ចំនួនអ្នកឆ្លងកូវីដ១៩នៅសហរដ្ឋអាមេរិក កើនឡើងខ្លាំងលើសគេ គួរឲ្យបារម្ភបំផុត
ចុះផ្សាយនៅថ្ងៃ៖
ស្តាប់ - ០៧:០៩
គិតមកត្រឹមថ្ងៃសុក្រទី២៧មីនា ចំនួនអ្នកឆ្លងកូវីដ១៩នៅសហរដ្ឋអាមេរិក បានកើនឡើងដល់ទៅជាង៨៣០០០នាក់ ពោលគឺលើសចំនួនអ្នកឆ្លងសរុបនៅចិនទៅទៀត។ ការកើនឡើងយ៉ាងឆាប់រហ័សបែបនេះ បានបង្កឲ្យមានការព្រួយបារម្ភជាខ្លាំង។ មានមតិរិះគន់កាន់តែច្រើន ជុំវិញការមើលស្រាល ការធ្វេសប្រហែសរបស់រដ្ឋាភិបាលលោកដូណាល់ ត្រាំ ក្នុងការទប់ស្កាត់ការឆ្លងរាលដាល។ លោកដូណាល់ ត្រាំ បានទាំងបង្ហើបគំនិត ថាចង់បើកឲ្យប្រជាជន អាចទៅធ្វើការវិញបាន ដើម្បីស្រោចស្រង់សេដ្ឋកិច្ច។
មើលស្រាលកូវីដ១៩
វាអាចមានហេតុផលច្រើន នៅពីក្រោយការមានចំនួនអ្នកឆ្លងកូវីដ១៩ច្រើនបែបនេះ នៅសហរដ្ឋអាេមរិក។ ហេតុផលចំបង គឺថា តាំងពីដំបូង រដ្ឋាភិបាលោកដូណាល់ ត្រាំ បានមើលស្រាលបញ្ហានេះ ហើយមិនបានដាក់ចេញនូវវិធានការចាំបាច់ទេ។ អាជ្ញាធរសុខាភិបាល ក៏មិនបានយកចិត្តទុកដាក់ ធ្វើតេស្តស្វែងរកមេរោគដែរ។ ដូច្នេះអ្នកដែលមានផ្ទុកដោយមិនដឹងខ្លួន បានចម្លងទៅអ្នកផ្សេងរួចទៅហើយ។ រដ្ឋាភិបាលលោកត្រាំ កាលពីដំបូងប្រកាន់ជំហរថា មេរោគនេះឆ្លងមកពីចិន និងប្រទេសផ្សេងទៀត។ ដូច្នេះបិទព្រំដែនឲ្យតែជាប់ ហើយធ្វើតេស្តតែទៅលើអ្នកដែលមកពីចិនទៅបានហើយ។
បញ្ហាមួយទៀត គឺការខ្វះសម្ភារៈក្នុងការធ្វើតេស្ត។ កាលពីខែចុងខែមករា អង្គការសុខភាពពិភពលោក បានបញ្ជូនសម្ភារៈធ្វើតេស្តទៅឲ្យប្រទេសជាច្រើន។ ដោយឡែកសហរដ្ឋអាមេរិក បានប្រកែកមិនទទួលទេ ព្រោះគេថា គេចង់ប្រើឧបករណ៍ និងវិធីសាស្រ្តធ្វើតេស្ត ផ្ទាល់ខ្លួនរបស់គេ។ តែក្រោយមក អាជ្ញាធរសុខាភិបាលអាមេរិក បានបញ្ជាក់ថា មានបញ្ហាបច្ចេកទេស ឧបករណ៍ធ្វើតេស្តផលិតដោយសហគ្រាសឯកជនរបស់អាមេរិកនោះ ប្រើការអត់កើតទេ។
ដូច្នេះយើងឃើញថា ការធ្វើតេស្តរកមេរោគ បានចាប់ផ្តើមយឺតយ៉ាវ ណាស់នៅសហរដ្ឋអាមេរិក។ ទើបតែនៅមួយសប្តាហ៍ចុងក្រោយនេះទេ ដែលអាជ្ញាធរសុខាភិបាលអាមេរិក បានធ្វើតេស្តបានច្រើន សរុបប្រមាណជា ៣៧ម៉ឺននាក់។ លោកដូណាល់ ត្រាំបានទាំងអួតតាមទំព័រTwitter ផងថា អាមេរិកបានធ្វើតេស្តបានច្រើនណាស់ ច្រើនជាងកូរ៉េខាងត្បូង ដែលគេសរសើរគ្រប់គ្នានោះទៀតផង។
តួលេខចំនួនអ្នកឆ្លង អាស្រ័យលើចំនួនធ្វើតេស្តស្វែងរកមេរោគ
តាមពិតទៅ ចំនួនតួលេខអ្នកឆ្លងចុងក្រោយដែលកើនឡើងខ្លាំង នៅសហរដ្ឋអាមេរិក គ្រាន់តែជាចំនួនតួលេខ ដែលគេរកឃើញបន្ទាប់ពីការធ្វើតេស្តស្វែងរកមេរោគ។ វាមិនមែនមានន័យថា ចាប់ពីពេលនេះទៅ មេរោគកូវីដនឹងកាន់តែរាតត្បាតខ្លាំងនៅសហរដ្ឋអាេមរិកនោះទេ។ តែវាអាចមានន័យថា មេរោគកូវីដ បានសំងំនៅក្នុងចំណោមប្រជាជនអាមេរិក យូរដែរហើយ។ មានមនុស្សជាច្រើននាក់ទៀត ដែលមិនបានធ្វើតេស្តស្វែងរកមេរោគទេ។ ចង់ដឹងអ្នកណាផ្ទុកមេរោគ ឬមិនផ្ទុក គឺទាល់តែយើងធ្វើតេស្ត។ ដូច្នេះចំនួននៃអ្នកឆ្លងមេរោគកូវីដ១៩ គឺវាអាស្រ័យទៅចំនួនមនុស្ស ដែលបានធ្វើតេស្តដែរ។
ប្រទេសនីមួយៗ មានវិធានការ យុទ្ធសាស្ត្រផ្សេងៗគ្នា។ រដ្ឋាភិបាលអាល្លឺម៉ង់ គេបានធ្វើតាមកូរ៉េខាងត្បូង ដោយជ្រើសរើសយកវិធីធ្វើតេស្តទ្រង់ទ្រាយធំ ដើម្បីរកអ្នកផ្ទុកមេរោគ ហើយដាក់ឲ្យនៅដោយឡែក។ យោងតាមតួលេខផ្លូវការ នៅអាល្លឺម៉ង់ គេធ្វើតេស្តទៅលើមនុស្ស ប្រមាណ៥០ម៉ឺននាក់ ក្នុងមួយសប្តាហ៍កន្លងទៅនេះ។ ហេតុដូច្នេះបានជាកម្រិតនៃការស្លាប់ដោយមេរោគកូវីដ១៩នៅអាល្លឺម៉ង់ មានទាបខ្លាំង បើប្រៀបធៀបទៅនឹងចំនួនអ្នកឆ្លងដែលគេរកឃើញ។ អាល្លឺម៉ង់ជាប្រទេសដែលបានធ្វើតេស្តស្វែងរកកូវីដ១៩ បានច្រើនជាងគេ។
ចំណែកនៅបារាំងវិញ គឺរដ្ឋាភិបាលមិនធ្វើតេស្តក្នុងទ្រង់ទ្រាយធំទេ គឺគេធ្វើតែលើអ្នកណា ដែលមានអាការៈជំងឺគួរឲ្យសង្ស័យខ្លាំងបំផុត។ អញ្ចឹងវាមានន័យថា វានៅមានអ្នកផ្ទុកកូវីដ១៩ ដោយមិនដឹងខ្លួន ច្រើនទៀតនៅបារាំង។ បញ្ហានេះ ក៏បានបង្កឲ្យមានការរិះគន់ ទៅលើចំណាត់ការរបស់រដ្ឋាភិបាលបារាំងដែរ។ គេរិះគន់ថា រដ្ឋាភិបាលជ្រើសរើសយកវិធីសាស្ត្រនេះ ក៏ដោយសារតែតាមពិតរដ្ឋាភិបាល ធ្វេសប្រហែល មិនបានត្រៀមឧបករណ៍ធ្វើតេស្តឲ្យបានច្រើន។ អ្នកជំនាញសុខាភិបាលបារាំង បានទទួលស្គាល់ថាបារាំងខ្វះសារធាតុ Réactive ដែលគេត្រូវការយកវាទៅលាយដើម្បីរកមេរោគ។ តែកាលពីថ្ងៃទី២៥មីនា លោករដ្ឋមន្ត្រីសុខាភិបាលបារាំង បានបញ្ជាក់ថា គេនឹងបង្កើនការធ្វើតេស្ត ឲ្យបានប្រមាណ២ម៉ឺននាក់ក្នុងមួយថ្ងៃ។
ត្រឹមមួយសប្តាហ៍ មនុស្ស៣លាន៣សែននាក់ បាត់បង់ការងារនៅអាមេរិក
ខណៈដែលចំនួនអ្នកឆ្លងមេរោគកូវីដ១៩នេះ បានកើនឡើងខ្លាំង ធ្វើឲ្យមានការព្រួយបារម្ភ ទន្ទឹមនឹងនេះ សេដ្ឋកិច្ចអាមេរិក ក៏កំពុងជួបការលំបាកខ្លាំងណាស់ដែរ ដោយសារតែរោងចក្រមិនដំណើរការ ហាងទំនិញបិទទ្វារ។
កាលពីថ្ងៃ១៦មីនា លោកដូណាល់ ត្រាំបានចេញបញ្ជា បិទសកម្មភាពសេដ្ឋកិច្ច និងការធ្វើដំណើរចំនួន១៥ថ្ងៃ ដើម្បីទប់ស្កាត់ការឆ្លងរាលដាលកូវីដ១៩។ ឥឡូវដល់ពេលកំណត់ ដែលត្រូវសម្រេចថាបន្តវិធានការបិទខ្ទប់នេះតទៅទៀត ឬយ៉ាងណា។ ក្នុងសន្និសីទកាសែត កាលពីថ្ងៃព្រហស្បតិ៍ លោក Mike Pence អនុប្រធានាធិបតីបានលើកឡើងថា លោកដូណាល់ ត្រាំ មានបំណងបើកប្រទេសឡើងវិញ ដើម្បីកុំឲ្យសេដ្ឋកិច្ចកកស្ទះតទៅទៀត។ សមាជិករដ្ឋាភិបាល កំពុងតែពិចារណា កំណត់នូវអនុសាសន៍មួយចំនួន ស្នើទៅលោកដូណាល់ ត្រាំ។
កូវីដ១៩ បានធ្វើឲ្យសេដ្ឋកិច្ចអាមេរិក ជួបវិបត្តិធ្ងន់ណាស់ ជាពិសេសសម្រាប់ប្រជាជនក្រីក្រ អ្នកធ្វើការរោងចក្រ ឬតាមហាងទំនិញ ដែលត្រូវបិទទ្វារ។ គ្រាន់តែមួយសប្តាហ៍កន្លងទៅនេះ មានអ្នកបាត់បងការងារដល់ទៅ ៣លាន៣សែននាក់។ នេះជាចំនួនច្រើនខ្លាំងណាស់។ មនុស្ស៣លាន៣សែន បាត់បង់ការងារព្រមៗគ្នា ទាំងមិនដឹងថាពេលណា កូវីដ១៩នេះនឹងសាបរលាប ហើយអាចរកការងារថ្មីធ្វើបាន។
តាំងតែពីដំបូងមក គេដឹងចិត្តលោកដូណាល់ ត្រាំ ថាគាត់មិនចង់ហាមប្រជាជនឲ្យនៅក្នុងផ្ទះ មិនចង់បិទហាងទំនិញ ឬបិទរោងចក្រទេ។ កាលពីថ្ងៃពុធ លោកដូណាល់ ត្រាំ បាននិយាយទៀតថា អាេមរិកនឹងយកឈ្នះមេរោគកូវីដ១៩ ហើយមនុស្សម្នា នឹងត្រលប់ទៅធ្វើការដូចមុនវិញ ដើម្បីសេដ្ឋកិច្ច។ ក្នុងគំនិតគាត់ គឺការងារប្រាក់ចំណូល សេដ្ឋកិច្ច មានសារៈសំខាន់ជាងសុខភាពអាយុជីវិត។ កំណើនសេដ្ឋកិច្ច គឺជាអ្វីដែលលោកដូណាល់ត្រាំ តែងតែអួតថាគាត់ដឹកនាំប្រទេសល្អជាងអ្នកមុនៗ។ ដូច្នេះបើសេដ្ឋកិច្ចអាមេរិកធ្លាក់ចុះ លោកដូណាល់ ត្រាំ នឹងលែងមានអ្វីយកមកអួត។ វិបត្តិកូវីដ១៩នេះ អាចប្រហែលជាបង្កើតឧបសគ្គច្រើន សម្រាប់លោកដូណាល់ ត្រាំ ក្នុងការយកឈ្នះ ការបោះឆ្នោតអាណត្តិក្រោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ