លោកដូណាល់ ត្រាំ អះអាងថា វ៉ាក់សាំងការពារកូវីដ១៩ នឹងត្រូវផលិតបាននៅចុងឆ្នាំ២០២០
ចុះផ្សាយនៅថ្ងៃ៖
ស្តាប់ - ០៨:២២
រវាងថ្ងៃព្រហស្បតិ៍ ដល់ថ្ងៃសុក្រទី១៥ឧសភា មានអ្នកស្លាប់ដោយកូវីដ១៩ សរុបចំនួន១៦៨០នាក់ បន្ថែមទៀត នៅសហរដ្ឋអាមេរិក។ សហរដ្ឋអាមេរិក ជាប្រទេសដែលមានអ្នកស្លាប់ដោយកូវីដ១៩ ច្រើនជាងគេបង្អស់ ពោលគឺ ចំនួនអ្នកស្លាប់សរុប បើគិតពីដំបូងមក រហូតដល់ពេលនេះ គឺមាន ៨៧៤៨៣នាក់។ ដោយឡែក នៅក្នុងសន្និសីទកាសែតប្រចាំថ្ងៃ របស់លោកដូណាល់ ត្រាំ ពីសេតវិមាន កាលពីថ្ងៃសុក្រម្សិលមិញនេះ លោកដូណាល់ ត្រាំ បានអះអាងថា ថ្នាំវ៉ាក់
លោកដូណាល់ ត្រាំ បានអះអាងនៅក្នុងសន្និសីទកាសែតប្រចាំថ្ងៃ កាលពីល្ងាចថ្ងៃទី១៥ឧសភា ក្នុងសួនច្បារសេតវិមាន ថាថ្នាំវ៉ាក់សាំងការពារជំងឺកូវីដ១៩ នឹងអាចរួចរាល់ នៅរវាងចុងឆ្នាំនេះ២០២០នេះ។ គាត់អះអាងថា បច្ចុប្បន្ននេះ អ្នកជំនាញកំពុងតែសម្រេចលទ្ធផលជោគជ័យយ៉ាងត្រចះត្រចង់ ក្នុងការស្រាវជ្រាវ។
តែដូចយើងធ្លាប់បានសង្កេតកន្លងមក លោកដូណាល់ ត្រាំ ច្រើនតែនិយាយរាងលើស ចូលចិត្តអួត និងបង្ហាញលទ្ធផលល្អប្រសើរ ហួសពីការពិតជាក់ស្តែង ដើម្បីយកមុខ។ ទាក់ទិននឹងបញ្ហាស្រាវជ្រាវផលិតវ៉ាក់សាំង ប្រឆាំងជម្ងឺកូវីដ១៩នេះ អ្នកជំនាញគ្រប់គ្នា បានអះអាងច្រើនលើកច្រើនសាហើយ ថាគេត្រូវការពេលយ៉ាងហោច១ឆ្នាំ ទៅ១ឆ្នាំកន្លះ។ បន្ទាប់ពីស្រាវជ្រាវ រកម៉ូឡេគុលផ្សំឃើញហើយ គេត្រូវចាប់ផ្តើមធ្វើការសាកល្បងទៅលើមនុស្ស។ ដូច្នេះ វាមិនមែន១ខែ២ខែធ្វើហើយចេញលទ្ធផលនេះ។
អ្នកជំនាញថា ត្រូវការពេលយ៉ាងហោច១ឆ្នាំទៀត
បច្ចុប្បន្ននេះ មានគម្រោងស្រាវជ្រាវផលិតវ៉ាក់សាំងការពារកូវីដ១៩នេះ ជា១០០គម្រោង។ ក្នុងនោះមានជាង១០គម្រោង ដែលកំពុងស្ថិតក្នុងការប្រើប្រាស់សាកល្បងទៅលើមនុស្ស។ ចំណែកវិទ្យាស្ថានប៉ាស្ទ័របារាំង បានអះអាងថា ខ្លួននឹងចាប់ផ្តើមសាកប្រើសាកល្បង នៅរវាងខែកក្កដា ហើយលទ្ធផលនៃការសាកល្បងនេះ អាចបាននៅរវាងខែតុលា។
ថ្នាំវ៉ាក់សាំង ដែលចាក់បញ្ចូលទៅក្នុងខ្លួនមនុស្ស គឺមិនមែនចេះតែធ្វើឲ្យតែរួចពីដៃ ដោយមិនគិតពីផលប៉ះពាល់ ផ្នែកសុខភាព របស់អ្នកដែលទទួលវ៉ាក់សាំងនោះទេ។ យ៉ាងណាមិញ នៅព្រឹកថ្ងៃសៅរ៍នេះ លោកស្រី Frederique Vidal រដ្ឋមន្ត្រីក្រសួងសិក្សាស្រាវជ្រាវបារាំង បានលើកឡើងថា ដោយយោងតាមមន្ទីរពិសោធន៍ ដែលកំពុងធ្វើកិច្ចការនេះ គឺគេត្រូវរងចាំយ៉ាងហោច១៨ខែទៀត ទើបវ៉ាក់សាំងអាចត្រូវបានផលិតចេញមកបាន។ ចង់ធ្វើវាឲ្យបានលឿនជាងនេះ គឺជារឿងមួយគ្រោះថ្នាក់ និងគ្មានការទទួលខុសត្រូវទេ។ គេមិនត្រូវយកជីវិតមនុស្សទៅប្រថុយគ្រោះថ្នាក់ ជាមួយនឹងថ្នាំវ៉ាក់សាំង ដែលត្រូវបានផលិតឡើង ដោយតក់ក្រហល់គ្មានការតាមដានឲ្យបានម៉ដ្ឋចត់នោះឡើយ។
ដូចគ្នាដែរ ទីភ្នាក់ងារឱសថអឺរ៉ុប បានលើកឡើងកាលពីថ្ងៃព្រហស្បតិ៍ទី១៤ឧសភា ថាវ៉ាក់សាំងការពារកូវីដ១៩ ប្រហែលជា១ឆ្នាំទៀត ទើបបានអាចផលិតយកមកប្រើបាន ហើយនេះជាការរំពឹងដោយសុទិដ្ឋិនិយមបំផុតផង។ ដូច្នេះការលើកឡើងរបស់លោកដូណាល់ត្រាំ ដែលថាចុងឆ្នាំ២០២០នេះ មានវ៉ាក់សាំង គឺជារឿងមួយពិបាកសង្ឃឹមណាស់។
លោកដូណាល់ ត្រាំ ចង់បង្កើតបរិយាកាសមានសង្ឃឹម ដើម្បីបើកសកម្មភាពសេដ្ឋកិច្ចឡើងវិញ
សំដីរបស់លោកដូណាល់ ត្រាំ ដែលអះអាងថានឹងមានវ៉ាក់សាំង នៅចុងឆ្នាំ២០២០នេះ គឺគាត់ចង់បង្កើតឲ្យមានបរិយាកាសសង្ឃឹម សុទិដ្ឋនិយម អមជាមួយនឹងយុទ្ធនាការរបស់គាត់ ដែលជំរុញឲ្យបើកសកម្មភាពសេដ្ឋកិច្ចឡើងវិញ។ តែបញ្ហាចោទគឺថាអភិបាលរដ្ឋខ្លះ គេមិនយល់ស្របតាមលោកដូណាល់ ត្រាំទេ។ គឺគេនៅតែបន្ត ប្រុងប្រយ័ត្ន ហាមឃាត់សកម្មភាពសេដ្ឋកិច្ច ហាមឃាត់ការធ្វើដំណើរ និងការជួបជុំនៅទីសាធារណៈជាដើម។
ជាក់ស្តែងរដ្ឋញូយ៉ក ការបិទខ្ទប់ទាំងស្រុង នឹងត្រូវបន្តរហូតដល់ថ្ងៃទី២៨ឧសភា នេះបើយោងតាមក្រិត្យថ្មី ចេញដោយលោកអភិបាលរដ្ឋញូយ៉ក Andrew Cuomo។ រដ្ឋញូយ៉ក មានអ្នកស្លាប់ដោយកូវីដ១៩ ច្រើនជាងគេ គឺប្រមាណ២ម៉ឺននាក់។ ដោយឡែក នៅក្នុងទីក្រុងញូយ៉ក បេះដូងសហរដ្ឋអាេមរិកតែម្តង លោក Bill de Blasio អភិបាលទីក្រុងនេះ បានលើកឡើងថា បើអ្វីៗបានធូរស្រាល គឺប្រហែលជាពាក់កណ្តាលខែមិថុនា ទើបហាងទំនិញ ភោជនីយដ្ឋាន រោងកុន រោងល្ខោន អាចបើកទ្វារដំណើរការវិញបាន។ លោកអភិបាលក្រុងញ៉ូយក បញ្ជាក់ថា ការបើកសកម្មភាពសេដ្ឋកិច្ចឡើងវិញនេះ គឺត្រូវតែធ្វើដោយប្រុងប្រយ័ត្នបំផុត មួយជំហានម្តង មួយជំហានម្តង ដោយធ្វើយ៉ាងណា ការពារអាយុជីវិតមនុស្សជាអាទិភាព។
តែយ៉ាងណាក៏ដោយ គោលជំហររបស់រដ្ឋាភិបាលសហព័ន្ធ ដែលដឹកនាំដោយលោកដូណាល់ ត្រាំ គឺចង់ឲ្យសកម្មភាពសេដ្ឋកិច្ចដើរឡើងវិញ ព្រោះថាមនុស្សអត់ការងារធ្វើច្រើនណាស់។ វិបត្តិសេដ្ឋកិច្ចបង្កឡើងដោយកូវីដ១៩នេះ បានធ្វើឲ្យប្រជាជនអាមេរិកប្រមាណ៣៦លាននាក់ បានបាត់បង់ការងារធ្វើ ក្នុងរយៈពេលតែ៣ខែប៉ុណ្ណោះ។ ចំនួនអ្នកក្រ នឹងកើនឡើងខ្លាំងណាស់នៅសហរដ្ឋអាមេរិក។
សភាតំណាងអនុម័តច្បាប់ថវិកា ៣០០ម៉ឺនលានដុល្លារ
កាលពីថ្ងៃសុក្រទី១៥ឧសភា សភាតំណាងសហរដ្ឋអាមេរិក ដែលស្ថិតក្នុងដៃគណបក្សប្រជាធិបតេយ្យ បានបោះឆ្នោតអនុម័តកញ្ចប់ថវិកាថ្មីមួយទៀត ប្រមាណជា៣០០ម៉ឺនលានដុល្លារ។ គម្រោងកញ្ចប់ថវិកាថ្មី ប្រមាណ៣០០ម៉ឺនលានដុល្លារនេះ ជាទឹកប្រាក់ដ៏ធំសម្បើម។ ច្បាប់ថវិកានេះ ត្រូវបានអនុម័តដោយសមាជិកសភាតំណាង ២០៨សម្លេង ទល់នឹង១៩៩។ បើផ្អែកតាមប្រសាសន៍របស់លោកស្រី Nancy Pelosi ប្រធានសភាតំណាង បានឲ្យដឹងថា នៅក្នុងទឹកប្រាក់នេះ គឺមានមួយផ្នែក ដែលជាជំនួយថវិកាដែលគេនឹងយកទៅចែកដោយផ្ទាល់ ទៅឲ្យប្រជាជនអាមេរិកតែម្តង។ ចំណែកប្រមាណ១០០ម៉ឺនលានដុល្លារ គឺយកទៅជួយរដ្ឋសមាជិក និងស្ថាប័នមូលដ្ឋាន ដើម្បីយកទៅបើកប្រាក់ខែឲ្យបុគ្គលិកនៃសេវាសាធារណៈ ដូចជាតាមមន្ទីរពេទ្យ សាលារៀន ជាដើម។ ចំណែកមួយផ្នែកទៀត គឺសម្រាប់ជួយសហគ្រាសធន់តូចនិងធន់មធ្យម ដែលបាត់បង់ចំណូលទាំងស្រុង ដោយសារតែកូវីដ១៩ ព្រមទាំងជួយជាស្បៀងអាហារ ដល់គ្រួសារដែលក្រីក្របំផុត។
លោកស្រី Nancy Pelosi បានអះអាងថា ច្បាប់ថវិការថ្មីនេះ មានសារៈសំខាន់ណាស់ ដើម្បីជួយដល់ប្រជាជនអាមេរិកដែលក្រីក្រ ដែលលំបាកលំបិនខ្លាំង។ លោកស្រីអះអាងថា រដ្ឋត្រូវតែជួយព្រោះវាជាតួនាទីរបស់រដ្ឋ ហើយមួយវិញ រដ្ឋមានលទ្ធភាពអាចជួយបាន។
តែយ៉ាងណា ច្បាប់ថវិកាថ្មីនេះ គ្មានសង្ឃឹមថា នឹងអាចទទួលការបោះឆ្នោតយល់ព្រមពីព្រឹទ្ធសភា ដែលស្ថិតក្នុងដៃគណបក្សសាធារណៈរដ្ឋនោះទេ។ លោក Mitch McConnell ប្រធានក្រុមសម្លេងភាគច្រើនបក្សសាធារណៈរដ្ឋនៅព្រឹទ្ធសភា បានលើកឡើងថា គម្រោងច្បាប់នេះ ត្រូវស្លាប់ទាំងមិនទាន់កើត ព្រោះវាគ្មានលក្ខណៈសមហេតុសមផល យកជាការបានទេ។
ចំណែកខាងសេតវិមានវិញ ធ្លាប់បានលើកឡើងថា រដ្ឋសហព័ន្ធបានសម្រេចបញ្ចេញប្រាក់ ២២០ម៉ឺនលានដុល្លារ ហើយទើបតែបានបន្ថែម៥០ម៉ឺនលានដុល្លារទៀត កាលពីពាក់កណ្តាលខែមេសា។ ដូច្នេះគួរតែផ្អាកជំនួយថវិកាសិន ដោយត្រូវរងចាំឲ្យមានការបូកសរុប វាយតម្លៃលើផែនការជំនួយមុន ថាវាបានហុចផលអ្វីខ្លះដល់សេដ្ឋកិច្ច។ ក៏ប៉ុន្តែលោកស្រី Nancy Pelosi បានឆ្លើយតបថា ការឆ្លងរាលដាលនូវជម្ងឺកូវីដ១៩នេះ មិនចេះផ្អាករងចាំទេ។ ដូច្នេះគេត្រូវតែរកវិធីជួយសេដ្ឋកិច្ចនិងប្រជាពលរដ្ឋ។
ស្ថិតក្នុងបរិបទនៃការបោះឆ្នោត ជ្រើសរើសប្រធានាធិបតីថ្មី ដែលកាន់តែខិតជិតមកដល់ បក្សនយោបាយធំៗទាំង២របស់អាមេរិក កំពុងតែប្រជែងគ្នាឃោសនា បង្ហាញថាខ្លួនធ្វើបានល្អកម្រិតណា គិតគូរកម្រិតណាដល់ប្រជាជន។ ពេលខ្លះ បក្សទាំងនេះឈរលើគោលការណ៍ វាយប្រហារគ្នាខ្លាំងពេក ដោយមិនបានមើលឃើញការពិតនិងភាពបន្ទាន់ជាក់ស្តែង ដែលបង្កឡើងដោយជម្ងឺកូវីដ១៩នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ