តើវិធានការបិទទីក្រុងរបស់អាជ្ញាធរចិន អាចទប់ស្កាត់ការរីករាលដាលកូរ៉ូណាវីរុសដែរឬទេ?
ចុះផ្សាយនៅថ្ងៃ៖
ស្តាប់ - ០៧:៣៧
នៅប្រទេសចិន ចំនួនមនុស្សស្លាប់ដោយសារមេរោគ រលាកផ្លូវដង្ហើម កូរ៉ូណាវីរុស ហៅកាត់ថា 2019NCoV បានកើនឡើងដល់៥៦នាក់ និងបានចម្លងទៅមនុស្ស១៩៧៥ គិតមកដល់ថ្ងៃអាទិត្យទី ២៦ មករា ២០២០។ តាមតុល្យការផ្លូវការចុងក្រោយ ផ្តល់ដោយគណៈកម្មការជាតិសុខភាពចិន គេឃើញមានករណីអ្នកជំងឺស្លាប់ដោយកូរ៉ូណាវីរុស ជាលើកទី ១នៅទីក្រុងសៀងហៃ។
ក្នុងរវាងតែ២៤ម៉ោង ចំនួនអ្នកស្លាប់ដោយសារជម្ងឺផ្លូវដង្ហើម កូរ៉ូណាវីរុសបានកើនឡើង ១៥នាក់បន្ថែមទៀត នៅថ្ងៃអាទិត្យ។ ករណីមនុស្សស្លាប់ទាំងអស់ ដោយសារកូរ៉ូណាវីរុស កើតមាននៅខេត្តហ៊ូពេ និងមួយករណី ដំបូងគេនៅទីក្រុងសៀងហៃ។
នៅថ្ងៃអាទិត្យ កាណាដាបានប្រកាសករណីដំបូងនៃអ្នកជម្ងឺ ដោយសារ កូរ៉ូណាវីរុស នៅពេលអាមេរិកប្រកាសករណីអ្នកជម្ងឺទី ៣ នៅរដ្ឋកាលីហ្វនីញ៉ា។ នៅក្នុងសេចក្តីថ្លែងការណ៍កាលពីថ្ងៃសៅរ៍ ក្រសួងការបរទេសអាមេរិកបានបញ្ជាក់ពីការជម្លៀស មន្រ្តីទូត និងប្រជាជនអាមេរិកចេញពីទីក្រុងវូហាន។ តាមក្រសួងការបរទេសអាមេរិក ជនជាតិអាមេរិកទាំងនោះ នឹងត្រូវដឹកចេញ តាមយន្តហោះ ពីក្រុងវូហាន សំដៅក្រុងសាន់ហ្វា្រន់ស៊ីស្កូ នៅថ្ងៃអង្គារសប្តាហ៍ក្រោយ។
ប្រឈមនឹងការរីករាតត្បាតរបស់ កូរ៉ូណាវីរុស អាជ្ញាធរចិនបានចាត់វិធានការជាបន្តបន្ទាប់ បិទទីក្រុងកាន់តែច្រើន ជុំវិញក្រុងវូហាន ដែលជាចំណុចចាប់ផ្តើមដំបូង នៃការផ្ទុះរាតត្បាត មេរោគកូរ៉ូណាវីរុស។ ដោយបិទមធ្យោបាយធ្វើដំណើរ ដូចជា រថភ្លើង យន្តហោះ និងផ្លូវចេញពីទីក្រុងជាង ១០ ដែលកំពុងកើតមានករណីឆ្លងមេរោគ កូរ៉ូណាវីរុស អាជ្ញាធរចិន បានដាក់បង្ខាំងឲ្យនៅដាច់ឡែក ប្រជាជនចិនជាង ៥៦លាននាក់។
បិទ ខ្ទប់ប្រជាជនដល់ទៅ៥៦លាននាក់ មិនឲ្យពួកគេ ធ្វើដំណើរចាកចេញ ពីទីក្រុង កន្លែងដែលខ្លួនរស់នៅ ដោយសារតែខ្លាចឆ្លងរីករាលដាលមេរោគ កូរ៉ូណាវីរុស គឺជាចំណាត់ការដ៏ធំសម្បើម ដែលគេមិនធ្លាប់ឃើញមាន ក្នុងប្រវត្តិជំងឺរាតត្បាតក្នុងពិភពលោក។
៥៦លាននាក់ គឺស្មើនឹងប្រជាជនសរុបរបស់ប្រជាជនអាហ្វ្រិកខាងត្បូងទៅហើយ។ ប៉ុន្តែ សម្រាប់ប្រទេសចិន ដែលមានប្រជាជនដល់ទៅ ១ពាន់ ៤០០លាននាក់ ដាក់បង្ខាំងមនុស្ស ៥៦លាននាក់ ឲ្យរស់នៅកាត់ផ្តាច់ ពីពិភពខាងក្រៅ ដើម្បីតាមដាន និងទប់ស្កាត់ការរីករាលមេរោគ កូរ៉ូណាវីរុស គឺជារឿងធម្មតា និងដើម្បីឆ្លើយតបនឹងវិបត្តិឆ្លងរីករាលដាល មេរោគកូរ៉ូណាវីរុស សព្វថ្ងៃនេះ។
អង្គការសុខភាពពិភពលោក ផ្ទាល់ បានថ្លែងស្វាគមន៍ចំណាត់ការរបស់ចិន ដើម្បី បង្រ្កាប ទប់ស្កាត់ មេរោគកូរ៉ូណាវីរុស ក្នុងប្រទេស នៅបន្ទាប់ពីអាជ្ញាធរចិនប្រកាសបិទទីក្រុង វូហាន ដែលជាចំណុចចាប់ផ្តើមនៃការផ្ទុះ កូរ៉ូណាវីរុស។
កូរ៉ូណាវីរុសឆ្លងទៅដល់ទ្វីបទាំង ៤
សម្រាប់អ្នកជំនាញមួយចំនួន វិធានការបិទទីក្រុង ឬQuarantaine របស់អាជ្ញាធរចិន ត្រូវបានធ្វើឡើងដោយយឺតពេលបន្តិច។ ករណីផ្ទុះដំបូង នៃមេរោគ កូរ៉ូណាវីរុស បានកើតឡើងតាំងពីថ្ងៃទី ៣១ធ្នូម្ល៉េះ ប៉ុន្តែ អាជ្ញាធរទើបសម្រេចបិទទីក្រុង ដាក់បង្ខាំងមនុស្ស កាលពីថ្ងៃព្រហស្បតិ៍ គឺ នៅ ៣សប្តាហ៍ក្រោយដែលកើតមានករណីអ្នកជំងឺ កូរ៉ូណាវីរុស។ គេវាយតម្លៃថា វិធានការរបស់អាជ្ញាធរធ្វើឡើងយឺតហួសពេល ព្រោះថា មនុស្សជាច្រើន ដែលអាចឆ្លងមេរោគកូរ៉ូណាវីរុស និងដែលបានធ្វើដំណើរ ចេញចូលទីក្រុងវូហាន ដោយសេរី នៅមុនការប្រកាសបិទទីក្រុង នឹងអាចនាំយកមេរោគទៅឆ្លងកន្លែងដទៃទៀត។ ជាក់ស្តែង រហូតមកដល់ពេលនេះ មេរោគកូរ៉ូណាវីរុស បានឆ្លងចេញទៅដល់ខេត្ត២៤របស់ប្រទេសចិន និងទៅប្រទេសជាង ១០ក្នុងទ្វីបទាំង ៤ អាស៊ី អឺរ៉ុប អូស្ត្រាលី និងអាមេរិក។ នៅថ្ងៃអាទិត្យ គេរកឃើញករណីមនុស្សឆ្លងទី៣នៅអាមេរិក មួយករណីនៅកាណាដា បន្ទាប់ពីករណីឆ្លងមេរោគកូរ៉ូណាវីរុសលើកដំបូង នៅអូស្ត្រាលី ត្រូវបានប្រកាសកាលពីថ្ងៃសៅរ៍។
វិធានការបិទទីក្រុង ឬ Quarantaine
វិធានការបិទទីក្រុង មិនអាចទប់ស្កាត់ការរីករាលដាល ប៉ុន្តែ វានឹងអាចជួយ កាត់បន្ថយការចម្លងមេរោគដែរ ព្រោះថា បើមនុស្សមិនសូវធ្វើដំណើរ ជួប ប៉ះពាល់គ្នាកាន់តែច្រើន នោះ លទ្ធភាពចម្លងមេរោគ តាមរយៈការដកដង្ហើម ការប៉ះកាន់ដៃគ្នា ក៏មានកាន់តែតិចដែរ។ សម្រាប់អ្នកជំនាញសុខភាព វិធានការរបស់អាជ្ញាធរចិន ដោយបិទបង្ខាំងមនុស្ស ឲ្យនៅដាច់ដោយឡែក នឹងរឹតតែមានប្រសិទ្ធភាព អាចកាត់បន្ថយទាំងស្រុងការចម្លងមេរោគ បើសិន អាជ្ញាធរចិន ពង្រឹងបន្ថែម លើការតាមដាន រក អ្នកជំងឺ និងពិនិត្យព្យាបាលពួកគេភ្លាមៗ ដើម្បី កុំឲ្យមានការចម្លងបន្តទៅអ្នកដែលគ្មានមេរោគសោះ ក្នុងករណី Quarantaine នេះ។
ផលប៉ះពាល់នៃវិបត្តិកូរ៉ូណាវីរុសទៅលើសេដ្ឋកិច្ច ចិន
ដើម្បី ទប់ស្កាត់ការឆ្លងរីករាលដាលមេរោគផ្លូវដង្ហើម កូរ៉ូវីរុស រដ្ឋាភិបាលចិន បានចាត់វិធានការខ្លាំងមួយទៀត គឺហាមមិនឲ្យមានចរាចរណ៍ លក់ សត្វព្រៃ ហើយនិងបានបញ្ជាមិនឲ្យមានការរៀបចំដំណើរកំសាន្ត របស់អ្នកទេសចរ ទាំងនៅក្នុង និងក្រៅប្រទេស។ វិធានការរឹតបន្តឹង ចរាចរណ៍ ដំណើរផ្លាស់ទីរបស់មនុស្ស ធ្វើឡើង នៅជួនចំ ពេលដែលប្រជាជនកំពុងប្រារព្ធបុណ្យចូលឆ្នាំចិន។
ការឆ្លងរាតត្បាតជម្ងឺSARS កាលពីឆ្នាំ ២០០៣ ធ្លាប់បានធ្វើឲ្យកំណើនសេដ្ឋកិច្ចចិនថយចុះ អស់ ២% និងធ្វើឲ្យសេដ្ឋកិច្ចពិភពលោក ខាតបង់ ដល់ទៅ ៤០ពាន់លានដុល្លារ។
នៅពេលនេះ វានៅឆាប់ពេក ដើម្បី វាយតម្លៃពីទំហំខាតបង់ ដោយសារមេរោគកូរ៉ូណាវីរុស។ ប៉ុន្តែ យ៉ាងណាក៏ដោយ គេអាចគន់គូរបានខ្លះហើយ ពីការខាតបង់ សេដ្ឋកិច្ច ជាពិសេសនៅប្រទេសចិន តែម្តង ដែលកំពុងមានសេដ្ឋកិច្ចចុះទន់ខ្សោយ ខ្លាំងមិនធ្លាប់មាន នៅក្នុងរយៈពេល ជិត៤០ឆ្នាំចុងក្រោយនេះ។
ចិនខាតបង់មុនគេ ព្រោះថា វិបត្តិកូរ៉ូណាវីរុសលើកនេះ ដែលកើតឡើងចំពេលដែលប្រទេសត្រូវរៀបចំបុណ្យចូលឆ្នាំយ៉ាងដូច្នេះ នឹងប៉ះពាល់ខ្លាំងដល់ការប្រើប្រាស់ក្នុងស្រុកចិន ដែលតំណាងឲ្យ៦០ភាគរយ នៃផលិតផលក្នុងស្រុបសរុប GDP របស់ចិន(៤០ភាគរយ នៅឆ្នាំ ២០០៣)។
កាលចូលឆ្នាំ ចិន ឆ្នាំ ២០១៩ ក្នុងរយៈពេល តែ ៦ថ្ងៃ ប្រជាជនចិន បានចាយប្រាក់សរុប ១៣២ពាន់លានអឺរ៉ូ សម្រាប់ ការធ្វើដំណើរទេសចរណ៍ ចូលហាង ជាដើម។ ប៉ុន្តែ ឥលូវនេះ ដោយសារមេរោគកូរ៉ូណាវីរុស ប្រាក់ចំណូលបានមកពីវិស័យទេសចរណ៍ចិន ត្រូវធ្លាក់ចុះ ដោយជៀសមិនផុត។ ដំណើរកំសាន្តត្រូវបានគេលុបចោល ទីកន្លែងកំសាន្ត រួមទាំងភោជនីយដ្ឋាន ត្រូវបានគេបិទទ្វារ ជាបន្តបន្ទាប់។ ការខាតបង់នឹងមានកាន់តែច្រើន ក្នុងករណីវិធានការបិទខ្ទប់ ទីក្រុង ឬក៏វិធានការកាត់បន្ថយ ការធ្វើដំណើរ ដោយសារតែមេរោគ កូរ៉ូណាវីរុស ត្រូវបានគេបន្តអនុវត្តកាន់តែយូរ។
ការរីករាលដាលមេរោគ កូរ៉ូណាវីរុស កើតមានខ្លាំងនៅប្រទេសចិន ប៉ុន្តែ ឥទ្ធិពល ផលប៉ះពាល់របស់វាជះទៅដល់សេដ្ឋកិច្ចពិភពលោក ភាគហ៊ុន នៅទីផ្សារ អន្តរជាតិ។
នៅពេលប្រជាជនចិន ត្រូវបានហាមឃាត់ មិនឲ្យធ្វើដំណើរ ទេសចរណ៍ទៅក្រៅប្រទេស ប្រទេសជាច្រើន ដូចជាបារាំង អ៊ីតាលី ថៃ ជាដើម ដែលរកប្រាក់ចំណូលពីក្រុមអ្នកទេសចរចិន ក៏នឹងត្រូវរងប៉ះពាល់ដោយសារវិបត្តិមេរោគកូរ៉ូណាវីរុស។ តម្លៃភាគហ៊ុនរបស់ក្រុមហ៊ុនលក់ផលិតផល គ្រឿងប្រណិត ដូចជា ក្រុមហ៊ុនបារាំង Louis Vuitton ជាដើមបានធ្លាក់ចុះ បន្តិច នៅក្រោយ ផ្ទុះវិបត្តិកូរ៉ូណាវីរុស។ អតិថិជនរបស់ក្រុមហ៊ុន ទាំងនេះ ភាគច្រើនជាប្រជាជនចិន ដែលសម្រុក ចាយលុយ ទិញ គ្រឿងប្រណិតៗ នៅក្នុងឱកាសបុណ្យចូលឆ្នាំចិននេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ