បាឡុងចារកម្ម កំពុងបំប៉ោងបន្ថែមភាពតានតឹងរវាងចិននិងអាមេរិក
ចុះផ្សាយនៅថ្ងៃ៖
ស្តាប់ - ០៧:៥៩
ទំនាក់ទំនងរវាងកំពូលមហាអំណាចពិភពលោកទាំងពីរ បានឡើងតានតឹងកាន់តែខ្លាំងជាថ្មី។ ក្រោយវត្តមានបាឡុងចារកម្មចិនក្នុងទឹកដែនអាកាសអាមេរិក គេឃើញមានបាឡុង “ចារកិច្ចចិន” មួយទៀត កំពុងហោះលើដែនអាកាសអាមេរិកឡាទីន។ ប្រឈមនឹងស្ថានការណ៍បែបនេះ លោកប្រមុខការទូតអាមេរិកអង់តូនី ប្លីងកិន បានសម្រេចលុបចោលទស្សនកិច្ចនៅប៉េកាំងដែលគ្រោងធ្វើនៅថ្ងៃអាទិត្យទី ៥និង៦កុម្ភៈ២០២៣។ ជាមួយនឹងការទទួលស្គាល់ថា បាឡុងដែលជាប៉េងប៉ោងស្រាវជ្រាវស៊ីវិល បានហោះអណ្តែតចូលដីអាមេរិកដោយអចេតនា ប៉េកាំងបានចោទប្រព័ន្ធផ្សព្វផ្សាយអាមេរិកថាព្យាយាមមួយបង្កាច់ចិន។
លោកអង់តូនី ប្លីងកិន គ្រោងទៅបំពេញទស្សនកិច្ចប៉េកាំងពីថ្ងៃទី៥-៦កុម្ភៈ២០២៣។ ជាព្រឹត្តការណ៍ដ៏សំខាន់ណាស់ ព្រោះនេះជាលើកទីមួយ គិតចាប់តាំងពីខែតុលា២០១៨មកដែលរដ្ឋមន្ត្រីការបរទេសអាមេរិក ធ្វើដំណើរទៅចិន ហើយទំនងមានគម្រោងជួបជាមួយប្រធានាធិបតីចិន លោក ស៊ីជីនពីងទៀត។ មានន័យថាជាឱកាសយោគយល់និងសម្រួលគ្នាដ៏សំខាន់ទាំងផ្នែកពិធីការការទូតផង នយោបាយផង។
ឥលូវសម្រាប់តែមានប៉េងប៉ោងមួយ “ជាបាឡុងចារកិច្ច” បានមកឆក់យកឱកាសនេះទៅបាត់។ លោកប្រមុខការទូតអាមេរិក បានប្រកាសលើកពេលធ្វើទស្សនកិច្ចវិញ ដោយពន្យល់ប្រាប់សមភាគីចិន លោក វ៉ាង យីថា នៅចំពោះទង្វើគ្មានទំនួលខុសត្រូវរបស់ចិន អាមេរិកមិនគួរមានទស្សនកិច្ចនៅពេលនេះទេ។ តែអាមេរិក នៅបន្តរក្សាបណ្តាញទំនាក់ទំនងជាចិនជានិច្ច។ ប្រមុខការទូតអាមេរិកនឹងរៀបចំគម្រោងទស្សនកិច្ចនៅក្រុងប៉េកាំងជាថ្មី នៅពេលឱកាសហុចឱ្យនិងប្រសើរជាងនេះ។
អាទិភាពចម្បងសម្រាប់ពេលនេះគឺធ្វើយ៉ាងណា ឱ្យបាឡុងចារកិច្ចចាកចេញពីដែនអាកាសអាមេរិកសិន ព្រោះហេតុការណ៍នេះ មិនត្រឹមតែបង្កឱ្យមានតានតឹងជាមួយចិនម្ចាស់បាឡុងទេ ផ្ទៃក្នុងនយោបាយអាមេរិកក៏មានភាពប្រទាញប្រទង់ខ្លាំងដែររវាងអ្នកប្រជាធិបតេយ្យនិងអ្នកសាធារណរដ្ឋ។ តំណាងបក្សប្រឆាំងជាច្រើន នាំមុខដោយលោកដូណាល់ ត្រាំ បានទាមទារជាសាធារណៈឱ្យអាមេរិកកម្ទេចបាឡុងចារកិច្ចនោះតែម្តងផង។ ដូច្នេះវាមិនចម្លែកទេ ដែលប្រមុខការទូតអាមេរិកលុបចោលទស្សនកិច្ច។ រដ្ឋបាលលោកបៃដិន មិនអាចនៅតែប្រកាន់ជំហរបែបផ្សះផ្សាក្នុងបរិបទនេះបានឡើយ។
ចំណែកខាងចិនវិញ មិនស្ងាត់មាត់ត្រឹមព្រមទទួលស្គាល់កំហុសរបស់ខ្លួនទេ។ នៅព្រឹកថ្ងៃសៅរ៍នេះ ប៉េកាំងបានបញ្ចេញប្រតិកម្មតបនឹងការលុបទស្សនកិច្ចរបស់លោកអង់តូនី ប្លីងកិន ថា អ្នកទទួលខុសត្រូវនយោបាយនិងប្រព័ន្ធផ្សព្វផ្សាយអាមេរិក ប្រើឧបទ្ទហេតុអចេតនា ជាលេសវាយប្រហារនិងមួលបង្កាច់ចិន។ ចិនពិតជាមិនអាចទទួលយកការបំប៉ោងព័ត៌មានគ្មានមូលដ្ឋានបែបនេះទេ។ ក្នុងន័យបន្តុះបង្អាប់ការលុបដំណើរទស្សនកិច្ចថាគ្មានអ្វីសំខាន់ ក្រសួងការបរទេសចិនបានអះអាងថា តាមការពិតទៅនោះ ទាំងចិនទាំងអាមេរិក មិនបានប្រកាស “ជាផ្លូវការ” ទស្សនកិច្ចរបស់លោកប្លីងកិន ផង។
បាឡុងចារកិច្ច ទំនើប និងពិបាកកម្ចាត់
នៅក្នុងសេចក្តីថ្លែងការណ៍ ក្រសួងការបរទេសចិនបានពន្យល់ថា ប៉េងប៉ោងបានងាកចេញគន្លងផ្លូវ ទៅចូលដែនអាកាសអាមេរិក ដោយហេតុតែខ្យល់ខាងលិចទាញខ្លាំងពេក។ ដូច្នេះនេះជាហេតុការណ៍អចេតនា កើតឡើងដោយបាតុភូតធម្មជាតិ និងដោយឥតព្រៀងទុកដែលមិនមែនជាទំនួលខុសត្រូវទាំងស្រុងរបស់ម្ចាស់ទេ។ ម្យ៉ាងវិញទៀត ចិនបានធានាថា ប៉េងប៉ោងហោះ ជាបាឡុងស៊ីវិលសុទ្ធសាធ កំពុងសិក្សាស្រាវជ្រាវ ផ្នែកឧតុនិយម។
សម្រាប់អ្នកជំនាញបាឡុងចារកិច្ចនៅមជ្ឈមណ្ឌលស្រាវជ្រាវម៉ារ៉ាតុងវ៉ាស៊ីនតោន លោក វីលីយ៉ាំ គីម មានលទ្ធភាពពិតដែលបាឡុងអាចហោះមកចូលដែនអាកាសអាមេរិកដោយចៃដន្យមែន បើយោលទៅលើរយៈកម្ពស់ដែលបាឡុងហោះ។ ប្រសិនបើមានកម្មវត្ថុចារកិច្ច និងមិនចង់ឱ្យគេចាប់សញ្ញាបាន បំផ្លាញបាន នោះគេគួរតែបង្ហោះវាឱ្យខ្ពស់ជាងនេះ។ ប៉ុន្តែថ្វីបើបាឡុងមានទម្រង់ខាងក្រៅជាឧបករណ៍ស្រាវជ្រាវឧតុនិយមមែន តែបន្ទុករបស់បាឡុងមានច្រើនគួរឱ្យសង្ស័យ។ មានទាំងគ្រឿងអេឡិចត្រូនិកបញ្ជាផ្លូវ និងចារកិច្ច ព្រមទាំងផ្ទាំងសូឡា។ បើតាមលោកវីលីយ៉ាំ គីម បាឡុងនេះអាចមានផ្ទុកនូវបច្ចេកវិទ្យាបង្ហាញផ្លូវ ដែលអាមេរិកមិនទាន់ដាក់ប្រើផង។ ជាមួយនឹងភាពជឿនលឿនផ្នែកបច្ចេកវិទ្យាបញ្ញាសិប្បនិម្មិត បាឡុងអាចប្តូរផ្លាស់ការហោះហើរក្នុងរយៈកម្ពស់ទាប ឬខ្ពស់ខ្លាំង ដើម្បីឱ្យកម្លាំងខ្យល់ជួយតម្រង់ឱ្យឆាប់ដល់ទិសដៅចង់បាន។ នេះបើតាមការពន្យល់បន្ថែមរបស់លោកវីលីយ៉ាំគីម។
បើតាមលោកវីលីយ៉ាំគីមដដែល បាឡុងចារកិច្ច មានគុណប្រយោជន៍ច្រើនជាងផ្កាយរណបស៊ើបការណ៍ដែលគេអាចវាយប្រហារកម្ទេចបានពីដីនិងពីអាកាស។ សមត្ថភាពទីមួយ គឺបាឡុងអាចគេចពីប្រព័ន្ធរ៉ាដា។ បើមានទំហំតូច បាឡុងអាចធ្វើចារកិច្ចដោយគ្មាននរណាដឹងនិងចាប់សញ្ញាបានទេ។ ហើយគុណប្រយោជន៍មួយទៀត គឺ បាឡុងអាចអណ្តែតលើមេឃនៅមួយកន្លែង រយៈពេលយូរ ចំលើចំណុចស៊ីបណាមួយដែលគេចង់តាមដាន។
ជាពិសេសទៅទៀត គេពិបាកកម្ចាត់ណាស់ កុំឃើញថាជាប៉េងប៉ោងដូច្នេះ។ នេះតាមសំដីរបស់លោកវីលីយ៉ាំគីមដដែល។ អ្នកជំនាញរូបនេះបានរំលឹកថា កាលពីឆ្នាំ១៩៩៨ យោធាកាណាដា បានបញ្ជូនយន្តហោះចម្បាំងទៅកម្ចាត់បាឡុងឧតុនិយមអនាថាមួយ បាញ់អស់រយៈពេល៦ថ្ងៃ ទម្រាំប៉េងប៉ោងស្វិតអស់ខ្យល់ធ្លាក់។ ចំពោះបាឡុងនេះ លោក វីលីយ៉ាំ គីម មិនដឹងថាមីស៊ីលបាញ់ពីដីទៅអាកាសអាចកម្ចាត់បានដែរឬអត់ទេ។
សម្រាប់រដ្ឋបាលអាមេរិក អាមេរិកសម្រេចមិនកម្ចាត់បាឡុងនេះ ដោយគិតថាបាឡុងចិនទំហំធំខ្លាំងពេកផង និងខ្លាចនាំប៉ះពាល់ដោយប្រជាជនផង។ ហើយម្យ៉ាងទៀត គេមិនទាន់ដឹងដោយប្រាកដថា បាឡុងនេះធ្វើប្រតិបត្តិការមែនទែន ឬគ្រាន់តែជាបង្អួតសមត្ថភាពរបស់ចិន ព្រោះសូមកុំភ្លេចថាក្រៅអំពីភាពជម្លោះសេដ្ឋកិច្ច មហាអំណាចទាំងពីរក៏កំពុងប្រកួតប្រជែងបច្ចេកវិទ្យាខ្លាំងដែរ។ ហេតុដូច្នេះហើយបានជាអាមេរិកសុខចិត្តតបតជាមួយចិន តាមផ្លូវភ្លឺសាធារណៈ ខុសទម្លាប់ដែលសំណុំរឿងចារកិច្ចបែបនេះច្រើនតែត្រូវផ្អិបទុក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ