Super Tuesday៖ លោកចូ បៃដិន ឡើងសន្ទុះខ្លាំង ប្រជែងជាមួយលោក ប៊ែរនី ស៊ែនឌើស៍
ចុះផ្សាយនៅថ្ងៃ៖
ស្តាប់ - ០៦:០២
ការបោះឆ្នោតជ្រើសរើសបេក្ខជនប្រធានាធិបតី របស់គណបក្សប្រជាធិបតេយ្យ នៅសហរដ្ឋអាមេរិក ទើបតែបានឆ្លងកាត់ដំណាក់កាលមួយដ៏សំខាន់ ដែលកាលពីថ្ងៃអង្គារទី៣មីនា គឺជាថ្ងៃបោះឆ្នោតនៅតាមរដ្ឋចំនួន១៤ព្រមគ្នា។ តាំងពីចាប់ផ្តើមបោះឆ្នោតលើកនេះ បេក្ខភាពលោក ប៊ែរនី ស៊ែនឌើស៍ ត្រូវបានគេមើលឃើញថា ជាបេក្ខជន ដែលមានប្រៀបច្រើនជាងគេ។ ក៏ប៉ុន្តែ យោងតាមលទ្ធផលកាលពីថ្ងៃអង្គារ ទី៣មីនា បានបង្ហាញថា បេក្ខភាពលោកចូ បៃដិន អតីតអនុប្រធានាធិបតីរបស់លោកអូបាម៉ា បានឈានឡើង មានសន្ទុះខ្លាំងគួរឲ្យសង្ឃឹម ដោយបានឈ្នះយ៉ាងហោច ចំនួន៩រដ្ឋ ក្នុងចំណោម១៤រដ្ឋ។
Super Tuesday ស្មើនឹង៤០% នៃអ្នកបោះឆ្នោតតំណាងទាំងអស់
Super Tuesday កាលពីថ្ងៃអង្គារទី៣មីនា បានចេញលទ្ធផលមកថា លោក ចូ បៃដិន (Joe Biden) មានសន្ទុះគាំទ្រច្រើនណាស់។ វាជារឿងភ្ញាក់ផ្អើល ព្រោះថា ពេលចាប់ផ្តើមបោះឆ្នោតកាលពីដើមខែកុម្ភៈ គេសង្កេតឃើញថា បេក្ខភាពលោកចូ បៃដិន មានការលំបាកខ្លាំង ដោយសារតែការឃោសនារកសម្លេងឆ្នោត ដូចជាមិនបានផល។ ផ្ទុយទៅវិញ កន្លងមក បេក្ខភាពលោក ប៊ែរនី ស៊ែនឌើស៍ (Bernie Sanders) មានប្រៀបមានសន្ទុះគាំទ្រច្រើន។
ក៏ប៉ុន្តែ ឆ្លងកាត់ការបោះឆ្នោត កាលពីថ្ងៃអង្គារ នៅតាមរដ្ឋចំនួន១៤ផ្សេងគ្នា ក្នុងថ្ងៃតែមួយ គឺលោក ចូ បៃដិន បានឈ្នះដល់ទៅ៩រដ្ឋ។ ក្នុងនោះមានរដ្ឋតិចសាស រដ្ឋវាហ្ស៊ីនី រដ្ឋការ៉ូលីនខាងជើង រដ្ឋអាឡាប៉ាម៉ា រដ្ឋអូក្លាហូម៉ា រដ្ឋថេណេស៊ី រដ្ឋអាខាន់សាស រដ្ឋម៉េនីសូតា និងរដ្ឋម៉ាសាជូសេត។ រដ្ឋទាំង១៤ ដែលបានបោះឆ្នោតកាលពីថ្ងៃអង្គារម្សិលមិញ បើគិតជាចំនួនអ្នកបោះឆ្នោតតំណាងសរុប គឺមានដល់៤០% នៃចំនួនអ្នកបោះឆ្នោតតំណាងទាំងអស់ ៣៩៧៩នាក់។ ដូច្នេះ លោកចូ បៃដិន បានឈ្នះ ដល់ទៅ៩រដ្ឋ ក្នុងចំណោម១៤ វាគឺជារឿងមួយមានសង្ឃឹមខ្លាំងណាស់ សម្រាប់បេក្ខជននេះ។
ចំណែកលោកប៊ែរនី ស៊ែនឌើស៍វិញ បានឈ្នះ នៅរដ្ឋយូតា រដ្ឋខូឡូរ៉ាដូ រដ្ឋវែរម៉ុង។ ហើយបើផ្អែកតាមការផ្សាយ របស់បណ្តាញទូរទស្សន៍Fox News និងទីភ្នាក់ងារព័ត៌មានAP លោកប៊ែរនី ស៊ែនឌើស៍ ក៏ឈ្នះនៅរដ្ឋកាលីហ្វ័រញ៉ាដែរ។ លោកប៊ែរនី ស៊ែនឌើស៍ ឈ្នះនៅរដ្ឋកាលីហ្វ័រញ៉ា ក៏មិនមែនជារឿងធម្មតាដែរ ព្រោះថារដ្ឋនេះមានចំនួនអ្នកបោះឆ្នោតតំណាងដល់ទៅ ៤១៥នាក់ ពោលគឺលើសរដ្ឋទាំង១៣ទៀត។
ចំណែកបេក្ខជនដែលចាញ់ខ្លាំងជាងគេ គឺលោកមហាសេដ្ឋី ម៉ៃឃើល ប៊្លូមប៊ែក និង អ្នកស្រីអេលីហ្សាប៊ែត វ៉ារែន។ ទោះជាមិនទាន់មានការប្រកាសជាផ្លូវការ តែបើតាមការស្មាន បេក្ខជនទាំង២នាក់នេះ ប្រហែលជាអាចប្រកាសដកខ្លួនចេញពីការប្រកួត ក្នុងពេលឆាប់ខាងមុខនេះហើយ។
ចង់ឈ្នះដូណាល់ ត្រាំ ត្រូវតែបញ្ជូន ចូ បៃដិន
ហេតុផលដែលលោកចូ បៃដិន បានឈ្នះសម្លេងច្រើន គឺអាចមានច្រើនកត្តាផ្គុំគ្នា។ ទីមួយ គឺថាលោកចូ បៃដិន ត្រូវបានបេក្ខជនតូចៗ៣នាក់ បានចូលរួមជួយគាត់ តាមរយៈការបោះបង់ចោលការប្រកួត ហើយនាំគ្នាមកគាំទ្រលោកចូ បៃដិន ដើម្បីកុំឲ្យបែកសម្លេងឆ្នោត។ ជាក់ស្តែង បេក្ខភាព លោក ភីត ប៊ូធីហ្កែត ដែលមានប្រជាប្រិយភាពគួរសមដែរ ហើយបានសម្រេចចិត្តដកខ្លួនចេញ ដើម្បីប្រមូលសម្លេងឆ្នោតរបស់គាត់ មកជួយលោកចូ បៃដិន។ ពោលគឺយើងឃើញថា មួយរយៈចុងក្រោយនេះ លោកចូ បៃដិន បានក្លាយជាបេក្ខជនដែលប្រមូលអ្នកផ្សេងឲ្យមកនៅពីក្រោយ ដើម្បីប្រជែងជាមួយលោក ប៊ែរនី ស៊ែនឌើស៍។
មូលហេតុមួយទៀតនោះ គឺវាស្ថិតលើភាពខុសគ្នា រវាងកម្មវិធីនយោបាយ របស់លោកចូ បៃដិន និងលោកប៊ែរនី ស៊ែនឌើស៍។ លោកចូ បៃដិន គឺជាអ្នកប្រជាធិបតេយ្យមានទំនោរកណ្តាលនិយម។ ចំណែកលោក ប៊ែរនី ស៊ែនឌើស៍វិញ គឺជាអ្នកប្រជាធិបតេយ្យ ទំនោរសង្គមនិយម ដែលអ្នកខ្លះអាចចាត់ទុកថា សង្គមនិយមជ្រុលផង។ បញ្ហានេះ វាធ្វើឲ្យអ្នកគាំទ្រ គណបក្សប្រជាធិបតេយ្យបារម្ភ ព្រោះថាបើលោក ប៊ែរនី ស៊ែនឌើស៍ឈ្នះ ក្លាយជាបេក្ខជនតំណាងឲ្យបក្សប្រជាធិបតេយ្យ ទៅប្រកួតជាមួយលោក ដូណាល់ ត្រាំ គឺអាចមិនឈ្នះ លោកដូណាល់ ត្រាំទេ។
មូលហេតុដែលគេបារម្ភ គឺថាប្រជាជនអាមេរិក ដែលអ្នកខ្លះមិនសូវជាគាំទ្រលោកដូណាល់ ត្រាំមែន តែបើឲ្យគេរើសរវាងលោក លោកដូណាល់ ត្រាំ ដែលជាអ្នកសេរីនិយម និងលោកប៊ែរនី ស៊ែនឌើស៍ ដែលជាអ្នកសង្គមនិយមសឹងតែជ្រុល គឺគេប្រាកដជារើសយកលោកដូណាល់ ត្រាំហើយ។ ត្រង់នេះហើយ បានជាគណបក្សប្រជាធិបតេយ្យ ចង់ឲ្យមានបេក្ខជនម្នាក់របស់ខ្លួន ដែលជាបេក្ខជនកណ្តាលនិយម មិនឆ្វេងនិយមខ្លាំងពេក ដើម្បីអាចប្រជែងដណ្តើមសម្លេងឆ្នោតពីលោកដូណាល់ ត្រាំបាន ព្រោះថាមានប្រជាជនស្តាំនិយមខ្លះ ក៏គេមិនពេញចិត្តលោកដូណាល់ ត្រាំដែរ។ ដូច្នេះ អ្នកបោះឆ្នោតជូនលោក ចូ បៃដិន ពេលនេះ គឺជាសន្ទុះសម្លេងឆ្នោត ដែលគេសម្លឹងទៅពេលបោះឆ្នោតប្រធានាធិបតី ព្រោះគេគិតថា បើចង់ឲ្យលោកដូណាល់ ត្រាំចាញ់ឆ្នោត គឺមានតែបញ្ជូនលោក ចូ បៃដិន ទៅប្រកួត តែប៉ុណ្ណោះ។
អ្វីៗអាចប្រែប្រួល
លោក ចូ បៃដិន ឈ្នះ៩រដ្ឋ ក្នុងចំណោម១៤រដ្ឋ ពេលនេះ មិនមែនមានន័យថា លោកប៊ែរនី ស៊ែនឌើស៍ កំពុងតែចាញ់នោះទេ។ អ្វីៗអាចប្រែប្រួលបាន។ នៅថ្ងៃទី១០មីនា ខាងមុខ គេនឹងបោះឆ្នោត នៅរដ្ឋចំនួន៦ ដែលត្រូវជ្រើសរើសអ្នកបោះឆ្នោតតំណាងចំនួន៣៦៥នាក់។ ហើយថ្ងៃទី ១៧មីនា បោះឆ្នោតនៅរដ្ឋ៤ ដើម្បីជ្រើសរើសអ្នកបោះឆ្នោតតំណាង ចំនួន៥៧៧នាក់។
តាមធម្មតា ដើម្បីអាចឈានក្លាយជាបេក្ខជនតំណាងគណបក្សប្រជាធិបតេយ្យបាន គឺបេក្ខជននីមួយៗ ត្រូវការប្រមូលអ្នកបោះឆ្នោតតំណាង ឲ្យបានយ៉ាងហោច ១៩៩០នាក់ ដែលជាចំនួនសម្លេងភាគច្រើននៃចំនួនសរុប ៣៩៧៩នាក់។ តែគ្រាន់តែថ្ងៃអង្គារ Super Tuesday មួយ មានអ្នកបោះឆ្នោតតំណាងដល់ទៅ១៣៥៧ ដែលត្រូវដណ្តើមគ្នាទៅហើយ។ សម្រាប់ពេលនេះ លទ្ធផលនៃការបែងចែកចំនួនអ្នកបោះឆ្នោតតំណាង នៅតាមរដ្ឋទាំងអស់ដែលបោះឆ្នោតរួចរាល់ កាលពីថ្ងៃអង្គារ នៅមិនទាន់ចេញជាផ្លូវការទេ។ តែគេជឿថា លោកចូ បៃដិន ទំនងជាអាចនាំមុខ ឈ្នះលោក ប៊ែរនី ស៊ែនឌើស៍បន្តិច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ