មហាសន្និបាតលើកទី២០នៃគណបក្សកុម្មុយនីស្តចិន បិទបញ្ចប់ជាមួយនឹងការពង្រឹងអំណាចជូនលោកស៊ី ជីនពីង
ចុះផ្សាយនៅថ្ងៃ៖
ស្តាប់ - ០៧:៥៣
មហាសន្និបាតលើកទី២០ នៃគណបក្សកុម្មុយនីស្តចិន ដែលបានបើកទ្វារកាលពីថ្ងៃអាទិត្យសប្តាហ៍មុន ត្រូវបិទបញ្ចប់នៅថ្ងៃសៅរ៍ទី ២២តុលា ជាមួយនឹងការបោះឆ្នោតជាឯកច្ឆ័ន្ទ តែងតាំងសមាជិកថ្មី នៃគណៈកម្មាធិការមជ្ឈឹមបក្សកុម្មុយនីស្ត។ ដូចអ្វីដែលគេរំពឹងទុក គឺលោក ស៊ី ជីនពីង បានទទួលការពង្រឹងអំណាចកាន់តែខ្លាំងឡើង ជាមួយនឹងការបន្ត កាន់កាប់កៅអីប្រធានាធិបតីចិន ក្នុងអាណត្តិទី៣។ ទន្ទឹមគ្នានេះដែរ យោងតាមការអះអាង របស់ក្រុមអ្នកកាសែតបរទេស លោក ហ៊ូ ជីនតាវ អតីតប្រធានាធិបតីចិន ទំនងដូចជាត្រូវបានបុគ្គលិក២នាក់ ចាប់ក្រៀកចេញពីអង្គសន្និបាតទាំងបង្ខំ មុនពេលការបោះឆ្នោតបានចាប់ផ្តើម។
លោកហ៊ូ ជីនតាវ ត្រូវគេក្រៀកយកចេញពីមហាសន្និបាត?
ឧប្បតិ្តហេតុមួយបានកើនឡើងមុនពេលបន្តិច ដែលអង្គមហាសន្និបាតលើកទី២០របស់បក្សកុម្មុយនីស្តចិន ហៀបនឹងបោះឆ្នោតជ្រើសតាំងសមាជិកថ្មីនៃគណៈកម្មាធិការមជ្ឈឹមបក្ស ព្រមទាំងបោះឆ្នោតលើខ្លឹមសារធម្មនុញ្ញថ្មីរបស់បក្សកុម្មុយនីស្តចិន។ ចៃដន្យក្នុងពេលនោះ គេបានបើកទ្វារ អនុញ្ញាតឲ្យអ្នកយកព័ត៌មានទាំងអស់ ចូលទៅក្នុងអង្គសន្និបាត ដើម្បីស្តាប់លទ្ធផលបោះឆ្នោត។
យោងតាមវីដេអូ ដែលអ្នកកាសែតរបស់ទីភ្នាក់ងារព័ត៌មានបារាំង AFPបានថតបាន គឺគេឃើញមានបុគ្គលិកម្នាក់ មកឱននិយាយជាមួយលោកហ៊ូ ជីនតាវ ដូចជាព្យាយាម សុំឲ្យគាត់ក្រោកចេញពីអង្គសន្និបាទ តែលោកហ៊ូ ជីនតាវ មិនព្រមធ្វើតាម។ រំពេចនោះ ស្រាប់តែបុគ្គលិកនោះ បានក្រៀកដៃចាប់លោកហ៊ូ ជីនតាវឲ្យក្រោកចេញពីកៅអី ហើយបុគ្គលិកម្នាក់ទៀតក៏មកដល់ ដើម្បីជួយក្រៀក។ លោក ហ៊ូ ជីនតាវ ព្យាយាមដណ្តើមយកសំណុំក្រដាសឯកសាររបស់គាត់ពីដៃបុគ្គលិកនោះ តែបុគ្គលិកនោះកញ្ឆក់មិនព្រមឲ្យ។ លោកហ៊ូ ជីនតាវ បានបង្ហាញអាកប្បកិរិយា ប្រឹងរើបំរាស់ មិនចង់ដើរចេញទៅតាមការបង្ខំរបស់គេទេ។
ក្នុងពេលដែលត្រូវគេក្រៀកចេញនេះ គេឃើញថាលោកហ៊ូ ជីនតាវ បាននិយាយទៅកាន់លោកស៊ី ជីនពីង ដែលអង្គុយកៅអីជាប់គ្នានោះ ហើយលោកស៊ី ជីនពីង ទំនងជាបានឆ្លើយតបមកវិញ តែភ្នែកមិនបានងើយមើលមុខលោកហ៊ូ ជីនតាវទេ។ ពេលត្រូវគេក្រៀកចេញទៅ លោម ហ៊ូ ជីនតាវ ក៏បានយកដៃទះស្មារលោក លី កឺឈាំង នាយករដ្ឋមន្ត្រីចិន ដែលអង្គុយនៅជាប់លោកស៊ីន ជីនពីង ចំណែកលោកលី កឺឈាំង ក៏បានងក់ក្បាលតបវិញ។ ចំណែកអ្នកផ្សេងៗទៀត ដែលអង្គុយក្បែរៗនោះ ខ្លះហាក់ដូចជាប្រឹងទប់ខ្លួនមិនហ៊ានងាកមើលលោកហ៊ូ ជីនតាវ ដែលត្រូវគេក្រៀកយកចេញពីមហាសន្និបាតទេ។
ចង់ជំទាស់ រំខានមហាសន្និបាត?
ឧប្បតិ្តហេតុនេះ គឺជារឿងកម្រ និងគួរឲ្យភ្ជាក់ផ្អើលខ្លាំងណាស់ ព្រោះថាតាមធម្មតា មហាសន្និបាតបក្សកុម្មុយនីស្តចិន គឺមានការរៀបចំប្រូតូកូលតឹងតែងខ្លាំងណាស់ មិនដែលមានរឿងអ្វីចម្លែកដែលគេមិនបានគ្រោងទុក អាចកើតឡើងបានឡើយ។ គិតមកត្រឹមពេលនេះ គ្មាននរណាដឹងថា មានរឿងកើតឡើងឲ្យពិតប្រាកដនោះទេ ព្រោះយើងមានត្រឹមតែរូបភាពវីដេអូថតពីចំងាយ មិនឮសំឡេងនិយាយ។ គ្មានការបញ្ជាក់ព័ត៌មានណាមួយពីអ្នករៀបចំអង្គសន្និបាតទេ ហើយបណ្តាញព័ត៌មានក្នុងស្រុកចិន ក៏មិនបាននិយាយអ្វីទាំងអស់ ទាក់ទិននឹងឧប្បត្តិហេតុនេះ។ ជាងនេះទៀត នៅលើបណ្តាញ Weibo របស់ចិនវិញ គឺគេបិទព័ត៌មានទាំងស្រុងតែម្តងឲ្យតែពាក់ព័ន្ធនឹងលោកហ៊ូ ជីនតាវ។
ប្រការទាំងនេះ ហាក់បង្ហាញអំពីអាថ៍កំបាំងអ្វីម្យ៉ាង ដែលគេមិនចង់ឲ្យមតិមហាជនដឹងថាមានរឿងអ្វីពិតប្រាកដបានកើតឡើង។ យើងមិនដឹងថា តើលោក ហ៊ូ ជីនតាវ ដែលមានវ័យ៧៩ឆ្នាំ ចាស់ជរាទ្រុឌទ្រោមនោះ ត្រូវគេក្រៀកចេញដោយសារបញ្ហាសុខភាព ឬមួយក៏ជារឿងផ្សេង? វាអាចដែរ ដែលគាត់អាចរំខានដល់អង្គសន្និបាត តាមរយៈការបោះឆ្នោតជំទាស់ ដែលអាចធ្វើឲ្យខូចដល់ទំនៀមទំលាប់ របស់មហាសន្និបាតបក្សកុម្មុយនីស្តចិន ដែលតែងតែបោះឆ្នោតគាំទ្រជាឯកច្ឆ័ន្ទ១០០%។ សម្រាប់ពេលនេះ គ្មាននរណាដឹងការពិតទេ។ រូបថតចុងក្រោយនៃមហាសន្និបាតលើកទី២០នេះ គឺមានកៅអីទំនេរមួយ គ្មានមនុស្សអង្គុយ នៅជាប់កៅអីលោកស៊ី ជីនពីងតែម្តង។
លោកលី កឺឈាំង និងឥស្សរជនធំ៣រូបទៀត គ្មានឈ្មោះក្នុងគណៈកម្មាធិការមជ្ឈឹមបក្ស
ថ្ងៃចុងក្រោយនៃមហាសន្និបាទនេះ សមាជិកបក្សទាំង២៣០០នាក់ ដែលមានវត្តមាន បានបោះឆ្នោតជាឯកច្ឆ័ន្ទតែងតែងគណៈកម្មាធិការមជ្ឈឹមបក្សថ្មី ដែលមានសមាជិកទាំងអស់២០៥នាក់។ យោងតាមតារាងឈ្មោះ ដែលទីភ្នាក់ងារព័ត៌មានចិនផ្លូវការចិនបានចុះផ្សាយ គឺមានឥស្សរជន៤នាក់ ដែលលែងមានឈ្មោះជាសមាជិកនៃគណៈកម្មាធិការមជ្ឈឹមបក្សតទៅទៀតហើយ។ ក្នុងនោះ គឺលោក លី កឺឈាំង នាយករដ្ឋមន្ត្រីបច្ចុប្បន្ន ដែលត្រូវឈប់ព្រោះដល់អាយុចូលនិវត្តន៍។
បន្ទាប់មកទៀត លោក Li Zhanshu ប្រធានសភាប្រជាមានិតចិន លោកឧបនាយករដ្ឋមន្ត្រីបច្ចុប្បន្ន Han Zheng ក៏ត្រូវគេដកចេញដែរ។ ហើយលោក Wang Yang ប្រធានក្រុមប្រឹក្សានយោបាយប្រជាមានិតចិន ក៏លែងមានឈ្មោះក្នុងគណៈកម្មាធិការមជ្ឈឹមបក្សដែរ។ លោក Wang Yang នេះ ត្រូវគេស្គាល់ថាជាមនុស្សមានទំនោរសេរីនិយមខ្លាំងជាគេ ក្នុងចំណោមសមាជិកធំៗរបស់បក្សកុម្មុយនីស្តចិន ហើយកន្លងមកធ្លាប់ត្រូវគេរំពឹងថាប្រហែលជាអាចឡើងមកធ្វើជានាយករដ្ឋមន្ត្រីអាណត្តិថ្មីនេះ។ តែពេលនេះ គឺត្រូវគេដកចេញហើយ។
បើតាមការគុណគូររបស់ទីភ្នាក់ងារព័ត៌មានបារាំង គឺគណៈកម្មាធិការមជ្ឈឹមបក្សថ្មីនេះ មានសមាជិកចាស់ៗប្រមាណ៦៥%។ ហើយនៅថ្ងៃនេះ គឺសមាជិកថ្មីទាំង២០៥នាក់នេះ នឹងត្រូវប្រជុំបោះឆ្នោត ជ្រើសរើស គណៈកម្មាធិការអចិន្ត្រៃយ៍ នៃការិយាល័យនយោបាយបក្ស ដែលមានសមាជិកចំនួន៧នាក់។ គឺមនុស្សទាំង៧នាក់នេះហើយ ដែលនឹងមានអំណាចធំ ក្នុងការដឹកនាំប្រទេស។ តាមធម្មតា ឈ្មោះសមាជិកទាំង៧នាក់នេះ នឹងត្រូវគេប្រកាសតាមលំដាប់តែម្តង បញ្ជាក់ពីអំណាចមុខតំណែង ពីធំចុះតាមលេខរៀងមកតូច។ លេខរៀងទី១ គឺអគ្គលេខាធិការបក្ស ដែលមានមុខតំណែងជាប្រធានាធិបតី លេខរៀងទី២គឺនាយករដ្ឋមន្ត្រី ហើយឧបនាយករដ្ឋមន្ត្រីបន្តបន្ទាប់មកទៀត។
លោក ស៊ី ជីនពីង មានអំណាចកាន់តែរឹងមាំ
តាមការរំពឹងទុក សមាជិកថ្មីទាំង២០៥នៃគណៈកម្មាធិការមជ្ឈឹមបក្ស នឹងបោះឆ្នោតតែងតាំងលោក ស៊ី ជីនពីង ឲ្យធ្វើជាអគ្គលេខាធិការបក្សជាថ្មីទៀត។ ពោលគឺ លោកស៊ី ជីនពីង ប្រាកដជា បន្តដឹកនាំប្រទេស ធ្វើជាប្រធានាធិបតីអាណត្តិទី៣។ បើតាមការវិភាគមើលទៅ គឺថាលោកស៊ី ជីនពីង ទំនងជាអាចធ្វើជាប្រធានាធិបតីចិន អស់មួយជីវិតផងក៏មិនដឹង ព្រោះថាលោកបានកែប្រែរដ្ឋធម្មនុញ្ញចិនរួចហើយ កាលពីឆ្នាំ២០១៨ ដោយបានលុបចោលការដាក់កំហិតពីរអាណត្តិ។
មិនត្រឹមតែប៉ុណ្ណោះ មហាសន្និបាតគណបក្សកុម្មុយនីស្តចិន បានប្រកាសទទួលស្គាល់ អំពី “តួនាទីនិងវីរភាពដ៏មានតម្លៃរបស់ សមមិត្តស៊ី ជីនពីង នៅក្នុងការដឹកនាំប្រទេសចិន” ឲ្យឈានក្លាយជាមហាអំណាចពិភពលោក។ មហាសន្និបាត ក៏បានបោះឆ្នោតកំណត់ខ្លឹមសារថ្មី នៃធម្មនុញ្ញរបស់គណបក្សកុម្មុយនីស្តចិនដែរ ដែលបានប្រកាសជាឱឡាឫកថា “បក្សកុម្មុយនីស្តចិន ប្រឆាំងជាដាច់ខាត ចំពោះការប្រកាសឯករាជ្យរបស់កោះតៃវ៉ាន់”។
នៅក្នុងសុន្ទរកថា ចុងក្រោយនៃអង្គមហាសន្និបាតនេះ លោកស៊ី ជីនពីង បានថ្លែងយ៉ាងមោះមុតអង់អាច ថា “ត្រូវតែហ៊ានប្រយុទ្ធ ដើម្បីជ័យជំនះ”។ លោកស៊ី ជីនពីង បានថ្លែងថា នឹងបន្តអនុវត្តផែនការនយោបាយ របស់លោកតទៅទៀត។ មានន័យថា អាណត្តិទី៣របស់លោកស៊ី ជីនពីង គឺចិនបន្តអនុវត្តយុទ្ធសាស្ត្រ កូវីដសូន្យ តទៅទៀត បើទោះបីជាសេដ្ឋកិច្ចចិន ត្រូវទទួលរងនូវការលំបាកកម្រិតណាក៏ដោយ។ ក្រៅពីបញ្ហាសេដ្ឋកិច្ចដែលកំពុងតែចុះទន់ខ្សោយនេះ ការលំបាកមួយទៀតរបស់លោកស៊ី ជីនពីង គឺការប្រឈមមុខដាក់គ្នាកាន់តែខ្លាំងឡើងៗ ជាមួយសហរដ្ឋអាមេរិក និងក្រុមប្រទេសលោកខាងលិចជារួម ទាក់ទិននឹងបញ្ហាកោះតៃវ៉ាន់ បញ្ហាសន្តិសុខតំបន់អាស៊ីប៉ាស៊ីហ្វិក បញ្ហាសិទ្ធិមនុស្ស និងវិវាទពាណិជ្ជកម្មជាដើម។ល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ