លោកពូទីន៖រុស្ស៊ីធ្វើអ្វីៗដែលត្រូវធ្វើនៅអ៊ុយក្រែន តែគ្មានគោលដៅកម្ទេចអ៊ុយក្រែនទេ
ចុះផ្សាយនៅថ្ងៃ៖
ស្តាប់ - ០៧:៤៨
ប្រធានាធិបតីរុស្ស៊ីលោកវ្ល៉ាឌីមៀរ ពូទីនបានចូលរួមនៅក្នុងកិច្ចប្រជុំកំពូលតំបន់រៀបចំក្នុងប្រទេសកាហ្សាក់ស្ថាននាថ្ងៃសុក្រ ទី១៤ តុលា។ ថ្លែងនាឱកាសនោះ លោកពូទីនបានលើកឡើងច្រើនពីសង្រ្គាមនៅអ៊ុយក្រែនដែលបានឈានចូលជិត ៨ខែ។ ដោយឡែកក្នុងថ្ងៃដែលលោកពូទីនចូលរួមនៅក្នុងកិច្ចប្រជុំតំបន់ អ៊ុយក្រែនបានប្រារព្ធទិវាអ្នកការពារដែលនាឱកាសនោះ ប្រធានាធិបតីអ៊ុយក្រែនលោកហ្សេឡេនស្គីបានសន្យាពីជ័យជំនះលើរុស្ស៊ី។ ចំណែកបស្ចិមលោកបន្តការគាំទ្រ និងជួយយអ៊ុយក្រែនដោយអាមេរិកបានសន្យាផ្តល់ជំនួយយោធាថ្មីឲ្យអ៊ុយក្រែនក្នុងទឹកប្រាក់ចំនួន ៧២៥លានដុល្លារ។
ក្នុងរយៈពេលប៉ុន្មានថ្ងៃចុងក្រោយនេះ ប្រធានាធិបតីរុស្ស៊ីបានថ្លែងដល់ទៅ ២ដងដែលខ្លឹមសារបានផ្តោតសំខាន់លើសង្រ្គាមអ៊ុយក្រែនដែលលោកហៅជាប្រតិបត្តិការយោធាពិសេស។ ការថ្លែងលើកទី១ បានធ្វើឡើងនៅក្នុងកិច្ចប្រជុំកំពូលស្តីពីថាមពលរៀបចំក្នុងក្រុងមូស្គូកាលពីថ្ងៃពុធ ទី១២ តុលា ហើយការថ្លែងលើកទី២ បានធ្វើឡើងនៅក្រៅទឹកដីរុស្ស៊ីនាកិច្ចប្រជុំកំពូលតំបន់រៀបចំក្នុងប្រទេសកាហ្សាក់ស្ថានកាលពីថ្ងៃសុក្រ ទី១៤ តុលា។ នាឱកាសនោះ និងនៅចំពោះមុខក្រុមប្រទេសដៃគូប្រពៃណីរបស់រុស្ស៊ី លោកពូទីនបានលើកឡើងច្រើនពីសង្រ្គាមអ៊ុយក្រែន។ តែគឺនៅក្នុងសន្និសីទកាសែតដែលលោកពូទីនបានបញ្ជាក់ដោយលំអិត និងហាក់គួរឲ្យភ្ញាក់ផ្អើល។
អ្នកកាសែតម្នាក់បានសួរលោកពូទីនថា តើគាត់មានការសោកស្តាយ ឬអត់ដែលបានបញ្ជូនទ័ពរុស្ស៊ីទៅវាយអ៊ុយក្រែន។ លោកពូទីនមិនបានប្រើពាក្យសោកស្តាយ ឬមិនសោកស្តាយទេ តែបានបញ្ជាក់ថា អ្វីដែលកំពុងកើតមានពេលនេះមិនមែនជារឿងគួរជាទីរីករាយឡើយ និងថា បើលោកមិនធ្វើដូចនេះទេ ម្ល៉េះរុស្ស៊ីអាចនឹងស្ថិតក្នុងស្ថានការណ៍ដូចគ្នានេះនៅពេលក្រោយ។ ទាក់ទងនឹងប្រតិបត្តិការកេណ្ឌទ័ពបម្រុងចំនួន ៣០០ ០០០នាក់ដែលបានចាប់ផ្តើមតាំងពីជាង ២សប្តាហ៍ត្រូវបានលោកពូទីនពន្យល់ថា ជារឿងចាំបាច់ ព្រោះបើគ្មានជំនួយពីទាហានបម្រុងទេ រុស្ស៊ីមិនអាចដាក់ពង្រាយទ័ពនៅតាមខ្សែព្រំដែនប្រវែងដល់ទៅ ១ ១០០គីឡូម៉ែត្របានឡើយ។
តាមលោកពូទីន ប្រតិបត្តិការកេណ្ឌទ័ពបម្រុងនឹងបិទបញ្ចប់នៅចុងខែតុលានេះ និងអះអាងថា គ្មានរឿងចាំបាច់ដែលត្រូវកេណ្ឌទ័ពបម្រុងថ្មីទៀតទេនាពេលខាងមុខ។ បន្ទាប់មក លោកពូទីនបានទទួលស្គាល់ជាលើកទី១ ពីក្តីបារម្ភរបស់ក្រុមប្រទេសអតីតសហភាពសូវៀតចំពោះសង្រ្គាមអ៊ុយក្រែនដោយធានាថា លោកគ្មានគោលដៅកម្ទេចអ៊ុយក្រែនទេ។
គ្មានការស្រោចគ្រាប់មីស៊ីលជាថ្មីលើអ៊ុយក្រែននាពេលខាងមុខ?
ទាក់ទងនឹងការបាញ់មីស៊ីលច្រើនគ្រាប់នៅសឹងទូទាំងអ៊ុយក្រែនក្នុងថ្ងៃចន្ទ និងថ្ងៃអង្គារដើមសប្តាហ៍នេះមិនត្រូវបានលោកពូទីនលើកហេតុផលទៅពន្យល់ទេ។ តែលោកបែរជាបានបញ្ជាក់ថា គ្មានការចាំបាច់ដែលរុស្ស៊ីត្រូវវាយប្រហារដោយគ្រាប់មីស៊ីលទ្រង់ទ្រាយធំជាថ្មីនាពេលឆាប់ៗខាងមុខទេ។ តាមលោកពូទីន រុស្ស៊ីនៅមានកម្មវត្ថុផ្សេងទៀតដែលត្រូវសម្រេចនៅអ៊ុយក្រែនដោយបញ្ជាក់ថា ក្នុងកម្មវត្ថុទាំង ២៩ ដែលលោកបានកំណត់ នៅសល់កម្មវត្ថុចំនួន ៧ ទៀតដែលរុស្ស៊ីនៅមិនទាន់បានសម្រេច។ តើកម្មវត្ថុទាំង ២៩ មានអ្វីខ្លះ ហើយកម្មវត្ថុទាំង៧ ដែលនៅមិនទាន់សម្រេចមានអ្វីខ្លះ លោកពូទីនមិនបានលំអិតទេ។
គួរបញ្ជាក់ថា ប្រតិបត្តិការស្រោចគ្រាប់មីស៊ីលរបស់រុស្ស៊ីរយៈពេល ២ថ្ងៃលើអ៊ុយក្រែនក្នុងថ្ងៃចន្ទ និងថ្ងៃអង្គារដើមសប្តាហ៍នេះបានធ្វើឡើង ក្រោយពីមានការបំផ្ទុះលើស្ពានរុស្ស៊ីក្នុងតំបន់គ្រីមេកាលពីថ្ងៃអាទិត្យ ទី៩ តុលាចុងសប្តាហ៍កន្លងទៅ។ ការបំផ្ទុះដែលបានធ្វើឲ្យខូចស្ពានមួយភាគត្រូវបានរុស្ស៊ីទម្លាក់ការទទួលខុសត្រូវលើអ៊ុយក្រែន។ ទោះបីជារុស្ស៊ីមិនបាននិយាយជាចំហរក៏ដោយក៏គេអាចនិយាយបានថា ការស្រោចគ្រាប់មីស៊ីលលើអ៊ុយក្រែនអាចជាការសងសឹករបស់រុស្ស៊ីលើការបំផ្ទុះស្ពាននៅគ្រីមេ។
ដោយឡែក ខណៈដែលលោកពូទីនបានលើកឡើងពីភាពមិនចាំបាច់ក្នុងការវាយប្រហារដោយមីស៊ីលទ្រង់ទ្រាយធំជាថ្មី និងគ្មានគោលដៅកម្ទេចអ៊ុយក្រែន អ្នកទទួលខុសត្រូវបស្ចិមលោកម្នាក់បានចាប់អារម្មណ៍លើពីរចំណុច ទី១ ការស្លាប់របស់ទាហានបម្រុងនៅលើសមរភូមិសង្រ្គាមដែលរុស្ស៊ីទើបកេណ្ឌប្រមូលដោយសារតែពួកគេមិនសូវមានបទពិសោធន៍ និងបំពាក់ដោយអាវុធសាមញ្ញ និងទី២ ចំនួនគ្រឿងសព្វាវុធក្នុងឃ្លាំបានធ្លាក់ចុះឆាប់រហ័ស ពិសេសគ្រាប់មីស៊ីលដែលរុស្ស៊ីមិនអាចប្រើដោយគ្មានកំណត់នោះទេ។
លោកពូទីនបញ្ជាក់ជាថ្មីពីជំហរត្រៀមខ្លួនចរចា
ជិត ៨ខែដែលរុស្ស៊ីបានបើកការវាយប្រហារលើអ៊ុយក្រែន។ គេនៅមិនទាន់អាចផ្តល់ចម្លើយច្បាស់លាស់លើសំណួរដែលថា តើសង្រ្គាមមួយនេះនឹងត្រូវចប់ដោយមានអ្នកឈ្នះ និងអ្នកចាញ់នៅលើសមរភូមិ ឬមួយក៏ត្រូវចប់តាមរយៈការចូលអង្គុយតុចរចា?។ ចូរកុំភ្លេចថា តាំងពីសង្រ្គាមរុស្ស៊ីឈ្លានពានអ៊ុយក្រែនបានចាប់ផ្តើម ការចរចាធ្លាប់បានធ្វើជាហូរហែរវាងភាគីជម្លោះទាំងពីរតាមការជំរុញ និងការផ្តួចផ្តើមរបស់សហគមន៍អន្តរជាតិ។ តែគេបានសង្កេតឃើញថា នៅពេលដែលសង្រ្គាមកាន់តែអូសបន្លាយ ការចរចាក៏កាន់តែឃ្លាតឆ្ងាយ។
មួយវិញទៀតខណៈនេះ ទ័ពអ៊ុយក្រែនហាក់កំពុងមានប្រៀបជាងទ័ពរុស្ស៊ីនៅលើសមរភូមិសង្រ្គាម។ តើការមានប្រៀបរបស់អ៊ុយក្រែនលើរុស្ស៊ីនៅលើសមរភូមិសង្រ្គាមនេះអាចបង្ខំឲ្យភាគីទាំងពីរ ពិសេសរុស្ស៊ីចូលតុ ចរចា ជាថ្មីដែរ ឬទេ។ សម្រាប់អ៊ុយក្រែន ប្រធានាធិបតីលោកហ្សេឡេនស្គីមិនបានបិទទ្វារចរចាជាមួយរុស្ស៊ីទេ តែលោកធ្លាប់បានបដិសេធមិនចរចាជាមួយរុស្ស៊ីរបស់លោកពូទីនដរាបណាលោកពូទីននៅកាន់អំណាច។ ចំណែកលោកពូទីនបានបញ្ជាក់ជាថ្មីក្នុងថ្ងៃសុក្រ ទី១៤ តុលាថា លោកត្រៀមខ្លួនចរចាដើម្បីបិទបញ្ចប់សង្រ្គាមអ៊ុយក្រែននៅក្នុងក្របខណ្ឌអន្តរការីអន្តរជាតិ និងនៅក្នុងលក្ខខណ្ឌដែលអ៊ុយក្រែនបានត្រៀមខ្លួនចរចាដូចគ្នា។
ដោយឡែក លោកពូទីនបានបដិសេធមិនជួបចរចាជាមួយសមភាគីអាមេរិកលោកបៃដិនដោយលោកមើលមិនឃើញពីភាពមិនចាំបាច់។ គួររម្លឹកថាក្នុងថ្ងៃទី៦ តុលា លោកបៃដិនមិនបានទាត់ចោលពីការជួបនិយាយជាមួយលោកពូទីននៅក្រៅក្របខណ្ឌនៃកិច្ចប្រជុំកំពូល G២០ ដែលគ្រោងរៀបចំក្នុងប្រទេសឥណ្ឌូណេស៊ីនៅខែវិច្ឆិកាខាងមុខ។ គេនៅមិនទាន់ដឹងថា តើលោកហ្សេឡេនស្គីបានត្រៀមខ្លួនចរចាដូចការលើកឡើងរបស់លោកពូទីនឬអត់ទេ។ អ្វីដែលគេអាចនិយាយបាន អ៊ុយក្រែន និងរុស្ស៊ីហាក់បានដឹងច្បាស់ពីការដែលខ្លួនមិនអាចឈ្នះសង្រ្គាមដូចគ្នា។ ចំណោតនៅត្រង់ថាបើត្រូវចរចា តើត្រូវចរចាយ៉ាងម៉េច និងត្រូវចរចាលើប្រធានរឿងអ្វីខ្លះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ