អាមេរិក៖ លោក Kevin McCarthy ត្រូវធ្លាក់ពីកៅអីប្រធានសភាតំណាង
ចុះផ្សាយនៅថ្ងៃ៖
ស្តាប់ - ០៦:០៩
ជាលើកទី១ក្នុងប្រវត្តិសាស្ត្រ នៃនយោបាយសហរដ្ឋអាមេរិក ដែលប្រធានសភាតំណាង ត្រូវគេបោះឆ្នោតទាញទម្លាក់ពីមុខងារ។ ថ្ងៃទី៣តុលា២០២៣ លោក Kevin McCarthy សមាជិកសភាបក្សសាធារណរដ្ឋ ដែលត្រូវបានគេបោះឆ្នោតតែងតាំងឲ្យធ្វើជាប្រធានសភាតំណាង កាលពីខែមករា ត្រូវបានសមាជិកសភាបោះឆ្នោត ដកចេញពីតំណែងដ៏ធំមួយនេះ តាមរយៈសំឡេងឆ្នោត ២១៦យល់ព្រម ទល់នឹង ២១០មិនព្រម។ ក្នុងចំណោមអ្នកដែលបានបោះឆ្នោតយល់ព្រមបញ្ចប់មុខតំណែងរបស់លោក Kevin McCarthy គឺមានសមាជិកសភាបក្សសាធារណរដ្ឋគ្នាឯង ចំនួន៨នាក់។
ភ្លាមៗក្រោយដឹងលទ្ធផលឆ្នោត លោក Kevin McCarthy បានថ្លែងទៅកាន់អ្នកកាសែតថា លោកបានកាន់ការងារជាប្រធានសភាតំណាង ដែលនេះគឺជាកិត្តិយសធំធេងណាស់សម្រាប់លោក។ លោកបានអះអាងប្រកបដោយមោទនភាព ថាលោកបានធ្វើការងារនេះ ប្រកបដោយឆន្ទៈបង្រួបបង្រួម សម្រុះសម្រួល ដើម្បីប្រយោជន៍ជាតិជាធំ។ ទន្ទឹមគ្នានេះ លោកបានបញ្ជាក់ថា លោកនឹងមិនស្នើបេក្ខភាពលោកសាជាថ្មី ដើម្បីឲ្យគេបោះឆ្នោតជ្រើសរើសធ្វើជាប្រធានសភាម្តងទៀតនោះទេ។
បរិយាកាសហែកហួរគ្នា ក្នុងបក្សសាធារណរដ្ឋ
ស្ថានការណ៍រញ៉េរញ៉ៃនៅសភាតំណាង របស់សហរដ្ឋអាមេរិក បានស្តែងឲ្យឃើញពីការបាក់បែកឈ្លោះប្រកែកគ្នា រវាងក្រុមសមាជិកសភា មកពីគណបក្សសាធារណរដ្ឋ ដែលមានសំឡេងភាគច្រើននៅក្នុងសភានេះ។ យ៉ាងណាមិញ ការបោះឆ្នោតតែងតាំងលោក Kevin McCarthy កាលពីខែមករា ត្រូវបានធ្វើឡើងទាំងបង្ខំ និងត្រដាបត្រដួសរួចទៅហើយ ដោយឆ្លងកាត់ការធ្វើសម្បទានជាច្រើនចំណុច មុននឹងក្រុមសមាជិកសភាបក្សសាធារណរដ្ឋយល់ព្រមបោះឆ្នោត។
តែមកទល់ពេលនេះ ជម្លោះប្រេះឆា ហាក់កាន់តែរីកធំនៅក្នុងបក្សនេះ ខណៈក្រុមសមាជិកសភាដែលស្និទ្ធនឹងលោកដូណាល់ ត្រាំ បាននាំគ្នាតវ៉ារិះគន់មិនសំចៃមាត់ ទៅលើលោក Kevin McCarthy។ គឺសមាជិកសភាម្នាក់ មកពីរដ្ឋផ្លរីដា ឈ្មោះ Matt Gaetz ដែលជាអ្នកចេញមុខ ដំឡើងសំឡេងខ្លាំងជាងគេ។ គឺលោក Matt Gaetz រូបនេះហើយដែលជាអ្នក ស្នើឲ្យមាននីតិវិធីបោះឆ្នោតទម្លាក់លោក Kevin McCarthy នៅថ្ងៃទី៣តុលា។
មុនពេលបោះឆ្នោតបានចាប់ផ្តើម នៅរសៀលថ្ងៃអង្គារ អង្គសភាទាំងមូល បានក្លាយជាវេទិការ ស្រែកចោទ រិះគន់គ្នាទៅវិញទៅមក យ៉ាងទ្រហឹងអឺងកង រវាងក្រុមសមាជិកសភាបក្សសាធារណៈរដ្ឋដូចគ្នា ដែលបានពុះចែកជា២ក្រុម ម្ខាងប្រឆាំង ម្ខាងគាំទ្រលោក Kevin McCarthy។ ចំណែកក្រុមសមាជិកសភាបក្សប្រជាធិបតេយ្យ ដែលសាមគ្គីជាធ្លុងមួយ អង្គុយស្ងាត់ស្ងៀម តាមដានមើលទស្សនីយភាពឈ្លោះប្រកែកគ្នានេះយ៉ាងហួសចិត្តបំផុត។
ហេតុអ្វី លោក Kevin McCarthy ត្រូវមនុស្សក្នុងបក្សរិះគន់?
លោក Matt Gaetz ដែលដឹកនាំក្រុមប្រឆាំងនឹងលោក លោក Kevin McCarthy បានលើកឡើងថា គ្មាននរណាមានទំនុកចិត្ត លើលោក Kevin McCarthy ទៀតទេ ព្រោះលោកម្នាក់នេះ បានធ្វើរឿងបញ្ច្រាសទិសជាច្រើនលើកច្រើនសារ។ ដូច្នេះ ត្រូវតែដូរប្រធានសភាថ្មី ដែលល្អជាងនេះ។ សមាជិកសភាស្និទ្ធនឹងលោកត្រាំរូបនេះ បានចោទថាលោក Kevin McCarthy បានចរចាជាមួយពួកបក្សប្រជាធិបតេយ្យ ដើម្បីបើកកញ្ចប់ថវិកាបណ្តោះអាសន្ន ក្នុងកម្មវត្ថុបញ្ចៀស បញ្ហា Shut Down។ លោកម្នាក់បានអះអាងទៀតថា លោក Kevin McCarthy បានចរចាដោយសម្ងាត់ ជាមួយលោកចូ បៃដិន ទាក់ទិននឹងកញ្ចប់ថវិកាជួយអ៊ុយក្រែន។
គួរបញ្ជាក់ថា ក្រុមសមាជិកសភាបក្សសាធារណរដ្ឋ ដែលមានទំនោរស្តាំនិយមខ្លាំង ហើយដែលស្និទ្ធគាំទ្រលោកដូណាល់ ត្រាំ មានចេតនារារាំងការបោះឆ្នោតច្បាប់ថវិកាជាតិ ទុកឲ្យប្រទេសជួបបញ្ហា Shut Down ដើម្បីយកលេសនេះដាក់សំពាធលើរដ្ឋាភិបាលលោក ចូ បៃដិន។ បន្ថែមពីនេះ ក្រុមគាំទ្រលោកដូណាល់ត្រាំ ប្រឆាំងដាច់ខាត ចំពោះគំរោងកញ្ចប់ថវិកាថ្មី ប្រមាណ២៤ពាន់លានដុល្លារ ដែលរដ្ឋបាលលោកចូ បៃដិន បានស្នើដើម្បីយកទៅជួយអ៊ុយក្រែន។ ក្រុមសមាជិកសភាទាំងនេះ លើកឡើងថា រដ្ឋអាមេរិកគួរណាតែទុកប្រាក់ យកទៅចំណាយលើការគ្រប់គ្រងជនអន្តោប្រវេសន៍ខុសច្បាប់ នៅតាមព្រំដែនជាមួយម៉ិកស៊ិកវិញ។
ឆ្លើយទៅកាន់អ្នកកាសែត លោក Kevin McCarthy បានអះអាងថា លោកមិនសោកស្តាយទេ ដែលបានចរចា រកការស្រុះស្រួលមតិ ជាមួយបក្សប្រជាធិបតេយ្យ។ នេះគឺជាការងារចាំបាច់ ដើម្បីការពារផលប្រយោជន៍ជាតិ ជាជាងការប្រកាន់បក្សពួករឹងរូសតែម្ខាងៗ។
ឈានចូលដំណាក់កាលចលាចល
ក្នុងពេលបោះឆ្នោត កាលពីថ្ងៃអង្គា លោក Tom McClintock សមាជិកសភាម្នាក់នៃបក្សសាធារណរដ្ឋ បានលើកឡើងថា យើងកំពុងតែនាំគ្នាដើរដល់មាត់ជ្រោះហើយ សូមគ្រប់គ្នាដកថយមកវិញ ពិចារណាឲ្យច្បាស់ ជៀសវាងធ្លាក់ចូលទៅក្នុងគ្រោះថ្នាក់។ លោកបានបន្តថា សភាតំណាងនឹងឈានចូលក្នុងតំណាក់កាលរាំងស្ទះ ធ្វើអ្វីលែងកើត នៅពេលដែលគ្មានប្រធាន។
លោកដូណាល់ ត្រាំ បានបង្ហោះសារតាមបណ្តាញសង្គម Trust Social ដោយចោទសួរថា “ហេតុអ្វីបានជាពួកសាធារណរដ្ឋ គិតតែនាំគ្នាឈ្លោះប្រកែកគ្នា ហើយបែរជាមិនព្រមរួមកម្លាំងគ្នា ប្រយុទ្ធនឹងពួកឆ្វេងនិយមជ្រុល ដែលកំពុងតែបង្កគ្រោះថ្នាក់ដល់ប្រទេសទៅវិញ?"
ចំណែកលោកចូ បៃដិនវិញ តាមរយៈសម្តីរបស់លោកស្រី Karine Jean-Pierre អ្នកនាំពាក្យសេតវិមាន បានអំពាវនាវឲ្យសភាតំណាង ត្រូវតែជ្រើសរើសប្រធានថ្មី ឲ្យបានឆាប់ជាទីបំផុត ព្រោះថាសហរដ្ឋអាមេរិក មានរឿងធំៗ និងសំខាន់ៗ ដែលត្រូវចាត់ចែងច្រើនណាស់ មិនអាចរាំងស្ទះបានទេ។
ជាការពិតណាស់ ជាមួយនឹងការបោះឆ្នោតទម្លាក់ប្រធានសភាពីតំណែង ជាលើកទី១នៃប្រវត្តិសាស្ត្រនេះ គឺនយោបាយអាមេរិកបានឈានជើងចូលក្នុងតំណាក់កាលមួយ ដ៏ចលាចលបំផុត។ សភាតំណាង បានទុកពេល១សប្តាហ៍ ដើម្បីបោះឆ្នោតជ្រើសរើសប្រធានសភាថ្មី មកជំនួសលោក Kevin McCarthy។ យោងតាមការវិភាគខ្លះ រយៈពេល១សប្តាហ៍នេះ គឺខ្លឺណាស់ បើយើងក្រឡេកទៅមើលស្នាមប្រះឆាដ៏ជ្រៅ នៃការឈ្លោះប្រកែកគ្នា ក្នុងចំណោមក្រុមសមាជិកសភាបក្សសាធារណរដ្ឋ។ គេមិនសង្ឃឹមថា បក្សសាធារណរដ្ឋ អាចនឹងស្រុះស្រួលគ្នា ជ្រើសរើសមនុស្សថ្មីម្នាក់ទៀត មកបានដោយងាយនោះឡើយ។ សមាជិកសភាខ្លះថែមទាំង ចង់ស្នើឈ្មោះលោកដូណាល់ ត្រាំ ឲ្យមកធ្វើជាប្រធានសភាថែមទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ