ចិនបន្ថយអត្រាការប្រាក់កណ្តាលដើម្បីពន្លឿនកំណើនសេដ្ឋកិច្ច
ចុះផ្សាយនៅថ្ងៃ៖
ស្តាប់ - ០៤:៤៤
ប៉ុន្មានឆ្នាំចុងក្រោយនេះ សេដ្ឋកិច្ចចិនដែលធ្លាប់តែស្គាល់កំណើន មិនតិចជាង១០ភាគរយ ក្នុងមួយឆ្នាំៗ ពេលនេះបានស្គាល់នូវការថយចុះ គួរឲ្យព្រួយបារម្ភ។ កំណើនដែលគេប៉ាន់ស្មាន ថានឹងថយមកត្រឹមតែ ៧,៣ភាគរយនៅដំណាច់ឆ្នាំនេះ។ ដើម្បីប្រឈមមុខទៅនឹងកង្វល់នេះ រដ្ឋាភិបាលចិន បានសម្រេចបន្ថយអត្រាការប្រាក់កណ្តាល របស់ធនាគារប្រជាមាណិតចិន។ ទង្វើនេះ គេរំពឹងថា អាចនឹងជួយសហគ្រាសចិន ឲ្យមានលទ្ធភាព ស្វែងរកឥណទាន បានងាយស្រួលជាងមុន។
បន្ថយការប្រាក់ បន្ថែមកម្ចី បង្កើនវិនិយោគទុន?
សេដ្ឋកិច្ចចិន ក្នុងរយៈពេល ពីរ បីឆ្នាំចុងក្រោយនេះ បានថមថយសន្ទុះ គួរឲ្យព្រួយបារម្ភ។ ដូច្នេះហើយបានជាពេលនេះ រដ្ឋាភិបាលកម្មុយនិស្តចិន បានសម្រេចបន្ថយអត្រាការប្រាក់កណ្តាល រឺដែលយើងហៅម្យ៉ាងទៀតថា ជាអត្រាការប្រាក់នាំមុខ។ កម្រិតអត្រាការប្រាក់ថ្មីនេះ គឺមានពីរ៖ ទីមួយ គឺអត្រាការប្រាក់កម្ចីឥណទាន ដែលនឹងថយមកត្រឹម ៥,៦ភាគរយ ក្នុងមួយឆ្នាំ ហើយទីពីរ គឺអត្រាការប្រាក់បញ្ញើ រឺសន្សំ គឺថយមកត្រឹម ២,៧៥ភាគរយ ក្នុងមួយឆ្នាំ។
រដ្ឋាភិបាលធ្លាប់បានចេញសេចក្តីសម្រេច បែបនេះម្តងដែរ កាលពីខែមិថុនាឆ្នាំ២០១២។ សូមបញ្ជាក់ផងដែរថា សេដ្ឋកិច្ចចិនជាសេដ្ឋកិច្ចទីផ្សារសេរីមែនពិត ប៉ុន្តែរាល់គម្រោងវិនិយោគធំៗ ភាគច្រើនជាគម្រោងរបស់រដ្ឋ។ កាលពីខែមេសាឆ្នាំនេះ រដ្ឋាភិបាលធ្លាប់បានប្រាប់ឲ្យដឹងដែរថា នឹងដាក់ចុះនូវគម្រោងកែរទម្រង់ ឲ្យចំៗ ទៅនឹងបញ្ហា ដែលចោទ ដើម្បីរកដំណោះស្រាយឲ្យជាក់លាក់។ មានឧទាហរណ៍ ដូចជាការបន្ធូរបន្ថយពន្ធដារឲ្យដល់សហគ្រាសធនតូច និងមធ្យម ព្រមទាំងគម្រោងសាងសង់ផ្លូវថ្នល់ និងខ្សែរថភ្លើងជាច្រើនខ្សែ។ ប៉ុន្តែទីបំផុត រដ្ឋាភិបាល បែរជាជ្រើសរើស ការបន្ថយអត្រាការប្រាក់ទៅវិញ។
ផលវិជ្ជមានដល់សេដ្ឋកិច្ចចិនមានតិចតួច៖
អ្នកវិភាគសេដ្ឋកិច្ចភាគច្រើនយល់ស្របគ្នាថា វិធានការថ្មីនេះ វានឹងជះឥទ្ធិពលតិចតួចណាស់ដល់សេដ្ឋកិច្ចចិន។ ព្រោះអី ព្រោះថា មានតែសហគ្រាសធំៗ ហើយជារបស់រដ្ឋទេ ដែលមានលទ្ធភាពទៅធ្វើកម្ចី នៅធនាគារកណ្តាល។ ដូចនេះ មានតែសហគ្រាសធំៗ អស់នេះតែប៉ុណ្ណោះ ដែលបានទទួលការបន្ធូរបន្ថយអត្រាការប្រាក់ថ្មីនេះ។ ផ្ទុយទៅវិញ រដ្ឋាភិបាលអត់បានគិតដល់សហគ្រាសធនតូច និងធនមធ្យម ដែលជាទូទៅ គ្នាអត់មានដើមទុន ធំដំទេ ហើយ ត្រូវតែទៅខ្ចីឥណទាន ពីតាមពួកឥណទានក្រៅផ្លូវការ ហើយតាមធម្មតា ពួកនេះ អនុវត្តអត្រាការប្រាក់ខ្ពស់ៗណាស់។
យ៉ាងណាក៏ដោយ នៅពីក្រោយវិធានការនេះ យើងអាចកាត់យល់ថា សេដ្ឋកិច្ចចិនចាប់ផ្តើមរង្គោះរង្គើរ ព្រោះថាតាមរយៈវិធានការថ្មីនេះ សញ្ជាក់ថា សហគ្រាសធំៗរបស់រដ្ឋ នៅចិន ត្រូវការជំនួយដើម្បីបន្តដកដង្ហើមតទៅទៀត។ យ៉ាងណាមិញ កំណើនសេដ្ឋកិច្ចចិននៅដើមត្រីមាសទីបីឆ្នាំនេះ មានត្រឹមតែ៧,៣ភាគរយប៉ុណ្ណោះ។ នេះគឺជាតួលេខទាបបំផុត ក្នុងរយៈពេល២០ឆ្នាំចុងក្រោយនេះ។ តែទោះជាយ៉ាងណា ចិននៅតែជាមហាអំណាចសេដ្ឋកិច្ចទីពីរ លើពិភពលោកអញ្ចឹង។
សប្បាយភ្លេចខ្លួន៖
បញ្ហាដែលធ្វើឲ្យសេដ្ឋកិច្ចចិន នៅទ្រឹងមួយកន្លែងមានច្រើនសណ្ឋានណាស់។ អ្វីដែលយើងគួរកត់សម្គាល់ នោះ គឺថា សេដ្ឋកិច្ចចិន បានរីកចម្រើនលឿនខ្លាំងពេក។ កន្លងមករដ្ឋាភិបាលចិន មានមោទនភាពខ្លាំងពេក ទៅនឹងកំណើនសេដ្ឋកិច្ច ដែលចិនបានស្គាល់ក្នុងរយៈពេល២០ឆ្នាំចុងក្រោយនេះ។ យើងត្រូវយល់ថា ពិភពលោកមានការផ្លាស់ប្តូរ ហើយរបត់សេដ្ឋកិច្ច ត្រូវតែដើរឲ្យទាន់ ទៅតាមតម្រូវការសង្គម និងទីផ្សារ។ ផ្ទុយទៅវិញ រដ្ឋាភិបាលកុម្មុយនិស្តចិន មិនសូវជាអើរពើ ក្នុងការធ្វើកំណែរទម្រង់សេដ្ឋកិច្ចទេ។ និយាយឲ្យត្រង់ទៅ គឺថារដ្ឋាភិបាលមិនសូវជាយកចិត្តទុកដាក់ ដល់សហគ្រាសធនតូច និងធនមធ្យមទេ។
ធ្វើផ្ទះ តែគ្មានអ្នកទិញ៖
ទុនវិនិយោគលើវិស័យអចលនទ្រព្យ ត្រូវកប់ចោលយ៉ាងសន្ធឹកសន្ធាប់។ ក្នុងរយៈពេល១០ ២០ ឆ្នាំចុងក្រោយដែល ចិនបានស្គាល់ការរីកចំរើនខ្លាំង មានក្រុមហ៊ុនច្រើនណាស់ ដែលបានដាក់ទុនសាងសង់ផ្ទះ អាគារ រាប់ពាន់ រាប់សែនខ្នង។ គឺថា ការសាងសង់ វាច្រើនជ្រុលហួសហេតុពេក។ មានទីក្រុងធំៗមួយចំនួន ដែលមានផ្ទះថ្ម ផ្ទះល្វែងថ្មី មើលដាច់កន្ទុយភ្នែក ដែលទុកចោល គ្មាននរណាមកទិញ ព្រោះវាថ្លៃពេក។ រាល់ថ្ងៃនេះ មានក្រុមហ៊ុនខ្លះ ថា មានផ្ទះទុកលក់ ដល់ទៅ២ ៣ឆ្នាំទៀត ក៏នៅលក់មិនទាន់អស់ផង។ ម្នាក់ៗនាំគ្នាយកលុយទៅវិនិយោគតែក្នុងវិស័យនឹង គឺដូចយកលុយទៅកប់ចោលអញ្ចឹង។
នយោបាយកម្ចាត់អំពើពុករលួយ បង្អើលមន្ត្រីចិន លែងហ៊ានសម្រេចគម្រោងវិនិយោគផ្តេសផ្តាស៖
ចំនុចសំខាន់មួយទៀត ដែលធ្វើឲ្យសេដ្ឋកិច្ចចិននៅទ្រឹងមួយកន្លែង គឺដោយសារគោលនយោបាយថ្មីរបស់លោកប្រធានាធិបតីចិន ក្នុងការប្រយុទ្ធប្រឆាំងនឹងអំពើពុករលួយ។ មានន័យថា មន្ត្រីចិន និងអភិបាលខេត្តចិន ជាច្រើន មិនសូវជាហ៊ានធ្វើអីផ្តេសផ្តាសទេ ព្រោះខ្លាចភ្លាត់ ត្រូវគេចោទថាបានស៊ីសំណូក ពុករលួយ។ ដូច្នេះ គម្រោងវិនិយោគមួយចំនួន ត្រូវផ្អាក ដោយសាតែគ្មាននរណាហ៊ានសម្រេច។
តែទោះជាយ៉ាងណា បញ្ហាវានៅត្រង់ការកំណែរទម្រង់សេដ្ឋកិច្ចចិនទាំងមូលតែម្តង។ ការបន្ថយការប្រាក់វាជារឿងល្អហើយ ប៉ុន្តែ ចិនគួរតែចាប់ផ្តើមពិនិត្យមើលវិស័យពន្ធដារឡើងវិញ។ ចំនុចមួយទៀតដែលសំខាន់ដែរ គឺការយកចិត្តទុកដាក់លើ សហគ្រាសធនតូច និងមធ្យម។ សហគ្រាសចិន គួរតែផ្លាស់ប្តូរទស្សនៈវិស័យ ក្នុងការបោះទុនរកស៊ី កុំនាំគ្នាគិតតែពីសង់ផ្ទះលក់ ហើយគ្មាននរណាទិញ។ មានវិស័យផ្សេងៗច្រើនទៀត ដែលត្រូវទីផ្សារ ហើយរដ្ឋត្រូវតែជួយខ្នះខ្នែង ជួយប្រជាជនតូចតាច ដែលគ្នាចង់បង្កើតមុខរបររកស៊ីថ្មីៗ មិនមែនរំពឹងតែទៅលើ រោងចក្រផលិតសម្ភារៈរបស់ក្រុមហ៊ុនបរទេសនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ