ចិនចាប់ផ្តើមសាកល្បងវ៉ាក់សាំងកូវីដ១៩លើអ្នកស្ម័គ្រចិត្តជាង១០០នាក់
ចុះផ្សាយនៅថ្ងៃ៖
មេរោគកូរ៉ូណាថ្មី បានរាតត្បាតស្ទើរតែទូទាំងពិភពលោក ដោយចម្លងដល់មនុស្ស ចំនួនជាង៣៤ម៉ឺននាក់ ហើយសម្លាប់មនុស្ស ជាង១ម៉ឺន៥ពាន់នាក់ទៅហើយ។ ថ្ងៃចន្ទ ទី២៣មីនា ប្រទេសចិន ប្រកាសជាផ្លូវការពីការសាកល្បងវ៉ាក់សាំងប្រឆាំងមេរោគកូវីដ-១៩ ជាលើកលើកដំបូង ដែលត្រូវចាក់ពិសោធលើមនុស្សអ្នកស្មគ្រចិត្តប្រមាណជាង១០០នាក់។ បើតាមការបញ្ជាក់របស់រដ្ឋអំណាចចិន អ្នកស្មគ្រទទួលការពិសោធចាក់វ៉ាក់សាំងទាំងអស់នោះ ជាអ្នកស្រុកវូហាន ដែលជាទីកន្លែងផ្ទុះចេញមេរោគកូរ៉ូណាថ្មីតែម្តង។ ការប្រកាសរបស់ចិន ពីការពិសោធវ៉ាក់សាំងលើមនុស្ស នៅពេលនេះ គឺបន្ទាប់ពីអាមេរិក បានប្រកាសពិសោធវ៉ាក់សាំងលើមនុស្សដែរ ក្នុងក្រុង Seattle កាលពីសប្តាហ៍មុន។ ទន្ទឹមគ្នានេះ ប្រទេសធំៗនៅអឺរ៉ុប ក៏បានប្រកាសពីការដំណើររុករកវ៉ាក់សាំងបង្ការមេរោគកូវីដ-១៩ ជាទ្រង់ទ្រាយធំផងដែរ។ តើនៅក្នុងពេលដ៏ខ្លីនេះ គេនឹងអាចរកឃើញថ្នាំ ឬវ៉ាក់សាំងបង្ការមេរោគកូរ៉ូណាថ្មី មែនឬយ៉ាងណា?
តើការពិសោធចិនបានលទ្ធផលយ៉ាងណាទៅហើយ?
ដូចជាលឿនពេក ក្នុងការនិយាយពីលទ្ធផល ក៏ប៉ុន្តែ នេះក៏ជាការចាត់ទុកថា មានការវិវឌ្ឈច្រើនដែរ ដែលអ្នកវិទ្យាសាស្ត្រចិន ផ្តើមសាកពិសោធវ៉ាក់សាំងទៅលើខ្លួនមនុស្ស។ ថ្ងៃសុក្រកន្លងទៅ ចិនបានផ្តើមចាក់ពិសោធវ៉ាក់សាំង ជាលើកដំបូង លើអ្នកស្រុកវូហាន ចំនួន១០៨នាក់ ដែលត្រូវបែងចែកមនុស្សជាបីក្រុម។ ពួកគេទាំងនោះ មានអាយុចន្លោះពី១៨ទៅ៦០ឆ្នាំ។ នេះបើតាមការផ្សាយ ក្នុងកាសែតផ្លូវការ របស់ បក្ស កុម្មុយនិស្ត ចិន ជាភាសាអង់គ្លេស ឈ្មោះថា Global Times។
រដ្ឋអំណាចទទួលបន្ទុកសុខាភិបាលចិន បានចេញបញ្ជានិងអនុញ្ញាតឱ្យពិសោធវ៉ាក់សាំងលើមនុស្ស ហើយការពិសោធនេះ ធ្វើឡើងតាំងពីនៅពេលដែលចិនទទួលបានដំណឹងភ្លាមថា សហរដ្ឋអាមេរិក ពីថ្ងៃទី១៧មីនាសប្តាហ៍មុន បានផ្តើមចាក់វ៉ាក់សាំងពិសោធលើកខ្លួនអ្នកស្មគ្រចិត្ត ចំនួន៤៥នាក់ នៅក្រុង Seattle។ «ប្រទេស ចិន គឺ នឹងមិនព្រមចុះចាញ់ និងបណ្តោយឱ្យសហរដ្ឋអាមេរិក រកឃើញវ៉ាក់សាំងមុនខ្លួននោះទេ។» នេះតាមការយល់ឃើញរបស់កាសែត Global Times និងថា «ការរុករកវ៉ាក់សាំងបង្ការមេរោគកូរ៉ូណាថ្មី ហាក់ដូចជាការប្រកួតប្រជែងគ្នាមួយដែរ រវាងមហាអំណាចទាំងពីរ អាមេរិកនិងចិន»។
ដំណើរការវិវឌ្ឍក្នុងការរុករកវ៉ាក់សាំងនៅអឺរ៉ុប
រុស្ស៊ី ជាមហាអំណាចធំដែរ បានផ្តើមធ្វើការស្ងាត់ៗ។ អ្នកវិទ្យាសាស្ត្ររុស្ស៊ី បានផ្តើមដំណើរការរុករកពិសោធវ៉ាក់សាំងតាំងពីខែមករាមកម្ល៉េះ ហើយរុស្ស៊ីបានចាក់វ៉ាក់សាំងពិសោធសាកល្បង លើសត្វជាច្រើនរួចមកហើយ។ លទ្ធផលនៃការពិសោធនេះ អាចនឹងត្រូវរង់ចាំយូរ យ៉ាងហោចដល់ខែមិថុនាឯណោះ ទើបបានដឹង។ នេះបើតាមទីភ្នាក់បារាំង AFP។
នៅស្រុកបារាំង បារាំងបានផ្តើមបើកការសិក្សាពិសោធទ្រង់ទ្រាយធំ ដែលផ្តើមពីថ្ងៃទី២២ម្សិលមិញនេះ ដោយមានការប្រមូលផ្តុំមន្ទីរពិសោធន៍ជាច្រើនរួមគ្នា ដូចជា មន្ទីរពិសោធ៍នៅនៅប៉ារីស, លីយ៉ុង ណង់តឺ និង លីល ជាដើម ហើយនិងពួតដៃជាមួយមន្ទីរពិសោធន៍ជាងដប់ផ្សេងទៀត។ ក្នុងការសិក្សារបស់បារាំងនេះ ក៏នឹងសហប្រតិបត្តិការជាមួយប្រទេសជាច្រើននៅអឺរ៉ុប ដោយត្រូវពិសោធសាកល្បង និងតាមដានការពិនិត្យព្យាបាល លើអ្នកជំងឺកូវីដ-១៩ ចំនួន ៣ពាន់២រយនាក់ នៅអឺរ៉ុប ក្នុងនោះ អ្នកជំងឺចំនួន ៨០០នាក់ មកពីបារាំង។
ចំណែក មន្ទីរពិសោធន៍វេជ្ជសាស្ត្រ Sanofi របស់ក្រុមហ៊ុនបារាំង កំពុងសិក្សាវ៉ាក់សាំងបង្ការកូរ៉ូណាថ្មី ដោយយកមូលដ្ឋាននៃការផលិត Kevzara។ Kevzara ជាប្រភេទថ្នាំ ជំនួយប្រព័ន្ធការពារខ្លួន និងជាលទ្ធផលការងារស្រាវជ្រាវរួមគ្នារបស់ក្រុមហ៊ុនឱសថបារាំងនិងអាមេរិក តាំងពីឆ្នាំ២០១៧មក ដើម្បីព្យាបាលជំងឺរលាកសន្លាក់។ បារាំងយល់ថា ការឈរលើមូលដ្ឋានចាស់ ដែលមានស្រាប់បែបនេះ វាងាយសស្រួល និងចំណេញពេលវេលា ជាជាងការត្រូវចាប់ផ្តើមពីចំណុចសូន្យមក តែម្តងនោះ។
រីឯក្រុមហ៊ុនរបស់ អាល្លឺម៉ង់ វិញ ក៏សកម្មណាស់ដែរ រហូតដល់ លោក ដូណាល់ ត្រាំ ចង់ចំណាយលុយ ទិញវ៉ាក់សាំង យកទៅអាមេរិកផ្តាច់មុខតែម្តង។
ក្នុងដំណើរការរុករកវ៉ាក់សាំងនេះដែរ សហភាពអឺរ៉ុប បានសម្រេចឱ្យកញ្ចប់ថវិកាចំនួន១០លានអឺរ៉ុប ដែលជួយដល់គម្រោងស្រាវជ្រាវ នៅតាមមន្ទីរពេទ្យ ប្រមាណ៣០០ និងមន្ទីរពិសោធន៍ ប្រមាណ៩០០កន្លែង។ ទោះយ៉ាងណាក្តី វាត្រូវស៊ីពេលយូរក្រែលដែរ សោភ័ណ។
តើត្រូវការពេលវេលាប៉ុន្មានទៀត ទម្រាំរកវ៉ាក់សាំងបង្ការឃើញ?
ដំណាក់កាលផលិតវ៉ាក់សាំង ស៊ីពេលយូរណាស់ បើគោរពតាមច្បាប់និងបទដ្ឋានវិទ្យាសាស្ត្រត្រឹមត្រូវ។ ទម្រាំដល់ដំណាក់កាលយកវ៉ាក់សាំងទៅចាក់ពិសោធលើខ្លួនមនុស្សបាន គឺប្រើពេលយូរណាស់។ ការដែលអាមេរិកនិងចិន បានសាកល្បងពិសោធវ៉ាក់សាំងលើមនុស្ស នៅពេលប៉ុន្មានថ្ងៃនេះ គឺចាត់ទុកថា លឿនគ្រាន់បើហើយ។
តាមអ្នកជំនាញ ទាំងបារាំង អឺរ៉ុប និងអាមេរិកក្តី គឺសុទ្ធតែយល់ឃើញដូចគ្នាថា ដំណើររករុក ទម្រាំឃើញវ៉ាក់សាំង និងថ្នាំបង្ការដែលមានប្រសិទ្ធភាពពិតប្រាកដនិងត្រឹមត្រូវ អាចទុកចិត្តបាននោះ យ៉ាងយោចណាស់ ក៏ត្រូវចំណាយពេលវេលា ចំនួន១២ខែ ទៅ១៨ខែដែរ (មួយឆ្នាំ ទៅ១ឆ្នាំកន្លះ)៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ