ចលនាបាតុកម្មប្រឆាំងវិធានការបិទទីក្រុង បានកើនឡើង នៅក្រោយ សារគាំទ្ររបស់ដូណាល់ ត្រាំ
ចុះផ្សាយនៅថ្ងៃ៖
ស្តាប់ - ០៨:៣៥
នៅមួយថ្ងៃក្រោយ លោកដូណាល់ ត្រាំ បានសរសេរសារ អំពាវនាវឲ្យប្រជាជនអាមេរិកាំង រំដោះរដ្ឋបី គឺMichigan Minnesota និងVirginia ជាទីដែលប្រជាជនរាប់រយនាក់ ផ្គើនបំរាមរបស់អាជ្ញាធរ ដោយបានចេញទៅជួបជុំធ្វើបាតុកម្មប្រឆាំងនឹងវិធានការបិទទីក្រុង ប្រជាជននៅរដ្ឋផ្សេងទៀត ដូចជា California Ohio Nevada Indiana Wisconsin ជាដើមបានធ្វើបាតុកម្មដូចគ្នានេះ កាលពីថ្ងៃសៅរ៍។
លោកដូណាល់ ត្រាំមិនដែលលាក់លៀមទេ ពីមហិច្ឆតារបស់លោក ដើម្បីបើកទីក្រុង បើកសេដ្ឋកិច្ចអាមេរិក ឡើងវិញ។ នៅថ្ងៃចន្ទ ទី១៣មេសា លោកដូណាល់ ត្រាំ ធ្លាប់គំរាមប្រើអំណាចប្រធានាធិបតី ដើម្បីបង្ខំឲ្យរដ្ឋបើកទីក្រុង ឡើងវិញ។ ប៉ុន្តែ នៅថ្ងៃព្រហស្បតិ៍បន្ទាប់មក លោកបាននិយាយប្រែសំដីទៅវិញថា លោកទុកសិទ្ធិសម្រេចបើកទីក្រុង ឲ្យអាជ្ញាធរម្ចាស់រដ្ឋនីមួយៗជាចាត់ចែង ដោយមិនលូកដៃនោះទេ។ ទីប្រឹក្សាខាងសុខភាព របស់រដ្ឋាភិបាល ធ្លាប់បានព្រមានពីស្ថានភាព ធ្លាក់ធ្ងន់ធ្ងររបស់អាមេរិក ដោយសារកូវីដ ១៩ បើសិនគេបើកទីក្រុង ឆាប់ពេក ទាំងគេនៅមិនទាន់អាចគ្រប់គ្រង វិបត្តិកូវីដ១៩។
ចលនាបាតុកម្មរបស់មហាជន ប្រឆាំង នឹងវិធានការបិទទីក្រុង នៅតាមរដ្ឋMichigan Minnesota និងVirginia ជាឱកាសមួយ ឲ្យលោកដូណាល់ ត្រាំ អាចស្តារ ស្វែងរកការគាំទ្រលោកឡើងវិញ។ មួយវិញទៀត លោកដូណាល់ ត្រាំ បានឆ្លៀតយកចលនាបាតុកម្មប្រឆាំងនឹងវិធានការបិទទីក្រុង ដើម្បីវាយប្រហារអ្នកប្រឆាំងមកពី គណបក្សប្រជាធិបតេយ្យ។ ជាក់ស្តែង នៅពេលវិធានការបិទទីក្រុងត្រូវអនុវត្តនៅគ្រប់រដ្ឋ របស់អាមេរិក លោកដូណាល់ ត្រាំ រិះគន់តែចំណាត់ការរបស់អភិបាលរដ្ឋ មក ពីគណបក្សប្រជាធិបតេយ្យ ដូចជា Michigan Virgina ជាដើម ចំណែកបាតុកម្មនៅរដ្ឋOhio ឬUtah គ្រប់គ្រងដោយអភិបាលរដ្ឋសាធារណរដ្ឋ គឺ លោកដូណាល់ ត្រាំមិនលើករិះគន់នោះទេ។
អ្នកដែលធ្វើបាតុកម្មទាមទារឲ្យបើកទីក្រុង ភាគច្រើនជាអ្នកគាំទ្រលោកដូណាល់ ត្រាំ
អ្នកធ្វើបាតុកម្មមួយចំនួន មានលើកស្លាកបដិ គាំទ្រលោកដូណាល់ ត្រាំ ដែលធ្វើឲ្យគេគិតថា ពួកគេជាអ្នកគាំទ្រ លោកដូណាល់ ត្រាំ នៅក្នុងបណ្តារដ្ឋដឹកនាំដោយក្រុមប្រជាធិបតេយ្យ។ ពួកគេទាំងនោះ អាចជាក្រុមស្តាំនិយមជ្រុល ឬក្រុមដែលទាមទារឲ្យមានការប្រើប្រាស់អាវុធនៅអាមេរិក។ នៅក្នុងសន្និសីទកាសែតកាលពីថ្ងៃសៅរ៍ ឆ្លើយនឹងសំណួរថា តើក្រុមបាតុករកំពុងរំលោភវិធានការដែលហាមមិនឲ្យមនុស្ស ជួបជុំគ្នា ដើម្បីកុំឲ្យឆ្លងមេរោគកូវីដ ១៩ លោកដូណាល់ ត្រាំ បានឆ្លើយ ដោយនិយាយសសើរក្រុមបាតុករ ថា មានការទទួលខុសត្រូវ។ ពួកគេធ្វើបាតុកម្ម ដើម្បីសំដែងមតិ ប្រឆាំងនឹងវិធានការ បិទទីក្រុង របស់អភិបាលរដ្ឋមួយចំនួន (ក្រុមប្រជាធិបតេយ្យ) ដែលបើតាមលោកដូណាល់ ត្រាំ គឺតឹងរ៉ឹងជ្រុលហួសពេក។
បាតុកម្មប្រឆាំងនឹងវិធានការបិទទីក្រុង រៀបចំ ដោយក្រុមអភិរក្សនិយម ដែលគាំទ្រលោកដូណាល់ ត្រាំ។ បាតុករ សរសេរពាក្យស្លោក ដ៏ល្បីរបស់លោកដូណាល់ ត្រាំ “ធ្វើឲ្យអាមេរិកអស្ចារ្យឡើងវិញ” ឬ មួយសរសេរឈ្មោះរបស់លោកដូណាល់ ត្រាំ នៅលើផ្ទាំងបដា នៅតាមកន្លែង ជួបជុំរបស់ពួកគេ។
ទោះបីជាបាតុកម្មប្រឆាំងនឹងវិធានការបិទទីក្រុង រៀបចំដោយក្រុមគាំទ្រលោកដូណាល់ ត្រាំ បាតុករមួយចំនួន និយាយថា ពួកគេ ល្មើសនឹងបំរាម របស់អាជ្ញាធ ដែលហាមមិនឲ្យដើរ ចេញក្រៅផ្ទះ ក៏ព្រោះតែហេតុផលសំខាន់ គឺតវ៉ាដើម្បី ប្រយោជន៍សេដ្ឋកិច្ច ប្រយោជន៍ឆ្នាំងបាយ។
វិធានការបិទទីក្រុងបន្ទាន់ ដើម្បី ទប់ស្កាត់ការឆ្លងរីករាលដាលកូវីដ បានធ្វើឲ្យប្រជាជនអាមេរិកាំងជាង២០លាននាក់បាត់បង់ការងារធ្វើ។ ខុសពី បណ្តាប្រទេសអឺរ៉ុប ដូចជាបារាំងជាដើម ដែលមានប្រព័ន្ធជំនួយសង្គម និងសុខាភិបាល ជួយប្រជាជន នៅគ្រាលំបាក នៅអាមេរិក ប្រជាជនអាមេរិកាំង ដែលបាត់បង់ការងារធ្វើ គ្មានបានទទួលជំនួយ ពីរដ្ឋាភិបាលនោះទេ។ តាមអាជ្ញាធរនៅទីក្រុងPittsburg ប្រជាជនអាមេរិកាំងកាន់តែច្រើន បានចេញទៅតម្រង់ជួរសុំជំនួយអាហារជាលើកទី១ ពីFood Bank ចាប់តាំងពីមានវិធានការបិទទីក្រុង បិទក្រុមហ៊ុនដោយសារកូវីដ១៩។
សម្រាប់អ្នកជំនាញ ភាពមិនច្បាស់លាស់ និង ការភ័យខ្លាច ក្រែងសេដ្ឋកិច្ច រងប៉ះពាល់ ដោយសារតែមនុស្សស្ថិតនៅផ្ទះ ច្រើនពេក តែងកើតមានក្នុងផ្នត់គំនិតរបស់ប្រជាជនអាមេរិកាំង អភិរក្សនិយម ដែលភាគច្រើនរស់នៅ តាមខេត្ត ដែលមិនសូវ រងប៉ះពាល់ដោយសារកូវីដ ១៩។ ចំណែកអ្នកដែលគាំទ្រ វិធានការបិទទីក្រុង ដើម្បី ទប់ស្កាត់ការឆ្លងមេរោគ វិញ ភាគច្រើន ជាក្រុមសេរីនិយម ដែលរស់នៅតាមទីក្រុង ទីប្រជុំជន ដែលកំពុងប្រឈមខ្លាំងនឹងវិបត្តិកូវីដ១៩។
អ្នកជំនាញ សុខភាព៖ ត្រូវធ្វើតេស្តឲ្យបាន៥សែននាក់ក្នុងមួយថ្ងៃ បើសិនចង់បើកទីក្រុងឡើងវិញ
សព្វថ្ងៃនេះ អាមេរិកបានធ្វើតេស្តរកមេរោគ កូវីដ ១៩ បានក្នុងចំណោមប្រជាជនជាង ៣លាន ៧សែននាក់ ដោយការធ្វើតេស្តចំនួន ១សែន២ម៉ឺននាក់ ក្នុងមួយថ្ងៃ។ សម្រាប់អ្នកជំនាញសុខភាព គេត្រូវធ្វើតេស្តក្នុងទ្រង់ទ្រាយធំ ប្រមាណ កន្លះលាននាក់ ក្នុងមួយថ្ងៃ បើសិនគេចង់បើកទីក្រុង ក្នុងពេលឆាប់ៗខាងមុខ នៅសហរដ្ឋអាមេរិក។ ការធ្វើតេស្តនឹងអាចកំណត់ថា តើអ្នកណាដែលមានឆ្លងមេរោគ កូវីដ១៩ ដែលគេត្រូវដាក់ឲ្យនៅដាច់ដោយឡែក ចំណែក អ្នកដែលគ្មានមេរោគកូវីដ១៩ នឹងអាចអនុញ្ញាតឲ្យចេញទៅធ្វើការ ឡើងវិញ។
ទីប្រឹក្សាសុខភាព របស់រដ្ឋបាលលោកដូណាល់ ត្រាំ បាននិយាយពីការចាំបាច់ធ្វើតេស្តជាមុន នៅទូទាំងអាមេរិក មុននឹងអាចមានការបន្ធូរបន្ថយ ការធ្វើដំណើរ និងការត្រលប់ទៅបើកក្រុមហ៊ុន បើកសេដ្ឋកិច្ចឡើងវិញ។ ប៉ុន្តែ ជាមួយគ្នានោះ លោកបានព្រមានថា ជំងឺកូវីដ ១៩ នឹងត្រលប់មកវិញ ហើយនឹងសាហាវទប់មិនជាប់ បើសិនគេប្រញាប់បើកទីក្រុង ដោយទាំងមិនទាន់គ្រប់គ្រងជំងឺកូវីដ១៩នោះ។
អភិបាលរដ្ឋជាច្រើន បានអះអាង ពួកគេរារែក មិនទាន់ចង់បើកទីក្រុង ដោយសារតែពួកគេ គ្មានឧបករណ៍ធ្វើតេស្តគ្រប់គ្រាន់។ ប៉ុន្តែ លោកដូណាល់ ត្រាំ ដែលជំរុញ ឲ្យគេឆាប់បើកទីក្រុង បាននិយាយថា អាមេរិក មានសមត្ថភាព មានឧបករណ៍តេស្តគ្រប់គ្រាន់ មិនខ្វះនោះទេ។ នៅពេលថ្នាក់ដឹកនាំរដ្ឋ សុំជំនួយឧបករណ៍តេស្តពីរដ្ឋាភិបាល លោកដូណាល់ ត្រាំបានអះអាងថា គឺ ថ្នាក់ដឹកនាំនៅតាមបណ្តារដ្ឋ ដែលជាអ្នកទទួលខុសត្រូវ ក្នុងការផ្គត់ផ្គត់ ឧបករណ៍តេស្តរកមេរោគ កូវីដ ១៩ ប៉ុន្តែ មិនមែនរដ្ឋបាលរបស់លោកនោះទេ។
សម្រាប់អភិបាលរដ្ឋ លោកប្រធានាធិបតីអាមេរិក បានព្យាយាមគេចវេសសាជាថ្មី ពីការទទួលខុសត្រូវ ពោល គឺជំរុញឲ្យប្រជាជនអាមេរិកាំងត្រលប់ទៅធ្វើការដើម្បីប្រយោជន៍សេដ្ឋកិច្ច ប៉ុន្តែ លោកនៅតែគ្មានសមត្ថភាព ផ្គត់ផ្គង់ឧបករណ៍តេស្តរកមេរោគ ដែលតាមពិត ជួយធានា ទប់ស្កាត់ការឆ្លងកូវីដ១៩ នៅក្នុងសហគមន៍ ក្រុមហ៊ុនអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ