លោកដូណាល់ត្រាំ ប្តូរអ្នកដឹកនាំការឃោសនាបោះឆ្នោត ដើម្បីព្យាយាមរកសម្លេងគាំទ្រឡើងវិញ
ចុះផ្សាយនៅថ្ងៃ៖
ស្តាប់ - ០៨:១៥
លោកដូណាល់ ត្រាំ ទើបបានប្រកាសកាលពីថ្ងៃពុធ ទី១៥កក្កដាម្សិលមិញ ដោយបានប្តូរប្រធានដឹកនាំការឃោសនាបោះឆ្នោតរបស់លោក។ ការប្តូរប្រធានឃោសនាបោះឆ្នោត នៅមុនពេលប្រមាណតែ៤ខែ មុនថ្ងៃបោះឆ្នោតនេះ ត្រូវបានអ្នកវិភាគមើលឃើញថា លោកដូណាល់ ត្រាំ កំពុងព្យាយាមស្វែងរកសម្លេងគាំទ្រឡើុងវិញ។ គួរកត់សំគាល់ថា ប្រមាណ២ខែចុងក្រោយនេះ ប្រជាប្រិយភាពរបស់គាត់ បានធ្លាក់ចុះជាលំដាប់ និងត្រូវគេរិះគន់ខ្លាំងៗ ទាក់ទិនបញ្ហាជម្ងឺឆ្លងកូវីដ១៩។ ការឆ្លងរាលដាលកូវីដ១៩នៅសហរដ្ឋអាមេរិក បច្ចុប្បន្ន កំពុងឡើងល្បឿនយ៉ាងរហ័សទប់មិនជាប់ គួរឲ្យព្រួយបារម្ភបំផុត។
ប្រជាប្រិយភាពដាំក្បាលចុះ
នៅបាំងតែប្រមាណ៤ខែទៀតទេ គឺដល់ថ្ងៃបោះឆ្នោតប្រធានធិបតីអាណត្តិថ្មីហើយ ក៏ប៉ុន្តែប្រជាប្រិយភាព របស់លោកដូណាល់ ត្រាំ បានដាំក្បាលចុះយ៉ាងខ្លាំងមួយរយៈចុងក្រោយនេះ។ ហេតុដូច្នេះ បានជាលោកដូណាល់ ត្រាំ បានសម្រេចដកប្រធានចាត់ចែងការឃោសនាបោះឆ្នោត ឈ្មោះ Brad Parscale ហើយដាក់ជំនួសដោយ លោក Bill Stepien ដែលពីមុន ជាអនុប្រធានក្រុមការងារឃោសនា។ តែយ៉ាងណា នៅលើទំព័រ Facebook លោកដូណាល់ ត្រាំ បានបញ្ជាក់ថា លោក Brad Parscale ដែលធ្លាប់ទទួលបន្ទុក យុទ្ធសាស្ត្របច្ចេកវិទ្យា និងស្ថិតិ នៅក្នុងក្រុមការងារឃោសនា តាំងតែពីឆ្នាំ២០១៦នោះ នឹងបន្តរក្សាមុខងារនេះដដែល។
បើតាមការវិភាគ គឺលោកដូណាល់ ត្រាំ មិនសប្បាយចិត្តជាមួយលោកBrad Parscale ទេ គឺដោយសារបរាជ័យយ៉ាងអាម៉ាស នៅក្នុងយុទ្ធនាការធ្វើមេទ្ទីញឃោសនា នៅក្រុង Tulsa រដ្ឋ Oklahoma កាលពីចុងខែមុថិនាកន្លងទៅ។ មេទ្ទីញឃោសនាដែលសឹងតែគ្មានមនុស្សទៅស្តាប់លោកដូណាល់ ត្រាំ ដោយសារមនុស្សខ្លាចឆ្លងជំងឺកូវីដ១៩។
គឺបញ្ហាកូវីដ១៩នេះហើយ ដែលជាកត្តាចំបងធ្វើឲ្យប្រជាប្រិយភាព របស់លោកដូណាល់ ត្រាំបានធ្លាក់ចុះខ្លាំង។ ឲ្យតែមានច្រក មានពន្លឺអ្វីបន្តិច គឺលោកដូណាល់ ត្រាំ ខំយកមកនិយាយភ្លាម ដើម្បីយកមុខ ទាក់ទាញការគាំទ្រឡើងវិញ។ ជាក់ស្តែងដូចយើងឃើញកន្លងមក ជាមួយនឹងថ្នាំ ក្លូរ៉ូគីនដែលលោកដូណាល់ ត្រាំអួតសរសេើរមុនអ្នកជំនាញទៅទៀត។ នៅព្រឹកម្សិលមិញនេះ គ្រាន់តែដឹងដំណឹងពីការវិវិឌ្ឍន៍ឈានចូលដំណាក់កាលសាកល្បងទី៣ នៃវ៉ាក់សាំងការពារកូវីដ១៩ របស់មន្ទីរពិសោធន៍ Moderna លោកដូណាល់ ត្រាំ បានសរសេរលើ Twitter ភ្លាមដែរថាដំណឹងល្អមកដល់ហើយ។ មើលទៅយើងឃើញថាលោកដូណាល់ ត្រាំកំពុងប្រឹងសម្បើមណាស់ ដើម្បីប្រមូលប្រិយភាពឡើងវិញ។
ការគ្រប់គ្រងការឆ្លងរាលដាល នូវកូវីដ១៩នៅសហរដ្ឋអាេមរិក បានក្លាយចំណុចខ្សោយដ៏ធំបំផុត របស់រដ្ឋាភិបាលលោកដូណាល់ ត្រាំ។ នៅរដ្ឋប្រមាណជា៤០រដ្ឋ មេរោគនេះ បានឆ្លងរាលដាលយ៉ាងលឿនបំផុត ប៉ុន្មានថ្ងៃចុងក្រោយនេះ ដោយសារតែគ្មានវិធានការបិទខ្ទប់ និងបង្កា ឲ្យមានប្រសិទ្ធិភាព។ ផ្ទុយទៅវិញ គេសង្កេតឃើញថា លោកដូណាល់ ត្រាំ នៅតែបង្ហាញថាមិនសូវបារម្ភ ហើយថែមទាំងបាននិយាយរិះគន់ ប្រឆាំងនឹងអនុសាសន៍ របស់លោក Anthony Fauci ដែលជាអ្នកជំនាញផ្នែកជំងឺឆ្លងដ៏ល្បីថែមទៀតផង។
មិនចាត់វិធានការទប់ស្កាត់ការឆ្លងរាលដាល បែរជានិយាយរិះគន់អនុសាសន៍អ្នកជំនាញ
យើងអាចចាត់ទុកថាវាជាទម្លាប់ របស់លោកដូណាល់ ត្រាំ ក៏ថាបាន។ តាំងតែពីដើម លោកដូណាល់ ត្រាំ មានទំលាប់ចង្អុរមុខ ទំលាក់កំហុស បន្ទោសលើនរណាម្នាក់ ដើម្បីលើកសរសើរខ្លួនគាត់ ជាជាងស្វែងរកដំណោះស្រាយ។ ជាក់ស្តែង លោកដូណាល់ ត្រាំ បានរិះគន់ចោទចិន ថាជាអ្នកធ្វើឲ្យមេរោគនេះ ឆ្លងរាលដាលខ្លាំងនៅអាមេរិក។ តែទន្ទឹមនឹងនេះ រដ្ឋាភិបាលលោកដូណាល់ ត្រាំ មិនបានចាត់វិធានការ ឆ្លើយតបទៅនឹងបញ្ហានេះទេ ឬក៏ធ្វើដែរ តែដោយភាពរញ៉េរញ៉ៃ គ្មានប្រសិទ្ធិភាព។
ផ្ទុយទៅវិញ លោកវិជ្ជបណ្ឌិតAnthony Fauci គឺជាអ្នកជំនាញមានចំណេះពិតប្រាកដ ពេលដែលគាត់និយាយពន្យល់ ឬលើកជាអនុសាសន៍ផ្សេង ទាក់ទិនបញ្ហាជំងឺកូវីដ១៩ គឺគេស្តាប់ច្រើន នឹងធ្វើឲ្យគេទុកចិត្ត។ ជាក់ស្តែង ថ្មីៗនេះ ដោយសង្កេតឃើញការឆ្លងរាលដាលបានស្ទុះឡើងខ្លាំង លោកវិជ្ជបណ្ឌិតAnthony Fauci បាននិយាយថា សហរដ្ឋអាេមរិកកំពុងស្ថិតនៅលើផ្លូវមួយដ៏គ្រោះថ្នាក់ ព្រោះមិនចាត់វិធានបិទខ្ទប់ទាំងស្រុង ឲ្យទាន់ពេល ឬរដ្ឋខ្លះបានប្រញ៉ាប់បើកសកម្មភាពសេដ្ឋកិច្ច ឡើងវិញនោះ លឿនជ្រុលពេក។ ក៏ប៉ុន្តែអ្វីដែលលោក Anthony Fauci លើកឡើងនេះ គឺវាផ្ទុយពីគំនិតរបស់លោកដូណាល់ ត្រាំ ដែលមិនចង់បិទសកម្មភាពសេដ្ឋកិច្ចទេ ព្រោះថាលោកដូណាល់ ត្រាំ សង្ឃឹមលើកំណើនសេដ្ឋកិច្ចខ្លាំងណាស់ ដើម្បីឈ្នះឆ្នោត។
ដូច្នេះគេសង្កេតឃើញរដ្ឋាភិបាលលោកដូណាល់ត្រាំ ហាក់បានបើកប្រតិបត្តិការ ប្រឆាំងនឹងសម្តីរបស់លោកវិជ្ជបណ្ឌិត Anthony Fauci។ ថ្មីៗនេះ ទីប្រឹក្សាពិសេសម្នាក់របស់លោកដូណាល់ ត្រាំ ឈ្មោះPeter Navarro បានសរសេរផ្សាយអត្ថបទមួយ លើកឡើងបែបមើលងាយ ទៅលើសមត្ថភាពចំណេះដឹង និងអនុសាសន៍របស់លោកវិជ្ជបណ្ឌិត Anthony Fauci។ ប្រការនេះបានធ្វើឲ្យថ្នាក់ដឹកនាំនយោបាយអាមេរិក ពីគ្រប់បក្ស មានការងឿងឆ្ងល់យ៉ាងខ្លាំង ថាហេតុអ្វី បានជារដ្ឋាភិបាលលោកដូណាល់ ប្រឹងឆ្កិះឆ្កៀលរករឿង ដៀលត្មិះសមត្ថភាពរបស់លោកវិជ្ជបណ្ឌិត Anthony Fauci បែបនេះ។ បញ្ហាពេលនេះមិនមែនត្រូវរករឿងលោក Anthony Fauciទេ គឺត្រូវវិធីធ្វើយ៉ាងណា ទប់ការឆ្លងរាលដាលកូវីដ១៩ ដែលកំពុងតែឡើងខ្លាំង ដូចទឹកបាក់ទំនប់។
លោកវិជ្ជបណ្ឌិត Anthony Fauci ជាអ្នកជំនាញដែលបានផ្តល់ប្រឹក្សាអនុសាសន៍ ដល់អតីតប្រធានាធិបតីអាេមរិក ៥ ៦នាក់រួចទៅហើយ ដូច្នេះលោកដូណាល់ ត្រាំ កុំមកចង់ជំទាស់នឹងសមត្ថភាពគេ។ លោក Lindsey Graham សមាជិកព្រឹទ្ធសភាបក្សសាធារណៈរដ្ឋ ដ៏មានឥទ្ធិពលម្នាក់ បានលើកឡើងថា រដ្ឋភិបាលលោកត្រាំ ល្មមឈប់រករឿងលោកវិជ្ជបណ្ឌិត Anthony Fauciទៅ ព្រោះវានឹងធ្វើឲ្យរដ្ឋាភិបាលលោកត្រាំខ្លួនឯង ខ្មាសគេទៅវិញទេ។
ទីបំផុតទៅ លោកដូណាល់ ត្រាំ បានដកថយមួយជំហ៊ានមកវិញ ដោយបាននិយាយថា លោកPeter Navarro មិនគួរសរសេររករឿង មើលងាយសមត្ថភាពលោកវិជ្ជបណ្ឌិត Anthony Fauciអញ្ចឹងទេ។ លោកត្រាំ អះអាងថាលោកនឹងលោក Anthony Fauci ប្រាស្រ័យទាក់ទង និយាយចុះសម្រុងគ្នាធម្មតាទេ។ តែបើផ្អែកតាមប្រភពខ្លះ គឺតាមពិត លោកដូណាល់ ត្រាំ មិនបានជួបពិភាក្សា ជាមួយលោកលោកវិជ្ជបណ្ឌិត Anthony Fauci ជាច្រើនសប្តាហ៍មកហើយ។ បញ្ហានេះ វាសរបង្ហាញថា រដ្ឋាភិបាលលោកដូណាល់ ត្រាំ គ្មានយុទ្ធសាស្ត្រច្បាស់លាស់ទាល់តែសោះ ក្នុងការប្រយុទ្ធប្រឆាំងនឹងការឆ្លងរាលដាលកូវីដ១៩។
លោកចូ បៃដិន សង្ឃឹមឈ្នះឆ្នោត ទោះបីនៅតាមរដ្ឋដែលធ្លាប់តែបោះឲ្យបក្សសាធារណៈរដ្ឋ
ជាមួយនឹងប្រជាប្រិយភាពកាន់តែដាំក្បាលចុះរបស់ លោកដូណាល់ ត្រាំនេះ លោកចូ បៃដិន ឯណោះវិញ ដែលជាបេក្ខជនតំណាងបក្សប្រជាធិបតេយ្យ ហាក់ដូចជាមានសង្ឃឹមជោគជ័យ។ យើងសង្កេតឃើញ ថាលោក ចូ បៃដិន មិនសូវចេញ ធ្វើការឃោសនាធំដុំ ហ៊ឹកហ៊ាក់ដូចលោកដូណាល់ ត្រាំ មែន ព្រោះក្រុមឃោសនារបស់លោកចូ បៃដិន បានផ្តល់អាទិភាពទៅលើ ការបង្ការការឆ្លងរាលដាលជម្ងឺកូវីដ១៩។
ទោះជាយ៉ាងនេះក្តី បើយើងផ្អែកលើការស្ទាប់ស្ទង់មតិចុងក្រោយនេះ លោក ចូ បៃដិន មានពិន្ទុនាំមុខលោកដូណាល់ ត្រាំ ដល់ទៅ៩ពិន្ទុ នៅក្នុងចេតនាបោះឆ្នោតរបស់ប្រជាជន។ នេះក៏ដោយសារតែ ប្រជាជននាំគ្នាខឹងលោកដូណាល់ ត្រាំពេក។ អ្វីដែលគួរឲ្យគត់សំគាល់ខ្លាំងបំផុតនោះ គឺថា លោកចូ បៃដិន កំពុងតែប្រមូលប្រជាប្រិយភាព បានច្រើន ទាំងនៅតាមរដ្ឋដែលកន្លងមកតែងតែបោះឆ្នោត ឲ្យបក្សសាធារណៈរដ្ឋ។ ជាក់ស្តែង រដ្ឋតិចសាស់ ដែលបក្សប្រជាធិបតេយ្យ មិនដែលឈ្នះតាំងតែពីឆ្នាំ១៩៧៦មក គឺពេលនេះយោងតាមការស្ទាបស្ទង់មតិ គឺលោកចូ បៃដិន អាចបានសម្លេងឆ្នោត ស្មើនឹងលោកដូណាល់ ត្រាំ។
ក្រុមបក្សសាធារណៈរដ្ឋ កាន់តែភ័យខ្លាំងហើយ ព្រោះថា យោងតាមការស្ទាបស្ទង់មតិ លោក ចូ បៃដិន អាចប្រហែលជានាំមុខ នៅរដ្ឋធំៗ ដូចជារដ្ឋ Arizona Florida Caroline ខាងជើង Pennsylvanie និង Wisconsin ជាដើម។ លោកចូ បៃដិន សឹងតែមិនបាច់ពិចារណារកវិធីសាស្រ្តអ្វីច្រើន ក្នុងការវាយប្រហារលោកដូណាល់ ត្រាំ ទេ គឺគ្រាន់តែបញ្ហាជំងឺកូវីដ១៩នេះមួយ គឺលោក អាចមានប្រៀបជាន់សង្កត់លោកដូណាល់ ត្រាំបាត់ទៅហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ