អង្គការសុខភាពពិភពលោកសង្ឃឹមបិទបញ្ចប់ជំងឺឆ្លងកូវីដ១៩ និងអុតស្វាក្នុងឆ្នាំ ២០២៣
ចុះផ្សាយនៅថ្ងៃ៖
ស្តាប់ - ០៧:២៨
លោកទេដ្រូស ប្រមុខអង្គការសុខភាពពិភពលោក WHO បានថ្លែងក្នុងថ្ងៃពុធ ទី១៤ ធ្នូដោយសង្ឃឹមថា ជំងឺឆ្លងកូវីដ១៩ និងជំងឺឆ្លងអុតស្វានឹងលែងជាបញ្ហាអាសន្នសម្រាប់សុខភាពសាធារណៈនៅឆ្នាំ ២០២៣ ទៀតឡើយ។ លោកទេដ្រូសបានថ្លែងយ៉ាងដូចនេះនៅក្នុងសន្និសីទកាសែតរៀបចំក្នុងទីក្រុងហ្សឺណែវ ប្រទេសស្វីស។ តាមប្រមុខអង្គការ WHO រូបនេះដដែល មេរៀនមួយដ៏សំខាន់ដែលគេបានទាញចេញពីជំងឺឆ្លងរាតត្បាតកូវីដ១៩ គឺថា ប្រទេសទាំងអស់ត្រូវតែមានវិធានការឆាប់រហ័សក្នុងឆ្លើយតបនឹងការលេចឡើងនូវជំងឺឆ្លងគួរឱ្យភ្ញាក់ផ្អើល។
អ្វីដែលប្រមុខអង្គការ WHO លោកទេដ្រូសសង្ឃឹមមិនមែនមានន័យថា ឆ្នាំ ២០២៣ ជាឆ្នាំគ្មានជំងឺឆ្លងកូវីដ១៩ ឬមួយក៏គ្មានជំងឺឆ្លងអុតស្វាទាំងស្រុងទេ។ លោកទេដ្រូសគ្រាន់ចង់បញ្ជាក់ដោយសង្ឃឹមថានៅឆ្នាំ ២០២៣ ជំងឺឆ្លងទាំងពីរនាពេលសព្វថ្ងៃ ពិសេសជំងឺកូវីដ១៩ នឹងលែងជាក្តីបារម្ភ ឬជាបញ្ហាអាសន្នសម្រាប់សុខភាពសាធារណៈទៀតឡើយ។ តាមលោកទេដ្រូស ដំណាក់ការគ្រោះថ្នាក់របស់ជំងឺទាំងពីរអាចនឹងបិទបញ្ចប់ក្នុងឆ្នាំ ២០២៣។ សព្វថ្ងៃនេះ ជំងឺកូវីដ១៩ ពិសេសមេរោគបំប្លែងខ្លួនអូមីក្រុងកំពុងបន្តឆ្លងលើមនុស្សរាប់ម៉ឺននាក់ និងបានសម្លាប់មនុស្សច្រើនរយនាក់ក្នុងមួយថ្ងៃៗ។
តែបើធៀបនឹងកាលពី ១ឆ្នាំមុន ចំនួនអ្នកឆ្លង និងចំនួនអ្នកស្លាប់មានការធ្លាក់ចុះគួរឲ្យកត់សម្គាល់។ តាមប្រមុខអង្គការ WHO លោកទេដ្រូស ចំនួនអ្នកស្លាប់ដោយកូវីដ១៩ក្នុងមួយសប្តាហ៍ៗនៅក្នុងលោកសព្វថ្ងៃមានក្នុងរង្វង់ ១០ ០០០នាក់ ពោលតិចជាង ៥ដងបើធៀបនឹងមួយឆ្នាំមុន។ ជាក់ស្តែងក្នុងសប្តាហ៍កន្លងទៅ មានស្លាប់តិចជាង ១០ ០០០នាក់។ តែសម្រាប់លោកទេដ្រូស ស្លាប់ ១០ ០០០នាក់នៅតែច្រើន និងថា គ្រប់ប្រទេសទាំងអស់អាចចាត់វិធានការឲ្យបានច្រើនជាងនេះដើម្បីសង្រ្គោះជីវិតមនុស្ស។ វិធានការដែលលោកទេដ្រូសចង់និយាយនេះ គឺបង្កើនការចាក់វ៉ាក់សាំងឲ្យបានលឿន និងឲ្យបានច្រើនជាងសព្វថ្ងៃ។
តាមលោកទេដ្រូស អ្នកឈឺធ្ងន់ចូលពេទ្យ និងអ្នកស្លាប់ដោយកូវីដសព្វថ្ងៃច្រើនជាអ្នកដែលមិនបានចាក់វ៉ាក់សាំង ឬអ្នកដែលនៅមិនទាន់បានចាក់វ៉ាក់សាំងគ្រប់ចំនួនដូស។ ដូច្នេះបើមានការចាក់វ៉ាក់សាំងឲ្យបានលឿន និងច្រើនជាងសព្វថ្ងៃ កូវីដ១៩ នឹងលែងជាក្តីបារម្ភ និងជាគ្រោះថ្នាក់សម្រាប់ពិភពលោកទៀតឡើយនៅឆ្នាំ ២០២៣ បើទោះបីជាជំងឺមួយនេះនៅមិនទាន់ទៅណាឆ្ងាយក៏ដោយ។
មានករណីឆ្លងជិត ៦៥០លានករណី និងមានស្លាប់ជាង ៦លាន ៦សែននាក់
តាមការប៉ាន់ប្រមាណរបស់អង្គការសុខភាពពិភពលោក WHO មានវ៉ាក់សាំងបង្ការកូវីដ១៩ ចំនួន ៣០ ០០០លានដូសត្រូវបានប្រើនៅទូទាំងពិភពលោក។ តែ WHO មិនបានបញ្ជាក់ពីវ៉ាក់សាំងផលិតដោយប្រទេសនេះ ឬប្រទេសនោះ ឬដោយមន្ទីរពិសោធន៍ណាមួយទេ។ អ្វីដែល WHO បានបញ្ជាក់គឺថា ក្នុងចំនួនអ្នកដែលបានចាក់វ៉ាក់សាំងក្នុងលោក មាន ៣០% ទើបចាក់បានតែមួយដូសប៉ុណ្ណោះ។ មួយដូសគឺមិនគ្រប់គ្រាន់ដើម្បីអាចការពារពីការធ្លាក់ខ្លួនឈឺធ្ងន់ ឬការស្លាប់បានទេ។ គួរបញ្ចាក់ថា តាំងពីថ្ងៃផ្ទុះដំបូងនៅចុងឆ្នាំ ២០១៩ ឬដើមឆ្នាំ ២០២០ មកដល់ពេលនេះ ជំងឺកូវីដ១៩ បានឆ្លងលើមនុស្សជិត ៦៥០លាននាក់ មិនបានផ្តាច់ជីវិតមនុស្សជាង ៦លាន ៦សែននាក់នៅទូទាំងពិភពលោក។
តែតួលេខនេះត្រូវបាន WHO វាយតម្លៃថានៅទាបជាងការពិត មានន័យថា ចំនួនអ្នកឆ្លង និងអ្នកស្លាប់ដោយកូវីដ១៩ មានច្រើនជាងនេះឆ្ងាយណាស់។ ជាថ្មីម្តងទៀត ប្រមុខអង្គការ WHO លោកទេដ្រូសបានលើកឡើងពីវិសមភាពក្នុងការទទួលបានវ៉ាក់សាំង និងការចាក់វ៉ាក់សាំង ពិសេសរវាងក្រុមប្រទេសអ្នកមាន និងក្រុមប្រទេសអ្នកក្រ។ ជាក់ស្តែងនៅក្នុងក្រុមប្រទេសដែលមានចំណូលតិច មានមនុស្សម្នាក់ក្នុងចំណោម ៥នាក់បានចាក់វ៉ាក់សាំង។ ទាក់ទងនឹងវត្តមានជំងឺឆ្លងអុតស្វាវិញត្រូវបានលោកទេដ្រូសបញ្ជាក់ថា មានករណីឆ្លងតិច និងអត្រាស្លាប់ទាប បើធៀបនឹងជំងឺកូវីដ១៩។
តាមលោកទេដ្រូស មានជំងឺអុតស្វាជាង ៨២ ០០០ករណីត្រូវបានរកឃើញនៅក្នុង ១១០ប្រទេសក្នុងលោក និងមានអ្នកស្លាប់សរុបចំនួន ៦៥នាក់។ លោកទេដ្រូសយល់ឃើញថា បើនិន្នាការនៃជំងឺមួយនេះនឹងបន្តមានដូចសព្វថ្ងៃ គេអាចប្រកាសបិទបញ្ចប់ភាពអាសន្ន និងភាពគ្រោះថ្នាក់របស់ជំងឺអុតស្វានៅឆ្នាំ ២០២៣។
ចិនមានកំណើនករណីឆ្លងកូវីដតាំងពីមុនឈប់អនុវត្តនយោបាយសូន្យកូវីដ
ក្រៅពីចាប់អារម្មណ៍លើស្ថានភាពទូទៅនៃជំងឺកូវីដ១៩ និងជំងឺអុតស្វានៅក្នុងលោក WHO ក៏បានចាប់អារម្មណ៍ពីកំណើនករណីឆ្លងកូវីដ១៩ យ៉ាងខ្លាំងនៅចិន ពិសេសតាំងពីក្រោយរដ្ឋាភិបាលចិនដកចេញវិញនូវនយោបាយសូន្យកូវីដ។ តើដោយសារតែការបោះបង់នយោបាយសូន្យកូវីដ នេះឬ បានជាចិនកំពុងស្គាល់កំណើនករណីឆ្លងពេលនេះ?។ មិនមែនទេ នេះជាចម្លើយរបស់លោក Michael Ryan អ្នកទទួលបន្ទុកគ្រប់គ្រងស្ថានភាពអាសន្នសុខភាពរបស់ WHO។
តាមលោក Michael Ryan កំណើនករណីឆ្លងកូវីដ១៩ នៅចិនបានកើតមានឡើងតាំងពីមុនក្រុងប៉េកាំងផ្តើមបន្ធូរបន្ធយលើវិធានការរឹតបន្តឹងទៅទៀត។ លោក Michael Ryan បានយល់ឃើញថា ការដែលចិនបានស្គាល់កំណើនករណីឆ្លងកូវីដ១៩ យ៉ាងលឿនពេលនេះ គឺដោយសារតែវិធានការគ្រប់គ្រងរបស់ចិនមិនអាចទប់នឹងការឆ្លងកូវីដ១៩បាន ពោលមិនមែនដោយសារតែចិនបានលើកចេញវិញនូវនយោបាយសូន្យកូវីដ នោះទេ។ តាមអ្នកទទួលបន្ទុកគ្រប់គ្រងស្ថានភាពអាសន្នសុខភាពរបស់ WHO រូបនេះដដែល ការដែលចិនបានលុបយុទ្ធសាស្រ្តសូន្យកូវីដចោលវិញមកពីចិនយល់ថា យុទ្ធសាស្រ្តមួយនេះលែងជាមធ្យោបាយដ៏ប្រសើរដើម្បីទប់ស្កាត់នឹងការឆ្លងកូវីដទៀតឡើយ ឬនិយាយយ៉ាងខ្លីថា លែងមានប្រសិទ្ធិភាព។
គួររម្លឹកថាពីដំបូង នយោបាយសូន្យកូវីដត្រូវបានអនុវត្តដោយប្រទេសមួយចំនួនលើលោក ក្នុងនោះមានចិនមួយដែរ។ តែនៅពេលដែលចិនបានបន្តប្រកាន់ខ្ជាប់ខ្ជួននូវនយោបាយមួយនេះ ប្រទេសផ្សេងបានបោះបង់ចោលវិញ។ គឺទើបនៅក្រោយការផ្ទុះបាតុកម្មរបស់ពលរដ្ឋចិននៅក្នុងទីក្រុងមួយចំនួនដែលរដ្ឋាភិបាលក្រុងប៉េកាំងបានសម្រេចឈប់ប្រើវិញនូវយុទ្ធសាស្រ្តសូន្យកូវីដ និងហាក់បែរទៅបង្កើនយុទ្ធនាការចាក់វ៉ាក់សាំង ពិសេសចាក់លើក្រុមមនុស្សចាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ