សហគមន៍អន្តរជាតិប្រយ័ត្នប្រយែង និងភ័យស្លន់ស្លោពីចិនបើកប្រទេស ខណៈដែលកូវីដកំពុងផ្ទុះខ្លាំងនៅចិន
ចុះផ្សាយនៅថ្ងៃ៖
ស្តាប់ - ០៦:៥៦
២ថ្ងៃក្រោយពីប្រទេសចិនបានប្រកាសបើកប្រទេសឡើងវិញចាប់ពីថ្ងៃទី៨ មករាខាងមុខទៅ សហគមន៍អន្តរជាតិហាក់មានការប្រយ័ត្នប្រយែងផង និងភ័យស្លន់ស្លោផង។ ប្រយ័ត្នប្រយែង និងភ័យស្លន់ស្លោព្រោះការបើកប្រទេសរបស់ចិនពេលនេះធ្វើឡើង ខណៈដែលចិនកំពុងស្គាល់សន្ទុះកំណើនឆ្លងកូវីដគួរឲ្យព្រួយបារម្ភ។ ប្រឈមនឹងលំហូរពលរដ្ឋចិន ពិសេសអ្នកទេសចរចិននាពេលខាងមុខ មានប្រទេសខ្លះបានផ្តើមចាត់វិធានការទប់ស្កាត់ និងប្រទេសខ្លះទៀតកំពុងរិះរកវិធានការទប់ស្កាត់។ អ្វីដែលប្រទេសទាំងអស់កំពុងបារម្ភខ្លាំង គឺលំហូរមេរោគកូវីដ១៩ តាមពលរដ្ឋចិនមកពីចិនដីគោក។
បើពិនិត្យជារួម វិធានការទប់ស្កាត់នឹងការឆ្លងរាលដាលកូវីដ១៩ ឬកូវីដ១៩ បំប្លែងខ្លួនហាក់គ្មានអ្វីថ្មីទេតាំងពីមេរោគសកលមួយនេះបានលេចរូបរាងជិត ៣ឆ្នាំកន្លងទៅ។ វិធានការនោះគឺធ្វើតេស្តិ៍ និងធ្វើចត្តាឡីស័ក ហើយវិធានការដដែលនេះត្រូវបានប្រទេសខ្លះផ្តើមអនុវត្តជាថ្មីទៅលើពលរដ្ឋចិនដែលធ្វើដំណើរចេញពីចិនដីគោក។ នៅអាស៊ី ចាប់ពីថ្ងៃសុក្រ ទី៣០ ធ្នូ ជប៉ុននឹងធ្វើតេស្តិ៍ PCR ជាចាំបាច់ទៅលើពលរដ្ឋចិនមកពីចិនចូលជប៉ុន ហើយបើមានវិជ្ជមានកូវីដ ពួកគេនឹងត្រូវបញ្ជូនទៅធ្វើចត្តាឡីស័ករយៈពេល ៧ថ្ងៃនៅទីកន្លែងដែលរដ្ឋអំណាចជាអ្នកកំណត់។ វិធានការរបស់ជប៉ុននេះក៏គ្រោងអនុវត្តដោយរដ្ឋាភិបាលប្រទេសឥណ្ឌា និងប្រទេសម៉ាឡេស៊ីដែរ។
តៃវ៉ាន់ក៏បានប្រកាសពីការត្រួតពិនិត្យធ្វើតេស្តិ៍លើពលរដ្ឋចិនមកពីចិនដីគោក តែមិនបញ្ជាក់ពីប្រភេទតេស្តិ៍ទេ។ នៅអាមេរិក រដ្ឋបាលក្រុងវ៉ាស៊ីនតោនបានប្រកាសពីគម្រោងរឹតបន្តឹងលើការចូលរបស់ពលរដ្ឋចិនមកពីចិន និងត្រៀមចាត់វិធានការដូចជប៉ុន។ នៅអឺរ៉ុប អ៊ីតាលីដែលបានរងគ្រោះថ្នាក់ខ្លាំងដោយកូវីដ ក្នុងឆ្នាំ ២០២០ ជាប្រទេសអឺរ៉ុបដំបូងគេបានប្រកាសថា គ្រប់អ្នកដំណើរមកពីចិននឹងធ្វើតេស្តិ៍ជាចាំបាច់។ ចំណែកនៅបារាំង វិមានប្រធានាធិបតីបានបញ្ជាក់ពីការស្នើឲ្យរដ្ឋាភិបាលចាត់វិធានការសមស្របដើម្បីការពារពលរដ្ឋបារាំង។ ក្នុងពេលជាមួយគ្នានាថ្ងៃព្រហស្បតិ៍ ទី២៩ ធ្នូ សហភាពអឺរ៉ុបកោះប្រជុំបន្ទាន់មួយដើម្បីពិនិត្យ និងវាយតម្លៃលើស្ថានការណ៍កូវីដ នៅចិន។
បន្ទាប់មក និងបើចាំបាច់ សហភាពអឺរ៉ុបនឹងដាក់ចេញនូវវិធានការរួមមួយសម្រាប់អនុវត្តនៅក្នុងប្រទេសសមាជិកទាំងអស់។ អ្វីដែលច្បាស់នាពេលខាងមុខ គឺនឹងអាចមានប្រទេសផ្សេងទៀតផ្តើមចាត់វិធានការត្រួតពិនិត្យលើគ្រប់អ្នកដំណើរមកពីប្រទេសចិន។
ចិនបន្តលាក់ព័ត៌មានជុំវិញកូវីដ១៩?
បើមើលមួយភ្លែតទៅ ចំណាត់ការរបស់ប្រទេសមួយចំនួននៅពេលនេះមកពីពួកគេបារម្ភខ្លាចពលរដ្ឋចិននាំមេរោគកូវីដបន្ថែមទៀតចូលប្រទេសរបស់ពួកគេ ខណៈដែលមេរោគមួយនេះកំពុងបន្តអូសជើង និងហាក់កំពុងមានវត្តមានអចិន្ត្រៃយ៍នៅក្នុងជីវិតប្រចាំថ្ងៃរបស់មនុស្សលោក។ តែតាមពិតទៅ ការប្រយ័ត្នប្រយែង និងក្តីបារម្ភរបស់ប្រទេសមួយចំនួនពេលនេះក៏ដោយសារតែគេគ្មានព័ត៌មានច្បាស់លាស់ស្តីពីចំនួនអ្នកឆ្លង ចំនួនអ្នកស្លាប់ ពិសេសគឺអត្តសញ្ញាណរបស់កូវីដដែលកំពុងឆ្លងខ្លាំងនៅចិនសព្វថ្ងៃ។ តើវាជាប្រភេទមេរោគកូវីដមួយណា?។ ជាមេរោគកូវីដ១៩ដើម ជាមេរោគកូវីដ១៩ បំប្លែងខ្លួនដែលតា ឬមួយក៏អូមីក្រុង?។
គួរបញ្ជាក់ថារាល់ថ្ងៃនេះ ពិភពលោកកំពុងបន្តគ្របដណ្តប់ដោយអូមីក្រុងដែលឆ្លងខ្លាំង និងឆ្លងលឿន តែមិនសូវមានគ្រោះថ្នាក់។ ប្រសិនបើករណីឆ្លងខ្លាំងនៅចិនពេលនេះកើតចេញពីអូមីក្រុង នោះគ្មានអ្វីជាចំណោតទេ ព្រោះអូមីក្រុងក៏កំពុងមានចរាចរណ៍ស្រាប់នៅបារាំង ឬនៅប្រទេសជាច្រើន។ ដូច្នេះបើបន្ថែមពលរដ្ឋចិនដែលមកពីចិនមានផ្ទុកអូមីក្រុងក៏មិនទាស់ខុសអ្វីដែរ។ តែអ្វីដែលគេបារម្ភ គឺខ្លាចមិនមែនអូមីក្រុង តែជាមេរោគបំប្លែងខ្លួនថ្មីៗទៀត។ ឥឡូវនេះទៀត ពោលតាំងពីចិនឈប់ប្រកាសចំនួនអ្នកឆ្លង និងអ្នកស្លាប់ដោយកូវីដ១៩ប្រចាំថ្ងៃ គេកាន់តែគ្មានព័ត៌មានអ្វីទាំងអស់ពីចិន។
ដូច្នេះជម្រើសមានតែមួយគត់ដើម្បីចង់ដឹងថាជាមេរោគអ្វី គឺត្រូវធ្វើតេស្តិ៍ PCR លើគ្រប់អ្នកដំណើរមកពីចិនដីគោក។ គួរបញ្ជាក់ថា តាំងពីថ្ងៃផ្ទុះកូវីដ១៩ ដំបូង ចិនបានលាក់ និងនិយាយមិនពិតទាល់តែសោះទាក់ទងនឹងប្រភពកូវីដ និងអត្តសញ្ញាណកូវីដ។ ប្រសិនបើចិនមានតម្លាភាព និងប្រាប់ការពិតតាំងពីដំបូង ម្ល៉េះប្រហែលពិភពលោកមិនអូសជើងនៅក្នុងកូវីដមកដល់សព្វថ្ងៃទេ។
ចិនជាទីកន្លែងចាប់កំណើតមេរោគបំប្លែងខ្លួនថ្មីៗទៀត?
នៅពេលដែលមានមេរោគមួយបន្តត្រាំត្រែង និងអូសបន្លាយយូរ មេរោគនោះនឹងបំប្លែងខ្លួនជាមេរោគថ្មីៗទៀតដោយខ្លះកាច ខ្លះស្លូត ខ្លះឆ្លងលឿន និងខ្លះទៀតឆ្លងយឺត។ ដូចករណីអូមីក្រុងសព្វថ្ងៃ គឺឆ្លងលឿនមួយគុណនឹង ១០ តែមិនសូវបង្កគ្រោះថ្នាក់។ នៅចិន រដ្ឋអំណាចធ្លាប់បានបញ្ជាក់ពីករណីឆ្លងភាគច្រើនដោយអូមីក្រុង។ តើពិត ឬទេ?។ អត់មានអ្នកណាហ៊ានឆ្លើយទេ ព្រោះចិនធ្លាប់បានលាក់រឿងកូវីដនេះតាំងពីដំបូងមក។ គេមិនដឹងថា តើក្នុងមួយថ្ងៃៗ មានអ្នកឆ្លង និងអ្នកស្លាប់ប៉ុន្មាននាក់នៅចិន។ តួលេខរបស់បស្ចិមលោកបានប៉ាន់ប្រមាណថា មានអ្នកឆ្លងប្រចាំថ្ងៃខ្ទង់ពី ៣០ ទៅ ៣៧លាននាក់ ហើយនៅពេលខាងមុខ នឹងអាចមានអ្នកស្លាប់ជាង ១លាននាក់។
គួរបញ្ជាក់ថានៅចិន យុទ្ធនាការនៃការចាក់វ៉ាក់សាំងមិនដូចគ្នានៅក្នុងប្រទេសផ្សេងទេ។ ខណៈដែលប្រទេសផ្សេងបានឲ្យអាទិភាពលើការវ៉ាក់សាំងលើក្រុមមនុស្សចាស់ និងក្រុមមនុស្សងាយរងគ្រោះ ចិនបានឲ្យអាទិភាពលើក្រុមមនុស្សសកម្ម។ ដល់អ៊ីចឹងទៅនៅពេលនេះ ក្រុមមនុស្សចាស់ និងក្រុមមនុស្សងាយរងគ្រោះនៅចិនកំពុងប្រឈមនឹងគ្រោះថ្នាក់ខ្លាំងជាងគេ។ នេះដោយនៅមិនទាន់គិតពីគុណភាពវ៉ាក់សាំងដែលចិនប្រើតែវ៉ាក់សាំងខ្លួនឯង និងដែលប្រជាជនចិនភាគច្រើនស្ទាក់ស្ទើរមិនចង់ចាក់។ ខណៈនេះ ពោលតាំងពីរដ្ឋាភិបាលចិនលុបចោលនយោបាយសូន្យកូវីដមក មេរោគកូវីដកំពុងធ្វើចរាចរណ៍ដោយសេរីនៅទូទាំងប្រទេស និងកំពុងចម្លងលើមនុស្សដោយមិនរើសមុខ។
អ្វីដែលក្រុមអ្នកជំនាញកំពុងបារម្ភពេលនេះ គឺខ្លាចតែចិនក្លាយជាទីកន្លែងចាប់កំណើតនូវមេរោគបំប្លែងខ្លួនថ្មីៗទៀតនាពេលខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ