លោក ដូណាល់ ត្រាំ សន្យារកវ៉ាក់សាំងប្រឆាំងកូវីដ១៩ ឱ្យបាន មុនដាច់ឆ្នាំ
ចុះផ្សាយនៅថ្ងៃ៖
ស្តាប់ - ០៧:២៦
នៅសហរដ្ឋអាមេរិក ថ្ងៃទី២៧ សីហា គណបក្សសាធារណរដ្ឋ បានបញ្ចប់សមាជចំនួន៤ថ្ងៃ ដោយសម្រេចជ្រើសតាំងជាផ្លូវការ លោក ដូណាល់ ត្រាំ ជាបេក្ខជនប្រធានាធិបតីរបស់ខ្លួន។ ក្នុងនាមជាបេក្ខជនប្រធានាធិបតីសហរដ្ឋអាមេរិក លោក ដូណាល់ ត្រាំ បានសន្យាថានឹងរកវ៉ាក់សាំងប្រឆាំងកូវីដ១៩ ឱ្យបាន មុនដាច់ឆ្នាំ២០២០។ នេះជាការសន្យាដ៏ចម្បងមួយ នៅក្នុងចំណោមវោហារសាស្ត្រ ជាងមួយម៉ោង របស់លោក ត្រាំ ក្នុងនាមជាបេក្ខជនប្រធានាធិបតីអាមេរិក អាណត្តិទី២ ដែលនឹងត្រូវបោះឆ្នោត នៅថ្ងៃទី៣វិច្ឆិកា ខាងមុខនេះ។ ក្រៅពីសន្យារកវ៉ាក់សាំងឱ្យឃើញ តើលោក ដូណាល់ ត្រាំ បានសន្យាអ្វីខ្លះទៀត ?
ក្នុងសុន្ទរកថារយៈជាង៧០នាទី លោក ដូណាល់ ត្រាំ សន្យាថានឹងផ្តល់«វ៉ាក់សាំងទប់ទល់នឹងមេរោគកូវីដ១៩ នៅឆ្នាំនេះ» និង«ផ្តល់ជូនដោយឥតគិតថ្លៃ»។
ជាការឃោសនាទាក់ទាញទឹកចិត្តម្ចាស់ឆ្នោត លោក ដូណាល់ ត្រាំ សន្យាថានឹងប្រមូលគ្រប់អ្នកវិទ្យាសាស្ត្រល្បីៗរបស់អាមេរិក ដើម្បីស្រាវជ្រាវផលិតវ៉ាក់សាំងប្រឆាំងនឹងកូវីដ១៩ ឱ្យបាននៅឆ្នាំនេះ ឬ ឱ្យបានមុនដាច់ឆ្នាំផង។ នេះជាការសន្យាមួយ យ៉ាងចម្បង ដ៏មានឥទ្ធិពលបំផុត នៅក្នុងឱកាសនេះ ព្រោះថា សហរដ្ឋអាមេរិក មានអ្នកស្លាប់ព្រោះតែមេរោគកូវីដ១៩ គឺស្លាប់ ជាង ១សែន ៨ម៉ឺននាក់។ សហរដ្ឋអាមេរិកជាប់ឈ្មោះលេខ១ ដែលឆ្លងមេរោគកូរ៉ូណាថ្មី ច្រើនជាគេលើពិភពលោក។
ក៏ប៉ុន្តែ លោក សម្រេចជ្រើសរើសធ្វើមីទ្ទីញជួបជុំគ្នា ដោយមានមនុស្សចូលរួម ដល់ទៅប្រមាណ ១៥០០នាក់ឯណោះ។ អ្នកកាសែតអន្តរជាតិសង្កេតថា មានអ្នកពាក់ម៉ាស់តិចតួច និងមិនសូវគោរពការរក្សាគម្លាតគ្នាទេ។ ខុសពីបក្សប្រជាជាធិបតេយ្យ ដែលជ្រើសរើសការថ្លែងឃោសនាតាមវីដេអូ កាលពីសប្តាហ៍មុន។
លោក ត្រាំ បានកោតសរសើរពីស្នាដៃរបស់ខ្លួន ជិត៤ឆ្នាំមកនេះ តួយ៉ាងការសើរើកិច្ចចរចាពាណិជ្ជកម្ម, ការនាំមកនូវកំណើនសេដ្ឋកិច្ច, បន្ទាបការបង់ពន្ធ ជាដើម។ លោកថែមទាំងបញ្ចូលការឃោសនាបោះឆ្នោតថានឹងធ្វើឱ្យសេដ្ឋកិច្ចសហរដ្ឋអាមេរិករីកចម្រើន មិនធ្លាប់មានក្នុងប្រវត្តិសាស្ត្រ។ លោក ដូណាល់ ត្រាំ ថានឹងដាក់ពន្ធសង្កត់កឱ្យធ្ងន់ចំពោះក្រុមហ៊ុនអាមេរិកណា ដែលទៅបង្កើតការងារនៅបរទេស ឬទៅតាំងទីស្នាក់ការនៅក្រៅស្រុក។ ចំពោះកិច្ចការនេះ លោកអះអាងថាបានចាប់ផ្តើមធ្វើ ជាបណ្តើរៗរួចមកហើយ។ លោក ដូណាល់ ត្រាំ បង្ហើរសម្តីថា«យើងធានាថាក្រុមហ៊ុនរបស់អាមេរិកយើង នឹងបង្កើតការងារនៅក្នុងស្រុកអាមេរិក សម្រាប់ពលរដ្ឋអាមេរិក។»
ក្នុងនាមជាគូប្រជែងលោក ដូណាល់ ត្រាំ បានចោទលោក ចូ បាយដិន ថា ក្បត់ជាតិ ហើយកម្មវិធីនយោបាយរបស់លោក បាយដិន គឺជារបស់ចិន។
នេះជាវោហាសាស្ត្រវាយប្រហារគ្នាទៅវិញទៅមក តាមទម្លាប់អ្នកនយោបាយ។ លោក ដូណាល់ ត្រាំ ចោទគូប្រជែងរបស់ខ្លួន និងចោទប្រទេសចិន ថាស្រុកចិនចង់ឃើញលោក ចូ បាយដិន ឈ្នះឆ្នោត។ កម្មវិធីនយោបាយរបស់ ចូ បាយដិន ជាកម្មវិធីផលិតនៅស្រុកចិន Made in China ដែលខុសពីកម្មវិធីនយោបាយរបស់គាត់ គឺផលិតនៅអាមេរិក ដើម្បីពលរដ្ឋអាមេរិក។
លោក ត្រាំ បានពន្យល់អំណះអំណាងជាច្រើន ដើម្បីការពារជំហររបស់គាត់។ ចំពោះលោក ត្រាំ គឺមានក្រុមសាធារណរដ្ឋរបស់គាត់ ដែលការពារគម្រោងសង់ជញ្ជាំងបិទព្រំដែនកុំឱ្យជនភៀសខ្លួនហូរចូលពីម៉ិចសិក និងបង្កើនកញ្ចប់ថវិកាភ្នាក់ងារប៉ូលីស។ បើក្រុមបក្សប្រជាធិបតេយ្យនិងលោក បាយដិន ឈ្នះឆ្នោត នោះគឺច្បាស់ជារំលាយជញ្ជាំងព្រំដែននេះហើយ និងច្បាស់ជា កាត់បន្ថយកញ្ចប់លុយរបស់ក្រុមនគរបាល។
ចំពោះលោក ត្រាំ និងរដ្ឋបាលរបស់គាត់ គឺនៅតែរក្សាជំហរ«បន្តឹងច្បាប់ និង ពង្រឹងសណ្តាប់ធ្នាប់»។ លោក ដូណាល់ ត្រាំ បានសង្កត់ថា បើក្រុមប្រជាធិបតេយ្យឈ្នះឆ្នោត ប្រសិនបើអាមេរិកនៅក្រោមការគ្រប់គ្រងរបស់លោក ចូ បាយដិន គឺពួកគេនឹងធ្វើច្បាប់គ្រប់គ្រងអាវុធ ឬដកហូតកាំភ្លើង អ៊ីចឹងគឺគ្មាននរណាម្នាក់មានសុវត្ថិភាពមានសន្តិសុខនោះឡើយ។
គេគួរបញ្ជាក់ត្រង់នេះថា សហរដ្ឋអាមេរិកនិងរដ្ឋអំណាចសព្វថ្ងៃ ឱ្យតម្លៃខ្លាំងលើសិទ្ធកាន់កាប់អាវុធ និងទិញលក់អាវុធយ៉ាងទូលំទូលាយ ដោយគេជឿថា ការមានអាវុធនៅក្នុងដៃ និងនៅតាមផ្ទះ គឺអាចជួយរក្សាសុវត្ថិភាពរបស់ពួកគេ។ សិទ្ធនេះមានចែងក្នុងរដ្ឋធម្មនុញ្ញផង។ ក៏ប៉ុន្តែសេរីភាពកាន់អាវុធ ក៏អាចមានអំពើហិង្សាបាញ់បោះសេរីដែរ។
យ៉ាងណាក៏ដោយចុះ លោក ដូណាល់ ត្រាំ បានអំពាវនាវឱ្យពលរដ្ឋអាមេរិក នាំគ្នាបោះឆ្នោតឱ្យរូបលោកកាន់តំណែងបួនឆ្នាំទៀត។ មហាសេដ្ឋីអចលនាទ្រព្យរូបនេះ ថែមទាំងអួតលើកសរសើរខ្លួនឯងថា មានតែរូបគាត់ម្នាក់ទេ ដែលអាចមានសមត្ថភាពដោះស្រាយបញ្ហាអាមេរិកបាន។
រដ្ឋបាលរបស់លោក ដូណាល់ ត្រាំ ក្រពុលខ្លាំងនឹងចលនាបាតុកម្ម។ លោក ដូណាល់ ត្រាំ ក៏លំបាកនឹងសម្រន់កំហឹងរបស់បាតុករបានដែរ ពិសេសចលនាទាមទារសិទ្ធនិងកុំឱ្យរើសអើងពលរដ្ឋស្បែកខ្មៅ។
មរណភាព របស់បុរសស្បែកខ្មៅ George Floyd ក្រោមដៃប៉ូលីសស្បែកស នៅខែមេសា បានបញ្ឆេះកំហឹងពលរដ្ឋអាមេរិកខ្លាំង ហើយត្រូវជាន់ចំមរណភាពបុរសស្បែកខ្មែរម្នាក់ទៀត ក្រោមដៃប៉ូលីសស្បែកសដែរ នៅថ្ងៃអាទិត្យកន្លងទៅនេះ គឺដូចជាយកសាំងចាក់លើភ្លើង។ ចលនាបាតុកម្ម កក្រើកសន្ធឹក ធ្វើឱ្យប៉ះទង្គិច ស្លាប់មនុស្សពីរនាក់ទៀត នៅថ្ងៃអង្គារ។ គឺកាន់តែជំរុញបាតុកម្មកាន់តែខ្លាំងឡើង នៅមុខសេតវិមានប្រធានាធិបតីអាមេរិក ទាំងយប់ទាំងថ្ងៃ ប្រឆាំងនឹងរដ្ឋបាលលោក ដូណាល់ ត្រាំ។ នៅថ្ងៃសុក្រ ទី២៨សីហា ក្រុមបាតុកម្មបានសម្រេចធ្វើមហាព្យុះយាត្រា រម្លឹកដល់ មេធាវី Martin Luther King បិតាទាមទារសិទ្ធសេរីភាពនិងការមិនប្រកាន់ពូជាសាសន៍ពណ៌សម្បុរ នៅសហរដ្ឋអាមេរិក។
ការធ្វើបាតុកម្មស្ទើរមិនលួសថ្ងៃដូច្នេះ គឺ ដំបូងឡើងកើតចេញពីការសម្តែងមតិនឹងការគ្រប់គ្រងវិបត្តិកូវីដ ហើយវារាលដល់ការស្លាប់ពលរដ្ឋស្បែកខ្មៅ ដែលដូចជាការឆ្កឹះដំបៅចាស់ដូច្នោះដែរ។ បើគេជឿតាមការស្ទង់មតិ ជុំវិញចំណាត់ការទប់ស្កាត់កូវីដ១៩របស់រដ្ឋបាលលោក ដូណាល់ ត្រាំ គឺមានពលរដ្ឋពេញចិត្ត តែជាង៣៨ភាគរយទេ តែអ្នកមិនសូវសប្បាយចិត្តវិញ ជាង៥៨ភាគរយឯណោះ។ នេះបើតាមការស្ទង់មតិរបស់គេហទំព័រ FiveThirtyEight៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ