សហភាពអឺរ៉ុបព្រមព្រៀងបង្កើតច្បាប់ហាមឃាត់ការនាំចូលផលិតផលដែលទាក់ទងនឹងការកាប់បំផ្លាញព្រៃ
ចុះផ្សាយនៅថ្ងៃ៖
ស្តាប់ - ០៦:០៥
សភាអឺរ៉ុបនិងប្រទេសសមាជិកអឺរ៉ុបទាំង២៧បានយល់ព្រមព្រៀងគ្នានៅថ្ងៃអង្គារទី៦ធ្នូ ដើម្បីបង្កើតច្បាប់ហាមឃាត់ការនាំចូលផលិតផលដែលមានប្រភពចេញមកពីការកាប់បំផ្លាញព្រៃឈើ។ ជៀសវាងកុំឲ្យពលរដ្ឋអឺរ៉ុបចូលរួមដោយប្រយោលក្នុងការបំផ្លាញព្រៃឈើ តាមរយៈការហាមនាំចូលផលិតផលដែលមានប្រភពចេញមកពីកាប់បំផ្លាញព្រៃឈើ។ នេះជាគោលដៅសំខាន់របស់ច្បាប់ ដែលសភាអឺរ៉ុប និងប្រទេសសមាជិកអឺរ៉ុបត្រូវបោះឆ្នោតអនុម័តជាផ្លូវការនិងចូលជាធរមាននៅឆ្នាំក្រោយ។ តើផលិតផលអ្វីខ្លះដែលអាចជាប់ក្នុងបញ្ជីហាមឃាត់របស់សហភាពអឺរ៉ុប
សភាអឺរ៉ុបនិងអ្នកតំណាងប្រទេសសមាជិកអឺរ៉ុបទាំង២៧បានព្រមព្រៀងគ្នាបង្កើតច្បាប់ស្តីពីការហាមឃាត់ការនាំចូលផលិតផលដែលមានប្រភពចេញពីការកាប់បំផ្លាញព្រៃឈើ។
រាល់ផលិតផលដែលមានប្រភពចេញមកពីការកាប់បំផ្លាញដីព្រៃ សុទ្ធតែស្ថិតក្នុងបញ្ជីខ្មៅរបស់សហភាពអឺរ៉ុប ដែលមានដូចជា កាហ្វេ កាកាវ សណ្តែក ដូងប្រេង ឈើ ធ្យូង ក្រដាស សាច់គោ កៅស៊ូ។
នេះជាលើកទី១ក្នុងពិភពលោក ដែលគេបង្កើតឲ្យមានច្បាប់ហាមឃាត់ការនាំចូលទំនិញផលិតផលដែលមានប្រភពចេញមកពីការកាប់បំផ្លាញព្រៃឈើ។ បើតាមប្រធានគណៈកម្មការបរិស្ថានរបស់សភាអឺរ៉ុប អំណើះតទៅ រាល់ផលិតផលដែលនាំចូលមកក្នុងទឹកដីអឺរ៉ុបនឹងត្រូវគេត្រួតពិនិត្យ យ៉ាងល្អិតល្អន់ដើម្បីដឹងច្បាស់ថា រាល់ផលិតផល ដែលប្រជាជនអឺរ៉ុបប្រើប្រាស់ប្រចាំថ្ងៃ ដូចជាកាហ្វេ សាច់ ស្ហូកូឡា ធ្យូងអាំងសាច់ ក្រដាសសៀវភៅ គ្មានប្រភពចេញមកពីដីកសិកម្មដែលបានមកពីការកាប់បំផ្លាញព្រៃឈើ។
ធ្វើយ៉ាងណាដើម្បីដឹងថា ផលិតផល មានប្រភពចេញមកពីការកាប់បំផ្លាញព្រៃឈើ?
តាមសេចក្តីព្រាងច្បាប់ រាល់ផលិតផលដែលដាំនៅលើដីកសិកម្ម ដែលបានមកពីការកាប់បំផ្លាញព្រៃ នៅក្រោយខែធ្នូ ឆ្នាំ ២០២០នឹងត្រូវហាមឃាត់មិនឲ្យនាំចូលក្នុងទឹកដីអឺរ៉ុប។ ឧទាហរណ៍ កាហ្វេដាំលើដីដែលបានមកពីការកាប់ព្រៃនៅមុនខែធ្នូ ឆ្នាំ ២០២០ នៅតែអាចមានសិទ្ធិនាំចូលមកទឹកដីអឺរ៉ុប។ ប៉ុន្តែ រាល់កាហ្វេដែលដាំនៅលើដីដែលគេបានមកពីការកាប់ព្រៃចាប់ពីឆ្នាំ ២០២១ នឹងត្រូវហាមឃាត់មិនឲ្យនាំចូលមកអឺរ៉ុប។
ដើម្បីបញ្ជាក់ថា ផលិតផលរបស់ខ្លួនមិនទាក់ទងនឹងការកាប់បំផ្លាញព្រៃឈើ សេចក្តីព្រាងច្បាប់របស់អឺរ៉ុបទាមទារឲ្យក្រុមហ៊ុននាំចូល បង្ហាញឯកសារបញ្ជាក់ទីតាំងភូមិសាស្រ្តរបស់ផលិតផល ហើយនិងត្រូវភ្ជាប់មកជាមួយរូបភាពផ្កាយរណបពីលើទីតាំងភូមិសាស្រ្តនោះផង។
ការត្រួតពិនិត្យទាមទារកក្រដាសស្នាម ទីតាំងភូមិសាស្រ្តរបស់ផលិតផលត្រូវធ្វើនៅកំពង់ផែរនៅតាមប្រទេសអឺរ៉ុប។ បើសិន ទីតាំងភូមិសាស្រ្តរបស់ផលិតផល មិនស្ថិតក្នុងតំបន់ដែលមានការកាប់បំផ្លាញព្រៃឈើ នោះទើបគេអនុញ្ញាតឲ្យនាំចូលទៅក្នុងទីផ្សារអឺរ៉ុប។ ផ្ទុយពីនោះ ផលិតផលទាំងនោះ នឹងត្រូវបញ្ជូនទៅប្រទេសដើមវិញ។ តាមការវាយតម្លៃរបស់អ្នកជំនាញ ជាមួយច្បាប់ខាងលើ ប្រទេសសមាជិកអឺរ៉ុបអាចបង្កើនការត្រួតពិនិត្យ ដល់ទៅ ៩%លើការនាំចូលផលិតផលមកពីប្រទេសដែលមានការកាប់បំផ្លាញព្រៃឈើច្រើន ចំណែកការត្រួតពិនិត្យលើផលិតផលដែលនាំចូលមកពីប្រទេសមានការកាប់បំផ្លាញព្រៃឈើមធ្យម នឹងកើនឡើងប្រមាណ ៣%។
ច្បាប់របស់សហភាពអឺរ៉ុបនឹងអាចជួយទប់ស្កាត់ការកាប់បំផ្លាញព្រៃឈើក្នុងពិភពលោក?
សម្រាប់អ្នកការពារបរិស្ថាន ច្បាប់របស់អឺរ៉ុបនឹងជួយកាត់បន្ថយបានច្រើន ការកាប់បំផ្លាញព្រៃឈើក្នុងពិភពលោក។ តាមអង្គការការពារសត្វព្រៃ WWF ការប្រើប្រាស់ផលិតផលរបស់ប្រជាជនអឺរ៉ុបមានជាប់ពាក់ព័ន្ធនឹងការកាប់បំផ្លាញព្រៃឈើ ឬអាចថា ផលិតផលដែលនាំចូលមកទឹកដីអឺរ៉ុបមានប្រភពមកពីដីដែលបានមកពីការកាប់បំផ្លាញព្រៃឈើ ១៦%ក្នុងពិភពលោក ពោលគឺនៅក្រោយប្រទេសចិន ដែលជាប់ចំណាត់ថ្នាក់លេខ១ (២៤%) ប៉ុន្តែ នាំមុខឥណ្ឌា និងអាមេរិក។
គេសង្ឃឹមថា ច្បាប់ចាត់វិធានការប្រឆាំងការនាំចូលទំនិញ ផលិតផលដែលមានប្រភពមកពីការកាប់បំផ្លាញព្រៃ នឹងជួយកាត់បន្ថយបានច្រើនការកាប់បំផ្លាញព្រៃឈើ។ អំណើះតទៅ រាល់ក្រុមហ៊ុនដែលចង់នាំទំនិញ មកទឹកដីអឺរ៉ុបត្រូវប្រយ័ត្នប្រយែង សិក្សាល្អិតល្អន់ដើម្បីច្បាស់ថា ផលិតផល ទំនិញគ្មានប្រវត្តិជាប់ពាក់ព័ន្ធនឹងដីកសិកម្មដែលជាប់ពាក់ព័ន្ធនឹងការកាប់បំផ្លាញព្រៃ ដែលហាមដោយច្បាប់របស់អឺរ៉ុប។ ចំណែកម្ចាស់ផលិតក្នុងស្រុក ក៏ត្រូវប្រយ័ត្នប្រយែងដោយនឹងលែងហ៊ានដាំលើដីដែលបានមកពីការកាប់ព្រៃ។ នៅទីបំផុត នឹងមិនសូវមានអ្នកដែលហ៊ានទៅកាប់ព្រៃដើម្បីរានយកដី ធ្វើកសិកម្មដាំកាហ្វេ សណ្តែក ដើមកៅស៊ូទៀតនោះទេ ព្រោះគេដឹងថា នៅទីបំផុត ផលិតផលដែលដាំលើដីដែលបានមកពីការកាប់បំផ្លាញព្រៃ នឹងត្រូវហាមមិនឲ្យទៅលក់នៅទឹកដី។
មានអ្នកមិនត្រេកអរនឹងច្បាប់អឺរ៉ុប
អ្នកដែលមិនសប្បាយចិត្តនឹងច្បាប់អឺរ៉ុប គឺបណ្តាប្រទេសដែលល្បីខាងកាប់រាន ដុតព្រៃដើម្បីយកដីមកដាំដំណាំកសិកម្ម ចិញ្ចឹមសត្វ ដូចជាប្រទេសប្រេស៊ីល ឥណ្ឌូណេស៊ី កូឡុំប៊ីជាដើម។ ប្រទេសទាំងនោះធ្លាប់បានត្អូញត្អែរហើយថា ពួកគេនឹងខាតបង់ខ្លាំងដោយសារវិធានការច្បាប់ថ្មីរបស់សហភាពអឺរ៉ុប។
មួយវិញទៀត មានអ្នកដែលខកចិត្តនឹងច្បាប់អឺរ៉ុបដែរ នោះគឺក្រុមការពារសិទ្ធិមនុស្សដែលឃើញថា ច្បាប់របស់អឺរ៉ុបមិនសូវជាតឹងតែងដាក់កំហិតឲ្យក្រុមហ៊ុន ជួយការពារប្រជាជនភាគតិច ដែលតាមពិតជាអ្នកពលីជីវិត ការពារព្រៃឈើខ្លាំងជាងគេ។ ច្បាប់របស់អឺរ៉ុបបានទាមទារឲ្យគេគោរពសិទ្ធិរស់នៅ របស់ប្រជាជនភាគតិចមែន ប៉ុន្តែ ការគោរពសិទ្ធិជនជាតិភាគតិចធ្វើឡើងទៅតាមច្បាប់ក្នុងស្រុកនីមួយៗ។
ចុងក្រោយ សេចក្តីព្រាងច្បាប់ស្តីពីការហាមឃាត់ការនាំចូលទំនិញដែលមានប្រភពមកពីការកាប់បំផ្លាញព្រៃឈើនឹងចូលជាធរមាន នៅ២០ថ្ងៃក្រោយ ការបោះឆ្នោតអនុវត្តរបស់សភាអឺរ៉ុប និងបណ្តារដ្ឋសមាជិក ដែលគេគ្រោងធ្វើនៅឆ្នាំក្រោយ។ នៅក្រោយច្បាប់ចូលជាធរមាន ក្រុមហ៊ុនធំៗមានពេល ១៨ខែដើម្បីអនុវត្ត ត្រួតពិនិត្យកិច្ចសន្យា រាល់ទំនិញរបស់ខ្លួនដែលជាប់ក្នុងសំណាញ់របស់ច្បាប់អឺរ៉ុប។ ចំណែកក្រុមហ៊ុនមធ្យម និងតូចៗមានពេលដល់ទៅ ២ឆ្នាំដើម្បីអនុវត្តច្បាប់អឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ