រធានាធិបតីសហរដ្ឋអាមេរិក ដែលបានលើកឡើងពីប្រតិកម្មរបស់ប្រមុខរដ្ឋអាមេរិក ដែលថា សហរដ្ឋអាមេរិកនឹងចាត់វិធានការ នៅក្នុងពេលដ៏ខ្លីខាងមុខនេះ ដើម្បីឆ្លើយតបនឹងចិន ជុំវិញច្បាប់សន្តិសុខជាតិហុងកុង។ ក្រោយមក លោក ដូណាល់ ត្រាំ ខ្លួនឯង ក៏ត្រូវអ្នកកាសែតឈរជើងនៅសេតវិមាន ឈ្លេចដេញដោលសួរ ហើយទីបំផុត ប្រធានាធិបតីអាមេរិក ក៏បានអះអាងពិតមែនថា សហរដ្ឋអាមេរិកនឹងចេញវិធានការម៉ឺងម៉ាត់ យ៉ាងយូរ គឺមិនផុតដាច់ចុងសប្តាហ៍នេះទេ លោកនឹងប្រកាសឱ្យដឹងហើយថា វិធានការជាអ្វី។ ក៏ប៉ុន្តែ ពេលនេះ លោក ត្រាំ មិនបានលម្អិតឱ្យអស់ទេ ថាចំណាត់ការនោះ មានអ្វីខ្លះទេ។ អ្នកកាសែតបានសង្កត់ធ្ងន់ដែរ ពីករណីការរឹតត្បិតទិដ្ឋការឆ្លងដែនចំពោះសិស្សនិស្សិតចិន ដែលទៅសិក្សារៀនសូត្រនៅសហរដ្ឋអាមេរិក។ លោក ដូណាល់ ត្រាំ ឆ្លើយតបនឹងអ្នកសារព័ត៌មានថា «អស់លោកនឹងបានដឹងដំណឹងដ៏ឱ្យចាប់អារម្មណ៍បំផុតនេះ នៅក្នុងសប្តាហ៍នេះតែម្តង»។
ជាការរម្លឹក ពីថ្ងៃសុក្រសប្តាហ៍មុន សហរដ្ឋអាមេរិក ក៏ចេញចំណាត់ការព្រមានក្រុងប៉េកាំងរួចមកហើយ ដោយ ដាក់ក្រុមហ៊ុននិងស្ថាប័នចិនចំនួន ៣៣ ទៅក្នុងបញ្ជីខ្មៅ ពីបទរួមចំណែកនៅក្នុងការរំលោភសិទ្ធមនុស្ស។ បើតាមអ្នកវិភាគនយោបាយភូមិសាស្ត្រមួយចំនួន ចំពោះការដាក់ក្រុមហ៊ុនចិនជាច្រើនចូលបញ្ជីខ្មៅ ករណីសិទ្ធមនុស្ស និងករណី ហុងកុង នេះក្តី គេយល់ថា សហរដ្ឋអាមេរិក យកមកធ្វើជាខែល ដើម្បីចរចាពាណិជ្ជកម្មជាមួយចិន ដើម្បីបានប្រយោជន៍ច្រើនជាងមុនសម្រាប់អត្ថប្រយោជន៍ផ្ទាល់ខ្លួនរបស់សហរដ្ឋអាមេរិកដែរ។
ចំពោះថ្នាក់ដឹកនាំចិនក្រុងប៉េកាំង, សំណុំរឿងបាតុកម្មតវ៉ានៅហុងកុង ចិនតែងតែថ្កោលទោសថា បរទេសយកហុងកុងជាលេស ដើម្បីបង្កអស្ថិរភាពដល់របបគ្រប់គ្រងកុម្មុយនិស្តរបស់ខ្លួន។ ហេតុនេះហើយការពង្រឹងច្បាប់សន្តិសុខជាតិនៅហុងកុង ជារឿងចាំបាច់។ គួរបញ្ជាក់ដែរ ច្បាប់សន្តិសុខជាតិនេះ គឺមានចែងពីការអនុញ្ញាតឱ្យនគរបាលនិងប៉ូលិសសម្ងាត់របស់ចិន ចូលអន្តរាគមន៍ជាចំហំ នៅហុងកុង។ រឿងនេះ បង្កក្តីបារម្ភដល់អ្នកវិនិយោទុនបរទេស និងប្រទេសបច្ចិមលោក ដែលមានទំនាក់ទំនងនឹងហុងកុង។ ករណីនេះ លោក ដូណាល់ ត្រាំ ក៏បានព្រមានដែរ ថា វាអាចនឹងធ្វើឱ្យហុងកុង បាត់បង់តំណែងជាមជ្ឈមណ្ឌលហិរញ្ញវត្ថុអន្តរជាតិ ទៀតផង។
ទោះយ៉ាងណាក្តី សម្រាប់ពលរដ្ឋហុងកុងខ្លួនឯង, ការងើបឈរ តវ៉ាទាមទារ គឺជាសិទ្ធិសេរីភាពរបស់ពួកគេ ហើយការឈឺចាប់នៅក្នុងចិត្ត គឺត្រូវតែនិយាយទម្លាយចេញមកក្រៅ។ ដូច្នេះហើយ ពួកក្រុមបាតុករ ត្រូវតែនាំគ្នាចុះផ្លូវ ធ្វើបាតុកម្ម ដោយមានពាក់មាស់ការពារ បើទោះបីជា ជំងឺរាតត្បាតកូវីដ១៩នៅមិនស្ងប់ស្ងាត់បាត់ទាំងស្រុងក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ