បារាំងរៀបចំសន្និសីទអន្តរជាតិដើម្បីជួយអ៊ុយក្រែនភ្លាមៗក្នុងរដូវរងារ និងនៅពេលខាងមុខ
ចុះផ្សាយនៅថ្ងៃ៖
ស្តាប់ - ០៦:៣៥
នៅថ្ងៃអង្គារ ទី១៣ ធ្នូ ប្រទេសបារាំងធ្វើជាម្ចាស់ផ្ទះរៀបចំសន្និសីទអន្តរជាតិដើម្បីជួយគាំទ្រប្រទេសអ៊ុយក្រែន។ មានប្រទេសប្រមាណជា ៤០ប្រទេស និងអង្គការប្រមាណជា ២០អង្គការបានចូលរួមដោយផ្ទាល់នៅក្នុងសន្និសីទអន្តរជាតិនេះ។ សន្និសីទអន្តរជាតិស្តីពីអ៊ុយក្រែនពេលនេះបានរៀបចំឡើង ខណៈដែលសង្រ្គាមរុស្ស៊ីឈ្លានពានអ៊ុយក្រែនបានអូសបន្លាយជាង ៩ខែ និងដែលក្នុងរយៈពេលចុងក្រោយនេះ រុស្ស៊ីបានសម្រុកវាយប្រហារលើហេដ្ឋារចនាសម្ព័ន្ធរបស់អ៊ុយក្រែន ពិសេសហេដ្ឋារចនាសម្ព័ន្ធថាមពល។
ក្នុងថ្ងៃតែមួយនៅថ្ងៃអង្គារ ទី១៣ ធ្នូ សន្និសីទអន្តរជាតិស្តីពីអ៊ុយក្រែនត្រូវបានបារាំងរៀបចំជាពីរដំណាក់ការដោយមានការចូលរួមផ្ទាល់ពីប្រមុខរដ្ឋ និងប្រមុខរដ្ឋាភិបាលមកពីប្រមាណ ៤០ប្រទេស និងអង្គការប្រមាណជា២០អង្គការ។ ក្នុងចំណោមប្រទេសដែលបានចូលរួមផ្ទាល់ក៏មានកម្ពុជាមួយដែរក្នុងនាមជាប្រធានប្តូរវេនអាស៊ានដោយមានការចូលរួមរបស់ប្រមុខរដ្ឋាភិបាលលោកហ៊ុន សែន។ តែក្រៅពីចូលរួមនៅក្នុងសន្និសីទអន្តរជាតិស្តីពីអ៊ុយក្រែន លោកហ៊ុន សែនក៏នឹងមានជំនួបជាមួយប្រធានាធិបតីបារាំងលោកម៉ាក្រុងតាមរយៈការទទួលទានអាហារការងាររួមគ្នានៅរាត្រីថ្ងៃអង្គារ ទី១៣ ធ្នូ។
ចិនបានអវត្តមាននៅក្នុងសន្និសីទអន្តរជាតិស្តីពីអ៊ុយក្រែនពេលនេះ ហើយឥណ្ឌា និងក្រុមប្រទេសនៅតំបន់ឈូងសមុទ្រពែក្សរ៍បានចូលរួមដោយឯកអគ្គរដ្ឋទូត។ ចំណែកអគ្គលេខាធិការអង្គការសហប្រជាជាតិលោកអង់តូនីញ៉ូ ហ្គូទែរស៍ និងប្រធានាធិបតីអ៊ុយក្រែនលោកហ្សេឡេនស្គីបានចូលរួមតាមអនឡាញ។ គេអាចយល់បានពីការមិនអាចចូលរួមផ្ទាល់របស់លោកហ្សេឡេនស្គីដោយលោកបានបញ្ជូននាយករដ្ឋមន្រ្តី និងភរិយារបស់លោកឲ្យចូលរួមផ្ទាល់។ ទាក់ទងនឹងការចូលរួមរបស់ស្ថាប័ន មានដូចជាអង្គការមូលនិធិរូបិយវត្ថុអន្តរជាតិ ឬមួយក៏ធនាគារពិភពលោក។
ជួយកម្តៅអ៊ុយក្រែនក្នុងរដូវរងារ និងគិតគូរពីកសាងអ៊ុយក្រែនឡើងវិញ
មានកិច្ចប្រជុំចំនួនពីរដាច់ដោយឡែកពីគ្នានៅក្នុងសន្និសីទអន្តរជាតិស្តីពីអ៊ុយក្រែនពេលនេះ។ កិច្ចប្រជុំទី១ រៀបចំនៅក្រសួងការបរទេស ហើយកិច្ចប្រជុំទី២ រៀបចំនៅក្រសួងសេដ្ឋកិច្ច និងហិរញ្ញវត្ថុ។ កិច្ចប្រជុំទី១ ដែលគេឲ្យឈ្មោះ « សាមគ្គីភាពជាមួយប្រជាជនអ៊ុយក្រែន » មានគោលដៅជួយអ៊ុយក្រែនភ្លាមៗ និងជាបន្ទាន់។ នៅក្នុងន័យនេះ កិច្ចប្រជុំផ្តោតសំខាន់លើវិស័យចំនួន ៥ ជាមូលដ្ឋាន គឺថាមពល ទឹកស្អាត ស្បៀងអាហារ សុខាភិបាល និងដឹកជញ្ជូន។ នៅចំពោះមុខពេលនេះ ប្រជាជនអ៊ុយក្រែនកំពុងខ្វះថាមពល ខ្វះទឹកស្អាត ខ្វះចំណីអាហារ ខ្វះថ្នាំពេទ្យ និងខ្វះមធ្យោបាយធ្វើដំណើរ។
អ្វីដែលប្រជាជនអ៊ុយក្រែនកំពុងត្រូវការខ្លាំងជាងគេពេលនេះ គឺថាមពលសម្រាប់ប្រើម៉ាស៊ីនកម្តៅក្នុងរដូវត្រជាក់ដែលមានសីតុណ្ហភាពធ្លាក់ក្រោមសូន្យ។ គួររម្លឹកថាតាំងពីខែតុលា រុស្ស៊ីបានយករដូវរងារធ្វើជាផ្ទាំងស៊ីបដើម្បីធ្វើបាបប្រជាជនអ៊ុយក្រែនដោយបានបាញ់ស្រោចមីស៊ីលទៅកម្ទេចហេដ្ឋារចនាសម្ព័ន្ធរបស់អ៊ុយក្រែននៅក្នុងទីក្រុងធំៗ ពិសេសហេដ្ឋារចនាសម្ព័ន្ធថាមពល។ ដូច្នេះនៅចំពោះមុខពេលនេះ និងទោះជាសង្រ្គាមកំពុងបន្តមាន សហគមន៍អន្តរជាតិត្រូវរួមគ្នាស្តារឡើងវិញនូវបណ្តាញអគ្គិសនី ប្រព័ន្ធទឹកស្អាត ប្រព័ន្ធដឹកជញ្ជូន រួមទាំងការផ្តល់ស្បៀង និងថ្នាំពេទ្យ។
បន្ទាប់មកនៅក្នុងកិច្ចប្រជុំទី២ គឺផ្តោតសំខាន់លើការគិតគូរពីការកសាងអ៊ុយក្រែនឡើងវិញដែលត្រូវបានខូចខាត ខ្ទេចខ្ទីរដោយសង្រ្គាមរុស្ស៊ីជាង ៩ខែកន្លងទៅ។ កិច្ចប្រជុំវគ្គទី២ នេះមានការបន្ថែមអ្នកចូលរួម ពិសេសការចូលរួមរបស់ក្រុមហ៊ុន រោងចក្រសហគ្រាសបារាំង។ គោលដៅ គឺដើម្បីឲ្យក្រុមហ៊ុន រោងចក្រសហគ្រាសបារាំងផ្តើមគិតគូរ និងពិនិត្យមើលថា តើមានវិស័យ និងការងារអ្វីខ្លះដែលពួកគេអាចធ្វើបាននៅអ៊ុយក្រែន។
តម្លៃខូចខាតអ៊ុយក្រែនដោយស្នាដៃរុស្ស៊ីមានទឹកប្រាក់មហាសាល
ពិតណាស់ បទឈប់បាញ់ក៏គ្មាន ហើយក្តីរំពឹងចប់សង្រ្គាមក៏នៅមិនទាន់អាចនិយាយបាន។ តែនេះមិនមានន័យថា គេមិនអាចគិតគូរពីការកសាងអ៊ុយក្រែនឡើងវិញនោះទេ។ មួយវិញទៀត ការកសាងអ៊ុយក្រែនឡើងវិញក៏មិនចាំបាច់ធ្វើក្នុងពេលតែមួយនៅទូទាំងប្រទេសដែរ ព្រោះថា មានតំបន់ខ្លះរបស់អ៊ុយក្រែនដែលបានរងការវាយប្រហារតាំងពីសង្រ្គាមចាប់ផ្តើមកំពុងត្រូវការឲ្យមានការកសាងឡើងវិញបណ្តើរៗ។ ទាក់ទងនឹងតម្លៃនៃការខូចខាត ខ្ទេចខ្ទីរអ៊ុយក្រែនដោយស្នាដៃរុស្ស៊ី គឺសម្បើមខ្លាំងណាស់។ តាមការប៉ាន់ប្រមាណរបស់អនុប្រធានធនាគារពិភពលោកទទួលបន្ទុកអឺរ៉ុប និងអាស៊ីកណ្តាលលោកស្រី Anna Bjerde គឺមានទឹកប្រាក់ប្រមាណ ៣៥០ ០០០លានដុល្លារ។
តែលោកស្រី Anna Bjerde មិនភ្លេចបញ្ជាក់ថា តម្លៃខូចខាតនេះគិតត្រឹមពីថ្ងៃផ្ទុះសង្រ្គាមដំបូងថ្ងៃទី២៤ កុម្ភៈដល់ត្រឹមថ្ងៃទី១ មិថុនាប៉ុណ្ណោះ។ អ៊ីចឹងបើគេគិតមកដល់ថ្ងៃទី១៣ ធ្នូនេះ ទំហំនៃការខូចខាត ខ្ទេចខ្ទីរនៅអ៊ុយក្រែនអាចនឹងមានទឹកប្រាក់ច្រើនជាង៣៥០ ០០០លានដុល្លារឆ្ងាយណាស់។ គេត្រូវរង់ចាំនៅដើមឆ្នាំ ២០២៣ ទើបធនាគារពិភពលោកផ្សព្វផ្សាយនូវតួលេខថ្មី។ ដូច្នេះសម្រាប់អ៊ុយក្រែន បើគ្មានការជួយជ្រោមជ្រែងពីសហគមន៍អន្តរជាតិទេ អ៊ុយក្រែនមិនអាចធានារ៉ាប់រងកសាងប្រទេសឡើងវិញដោយខ្លួនបានឡើយ។ តែទន្ទឹមគ្នាពេលនេះដែរ អាវុធបន្តជារឿងអាទិភាពដែលអ៊ុយក្រែនកំពុងត្រូវការខ្លាំងដើម្បីបន្តត ទល់នឹងរុស្ស៊ីដោយមិនដឹងថា សន្តិភាពនឹងអាចលេចរូបរាងនៅពេលណាឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ