លោកស៊ី ជីនពីង ទៅប្រារព្ធខួប២០ឆ្នាំ នៃការប្រគល់ម៉ាកាវ មកឲ្យចិនវិញ
ចុះផ្សាយនៅថ្ងៃ៖
ស្តាប់ - ០៧:៥៤
នៅថ្ងៃសុក្រទី២០ធ្នូ ម៉ាកាវ និងប្រារព្ធខួប២០ឆ្នាំ នៃការវិលត្រលប់ទៅរួមរស់ជាមួយចិន។ នៅថ្ងៃពុធនេះ លោកប្រធានាធិបតីចិន ស៊ី ជីនពីង ទើបតែធ្វើដំណើរទៅដល់ដែនដីម៉ាកាវ ដើម្បីប្រារព្ធកម្មវិធីបុណ្យខួបនេះ យ៉ាងអធិកអធម្ម។ ការយាមកាមសន្តិសុខ នៅមាត់ច្រកចេញចូលតំបន់ម៉ាកាវ ត្រូវបានគេរិតបង្តឹងយ៉ាងខ្លាំង។ ពិធីបុណ្យខួប២០ឆ្នាំ ដែលលោកប្រធានាធិបតីចិន និងធ្វើជាអធិបតីនៅម៉ាកាវនេះ ត្រូវបានអ្នកវិភាគគិតថា គឺជាឱកាស ដែលលោកស៊ី ជីនពីង ចង់ប្រាប់ទៅហុងកុងថា ហុងកុងត្រួវតែយកគម្រូតាមម៉ាកាវ ដើម្បីរក្សាស្ថិរភាព រួមរស់ក្នុងមហាគ្រួសារចិនដោយសុខសាន្ត ក្រោមដំបូលរបស់គណបក្សកុម្មុយនីស្តចិន តែមួយ។
ទស្សនកិច្ចរយៈពេល២ថ្ងៃ របស់លោកប្រធានាធិបតីចិន នៅមុនដល់ថ្ងៃប្រារព្ធពិធីបុណ្យខួប២០ឆ្នាំនៅម៉ាកាវនេះ គឺជាការបង្ហាញប្រាប់ថា លោកស៊ី ជីនពីង ផ្តល់សារៈសំខាន់ខ្លាំងណាស់ ដល់ដែនដីស្វយ័តម៉ាកាវ។ ទាក់ទិននឹងកាលវិភាគនៃសកម្មភាពរបស់លោកស៊ី ជីនពីង ក្នុងរយៈពេល២ថ្ងៃនេះ គឺអាជ្ញាធរបានជូនដំណឹងយ៉ាងតិចតួចបំផុត។
នៅថ្ងៃព្រហស្បតិ៍ ពេលរសៀល លោកស៊ី ជីនពីង នឹងជួបប្រជុំជាមួយថ្នាក់ដឹកនាំរដ្ឋបាលដែនដីស្វយត័ម៉ាកាវ។ ហើយពេលល្ងាច នឹងមានពិធីលាងសាយភោគដ៏ធំមួយ អមដោយការសំដែងសិល្បៈ ទស្សនីយភាពថែមទៀតផត។ នៅថ្ងៃសុក្រពេលព្រឹក លោកប្រធានាធិបតីចិន និងធ្វើជាអធិបតី ក្នុងការស្បថ ចូលកាន់តំណែងអាណត្តិថ្មី របស់លោក ហូ ឡាត់សេង ក្នុងនាមជាប្រមុខរដ្ឋបាលម៉ាកាវ។ ចំណែកពេលរសៀល នឹងមានកម្មវិធីផ្សេងទៀត ទាក់ទិននឹងការប្រារព្ធខួប២០ឆ្នាំ នាំការប្រគល់ដែនដីម៉ាកាវ មកឲ្យចិនកាន់កាប់វិញ។
ទស្សនកិច្ចក្រោមការយាមកាមសន្តិសុខ ដ៏តឹងតែង
ដំណើរមកដល់របស់លោកប្រធានាធិបតីចិន និងភរិយា នៅម៉ាកាវនាពេលនេះ ត្រូវស្ថិតក្នុងការយាមកាមសន្តិសុខ យ៉ាងតឹងតែង។ ការចេញចូលម៉ាកាវ មិនថាតាមផ្លូវទឹក ផ្លូវគោក ឬផ្លូវអាកាស ត្រូវស្ថិតក្រោមការឆែកឆេ យ៉ាងតឹងតែង។ ផ្លូវធំក្នុងទីក្រុងមួយចំនួន ត្រូវបិទមិនឲ្យមានចរាចរណ៍។ រថភ្លើងក្រោមដីមួយខ្សែដំបូង ដែលទើបតែដាក់ឲ្យដំណើរការបាន១សប្តាហ៍នោះ ក៏ត្រូវបិទសិនដែរ។ ចំណែកច្រកចូល មកម៉ាកាវ តាមតំបន់ជូហៃ ដែលមានស្ពានឆ្លងពីហុងកុងមក ត្រូវស្ថិតក្រោមការត្រួតពិនិត្យឆែកឆេ យ៉ាងម៉ដ្ឋចត់។
តាមរយៈវិធានការសន្តិសុខ ដ៏ប្រុងប្រយត្ននេះ គឺអាជ្ញាធរម៉ាកាវ ចង់ទប់ស្កាត់ សកម្មភាពបាតុកម្មក្នុងទ្រង់ទ្រាយណាមួយ ដែលឆ្លងមកពីហុងកុង។ យ៉ាងណាមិញ អ្នកកាសែតហុងកុងមួយចំនួនធំ ដែលធ្វើការឲ្យកាសែតបរទេស ត្រូវបានគេហាមឃាត់ មិនឲ្យចូលទៅយកព័ត៌មាននៅម៉ាកាវ នៅក្នុងឱកាសនេះទេ។
ម៉ាកាវស្តាប់បង្គាប់ ហុងកុងវិញរឹងរូស
តំបន់ម៉ាកាវ ធ្លាប់ស្ថិតក្រោមអាណានិគមព័រទុយហ្កាល់ រយៈពេលប្រមាណ៤០០ឆ្នាំ មុននឹងប្រគល់ទៅឲ្យចិនគ្រប់គ្រងវិញ នៅឆ្នាំ១៩៩៩ ពោលគឺក្រោយអង់គ្លេសប្រគល់ហុងកុងឲ្យចិនវិញ ចំនួន២ឆ្នាំ។ តំបន់ទាំង២នេះ មានលក្ខន្តិកៈស្វយ័តពិសេសដូចគ្នា ដែលគេហៅថា "ប្រទេសតែមួយរបបគ្រប់គ្រង២"។
ក៏ប៉ុន្តែ ឆ្លងកាត់រយៈពេល២០ឆ្នាំនេះ ហុងកុង និងម៉ាកាវខុសគ្នាឆ្ងាយណាស់។ ម៉ាកាវបានរួមរស់ក្រោមម្លប់បក្សកុម្មុយនីស្តចិនប៉េកាំង ដោយស្ងាត់ស្ងៀម ខណៈដែលហុងកុងវិញ នៅតែបន្តមានៈ មិនចង់ស្ថិតក្រោមការកៀបសង្កត់ ការបំបិទសិទ្ធិសេរីភាពពីសំណាក់ចិនកុម្មុយនិស្ត។ អ្នកវិភាគខ្លះលើកឡើងថា ម៉ាកាវបានជ្រើសយកផ្លូវទន់ភ្លន់ ស្តាប់បង្គាប់ចិនដីគោក ដើម្បីសំងំយកសុខ។
ភាពខុសគ្នារវាងម៉ាកាវ និងហុងកុង គឺមានច្រើនណាស់ ដែលធ្វើឲ្យការយល់ឃើញ ការចង់បានរបស់ប្រជាជននៅតំបន់ទាំង២នេះ មានលក្ខណៈខុសគ្នាដែរ។ ក្នុងចំណោមប្រជាជនម៉ាកាវប្រមាណ៧សែននាក់ បច្ចុប្បន្ននេះ ជាងពាក់កណ្តាល គឺសុទ្ធតែជាអ្នកចំណូលថ្មី មកពីចិនដីគោក។ នេះជាមូលហេតុមួយ ដែលបញ្ជាក់ពីភាពស្និទ្ធស្នាល កៀកទៅខាងចិនដីគោកខ្លាំង។ ចំណែកហុងកុងវិញ ប្រជាជនភាគច្រើនលើសលប់ គឺកើតនៅហុងកុង មានទំនៀបទម្លាប់ មានការអប់រំ បែបបច្ចឹមលោក មិនដូចចិនដីគោកទេ។
យកចំណូលពីបនល្បែង មកទិញទឹកចិត្តប្រជាជន
ប្រមាណ២០ឆ្នាំ ក្រោមការគ្រប់គ្រងរបស់ចិន គេបានកែប្រែតំបន់ម៉ាកាវ ឲ្យក្លាយជាស្ថានសួគ៌បនល្បែង កន្លែងលាងលុយក្រខ្វក់ របស់ចិនដីគោកទាំងមូលតែម្តង។ កាស៊ីណូ ទាំង៣៥នៅម៉ាកាវ រកចំណូលមួយឆ្នាំៗ បានដល់ទៅ៣ម៉ឺនលានអឺរ៉ូ។ ក្នុងមួយអាទិត្យកាស៊ីណូម៉ាកាវ រកចំណូលបានស្មើនឹងកាស៊ីណូឡាសវ៉េហ្កាស មួយខែ។ នៅឆ្នាំ១៩៩៩ ម៉ាកាវ មានចំណូលដុលសរុប ប្រមាណតែ៦៤០០លានដុល្លារទេ។ តែឥឡូវវិញ ម៉ាកាវមានចំណូលដុលសរុប ដល់ទៅ៥ម៉ឺន៥ពាន់លានដុល្លារ។
ប្រាក់ចំណូលទាំងនេះ ត្រូវបានថ្នាក់ដឹកនាំម៉ាកាវ យកមកប្រើ ដើម្បីទិញទឹកចិត្តប្រជាជនម៉ាកាវ។ ប្រាក់ខែជាមធ្យមនៅម៉ាកាវ គឺប្រមាណជា២២០០អឺរ៉ូ។ ៧០%នៃប្រជាជនម៉ាកាវ មានផ្ទះជាកម្មសិទ្ធិខ្លួនឯង។ ពោលគឺគេយកប្រាក់ យកស្ថិរភាពហិរញ្ញវត្ថុរបស់ប្រជាជន ជាលេសដើម្បីកុំឲ្យប្រជាជនម៉ាកាវ គិតខ្វល់ពីសិទ្ធិសេរីភាព ឬបញ្ហានយោបាយ។
ក្នុងចំណោមសមាជិក នៃគណកម្មាធិការកណ្តាលតំបន់ម៉ាកាវ ដែលមានគ្នា៤០០នាក់ គឺសុទ្ធតែជាមនុស្ស ស្និទនឹងបក្សកុម្មុយនីស្តប៉េកាំងទាំងអស់។ គឺគណកម្មាធិការនេះហើយ ដែលជាអ្នកបោះឆ្នោតតែងតាំងប្រមុខរដ្ឋបាលម៉ាកាវ ទៅតាមការគូសវាស របស់គណបក្សកុម្មុយនីស្តចិន។
មានដែរ អ្នករិះគន់អ្នកតវ៉ា ប្រឆាំងចិននៅម៉ាកាវ តែមានតិចណាស់។ មានយុវជននិស្សិតម៉ាកាវ មួយចំនួនតូចដែរ ដែលបានទៅហុងកុង ចូលរួមធ្វើបាតុកម្មកន្លងមកនេះ។
ចិនចង់ឲ្យហុងកុង និងតៃវ៉ាន់ យកគម្រូ តាមម៉ាកាវ
ចង់មិនចង់ ទស្សនកិច្ចទៅម៉ាកាវ របស់លោកស៊ី ជីនពីង គឺបង្ហាញពីភាពត្រូវរ៉ូវ ស្និទស្នាលគ្នា រវាងចិនដីគោក និងម៉ាកាវ។ រវាងម៉ាកាវ ដែលស្តាប់បង្គាប់ និងហុងកុងដែលចចេសរឹងរូស គឺចិនច្បាស់ជាចង់ឃើញហុងកុង ដើរតាមគម្រូរបស់ម៉ាកាវហើយ។ នៅក្នុងអត្ថបទវិចារណកថា របស់កាសែត Xinhua ដែលជាកាសែតផ្លូវការរបស់ចិន គេបានសរសេរថា "ម៉ាកាវ គឺជាគម្រូ នៃការការពាររដ្ឋធម្មនុញ្ញចិន ព្រមទាំងការបង្រួបបង្រួមដែនដីចិនតែមួយ"។
មានផែនការបញ្ជ្រាបមនោគមវិជ្ជារបស់ចិនកុម្មុយនីស្ត ជាច្រើន ដែលគេបានធ្វើនៅម៉ាកាវ។ តួយ៉ាងកម្មវិធីសិក្សានៅតាមសាលា សៀវភៅប្រវត្តិសាស្ត្រ ដែលឃោសនាភាពស្មារតីស្នេហាជាតិ ការពាររបបសង្គមនិយមចិន ត្រូវបានគេអនុវត្តនៅម៉ាកាវ ដើម្បីអប់រំក្មេងជំនាន់ក្រោយ ឲ្យដើរតាមមាគ៌ាចិនប៉េកាំង។ តែវិធានការស្រដៀងគ្នានេះ គេមិនអាចយកទៅអនុវត្តនៅហុងកុងទេ ព្រោះប្រជាជនហុងកុងបដិសេធ។
ចិន មិនមែនចង់ឲ្យតែហុងកុងមួយទេ យកគម្រូតាមម៉ាកាវ តៃវ៉ាន់ក៏ដូច្នោះដែរ។ ទស្សនៈនយោបាយ ការចង់បានរបស់គណបក្សកុម្មុយនិស្តចិន គឺដែនដីស្វយ័តទាំងអស់ មិនថាហុងកុង មិនថាតៃវ៉ាន់ គឺជារបស់ចិន ហើយត្រូវតែស្តាប់បង្គាប់ចិន ជាថ្នូរនឹងស្ថិរភាព ការរីកចំរើនសេដ្ឋកិច្ច ដូចនៅម៉ាកាវ។
តែយ៉ាងណា គម្រូសេដ្ឋកិច្ច និងនយោបាយនៅម៉ាកាវ មិនត្រូវបានប្រជាជនហុងកុង ឬតៃវ៉ាន់ គេត្រេកត្រអាលជាមួយទេ។ ប្រជាជនតៃវ៉ាន់ និងហុងកុង សួរខ្លួនគេថា តើសេដ្ឋកិច្ចរីកចម្រើន មានចំណូល ដោយសារបនល្បែងលាងលុយក្រខ្វក់មិនស្របច្បាប់ ហើយសុខចិត្តបិទមាត់គ្មានសិទ្ធិសេរីភាព ដូចម៉ាកាវ រាល់ថ្ងៃនេះ តើវាមានន័យអ្វីទៅ? គឺវាគ្មានន័យទេសម្រាប់ពួកគេ ដែលស្រលាញ់សិទ្ធិសេរីភាព ស្រលាញ់ប្រជាធិបតេយ្យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ