ហេតុអ្វី កូរ៉េខាងជើង បាញ់មីស៊ីល ជាច្រើន និងញឹកញយម្ល៉េះ?
ចុះផ្សាយនៅថ្ងៃ៖
ស្តាប់ - ០៦:៥១
យប់ថ្ងៃសៅរ៍ឈានចូលថ្ងៃអាទិត្យ ទី៩តុលា កូរ៉េខាងជើង បាញ់សាកល្បងមីស៊ីល២គ្រប់បន្ថែមទៀត។ ប៉ុន្មានម៉ោងប៉ុណ្ណោះ ក្រោយពីការធ្វើសមុទ្ធយោធារួមគ្នារបស់ សហរដ្ឋអាមេរិក និង កូរ៉េខាងត្បូង។ បើតាមដំណឹងពីយោធាកូរ៉េខាងត្បូង គឺម៉ោងជាង១និង៤០នាទី រំលងអធ្រាត្រ, កូរ៉េខាងជើង បានបាញ់មីស៊ីលបាលីស្ទីក ២ គ្រាប់។ មីស៊ីលទាំងនេះ ហោះក្នុងរយៈកម្អស់ ៩០ គីឡូម៉ែត្រពីផ្ទៃសមុទ្រ និងមានរយៈចម្ងាយ ៣៥០ គីឡូម៉ែត្រ គឺបាញ់ចេញពីតំបន់ Munchon ខេត្ត កាងវុន ឆ្ពោះទៅសមុទ្រខាងកើត។ ក្នុងរយៈពេលតែ ២ សប្តាហ៍ចុងក្រោយនេះ, កូរ៉េខាងជើង បាញ់សាកល្បងមីស៊ីល ដល់ទៅចំនួន ៨ លើក ហើយបើគិតក្នុងឆ្នាំ២០២២ គឺ៣០លើក។ នេះបង្កជាក្តីបារម្ភ និងបង្កឲ្យមានប្រតិកម្ម កាន់តែខ្លាំងពីសំណាក់ប្រទេសជិតខាង ដូចជា ជប៉ុនិ និង កូរ៉េខាងត្បូង។ សហគមន៍អន្តរជាតិ ក៏រឹតតែថ្កោលទោស របបក្រុងព្យុងយ៉ាង ខ្លាំងណាស់ដែរ។ តើមានមូលហេតុអ្វីខ្លះ ដែល កូរ៉េខាងជើង របស់បុរសខ្លាំង គីម ជុងអ៊ុន បានបាញ់សាកល្បងមីស៊ីល ច្រើននិងញឹកញយយ៉ាងដូច្នេះ ?
តើមានហេតុផលអ្វីខ្លះ នៅពីក្រោយការបាញ់សាកល្បងមីស៊ីល ពីសំណាក់រដ្ឋអំណាចក្រុងព្យុងយ៉ាង ?
មូលហេតុ បួនប្រាំ ធំៗ ដែលត្រូវលើកមកពិចារណា។ ទី១ គឺ កូរ៉េខាងជើង នៅតែបន្តផ្គើន និងឌឺដង តាមទម្លាប់ ដែលជាការរុកកួន គូសត្រូវរបស់ខ្លួន គឺរបបក្រុងតូក្យូ សេអ៊ូល វ៉ាស៊ីនតោន។ ជំហររបស់ ព្យុងយ៉ាង គឺ គំរាម ហើយនិងជាសញ្ញាប្រាប់ឲ្យ ជប៉ុន កូរ៉េខាងត្បូងនិងសហរដ្ឋអាមេរិក កុំឲ្យធ្វើ និង ឈប់ធ្វើសមយុទ្ធរួមគ្នា នៅម្តុំសមុទ្រឧបទ្វីបកូរ៉េ នេះទៀត។
មូលហេតុទី២ ការបាញ់សាកល្បងមីស៊ីល របស់ កូរ៉េខាងជើង គឺមធ្យោបាយមួយដ៏មានប្រសិទ្ធភាព ដែលប្រទេសនេះ ធ្លាប់ប្រើ និងបន្តប្រើតទៅទៀត ដើម្បីឲ្យពិភពលោកយកចិត្តទុកដាក់ចំពោះខ្លួន និងនិយាយលើកឡើងពីជាតិខ្លួន។ អ្នកវិភាគបញ្ហាភូមិសាស្ត្រនយោបាយឧបទ្វីបកូរ៉េ បានមូរមាត់គ្នាថា នាដើមអាណត្តិ របស់ប្រធានាធិបតីសហរដ្ឋអាមេរិក លោក ចូ បៃដិន គឺគេមិនសូវនិយាយពី កូរ៉េខាងជើង ប៉ុន្មានទេ។ ដូច្នេះ ចំពោះព្យុងយ៉ាង គឺ មានតែបាញ់មីស៊ីល ទេ ទើបទាក់ចិត្តទាញចំណាប់អារម្មណ៍ឲ្យគេដឹងពីអត្ថិភាពរបស់ខ្លួន។
ទី៣ គឺ របបកុម្មុយនិស្តកូរ៉េខាងជើង បានសម្រេចបច្ចេកទេសអភិវឌ្ឍសមត្ថភាពអាវុធ កាន់តែខ្លាំងឡើងៗ ហើយ របបក្រុងព្យុងយ៉ាង មិនដែលបដិសេធឡើយ ចំពោះការមានគ្រាប់បែកនុយក្លេអ៊ែរ។ សាស្ត្រាចារ្យបារាំង Antoine Bondaz នៅវិទ្យាស្ថាន វិទ្យាសាស្ត្រនយោបាយ Science Po Paris និងជានាយកកម្មវិធីកូរ៉េ នៃមូលនិធិស្រាវជ្រាវយុទ្ធសាស្ត្រ បានអង្គុយរាប់គ្រាប់មីស៊ីលរបស់កូរ៉េខាងជើង និងប្រាប់កាសែតបារាំងឲ្យដឹងថា ចាប់ពីដើមឆ្នាំ២០២២នេះមក របបកុម្មុយនីស្តព្យុងយ៉ាង បានបាញ់មីស៊ីល ចំនួន ៣០ លើកមកហើយ។ បើគិតក្នុងរយៈ ១១ឆ្នាំចុងក្រោយនេះ ពោលគឺតាំងពីលោក គីម ជុងអ៊ុន ឡើងក្តោបក្តាប់អំណាចបន្តពីឪពុកមក គឺ កូរ៉េខាងជើង បាញ់សាកល្បងមីស៊ីល ដល់ទៅ ១៧០ ដង ដែលច្រើនជាងជំនាន់ឪពុកគាត់ឆ្ងាយណាស់។ ក្នុងរដ្ឋកាលរបស់ គីម ជុងអ៊ីល គឺមានបាញ់មីស៊ីលតែប្រមាណជា ១៥ ដងប៉ុណ្ណោះ ក្នុងរយៈពេល ១៥ឆ្នាំ។ អាស្រ័យហេតុដូច្នេះ នេះសឲ្យឃើញថា គីម ជុងអ៊ុន ពឹងប្រឹងតែពីពង្រឹងសមត្ថភាពអាវុធ និងបន្តគម្រោងអភិវឌ្ឍគ្រាប់បែកបរមាណូ ដែលចំពោះបុរសខ្លាំង គីម ជុងអ៊ុន គម្រោងនេះគឺជាជីវិតជោគវាសនាអនាគតរបស់កូរ៉េខាងជើង។
ក្រៅពីចំណុចទាំងនេះ នៅមានហេតុផល ខ្លះទៀត គឺថា ក្នុងបរិបទសង្គ្រាមរុស្ស៊ី-អ៊ុយក្រែន និង ការអសមត្ថភាព អង្គការសហប្រជាជាតិ គឺធ្វើឲ្យ កូរ៉េខាងជើង កាន់តែបានចិត្តខ្លាំងឡើង។
ក្នុងបរិបទពិភពលោក កំពុងតែអំណោយផល សម្រាប់ កូរ៉េខាងជើង ដ្បិតថា សង្គ្រាមរុស្ស៊ី-អ៊ុយក្រែន គឺនាំឲ្យសហគមអន្តរជាតិ ផ្តោតអារម្មណ៍តែពីសង្គ្រាមនេះ និងផលវិបាករបស់វា។ ព្រឹត្តិការណ៍នេះ ជាច្រើនខែមកហើយ ដែលវាលុបលើរឿងផ្សេងៗទៀត។ បើនិយាយតែប្រទេសធំៗនៅអឺរ៉ុប ក៏កំពុងតែដោះស្រាយបញ្ហាផ្ទាល់ខ្លួន រឿងសេដ្ឋកិច្ច បញ្ហាស្បៀង និងពិសេសបញ្ហាថាមពល តួយ៉ាងប្រេងនិងឧស្ម័ន ដែលជាប្រឈមខ្លាំង ដរ ចេញពីវិបត្តិសង្គ្រាមនៅអ៊ុយក្រែន នេះដែរ។
ចំណែកឯ អង្គការសហប្រជាជាតិ ក៏ត្រូវ អ្នកតាមដានស្ថានការណ៍ មើលឃើញយ៉ាងច្បាស់ថា អសមត្ថភាព ក្នុងការសង្កត់ក កូរ៉េខាងជើង ទៅទៀត។ នេះគឺជាឱកាសអំណោយផលមួយដែរ ចំពោះក្រុងព្យុងយ៉ាង ។ ជាក់ស្តែង ទណ្ឌកម្មសេដ្ឋកិច្ច របស់ អង្គការសហប្រជាជាតិ ហាក់ដូចជា មិនបានធ្វើឲ្យ របបក្រុងព្យុងយ៉ាង ផ្លាស់ប្តូរជំហរសោះ។ នេះក៏ព្រោះតែ របបកុម្មុយនិស្តកូរ៉េខាងជើង មានខ្នងបង្អែករឹងមាំមួន តួយ៉ាងគឺ រុស្ស៊ី និង ចិន ជាសមាជិកអចិន្ត្រៃយ៍របស់ក្រុមប្រឹក្សាសន្តិសុខអង្គការសហប្រជាជាតិ។ កាលពីឆ្នាំ២០១៧ កាលពីចេញសេចក្តីសម្រេច ដាក់ទណ្ឌកម្មលើ កូរ៉េខាងជើងក្នុងសំណុំរឿងអភិវឌ្ឍនុយក្លេអ៊ែរ កាលណោះគឺ ក្រុមប្រឹក្សាសន្តិសុខ បានសម្រេចគ្នាជាឯកច្ឆ័ន។ ក្នុងបរិបទថ្មីនេះ រុស្ស៊ី និង ចិន បានបោះឆ្នោតជំទាស់ ជាហេតុគឺធ្វើឲ្យការរកផ្លូវដាក់ទណ្ឌកម្មសេដ្ឋកិច្ច ជាបន្តនិងបន្ថែម ត្រូវជាប់គាំង កាលពីខែ ឧសភា កន្លងទៅ។
ជាទម្លាប់រហូតមក របបក្រុងប៉េកាំង ជួយទ្រទ្រង់សេដ្ឋកិច្ច រដ្ឋបាលក្រុងព្យុងយ៉ាង ហើយនិង រដ្ឋអំណាចក្រុងម៉ូស្កូ ក៏មិនមើលនឹងភ្នែកដែរ។ ពីពេលថ្មីៗ ម៉ូស្កូ ក៏បានទិញអាវុធជាច្រើនផង ពី ព្យុងយ៉ាង ដើម្បីទៅបំពាក់បំប៉នសង្គ្រាមរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ