ការបារម្ភឈានឡើងអំពីការផ្ទុះអាវុធដាក់គ្នា ក្រោយកូរ៉េខាងជើងនិងខាងត្បូង បាញ់មីស៊ីលឆ្លងឆ្លើយគ្នា
ចុះផ្សាយនៅថ្ងៃ៖
ស្តាប់ - ០៧:០៦
នៅព្រឹកថ្ងៃពុធ ទី២វិច្ឆិកានេះ យោងតាមក្រសួងការពារជាតិកូរ៉េខាងត្បូង គឺកូរ៉េខាងជើង បានបាញ់មីស៊ីលជាច្រើនគ្រាប់ សំដៅមកសមុទ្រខាងកើត និងខាងត្បូង ដែលក្នុងនោះ មានមួយគ្រាប់ បានធ្លាក់ចូលកៀកបំផុត នឹងដែនទឹករបស់កូរ៉េខាងត្បូង។ នេះជាលើកទីមួយហើយ ដែលមីស៊ីលរបស់កូរ៉េខាងជើង បានធ្លាក់ហួសឆ្ងាយពីខ្សែបន្ទាន់ព្រំដែនទឹក ដែលខណ្ឌចែកបងប្អូនកូរ៉េទាំង២បែបនេះ។ ភ្លាមៗនោះ កងទ័ពកូរ៉េខាងត្បូង បានបាញ់មីស៊ីលច្រើនគ្រាប់ ជាការឆ្លើយតបវិញទៅកាន់របបកុម្មុយនីស្តព្យុងយ៉ាង។ ការបាញ់មីស៊ីលឆ្លងឆ្លើយគ្នានេះ បានបង្កឲ្យមានការព្រួយបារម្ភកាន់តែខ្លាំង អំពីការផ្ទុះអាវុធដាក់គ្នាទៅវិញទៅមក។
លើកទីមួយ មីស៊ីលធ្លាក់កៀកមកក្នុងដែនទឹកកូរ៉េខាងត្បូង
ក្រសួងការពារជាតិកូរ៉េខាងត្បូង បានឲ្យដឹងថា នៅព្រឹកថ្ងៃពុធ កូរ៉េខាងជើង បានបាញ់មីស៊ីល សំដៅមកសមុទ្រខាងកើត និងខាងត្បូង ដែលជាទូទៅយើងហៅថាសមុទ្រជប៉ុននោះ ចំនួនជាង១០គ្រាប់។ ក្នុងចំណោមនោះ មាន៣គ្រាប់ បានធ្លាក់មកក្នុងសមុទ្រ កៀកនឹងដែនទឹករបស់កូរ៉េខាងត្បូង ហើយដែលកងទ័ពកូរ៉េខាងត្បូង អះអាងថាជាប្រភេទមីស៊ីលបាលីស្ទិក ចំងាយខ្លី។ ហើយក្នុងចំណោម៣គ្រាប់នេះ មានមួយគ្រាប់ បានឆ្លងផុតខ្សែបន្ទាត់ព្រំដែនទឹកខាងជើង ដែលជាព្រំដែនពុះចែកកូរ៉េទាំង២ ហើយបានឆ្លងចូលមកធ្លាក់ចំងាយប្រមាណ២៧គីឡូម៉ែត្រ ពីខ្សែព្រំដែននេះ ហើយដែលចំណុចធ្លាក់នេះ ស្ថិតនៅចម្ងាយប្រមាណតែ៥៧គីឡូម៉ែត្រប៉ុណ្ណោះ ពីឆ្នេរសមុទ្ររបស់កូរ៉េខាងត្បូង ក្រុងSokcho ។
ប្រជាជនរស់នៅលើកោះ Ullengdo ចំងាយប្រមាណ១៦៧គីឡូម៉េត្រ ខាងកើតឆ្នេរកូរ៉េខាងត្បូង បានអះអាងប្រាប់អ្នកកយកព័ត៌មាន Reuters ថា នៅវេលាម៉ោង ៨និង៥៥នាទីព្រឹកថ្ងៃពុធ ស៊ីរ៉ែនបានបន្លឺសូរ កងរំពង ប្រាប់ឲ្យប្រជាជនរត់រកកន្លែងមានសុវត្ថិភាពជ្រក ព្រោះខ្លាចក្រែងមានគ្រាប់មីស៊ីលផ្សេងទៀត ដែលកូរ៉េខាងជើងបាញ់មក។ ក្រោយមក ម៉ោងប្រមាណជា៩និង១៥នាទី ទើបប្រជាជននាំគ្នាចេញពីកន្លែងពួនជ្រកវិញ បន្ទាប់ពីបានទទួលដំណឹងថា គ្រាប់មីស៊ីលរបស់កូរ៉េខាងជើង បានធ្លាក់នៅក្នុងទឹកសមុទ្រ។
កងទ័ពកូរ៉េខាងត្បូង បានលើកឡើងថា នេះជាលើកទី១ហើយ ដែលគ្រាប់មីស៊ីលរបស់កូរ៉េខាងជើង បានធ្លាក់មកកៀកបំផុត នឹងដែនទឹករបស់កូរ៉េខាងត្បូង បើគិតរាប់ពីពេលដែលឧបទ្វីបកូរ៉េត្រូវបានពុះចែកជាពីរ។ លោកប្រធានាធិបតី កូរ៉េខាងត្បូង យូន ស៊ុកយោល បានកោះប្រជុំក្រុមប្រឹក្សាសន្តិសុខជាតិជាបន្ទាន់ នៅព្រឹកមិញនេះ ដោយលោកបានលើកឡើងថា ទង្វើរបស់កូរ៉េខាងជើង គឺជាការគំរាម និងជាការឈ្លានពានមកលើបូរណភាពដែនដី របស់កូរ៉េខាងត្បូង ព្រោះមីស៊ីលកូរ៉េខាងជើង បានហោះរំលងខ្សែបន្ទាត់ព្រំដែនខាងជើង។
“ឆ្លើយតបដោយរហ័ស និងខ្លាំងដៃ”
នៅក្នុងពេលប្រជុំក្រុមប្រឹក្សាសន្តិសុខជាតិ លោកយូន ស៊ុកយោល ប្រធានាធិបតីកូរ៉េខាងត្បូង បានប្រាប់ទៅកងទ័ពថា ត្រូវតែបើកប្រតិបត្តិការ ឲ្យរហ័ស និងខ្លាំងដៃបំផុត ដើម្បីឆ្លើយតប ហើយធ្វើឲ្យកូរ៉េខាងជើង ដឹងខ្លួនថាបានធ្វើខុស។ ក្រោយការចេញបញ្ជានេះ កងទ័ពកូរ៉េខាងត្បូង បានប្រើយន្តហោះចម្បាំង បាញ់មីស៊ីលពីលើអាកាសចំនួន៣គ្រាប់ ឲ្យធ្លាក់ទៅក្បែរចំណុច ដែលមីស៊ីលរបស់កូរ៉េខាងជើងបានធ្លាក់។
កងទ័ពកូរ៉េខាងត្បូងបញ្ជាក់ថា មីស៊ីលដែលគេបានប្រើ ជាប្រភេទមីស៊ីល AGM-84H/K SLAM-ER ដែលអាចមានសមត្ថភាពបំពាក់ក្បាលគ្រាប់ មានកម្លាំងផ្ទុះស្មើនឹងទំងន់៣៦០គីឡូក្រាមម៉្សៅ TNT ហើយអាចរត់បានចម្ងាយ ២៧៩គូឡូម៉ែត្រ។ ភ្លាមៗ បន្ទាប់ពីកូរ៉េខាងត្បូងបានបាញ់មីស៊ីល ឆ្លើយតបវិញនេះ ស្រាប់តែកងទ័ពកូរ៉េខាងជើង បានបាញ់កាំភ្លើងធំ ចំនួនប្រមាណជា១០០គ្រាប់ ចេញពីតំបន់ Kosong ខេត្តកាងវុន ដែលស្ថិតនៅក្នុងតំបន់ស ព្រំដែនពុះចែកកូរ៉េទាំង២។
គួរបញ្ជាក់ដែរ ថាការគំរាមជាថ្មី និងកាន់តែខ្លាំងដៃ ពីសំណាក់របបផ្តាច់ការព្យុងយ៉ាង មកលើកូរ៉េខាងត្បូងនេះ គឺវាចំពេលដែលកូរ៉េខាងត្បូង កំពុងតែកាន់ទុក្ខទូទាំងប្រទេស បន្ទាប់ពីមានហេតុការណ៍ប្រជ្រៀតជាន់គ្នា ស្លាប់ជាង១៥០នាក់ កាលពីយប់ថ្ងៃសៅរ៍ សប្តាហ៍មុននេះ។ ដូច្នេះ វាជាកាលៈទេសៈ ដែលកូរ៉េខាងត្បូង ទាំងប្រជាជន ទាំងថ្នាក់ដឹកនាំ មានការតានតឹងក្នុងចិត្តខ្លាំងណាស់។ ការគំរាមកំញើញរបស់កូរ៉េខាងជើង មកលើសន្តិសុខកូរ៉េខាងត្បូងបន្ថែមទៀតនេះ អាចធ្វើឲ្យកូរ៉េខាងត្បូងឆ្លើយតបវិញក្នុងកម្រិតមួយខ្លាំង ដែលអាចឈានទៅដល់ជ្រុលដៃ ហើយអាចផ្ទុះជាសង្គ្រាមក៏ថាបានដែរ។ ត្រង់នេះហើយ ដែលជាការព្រួយបារម្ភបំផុត។
Vigilant Storm
ជានិច្ចជាកាលកូរ៉េខាងជើង តែងតែធ្វើការបរិហាររិះគន់ ហើយចោទថាសមយុទ្ធយោធារួមគ្នា របស់អាមេរិក និងកូរ៉េខាងត្បូង វាគឺជាសកម្មភាពបង្ហាញកម្លាំង គំរាមមកលើកូរ៉េខាងជើង។ ក៏ប៉ុន្តែនៅលើកនេះ អ្វីដែលគួរឲ្យកត់សំគាល់ គឺកូរ៉េខាងជើងបានឆ្លើយតបដោយកម្លាំងគំរាម មកកៀកបំផុតនឹងដែនទឹករបស់កូរ៉េខាងត្បូង។
សមយុទ្ធយោធាលើកនេះ ដែលកងទ័ពអាមេរិក និងកងទ័ពកូរ៉េខាងត្បូង ប្រើយន្តហោះចម្បាំងដល់ទៅ១០០គ្រឿងនោះ ត្រូវគេដាក់ឈ្មោះថា Vigilant Storm។ ឈ្មោះនេះ ត្រូវបាន Pak Jong Chon មេបញ្ជាការកងទ័ពកូរ៉េខាងជើង និងជាអគ្គលេខាធិការបក្សកុម្មុយនីស្ត អះអាងថា វាបានសំដៅទៅលើប្រតិបត្តិការ Desert Storm មុនពេលដែលអាមេរិកលើកទ័ពចូលទៅវាយអ៊ីរ៉ាក់នៅឆ្នាំ ១៩៩១។ បណ្ដាញព័ត៌មានផ្លូវការកូរ៉េខាងជើង បានចុះផ្សាយសំដីរបស់ លោក Pak Jong Chon ដែលបានគំរាមថា ប្រសិនបើអាមេរិកនិងកូរ៉េខាងត្បូង ហ៊ានប៉ះពាល់មកលើកូរ៉េខាងជើង នោះកូរ៉េខាងជើង នឹងប្រើប្រាស់ប្រតិបត្តិការយុទ្ធសាស្ត្រពិសេស ដើម្បីឆ្លើយតបវិញ មិនញញើតឡើយ។ ប្រតិបត្តិការយុទ្ធសាស្ត្រពិសេសនេះ គឺប្រហែលជាគេចង់សំដៅទៅលើការប្រើប្រាស់គ្រាប់នុយក្លេអ៊ែរ។
កូរ៉េខាងជើងពើងទ្រូង ព្រោះមានទំនុកចិត្តកាន់តែខ្លាំង លើសមត្ថភាពសព្វាវុធខ្លួន
លោក Pak Won-gon សាស្ត្រាចារ្យនៅសកលវិទ្យា Ewha បានលើកឡើងថា បើតាមលោកចាំ គឺកូរ៉េខាងជើងមិនដែលឆ្លើយតបខ្លាំងបែបនេះទេ ចំពោះសមយុទ្ធយោធារួមគ្នារវាងអាមេរិកនិងកូរ៉េខាងត្បូង។ ការពើងទ្រូង កាន់តែខ្លាំងរបស់កូរ៉េខាងជើង គឺទំនងមកពីកូរ៉េខាងជើង មានទំនុកចិត្តលើសមត្ថភាពសព្វាវុធរបស់ខ្លួនកាន់តែខ្លាំង។ បើតាមការវិភាគរបស់លោក គឺកូរ៉េខាងជើង កាន់តែទុកចិត្តអំពីសមត្ថភាពអាវុធនុយក្លេអ៊ែររបស់ខ្លួន ថាអាចធ្វើឲ្យកូរ៉េខាងត្បូង និងអាមេរិកញញើតបាន។
ដូចគ្នាដែរ លោក Cheong Seong-Chang អ្នកស្រាវជ្រាវ នៅវិទ្យាស្ថាន Sejong បានលើកឡើងថា កាលៈទេសៈពេលនេះ គឺឈានចូលដល់ចំណុចគ្រោះថ្នាល់ខ្លាំងណាស់ ដោយសង្គ្រាមផ្ទុះអាវុធដាក់គ្នា អាចកើតមានឡើង ក្នុងមួយប៉ព្រិចភ្នែក។ យោងតាមប្រភពជាច្រើនពីកូរ៉េខាងត្បូង និងអាមេរិក គឺកូរ៉េខាងជើងទំនងជាប្រុងប្រៀបសាកល្បងគ្រាប់បែកបរមាណូថ្មីមួយទៀត ក្នុងពេលឆាប់ៗនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ