បោះឆ្នោតប្រធានាធិបតីអាមេរិក៖លោកដូណាល់ ត្រាំ និងលោកចូ បៃដិនជជែកដេញដោលលើកទី១ រយៈពេល ៩០នាទី Non Stop
ចុះផ្សាយនៅថ្ងៃ៖
ស្តាប់ - ០៧:១៨
នៅសហរដ្ឋអាមេរិក វេទិកាជជែកដេញដោលតាមកញ្ចក់ទូរទស្សន៍លើកទី១ រវាងបេក្ខជនប្រធានាធិបតីមកពីគណបក្សសាធារណរដ្ឋលោកដូណាល់ ត្រាំ និងបេក្ខជនប្រធានាធិបតីមកពីគណបក្សប្រជាធិបតេយ្យលោកចូ បៃដិនចាប់ផ្តើមក្នុងថ្ងៃអង្គារ ទី២៩ កញ្ញានៅក្នុងរដ្ឋអូហៃយ៉ូ។ វេទិកាជជែកដេញដោលនេះរៀបចំដោយទូរទស្សន៍ Fox News នៅក្នុងសាលធំមួយក្នុងរដ្ឋអូហៃយ៉ូ។ ចំណែកអ្នកកាសែតដែលដឹកនាំវេទិកានេះ គឺលោកគ្រីស វ៉ាឡេសដែលជាអ្នកកាសែតដ៏ល្បីនៅអាមេរិក និងដែលទទួលបានការគោរពពីបេក្ខជនប្រធានាធិបតីទាំងពីរនាក់។ ការរៀបចំវេទិកាដេញដោលប្រធានាធិបតីនេះធ្វើឡើង នៅ ៣៥ថ្ងៃមុនការរៀបចំបោះឆ្នោតនៅថ្ងៃទី៣ វិច្ឆិកា។ តែអ្វីជាការកត់សម្គាល់ វេទិកាលើកនេះធ្វើឡើងនៅក្នុងបរិបទនៃការញាំញីដោយជំងឺកូវីដ១៩។
វេទិកាជជែកដេញដោលរវាងបេក្ខជនប្រធានាធិបតីអាមេរិកតាមកញ្ចក់ទូរទស្សន៍នៅមុនការបោះឆ្នោតបានរៀបចំតាំងពី ៦០ឆ្នាំដែលវេទិកាលើកទី១ ជាការជជែកដេញដោលរវាងលោក John F.Kennedy និងលោក Richard Nixon។ ម្យ៉ាងទៀត វេទិកាជជែកដេញដោលនេះត្រូវរៀបចំចំនួន ៤ដង គឺ ៣ដងរវាងបេក្ខជនប្រធានាធិបតី និង ១ដងរវាងបេក្ខជនអនុប្រធានាធិបតី។ វេទិកាជជែកដេញដោលរវាងលោកត្រាំអាយុ ៧៤ឆ្នាំ និងលោកបៃដិនអាយុ ៧៧ឆ្នាំលើកទី១ រៀបចំក្នុងថ្ងៃអង្គារ ទី២៩ កញ្ញា និងបន្តដោយវេទិកាជជែកដេញដោលរវាងបេក្ខជនអនុប្រធានាធិបតីនៅថ្ងៃទី៧ តុលា។ បន្ទាប់មក លោកត្រាំ និងលោកបៃដិនគ្រោងជជែកដេញដោលគ្នាលើកទី២ នៅថ្ងៃទី១៥ តុលា និងលើកទី៣ នៅថ្ងៃទី២២ តុលា។
វេទិកាជជែកដេញដោលរវាងលោកត្រាំ និងលោកបៃដិនលើកទី១ រៀបចំដោយទូរទស្សន៍ Fox Newsនៅក្នុងសាលធំមួយស្ថិតក្នុងរដ្ឋអូហៃយ៉ូ និងមានរយៈពេល ៩០នាទី Non Stop ដោយគ្មានការឈប់សម្រាកដើម្បីចាក់ផ្សាយពាណិជ្ជកម្ម និងដឹកនាំដោយអ្នកកាសែតលោកគ្រីស វ៉ាឡេស។ តាមធម្មតា មានមនុស្សប្រមាណជា ៩០០នាក់ចូលរួមទស្សនាផ្ទាល់នៅក្នុងសាលរៀបចំវេទិកា។ តែកូវីដ១៩ បានកម្រិតអ្នកចូលទស្សនាផ្ទាល់តែពី ៨០ ទៅ ៩០នាក់ នេះជាការបញ្ជាក់របស់លោក Frank Fahrenkopf សហប្រធានគណៈកម្មការរៀបចំវេទិកាជជែកដេញដោលប្រធានាធិបតី។ ទន្ទឹមគ្នានេះ អ្នកចូលរួមទស្សនាផ្ទាល់ត្រូវបង្ហាញលទ្ធផលតេស្តិ៍កូវីដ១៩ អវិជ្ជមាន និងត្រូវពាក់ម៉ាស។
ដោយឡែក ការជម្រាបសួរដោយចាប់ដៃ ឬជល់កែងដៃគ្នាក៏ត្រូវហាមឃាត់ ទោះជារវាងលោកដូណាល់ ត្រាំ និងលោកចូ បៃដិន។ អ្នកចូលរួមទស្សនាដោយផ្ទាល់មានតិច តែចំនួនពលរដ្ឋអាមេរិកទស្សនាតាមទូរទស្សន៍អាចមានដល់ទៅជាង ១០០លាននាក់។ ទាក់ទងនឹងសន្តិសុខ ទីកន្លែងរៀបចំវេទិកាមានដាក់ពង្រាយដោយកម្លាំងឆ្មាំជាតិយ៉ាងច្រើនសម្បើម ព្រោះនៅក្បែរទីកន្លែងរៀបចំវេទិកាក៏អាចមានបាតុកម្មពីក្រុមសកម្មជនគាំទ្រលោកត្រាំ និងលោកបែដិន។
វេទិកាជជែកដេញដោលផ្តោតលើប្រធានបទធំៗចំនួន ៦
មានសំណុំរឿងធំៗចំនួន ៦ ដែលអ្នកដឹកនាំវេទិកាលោកគ្រីស វ៉ាឡេសបានជ្រើសរើសសម្រាប់ការជជែកដេញដោលតទល់លើកទី១ រវាងលោកដូណាល់ ត្រាំ និងលោកចូ បៃដិន ហើយសំណុំរឿងនីមួយៗត្រូវប្រើពេលជជែកដេញដោលគ្នាតែ ១៥នាទី។ អ្នកដឹកនាំវេទិកាអាចឲ្យលោកត្រាំ និងលោកបៃដិននិយាយមុនម្តងម្នាក់ដោយមានការជជែកដេញដោលគ្នាសម្រាប់សំណុំរឿងនីមួយៗ។ ប្រធានបទធំៗចំនួន ៦ ដែលបានជ្រើសរើសមានដូចជារឿងតុលាការកំពូលដោយផ្តោតលើការតែងតាំងលោកស្រីអេមី ខូនី បារ៉េតឲ្យធ្វើជាចៅក្រមតុលាការកំពូលពីលោកត្រាំ និងដែលលោកចូ បៃដិនចង់ឲ្យការតែងតាំងនេះធ្វើឡើងនៅក្រោយការបោះឆ្នោតប្រធានាធិបតីថ្ងៃទី៣ វិច្ឆិកា។
បន្ទាប់មកមានស្ថានភាពជំងឺកូវីដ១៩ និងការគ្រប់គ្រងជំងឺមួយនេះដែលអាមេរិកកំពុងមានអ្នកឆ្លង និងអ្នកស្លាប់ច្រើនជាងគេក្នុងលោក វិបត្តិសេដ្ឋកិច្ចដែលបានបង្កឡើងដោយកូវីដ១៩ ឬមួយក៏ភាពតានតឹងក្នុងរឿងប្រកាន់ពូជសាសន៍ តាំងពីក្រោយការស្លាប់ជនជាតិអាមេរិកស្បែកខ្មៅលោក George Floyd។ បន្ទាប់មកទៀតក៏នៅមានរឿងរ៉ាវទម្លាយដោយកាសែត New York Times ដែលបញ្ជាក់ថា មហាសេដ្ឋីត្រាំបានបង់ពន្ធលើប្រាក់ចំណូលប្រចាំឆ្នាំតែ ៧៥០ដុល្លារប៉ុណ្ណោះក្នុងឆ្នាំ២០១៦ ដែលជាឆ្នាំលោកជាប់ឆ្នោតប្រធានាធិបតី និងឆ្នាំ ២០១៧។ ព័ត៌មានមួយនេះត្រូវបានលោកបៃដិនឌឺដងដាក់លោកត្រាំថា ក្នុងនាមជាមហាសេដ្ឋី និងជាប្រធានាធិបតី លោកត្រាំបែរជាបានបង់ពន្ធលើប្រាក់ចំណូលប្រចាំឆ្នាំតិចជាអ្នកពន្លត់អគ្គីភ័យ ឬគ្រូបង្រៀនទៅទៀត។
វេទិកាជជែកដេញដោលជាកត្តាជួយឲ្យអ្នកបោះឆ្នោតធ្វើការសម្រេចចិត្តនៅក្នុងជម្រើសបេក្ខជន?
វេទិកាជជែកដេញដោលរវាងបេក្ខជនប្រធានាធិបតីនៅមុនការបោះឆ្នោតមានសារៈសំខាន់ខ្លាំងណាស់សម្រាប់បេក្ខជនម្នាក់ៗ។ សំខាន់ព្រោះវាអាចជួយឲ្យអ្នកដែលនៅបន្តអល់អែកមិនដឹងបោះឆ្នោតឲ្យលោកត្រាំ ឬលោកបៃដិនអាចសម្រេចចិត្តភ្លាម បន្ទាប់ពីបានស្តាប់ការជជែកដេញដោលគ្នារវាងបេក្ខជនទាំងពីរ។ ម្យ៉ាងទៀត វេទិការបៀបនេះក៏អាចជួយស្រោចស្រង់ប្រជាប្រិយភាពរបស់បេក្ខជនណាដែលកំពុងចាញ់ប្រៀបបេក្ខជនគូប្រជែងរបស់ខ្លួនដែរ។ វេទិការវាងលោកត្រាំ និងលោកបៃដិនពេលនេះត្រូវបានគេមើលឃើញថា លោកត្រាំហាក់កំពុងទទួលសម្ពាធខ្លាំងជាងលោកបៃដិន ព្រោះលោកបៃដិនកំពុងមានប្រៀបជាងលោកត្រាំ។ លទ្ធផលស្ទង់មតិធ្វើពីថ្ងៃទី២៤ ដល់ថ្ងៃទី២៧ កញ្ញាដោយសួរទៅលើមនុស្សចំនួន ៨០៩នាក់ឲ្យដឹងថា អ្នកចង់បោះឆ្នោតឲ្យលោកបៃដិនមាន ៥០% ហើយអ្នកចង់បោះឆ្នោតឲ្យលោកត្រាំមានត្រឹម ៤៥% ប៉ុណ្ណោះ។
ទន្ទឹមគ្នានេះ លោកត្រាំក៏កំពុងស្ថិតក្នុងស្ថានភាពមួយពិបាកខ្លាំងដោយសារតែរយៈពេលចុងក្រោយនេះ លោកមិនញញើតនឹងវាយប្រហារលោកបៃដិនដោយហៅលោកបៃដិនជា « Sleepy Joe »ថាលោកបៃដិនជាមនុស្សជរាគ្មានសមត្ថភាពដឹកនាំ ឬមួយក៏បបួលលោកបៃដិនឲ្យទៅធ្វើតេស្តិ៍រកថ្នាំជំនួយកម្លាំងដោយលោកត្រាំយល់ថា លោកបៃដិនប្រហែលជាបានប្រើថ្នាំជំនួយកម្លាំង មុននឹងឡើងតទល់ជាមួយលោក។ តាមលោក Frank Fahrenkopf ដែលជាសហប្រធានគណៈកម្មការរៀបចំវេទិកាជជែកដេញដោលប្រធានាធិបតី មានពលរដ្ឋអាមេរិកពី ៧០% ទៅ ៧៥% បានចាត់ទុកវេទិកាជជែកដេញដោលរវាងបេក្ខជនប្រធានាធិបតីជាកត្តាសំខាន់នៅក្នុងជម្រើសបេក្ខជនដែលពួកគេបោះឆ្នោតឲ្យ។
តែលោក Frank Fahrenkopf បានបន្ថែមថា វេទិកានេះមិនមែនជាកត្តាតែមួយ និងសំខាន់ជាងគេទេ ពោលគ្រាន់ជាកត្តាមួយក្នុងចំណោមកត្តាផ្សេងទៀតប៉ុណ្ណោះ។ យ៉ាងណាក៏ដោយ គេបានសង្កេតឃើញជារួមថា វេទិកាជជែកដេញដោលនេះកម្រធ្វើឲ្យអ្នកសម្រេចចិត្តបោះឆ្នោតឲ្យបេក្ខជនណាមួយហើយប្តូរចិត្តវិញណាស់។ មួយវិញទៀត បេក្ខជនដែលមានប្រៀបនៅក្នុងវេទិកាជជែកដេញដោលនេះក៏មិនប្រាកដនឹងអ្នកឈ្នះឆ្នោតក្លាយជាប្រធានាធិបតីដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ