WHOរិះគន់ទិន្នន័យរបស់ចិន ចំណែកអឺរ៉ុបព្រមព្រៀងឲ្យគេរឹតបន្តឹងសុខភាពលើអ្នកដំណើរមកពីចិន
ចុះផ្សាយនៅថ្ងៃ៖
ស្តាប់ - ០៧:៣៧
ស្ថានភាពឆ្លងជំងឺកូវីដនៅប្រទេសចិនក្លាយជាក្តីបារម្ភកាន់តែខ្លាំងរបស់អង្គការសុខភាពពិភពលោក។ នៅថ្ងៃពុធ ទីភ្នាក់ងារសុខភាពរបស់អង្គការសហប្រជាជាតិបានរិះគន់ទិន្នន័យរបស់ចិនស្តីពីចំនួនអ្នកឆ្លង និងអ្នកស្លាប់ដោយសារកូវីដថា មិនឆ្លុះបញ្ចាំងពីតថភាពជាក់ស្តែងនៃជំងឺកូវីដដែលកំពុងជួបសន្ទុះកំណើនឆ្លងរាលដាលខ្លាំង ចាប់តាំងពីចិនឈប់អនុវត្តវិធានការកូវីដសូន្យ និងបើកប្រទេសឲ្យចរាចរដូចធម្មតា នៅដើមខែមករានេះ។ យល់ឃើញដូចអង្គការសុខភាពពិភពលោកដែលថា ទិន្នន័យអ្នកឆ្លង និងអ្នកស្លាប់កូវីដនៅចិនគ្មានតម្លាភាព ប្រទេសសមាជិកអឺរ៉ុបកាលពីថ្ងៃពុធទី ៤មករា បានឯកភាពគ្នាដើម្បីណែនាំប្រទេសសមាជិកឲ្យទាមទារអ្នកដំណើរមកពីប្រទេសចិនត្រូវមានលទ្ធផលតេស្តកូវីដអវិជ្ជមាន ប្រទេសសមាជិកអឺរ៉ុបត្រូវបានជំរុញលើកទឹកចិត្តផងដែរឲ្យ ធ្វើតេស្តបន្ថែមលើអ្នកដំណើរមកពីប្រទេសចិន
បន្ទាប់ពីខ្វែងគំនិតគ្នាអស់ជាច្រើនថ្ងៃ ប្រទេសសមាជិកអឺរ៉ុបទាំង ២៧នៅទីបំផុតបានឯកភាពគ្នា កាលពីថ្ងៃពុធម្សិលមិញ ដើម្បីអនុវត្តវិធានការរឹតបន្តឹងលើអ្នកដំណើរមកពីប្រទេសចិន។កិច្ចព្រមព្រៀងរបស់សហភាពអឺរ៉ុបកាលពីថ្ងៃពុធម្សិលមិញគ្រាន់តែនិយាយពីការណែនាំ ប៉ុន្តែ មិនបានចាប់តម្រូវឲ្យប្រទេសសមាជិកអឺរ៉ុបត្រូវតែធ្វើនោះទេ។ មានន័យថា ប្រទេសសមាជិកអឺរ៉ុបនៅតែមានសេរីភាព ក្នុងការអនុវត្ត ឬមិនអនុវត្តតាមសេចក្តីណែនាំរបស់អឺរ៉ុប។
តាមកិច្ចព្រមព្រៀងរបស់សហភាពអឺរ៉ុប គេណែនាំឲ្យប្រទេសសមាជិកអឺរ៉ុបដាក់កម្រិតឲ្យអ្នកដំណើរមកពីប្រទេសចិន ត្រូវតែមានក្នុងដៃ លទ្ធផលតេស្តកូវីដអវិជ្ជមានក្នុងរយៈពេល ៤៨ម៉ោង មុនឡើងយន្តហោះ។ សេចក្តីណែនាំរបស់សហភាពអឺរ៉ុបធ្វើឡើងដោយផ្អែកទៅលើលទ្ធផលប្រជុំរបស់គណៈកម្មាធិការសន្តិសុខសុខភាពដែលប្រមូលផ្តុំទៅដោយអ្នកជំនាញសុខភាព របស់ប្រទេសសមាជិកអឺរ៉ុបទាំង២៧។
តាមកិច្ចព្រមព្រៀងរបស់សហភាពអឺរ៉ុប ប្រទេសសមាជិកអឺរ៉ុបទាំង២៧ត្រូវបានលើកទឹកចិត្តផងដែរ ឲ្យធ្វើតេស្តបន្ថែមទៅលើអ្នកដំណើរមកពីប្រទេសចិន នៅពេលពួកគេមកដល់ព្រលានយន្តហោះក្នុងទឹកដីអឺរ៉ុប។ ជាការធ្វើតេស្តបែបចោះៗ ពោល គឺមិនអនុវត្តជាទូទៅនោះទេ។ ក្រៅពីនោះ ប្រទេសសមាជិកអឺរ៉ុបយល់ព្រមព្រៀងគ្នាដែរ ដើម្បីណែនាំឲ្យរាល់អ្នកដំណើរទៅ ឬមកពីចិនពាក់ម៉ាស។ ចុងក្រោយ សហភាពអឺរ៉ុបលើកទឹកចិត្តឲ្យប្រទេសសមាជិកធ្វើតេស្តលើទឹកប្រើប្រាស់រួចហើយនៅតាមយន្តហោះ ដែលមានដំណើរចេញមកពីប្រទេសចិន។
មជ្ឈមណ្ឌលអឺរ៉ុបដើម្បីបង្ការ និងត្រួតពិនិត្យជំងឺ វាយតម្លៃថា វិធានការធ្វើតេស្តលើអ្នកដំណើរមកពីចិនគ្មានប្រយោជន៍
នៅមួយថ្ងៃមុនសហភាពអឺរ៉ុបចេញកិច្ចព្រមព្រៀងដើម្បីណែនាំឲ្យគេរឹតបន្តឹងសុខភាពលើអ្នកដំណើរមកពីចិន មជ្ឈមណ្ឌលអឺរ៉ុបដើម្បីបង្ការនិងត្រួតពិនិត្យជំងឺ បានចេញមកបញ្ជាក់អះអាងសាជាថ្មីថា ការធ្វើតេស្តកូវីដចាំបាច់ទៅលើអ្នកដំណើរមកពីចិនគឺមិនសមហេតុផល និងគ្មានប្រយោជន៍នោះទេ ព្រោះថា អឺរ៉ុបមានប្រព័ន្ធភាពស៊ាំរួមនៅក្នុងចំណោមប្រជាជនរួចទៅហើយ ម្យ៉ាង មេរោគកូវីដដែលកំពុងឆ្លងរាតត្បាតនៅចិនសព្វថ្ងៃ ដូចគ្នានឹងមេរោគកូវីដបំប្លែងខ្លួនដែលកំពុងចរាចរ នៅទឹកដីអឺរ៉ុប។
ប៉ុន្តែ អ្នកនាំពាក្យរបស់គណៈកម្មការអឺរ៉ុបបានពន្យល់ថា សហភាពអឺរ៉ុបបានសម្រេចចិត្តរឹតបន្តឹងលើអ្នកដំណើរមកពីចិន ដោយផ្អែកទៅលើវិទ្យាសាស្រ្ត និងដោយមើលទៅលើស្ថានភាពជាក់ស្តែង នៅប្រទេសចិន។ សម្រាប់អ្នកនាំពាក្យអឺរ៉ុប សហភាពអឺរ៉ុបមានចំណាត់ការពិសេសទៅលើអ្នកដំណើរមកពីចិន ដោយសារតែទិន្និន័យគ្មានតម្លាភាពរបស់ចិនតែម្តង។ ជាក់ស្តែង ចិនបានប្រកាសជាផ្លូវការថា មានអ្នកស្លាប់តែ ២៣នាក់ គិតចាប់តាំងពីការផ្ទុះរាលដាលជំងឺកូវីដ នៅក្រោយឈប់អនុវត្តកូវីដ។ ប៉ុន្តែ តួលេខនេះ គឺតិចតួច ខុសឆ្ងាយពីស្ថានភាពជាក់ស្តែង នៅតាមមន្ទីរពេទ្យ នៅបន្ទប់សង្រ្គោះបន្ទាន់ និងកន្លែងបូជាសព។
ជាការពិត ចំណាត់ការទាមទារឲ្យអ្នកដំណើរមកពីចិនត្រូវតែមានលទ្ធផលតេស្តកូវីដអវិជ្ជមាននៅក្នុងដៃ មុនឡើងយន្តហោះនឹងមិនអាចទៅទប់ស្កាត់ កុំឲ្យអ្នកដំណើរនាំយកមេរោគកូវីដចូលទឹកដីអឺរ៉ុប។ ឧទាហរណ៍ក្នុងករណីប្រទេសបារាំង ការធ្វើតេស្តកាលពីថ្ងៃអង្គារ នៅព្រលានយន្តហោះមួយកន្លែង បានបង្ហាញថា អ្នកដំណើរម្នាក់ ក្នុងចំណោមអ្នកដំណើរ៣នាក់ មកពីចិន ត្រូវបានតេស្តឃើញមានវិជ្ជមានកូវីដរួចទៅហើយ។
សម្រាប់អាជ្ញាធរបារាំង ក៏ដូចជារដ្ឋមន្រ្តីសុខភាពអឺរ៉ុបដែលជួបប្រជុំគ្នាកាលពីថ្ងៃពុធម្សិលមិញ ចំណាត់ការរបស់អឺរ៉ុបធ្វើឡើង ដោយសារតែទិន្នន័យស្តីពីចំនួនឆ្លង និងអ្នកស្លាប់ដោយសារកូវីដនៅចិន គ្មានតម្លាភាព។ ម្យ៉ាង ការធ្វើតេស្តលើអ្នកដំណើរមកពីចិននឹងមិនអាចទៅទប់ស្កាត់ការឆ្លងមេរោគមកពីប្រទេសចិន ប៉ុន្តែ ការធ្វើតេស្តបន្ថែមលើអ្នកដំណើរមកពីប្រទេសចិន នឹងអាចជួយឲ្យភាគីអឺរ៉ុបកំណត់ យល់ដឹងច្បាស់ពីស្ថានភាពឆ្លងមេរោគនៅចិន។ អ្វីដែលគេចង់ដឹងច្បាស់នោះគឺថា តើអ្នកដំណើរមកពីចិន មានមេរោគកូវីដបំប្លែងខ្លួនថ្មី ប្លែក ដែលអាចឆ្លងលឿន និងគ្រោះថ្នាក់ជាងមេរោគកូវីដអូមីក្រុងដែរឬទេ។ គេកំពុងបារម្ភខ្លាចថា សន្ទុះកំណើនឆ្លងរាលដាលជំងឺកូវីដនៅប្រទេសចិន ដែលមានប្រជាជនប្រមាណ ១៤០០លាននាក់ នឹងអាចផ្តល់ឱកាសឲ្យកើតមានមេរោគបំប្លែងខ្លួនថ្មី ដែលអាចគ្រោះថ្នាក់ ឆ្លងលឿនជាងមេរោគអូមីក្រុង ដែលកំពុងចរាចរច្រើននៅក្នុងពិភពលោកសព្វថ្ងៃ។
ការស្វែងយល់ច្បាស់ពីប្រភេទមេរោគកូវីដបំប្លែងខ្លួនថ្មីដែលអាចចរាចរចូលមកទឹកដីអឺរ៉ុប តាមរយៈអ្នកដំណើរមកពីប្រទេសចិន នឹងអាចជួយឲ្យអឺរ៉ុបប្រុងប្រៀបខ្លួនចាត់វិធានការមានប្រសិទ្ធិភាពដើម្បីការពារប្រព័ន្ធសុខាភិបាលរបស់អឺរ៉ុប។
ធ្វើតេស្តទឹកដែលប្រើប្រាស់រួចហើយនៅលើយន្តហោះ?
នៅមុនសេចក្តីណែនាំរបស់សហភាពអឺរ៉ុប ប្រទេសមួយចំនួនដូចជា បែលហ្សិក អូទ្រីស អូស្ត្រាលី និងកាណាដាបានចាត់វិធានការឲ្យគេធ្វើតេស្តលើទឹកប្រើប្រាស់រួចហើយ នៅលើយន្តហោះដែលធ្វើដំណើរមកពីប្រទេសចិន។ លទ្ធផលវិជ្ជមានកូវីដនៅក្នុងទឹកដែលប្រើប្រាស់រួចហើយនៅក្នុងយន្តហោះ នឹងមិនទៅធ្វើឲ្យគេចាប់បញ្ជូនអ្នកដំណើរចិនទៅប្រទេសវិញ។ ប៉ុន្តែ គោលដៅ គឺដើម្បីសិក្សាឲ្យដឹងថា តើមានមេរោគកូវីដនៅក្នុងទឹកដែលប្រើប្រាស់ទាំងនោះដែរឬទេ។ បើសិនមេរោគកូវីដមានវត្តមាននៅក្នុងទឹកបង្គន់ ទឹកដែលប្រើប្រាស់រួចហើយ នៅក្នុងយន្តហោះ តើវាជាប្រភេទមេរោគកូវីដបំប្លែងខ្លួនថ្មីមួយណា? តើវាជាមេរោគកូវីដបំប្លែងខ្លួនថ្មីដែលអាចគ្រោះថ្នាក់ដែរឬទេ។
ក្រៅពីអឺរ៉ុប អូស្ត្រាលី និងកាណាដា អាមេរិកមានគម្រោងផងដែរថានឹងធ្វើតេស្តលើទឹកប្រើប្រាស់នៅក្នុងយន្តហោះធ្វើដំណើរមកពីចិន។
អង្គការសុខភាពពិភពលោកថាទិន្នន័យរបស់ចិនមិនឆ្លុះបញ្ចាំងពីស្ថានភាពជាក់ស្តែងនៃសន្ទុះកំណើនឆ្លងជំងឺកូវីដនៅចិន
នៅក្នុងសន្និសីទកាសែតកាលពីថ្ងៃពុធទី ៤មករា លោកMichael Ryan អ្នកទទួលខុសត្រូវ ទទួលបន្ទុកផ្នែកសុខភាពបន្ទាន់របស់អង្គការសុខភាពពិភពលោកបាននិយាយរិះគន់និយមន័យថ្មីរបស់ចិន សម្រាប់ពាក្យស្លាប់ដោយសារជំងឺកូវីដ។ ខុសពីប្រទេសផ្សេងទៀត ក្នុងពិភពលោក ចិនបានកំណត់ថា ទាល់តែអ្នកស្លាប់ដោយសារជំងឺផ្លូវដង្ហើមធ្ងន់ធ្ងរ ក្រោយតេស្តវិជ្ជមានកូវីដ ទើបចាត់ទុកថា ជាអ្នកស្លាប់ដោយសារកូវីដ។
តាមការវាយតម្លៃរបស់អ្នកទទួលខុសត្រូវរបស់អង្គការសុខភាពពិភពលោក ការកំណត់និយមន័យរបស់ចិន គឺតូចចង្អៀតណាស់។ ម្យ៉ាង តួលេខស្តីពីអ្នកឆ្លងនិងអ្នកស្លាប់ ចុះផ្សាយដោយអាជ្ញាធរចិន ខុសឆ្ងាយស្រឡះពីស្ថានភាពជាក់ស្តែងនៅតាមមន្ទីរពេទ្យ ជាពិសេស បើគេមើលទៅលើចំនួនអ្នកជំងឺនៅបន្ទប់សង្រ្គោះបន្ទាន់ និងចំនួនអ្នកស្លាប់នៅមន្ទីរពេទ្យ។
ឆ្លើយតបនឹងការរិះគន់របស់អង្គការសុខភាពពិភពលោកដែលថា ទិន្នន័យរបស់ចិនមិនឆ្លុះបញ្ចាំងពីស្ថានភាពជំងឺឆ្លងជាក់ស្តែង ដែលកំពុងស្គាល់សន្ទុះកំណើនឆ្លងខ្លាំងនៅប្រទេសចិន អ្នកនាំពាក្យរបស់ក្រសួងការបរទេសចិន លោកស្រី ម៉ៅ នីង Mao Ning បានចេញមកបញ្ជាក់ នៅថ្ងៃព្រហស្បតិ៍ថា តួលេខរបស់ចិន ស្តីពីចំនួនអ្នកជំងឺ និងអ្នកស្លាប់ដោយសារកូវីដ មានតម្លាភាព។ មន្រ្តីចិនបានទាមទារផងដែរឲ្យអង្គការសុខភាពពិភពលោកប្រកាន់ជំហរដោយផ្អែកលើវិទ្យាសាស្រ្ត អព្យាក្រឹត្យនិងយុត្តិធម៌ និងប្រឹងប្រែងដើម្បីដើរតួនាទីវិជ្ជមានសម្រាប់ឆ្លើយតបនឹងស្ថានភាពជំងឺឆ្លងនៅក្នុងពិភពលោក។
អគ្គនាយកអង្គការសុខភាពពិភពលោកលោកតេដ្រូស កាលពីថ្ងៃ ពុធ បាននិយាយទាមទារសាជាថ្មីឲ្យចិនចែករំលែកទិន្នន័យជាក់លាក់ លឿនរហ័ស និងទៀងទាត់ ស្តីពីអ្នកជំងឺនៅមន្ទីរពេទ្យ និងអ្នកស្លាប់ដោយសារកូវីដ ពោលគឺដើម្បីជួយឲ្យអង្គការសុខភាពពិភពលោកអាចវាយតម្លៃដោយទៀងទាត់ ពីកម្រិតឆ្លង និងគ្រោះថ្នាក់របស់មេរោគកូវីដបំប្លែងខ្លួនថ្មី។ គោលដៅគឺដើម្បីឲ្យអង្គការសុខភាពពិភពលោកអាចសម្របខ្លួន និងចេញអនុសាសន៍ណែនាំប្រកបដោយប្រសិទ្ធិភាពដើម្បីប្រយុទ្ធប្រឆាំងជំងឺកូវីដ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ