អាជ្ញាធរចិនរងការរិះគន់ នៅក្រោយមរណភាពរបស់គ្រូពេទ្យ ដែលជាអ្នកទាញសញ្ញាមុនគេពីគ្រោះថ្នាក់របស់កូរ៉ូណាវីរុស
ចុះផ្សាយនៅថ្ងៃ៖
ស្តាប់ - ០៨:៣៥
នៅប្រទេសចិន ចំនួនមនុស្សស្លាប់ដោយសារកូរ៉ូណាវីរុស បានកើនឡើងដល់ ៦៣៦នាក់ នៅថ្ងៃសុក្រទី ៧ កុម្ភៈ និងបានចម្លងទៅមនុស្សជាង ៣ម៉ឺននាក់ នៅប្រទេសចិន។ នៅក្នុងកិច្ចសន្ទនាទូរស័ព្ទជាមួយប្រធានាធិបតីអាមេរិក លោកដូណាល់ ត្រាំ ប្រធានាធិបតីចិន លោកស៊ី ជីនពីង បានធានាអះអាងថា ចិនមានសមត្ថភាព អាចប្រយុទ្ធយកឈ្នះ លើមេរោគកូរ៉ូណាថ្មី។ ពាក្យធានារបស់ប្រមុខរដ្ឋចិន ធ្វើឡើង នៅប៉ុន្មានម៉ោងក្រោយគ្រូពេទ្យ ចិន ម្នាក់ដែលអ្នកជាទាញសញ្ញាអាសន្នមុនគេ ពីមេរោគកូរ៉ូណា នៅទីក្រុងវូហាន បានទទួល មរណភាព នៅមន្ទីរពេទ្យចិន។ មរណភាពរបស់គ្រូពេទ្យ ដែលជាអ្នកទាញសញ្ញាពីគ្រោះថ្នាក់របស់កូរ៉ូណាវីរុសបានបំផុសបំផុលឲ្យមានប្រតិកម្មរិះគន់ និងខឹងសម្បារ ពីសំណាក់ពលរដ្ឋចិន។
ចំនួនមនុស្សស្លាប់ដោយសារមេរោគកូរ៉ូណាថ្មី បានកើនឡើង ដល់៦៣៦នាក់ និងឆ្លងទៅមនុស្សជាង ៣ម៉ឺននាក់ នៅប្រទេសចិន។ ប្រធានាធិបតីចិន លោកស៊ី ជីនពីងបាននិយាយ តាមទូរស័ព្ទ ប្រាប់ប្រធានាធិបតីអាមេរិក លោកដូណាល់ ត្រាំ កាលពីថ្ងៃសុក្រថា ចិនមានជំនឿយ៉ាងមុតមាំ ទៅលើសមត្ថភាពរបស់ខ្លួន ដើម្បី ប្រយុទ្ធ យកឈ្នះ មេរោគកូរ៉ូណាថ្មី។ ចាប់តាំងពីមានផ្ទុះជំងឺរាតត្បាត កូរ៉ូណាវីរុស នៅប្រទេសចិន នេះជាលើក ទី ៣ដែលប្រធានាធិបតី ចិន ចេញមុខ ធានាអះអាងពីសមត្ថភាពរបស់ចិន ក្នុងការដោះស្រាយវិបត្តិកូរ៉ូណាវីរុស។
តាមទូរទស្សន៍រដ្ឋចិន CCTV នៅក្នុងកិច្ចសន្ទនាតាមទូរស័ព្ទ ប្រធានាធិបតីចិន លោកស៊ី ជីនពីងបាននិយាយប្រាប់ ប្រធានាធិបតី អាមេរិក ថា ចិនបានប្រើគ្រប់មធ្យោបាយ និងចាត់វិធានការពេញផ្ទៃប្រទេស ដើម្បី ប្រយុទ្ធប្រឆាំងនឹងជំងឺកូរ៉ូណាវីរុសថ្មី។
តាមទីភ្នាក់ងារព័ត៌មានចិន ស៊ីនហួរ នៅក្នុងកិច្ចសន្ទនាតាមទូរស័ព្ទ ជាមួយ លោកដូណាល់ ត្រាំ ប្រធានាធិបតីចិន បានទាមទារផងដែរ ឲ្យអាមេរិក ចាត់វិធានការ សមហេតុផល ដើម្បីឆ្លើយតបនឹងជំងឺរាតត្បាតកូរ៉ូណាវីរុស។ កន្លងមក ប្រទេសចិនបានប្រតិកម្ម រិះគន់អាមេរិក មុនគេ ដែលទើបបានប្រកាសមិនឲ្យអ្នកដែលធ្លាប់ ធ្វើដំណើរទៅប្រទេសចិន ចូលទឹកដីអាមេរិក នៅក្នុងអំឡុងកើតមានជំងឺរាតត្បាត កូរ៉ូណាវីរុស នៅប្រទេសចិន។
ដើម្បីទប់ស្កាត់ កុំឲ្យមានការឆ្លងរីករាលមេរោគកូរ៉ូណាថ្មី ប្រទេសមួយចំនួន ដូចជាសិង្ហបុរី អ៊ីតាលី ម៉ុងហ្គោលី និងចុងក្រោយ គឺវៀតណាមបានចូលរួមជាមួយអាមេរិក ដើម្បីផ្អាក មិនទទួលជនបរទេសដែលធ្វើដំណើរចេញមកពីប្រទេសចិន។ អាជ្ញាធរចិនបានចាត់ទុក វិធានការរបស់អាមេរិក និងប្រទេសមួយចំនួន ថា ជាវិធានការចិត្តអាក្រក់ និងផ្ទុយពីការអំពាវនាវរបស់អង្គការសុខភាពពិភពលោក ដែលចាត់ទុក ការបិទច្រកព្រំដែន ថា វិធានការអវិជ្ជមានសម្រាប់សេដ្ឋកិច្ចរបស់ប្រទេសដែលកំពុងប្រឈមនឹងមេរោគកូរ៉ូណាថ្មី ដូចជាប្រទេសចិន។
សេតវិមានបានអះអាងថា លោកដូណាល់ ត្រាំ បានបញ្ជាក់តបទៅប្រធានាធិបតីចិន រួចហើយថា លោកមានជំនឿ លើកម្លាំង និងភាពរឹងមាំរបស់ចិន ក្នុងការប្រយុទ្ធប្រឆាំងនឹងជំងឺកូរ៉ូណាវីរុស។ តាម អ្នកនាំពាក្យរបស់សេតវិមាន ប្រមុខដឹកនាំប្រទេសទាំងពីរបានយល់ព្រមព្រៀងគ្នាថា នឹងបន្តជជែកគ្នាតទៅទៀត លើសំណុំរឿងនេះ ប៉ុន្តែ វ៉ាស៊ីនតោននៅមិនទាន់បញ្ជាក់នៅឡើយទេ ថា ពីជំហរថ្មីរបស់ខ្លួន។ តើវ៉ាស៊ីនតោនសុខចិត្ត លុបចោលទៅវិញ វិធានការហាម មិនទទួលអ្នកដំណើរមកពីប្រទេសចិន ដែរឬទេ នៅក្រោយកិច្ចសន្ទនាជាមួយរវាងលោកដូណាល់ ត្រាំ និងលោកស៊ីជីនពីង។
គ្រូពេទ្យ លី វិនលាំង មនុស្សដំបូងបំផុត ដែលបានទាញសញ្ញាអាសន្ន ស្តីពីគ្រោះថ្នាក់របស់មេរោគកូរ៉ូណា ទទួល មរណភាព បន្ទាប់ពីឆ្លងកូរ៉ូណាវីរុស កាលពីចុងខែមករា
នៅប្រទេសចិន មរណភាពរបស់វេជ្ជបណ្ឌិត លី វិនលាំងបានបណ្តាល ឲ្យមានប្រតិកម្មព្រោងព្រាតរបស់អ្នកប្រើប្រាស់អ៊ីនធ័រនែត ដែលបានសំដែងការសោកស្តាយ រំលែកទុក្ខ និងការខឹងសម្បារទៅលើចំណាត់ការរបស់អាជ្ញាធរ។
មានវ័យ ៣៤ឆ្នាំ លោកលី វិនលាំងដែលមានជំនាញពេទ្យភ្នែក ជាមនុស្សដំបូងគេដែលបានទាញសញ្ញាអាសន្ន ពីការលេចឡើង នៃមេរោគផ្លូវដង្ហើម ដែលមានលក្ខណៈ ដូចជំងឺសារស៍ ដែលបានសម្លាប់មនុស្សជាង ៣០០នាក់ នៅប្រទេសចិន កាលពី ឆ្នាំ ២០០៣។
សូមបញ្ជាក់ថា នៅថ្ងៃទី ៣០ធ្នូ ២០១៩ ពោល នៅមួយថ្ងៃមុន ដែលមេរោគចាប់ផ្តើមសម្លាប់មនុស្សដំបូងគេ នៅប្រទេសចិន លោកគ្រូពេទ្យ លី វិនលាំងបានផ្ញើសារទៅ សហជីវិនរបស់គាត់ ដើម្បីក្រើនរំលឹក ពីគ្រោះថ្នាក់របស់មេរោគថ្មីកំបាំង ដែលមានលក្ខណៈស្រដៀងនឹងមេរោគសារស៍។ ប៉ុន្តែ ពីរថ្ងៃក្រោយ គឺនៅថ្ងៃទី ១មករា លោក លី វិនលាំង និងគ្រូពេទ្យ៧នាក់ផ្សេងទៀត ត្រូវបានប៉ូលិសនៅទីក្រុងវូហាន កោះហៅ និងនិយាយប្រាប់ឲ្យចុះហត្ថលេខា លើលិខិតមួយដែលក្នុងនោះ ក្រុមគ្រូពេទ្យត្រូវសន្យា ឈប់ជាបន្ទាន់ សកម្មភាព ដែលអាជ្ញាធរចិនចាត់ទុកថា ជាសកម្មភាពបង្កអសណ្តាប់ធ្នាប់សង្គម។ នៅថ្ងៃទី២មករា ទូរទស្សន៍រដ្ឋចិន CCTVបានចុះផ្សាយពីមនុស្ស៨នាក់ ដែលជាប់ចោទពីបំផុសបំផុលផ្សព្វផ្សាយពាក្យចចាមអារ៉ាម។
“សកម្មភាពរបស់ពួកអ្នកខុសច្បាប់។ អ្នកបានផ្ញើសារ ដែលមានន័យ ភូតភរនៅលើអ៊ីនធ័រនែត។ ប៉ូលិសជឿថា អ្នកទាំងអស់គ្នានឹងសហការ។ តើអ្នកអាចឈប់សកម្មភាពខុសច្បាប់ដែរឬទេ? យើងជឿថា អ្នកនឹងឈប់ បន្ទាប់មក គិតពិចារណា។ ចំណែកយើង នឹងព្រមានអ្នកថា បើសិនអ្នកនៅតែបន្តសកម្មភាព និងមិនព្រមផ្លាស់ប្តូរគំនិត នៅតែបន្តសកម្មភាពខុសច្បាប់ អ្នកនឹងប្រឈមទល់នឹងច្បាប់។ តើអ្នកយល់ដែរឬទេ ?” នេះជាសេចក្តីក្នុងលិខិតដែលគ្រូពេទ្យ លី វិនលាំងបានបង្ហោះផ្សាយ នៅបណ្តាញសង្គម ថ្ងៃទី ៣១មករា។ នៅក្នុងពេលនោះដែរ លោកគ្រូពេទ្យលី បានបង្ហើបឲ្យគេដឹងថា កាលពីថ្ងៃទី ១០មករា លោកចាប់មានអាការៈគ្រុនក្តៅខ្លួន និងក្អករហូតត្រូវសម្រាកពេទ្យ។
នៅថ្ងៃទី ៣០មករា គេរកឃើញថា លោកគ្រូពេទ្យ លី បានឆ្លងមេរោគ កូរ៉ូណា នៅពេលលោកព្យាបាលអ្នកជំងឺ។ តាមកាសែតរដ្ឋចិន មន្ទីរពេទ្យ បានប្រកាស កាលពីយប់ថ្ងៃព្រហស្បតិ៍ ពីមរណភាពរបស់វេជ្ជបណ្ឌិតវ័យក្មេង មួយនេះ។
អ្វីដែលធ្វើឲ្យអ្នកប្រើប្រាស់អ៊ីនធ័រនែតខឹងសម្បារ លើសពីការសំដែងទុក្ខសោក នៅក្រោយមរណភាពរបស់លោកគ្រូពេទ្យ លី វិនលាំង គឺគ្រូពេទ្យ លី ជាអ្នកចេញមុខមុនគេ ដើម្បីទាញសញ្ញាអាសន្ន ពីគ្រោះថ្នាក់របស់មេរោគផ្លូវដង្ហើមថ្មី ប៉ុន្តែ ផ្ទុយទៅវិញ លោកបែរជាត្រូវអាជ្ញាធរចាត់ទុកជាសត្រូវ ដែលគ្រោះថ្នាក់សម្រាប់សណ្តាប់ធ្នាប់សង្គមទៅវិញ។ អ្នកប្រើប្រាស់អ៊ីនធ័រនែតជាច្រើនបានសរសេរថា បើសិនអាជ្ញាធរថ្នាក់មូលដ្ឋាននៅទីក្រុងវូហាន ស្តាប់យកយោបល់របស់លោកគ្រូពេទ្យ លី នោះ គេអាចចាត់វិធានការ ភ្លាមៗ ទប់ស្កាត់ការឆ្លងរីករាលដាល របស់កូរ៉ូណាវីរុស ដោយមិនរង់ចាំរហូតដល់ ៣អាទិត្យ ក្រោយ ទើបប្រកាសបិទទីក្រុង នោះទេ។
មរណៈភាពរបស់គ្រូពេទ្យ លី វិនលាំងបានបំផុសឲ្យមានការទាមទារសិទ្ធិសេរីភាពបញ្ចេញមតិ ដែលគេមិនសូវជាលឺច្រើន ទេ នៅប្រទេសចិន
“ខ្ញុំចង់បានសិទ្ធិសេរីភាពបញ្ចេញមតិ » នេះជាសារសរសេរនៅបណ្តាញសង្គមWeibo របស់ចិន ដែលត្រូវបានអាជ្ញាធរចិនលុបចោលទៅវិញ។ នៅថ្ងៃសុក្រនេះ សាររិះគន់អាជ្ញាធរក្នុងស្រុកចិន ក្នុងទីក្រុងវូហាន បានរីករាលដាលទៅជាសារ រិះគន់រដ្ឋាភិបាលចិន ថា គ្មានសមត្ថភាព គ្រប់គ្រាន់ ដើម្បីដោះស្រាយ វិបត្តិកូរ៉ូណាវីរុស ដែលសម្លាប់មនុស្សកាន់តែច្រើននៅប្រទេសចិន។ ការសរសេរសាររិះគន់រដ្ឋាភិបាលចិន គឺជារឿងដែលគេកម្រនឹងឃើញណាស់ នៅប្រទេសចិន ជាទីដែលមតិរិះគន់ ត្រូវបានគេហាមដាច់ខាតមិនឲ្យមាន។
សម្រាប់សាស្ត្រាចារ្យ មួយរូប នៅសកលវិទ្យាល័យហុងកុង នៅសម័យអ៊ីនធ័រនែត ដែលមានបណ្តាញសង្គមរីកចម្រើនខ្លាំង គេមិនអាចបិទខ្ទប់ ការបញ្ចេញមតិដ៏ច្រើនសន្ធឹកសន្ធាប់បានទេ។ នៅពេលដែលចំនួនមនុស្សស្លាប់ និងករណីឆ្លងកាន់តែច្រើន បូកផ្សំ នឹងកង្វះមន្ទីរពេទ្យ សំភារៈពេទ្យដូច្នេះផង អ្នកដែលអាក់អន់ចិត្តនឹងចំណាត់ការ មិនគ្រប់គ្រាន់ ហើយនិងការិយាធិបតេយ្យ របស់អាជ្ញាធរចិន គ្រប់ជាន់ថ្នាក់ គឺមានចំនួនកាន់តែច្រើន។ ប្រជាជនចិន ដែលមិនពេញចិត្តនឹងវិធានការឃាត់ឃាំង របស់អាជ្ញាធរ និងដែលកំពុងខ្លាចឆ្លងមេរោគ ជាងការទទួលពិន័យ ឬការចាប់ដាក់ឃុំ ពីអាជ្ញាធរទៅទៀតនោះ គឺ លែងខ្លាចនឹងការបញ្ចេញមតិផ្ទាល់ខ្លួន ដើម្បី រិះគន់ រដ្ឋាភិបាលទៀតហើយ។
នៅក្នុងចំណាត់ការ ដោះស្រាយវិបត្តិកូរ៉ូណាវីរុសនៅពេលនេះ រដ្ឋាភិបាលចិន របស់លោកប្រធានាធិបតីស៊ី ជីនពីង មិនត្រឹមឈឺក្បាលដោយសារការរីករាតត្បាតរបស់មេរោគកូរ៉ូណាវថ្មី ហើយនិងការដាក់សម្ពាធពីប្រទេសខាងក្រៅ តែប៉ុណ្ណោះទេ ប៉ុន្តែ រដ្ឋាភិបាលចិន ត្រូវប្រឈមផងដែរ នឹងមតិរលករិះគន់ និងការដាក់សម្ពាធពីសំណាក់ពលរដ្ឋក្នុងស្រុកចិនខ្លាំងណាស់ដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ