តើប្រធានាធិបតីរុស្ស៊ីលោកពូទីនកំពុងចាញ់សង្រ្គាមនៅក្នុងប្រទេសអ៊ុយក្រែន ឬ?
ចុះផ្សាយនៅថ្ងៃ៖
ស្តាប់ - ០៧:៣៦
សង្រ្គាមរុស្ស៊ីឈ្លានពានអ៊ុយក្រែនដែលបានចាប់ផ្តើមក្នុងថ្ងៃទី២៤ កុម្ភៈកំពុងឈានចូលក្នុងផ្លូវរបត់ថ្មី។ ក្រោយពីរុស្ស៊ីបានប្រកាសផ្តាច់យកតំបន់ចំនួន ៤ របស់អ៊ុយក្រែនជាផ្លូវការកាលពីថ្ងៃទី៣០ កញ្ញាមក កងទ័ពអ៊ុយក្រែនបានបង្កើនការប្រយុទ្ធដោយមិនបន្ធូរដៃដើម្បីដណ្តើមយកតំបន់ទាំងនោះពីកណ្តាប់ដៃរុស្ស៊ីវិញ។ គេបានសង្កេតឃើញថានារយៈពេលប៉ុន្មានថ្ងៃចុងក្រោយនេះ កងទ័ពអ៊ុយក្រែនដណ្តើមបានទីតាំងមួយចំនួននៅក្នុងតំបន់ដែលរុស្ស៊ីទើបផ្តាច់យក។ ចំណែករុស្ស៊ីក៏បានទទួលស្គាល់ពីការរុលទៅមុខរបស់ទ័ពអ៊ុយក្រែននៅក្នុងតំបន់ទាំងនោះដែរ។ តែរុស្ស៊ីបានសន្យាវាយយកត្រឡប់វិញ។
តំបន់ទាំង ៤ ដែលរុស្ស៊ីទើបបានផ្តាច់យកពីអ៊ុយក្រែនកាលពីថ្ងៃទី៣០ កញ្ញាកន្លងទៅមានតំបន់ដូណេតស៍ តំបន់លូហ្កង់ស្ក៍ តំបន់ឃឺសិន និងតំបន់ហ្សាប៉ូរីចា។ តំបន់ទាំង ៤ នេះស្ថិតនៅប៉ែកខាងកើត និងខាងត្បូងអ៊ុយក្រែន។ សម្រាប់ក្រុងមូស្គូ តំបន់ទាំង ៤ នេះបានក្លាយជាទឹកដីរុស្ស៊ីផ្លូវការ ទោះបីជាមានការថ្កោលទោសខ្លាំងក្លា និងគ្មានការទទួលស្គាល់ពីសហគមអន្តរជាតិក៏ដោយ។ តែសម្រាប់អ៊ុយក្រែនវិញ តំបន់ទាំង ៤ នេះបានបន្ត កំពុងបន្ត និងបន្តស្ថិតនៅជាទឹកដីរបស់ខ្លួនផ្លូវការជានិច្ចដែលខ្លួនត្រូវតែយកពីដៃរុស្ស៊ីត្រឡប់វិញ។
អាចមានកត្តាសំខាន់ចំនួន ៣ ដែលបញ្ជាក់ពីការរុលទៅមុខ ឬពីការមានប្រៀបរបស់ទ័ពអ៊ុយក្រែនលើទ័ពរុស្ស៊ីនៅលើសមរភូមិពេលនេះ ទី១ ការប្តេជ្ញាចិត្តរបស់ប្រទេស និងប្រជាជនអ៊ុយក្រែនក្នុងការការពារអធិបតេយ្យភាព និងបូរណភាពទឹកដីដោយមិនឲ្យរបូតពីដៃសូម្បីតែមួយចង្អាម ទី២ ការដែលអ៊ុយក្រែនទទួលបានការជួយគាំទ្រ លើកទឹកចិត្ត ពិសេសការជួយឧបត្ថម្ភទាំងលុយកាក់ និងគ្រឿងសព្វាវុធទំនើបៗពីក្រុមប្រទេសលោកខាងលិចតាំងពីដំបូងទី ពិសេសពីសហភាពអឺរ៉ុប និងអាមេរិក ហើយកត្តាទី៣ ការដែលទ័ពរុស្ស៊ីហាក់បានបាក់ទឹកចិត្តលែងចង់ច្បាំងក្រោមហេតុផលផ្សេងៗ រួមទាំងការខ្សត់អាវុធ និងគ្រាប់រំសេវផង។
គួររម្លឹកថា នៅមួយថ្ងៃក្រោយពីរុស្ស៊ីប្រកាសផ្តាច់យកតំបន់ទាំង ៤ របស់អ៊ុយក្រែន ទ័ពអ៊ុយក្រែនវាយយកបានស្រុកលីម៉ាន់ដែលជាស្រុកយុទ្ធសាស្រ្តនៅក្នុងតំបន់ដូណេតស៍។
តើមានតំបន់ណាខ្លះដែលទ័ពអ៊ុយក្រែនវាយយកបានពីទ័ពរុស្ស៊ីវិញ?
រហូតមកដល់ពេលនេះ នៅមិនទាន់មានតំបន់ណាមួយក្នុងចំណោមតំបន់ទាំង ៤ ដែលរុស្ស៊ីទើបបានផ្តាច់យកត្រូវបានអ៊ុយក្រែនដណ្តើមបានត្រឡប់វិញនៅឡើយទេ។ តែទ័ពអ៊ុយក្រែនកំពុងបន្តរុលទៅមុខ និងកំពុងវាយយកបានស្រុកថ្មីៗទៀតពីទ័ពរុស្ស៊ីនៅក្នុងតំបន់ទាំង ៤ ពិសេសនៅក្នុងតំបន់ឃឺសិនស្ថិតប៉ែកខាងត្បូងអ៊ុយក្រែន។ នៅក្នុងសារវីដូអូមួយផ្សព្វផ្សាយកាលពីយប់ថ្ងៃចន្ទ ទី៣ តុលា ប្រធានាធិបតីអ៊ុយក្រែនលោកហ្សេឡេនស្គីបញ្ជាក់ពីការរំដោះបានស្រុកថ្មីៗទៀតនៅក្នុងតំបន់ជាច្រើនពីកណ្តាប់ដៃទ័ពរុស្ស៊ី។ ចំណែកកងទ័ពរុស្ស៊ីក៏បានប្រកាសទទួលស្គាល់ពីការរុលទៅមុខរបស់ទ័ពអ៊ុយក្រែននៅក្នុងតំបន់ដែលខ្លួនទើបបានផ្តាច់យក និងការដកថយរបស់ទ័ពរុស្ស៊ី។
តាមរយៈផែនទីដែលបង្ហាញដោយក្រសួងការពារជាតិរុស្ស៊ីក្នុងថ្ងៃអង្គារ ទី៤ តុលា គេបានឃើញទ័ពរុស្ស៊ីដកថយពីស្រុកមួយចំនួននៅក្នុងតំបន់ខាគៀវ និងតំបន់ខឺសិន។ តែកងទ័ពរុស្ស៊ីមិនបានប្រកាសពីការដកទ័ព ឬធ្វើអត្ថាធិប្បាយអ្វីលើការដកថយដែលគេបានមើលឃើញនៅលើផែនទីនោះទេ។ ចំណែករដ្ឋអំណាចគាំទ្ររុស្ស៊ីដែលកំពុងកាន់កាប់តំបន់ប៉ែកខាងត្បូងបានអំពាវនាវកុំឲ្យភ័យស្លន់ស្លោ ទោះបីជាទ័ពរុស្ស៊ីកំពុងទទួលបរាជ័យនៅចំពោះមុខទ័ពអ៊ុយក្រែនក៏ដោយ។ ប្រមុខតំបន់ឃឺសិននិយមរុស្ស៊ីលោកវ៉្លាឌីមៀរ សាលដូបានទទួលស្គាល់ពីការបាត់បង់ស្រុក ឌូតឆានីស្ថិតក្នុងតំបន់ឃឺសិន។
អ្វីដែលគេបានឃើញនៅពេលនេះ គឺវត្តមានទង់ជាតិរបស់រុស្ស៊ី និងទង់ជាតិរបស់អ៊ុយក្រែននៅក្នុងតំបន់ទាំង ៤ ដែលរុស្ស៊ីទើបបានផ្តាច់យក ព្រោះថា ស្រុក ឬទីតាំងដែលទ័ពអ៊ុយក្រែនទើបរំដោះបានពីទ័ពរុស្ស៊ីវិញត្រូវបានទ័ពអ៊ុយក្រែនលើកទង់ជាតិអ៊ុយក្រែន ហើយស្រុក ឬទីតាំងណាដែលកំពុងស្ថិតក្នុងដៃទ័ពរុស្ស៊ីកំពុងបន្តមានទង់ជាតិរុស្ស៊ី។
រុស្ស៊ីសន្យាយកត្រឡប់វិញនូវដែនដីដែលបានបាត់បង់
គេមិនដឹងថា តើការដែលទ័ពរុស្ស៊ីបានដកថយ ឬបានចាកចេញពីស្រុក ឬទីតាំងណាមួយនៅចំពោះមុខទ័ពអ៊ុយក្រែនជាល្បិចកល ឬមួយជាយុទ្ធសាស្រ្តសង្រ្គាមរបស់រុស្ស៊ី ឬអត់ទេ។ តែគេអាចពន្យល់បកស្រាយទៅវិញថា បើទ័ពរុស្ស៊ីកំពុងកាន់កាប់ទាំងស្រុងលើតំបន់ទាំង ៤ ដែលរុស្ស៊ីទើបបានផ្តាច់យកជាផ្លូវការហើយនោះ ម៉េចមិនប្រឹងវាយប្រហារ និងប្រើគ្រប់លទ្ធភាពដើម្បីទប់ទល់នឹងការវាយប្រហាររបស់ទ័ពអ៊ុយក្រែនទៅ ចាំបាច់អីដកថយ ឬចាកចេញពីទីតាំង ឬស្រុកខ្លះ រួចចាំធ្វើការវាយបកដណ្តើមយកវិញធ្វើអី។
ត្រង់ចំណុចនេះមានការលើកឡើងថា បើទ័ពរុស្ស៊ីមានលទ្ធភាព និងសមត្ថភាពអាចតតាំងនឹងការរុលទៅមុខរបស់ទ័ពអ៊ុយក្រែនបាន ម្ល៉េះទ័ពរុស្ស៊ីមិនដកថយ និងទុកបណ្ដោយឲ្យទ័ពអ៊ុយក្រែនយកស្រុក ឬទីតាំងរបស់ខ្លួនទេ។ នៅពេលនេះ និងបើពិនិត្យជារួម គេប្រហែលនៅមិនទាន់អាចនិយាយពីបរាជ័យរបស់ទ័ពរុស្ស៊ីបាននៅឡើយទេ។ អ្វីដែលគេអាចនិយាយបាន ទ័ពអ៊ុយក្រែនកំពុងមានប្រៀបលើទ័ពរុស្ស៊ី ឬទ័ពរុស្ស៊ីកំពុងចាញ់ច្រាបទ័ពអ៊ុយក្រែននៅលើសមរភូមិ។ ការចាញ់ច្រាបនេះត្រូវបានគ្រប់គ្នាមើលឃើញយ៉ាងច្បាស់ក្រឡែត។ ថ្មីៗនេះ មេដឹកឆេឆេនីលោកកាឌីរ៉ូវដែលគាំទ្ររុស្ស៊ី និងជាមនុស្សជំនិតរបស់ប្រធានាធិបតីរុស្ស៊ីលោកពូទីនបានរិះគន់មេបញ្ជាកងទ័ពរុស្ស៊ី និងថែមបានជំរុញឲ្យលោកពូទីនប្រើគ្រាប់នុយក្លេអ៊ែរកម្រិតតូចទៅលើអ៊ុយក្រែន។
តែរុស្ស៊ីបានចាត់ទុកការអំពាវនាវរបស់មេដឹកនាំឆេឆេនីរូបនេះថាជាការយកកំហឹងទល់កំហល់។ ក្នុងថ្ងៃពុធ ទី៥ តុលា អ្នកនាំពាក្យវិមានក្រឹមឡាំងលោកឌីមីទ្រី ប៉េស្កូវបានថ្លែងថា រុស្ស៊ីនឹងយកត្រឡប់វិញនូវដែនដីដែលបាត់បង់ និងបញ្ជាក់ដោយធានាថា តំបន់ទាំង ៤ ដែលរុស្ស៊ីទើបបានផ្តាច់យកនឹងស្ថិតនៅជារបស់រុស្ស៊ីជារៀងរហូត។ តែលោកប៉េស្កូវមិនបានលំអិតថា តើរុស្ស៊ីនឹងយកដែនដីដែលទើបបាត់បង់ពេលនេះយ៉ាងម៉េច និងដោយរបៀបណា។ រីឯប្រធានាធិបតីរុស្ស៊ីលោកពូទីនសង្ឃឹមថា ស្ថានការណ៍យោធានៅក្នុងតំបន់ទាំង ៤ នឹងត្រឡប់ទៅរកភាពប្រក្រតីឡើងវិញ។ ចំណែកអ៊ុយក្រែនបានបន្តប្តេជ្ញាយកតំបន់ទាំង ៤ ត្រឡប់វិញ។
នៅខាងបស្ចិមលោកវិញ ប្រធានាធិបតីអាមេរិកលោកបៃដិនបានប្រកាសក្នុងថ្ងៃអង្គារ ទី៤ តុលាពីការផ្តល់ជំនួយយោធាបន្ថែមចំនួន ៦៥០លានដុល្លារឲ្យអ៊ុយក្រែន។ ចំណែកសហភាពអឺរ៉ុបកំពុងត្រៀមទណ្ឌកម្មថ្មីៗទៀតដាក់លើរុស្ស៊ី។ សរុបមក សង្រ្គាមដែលអូសបន្លាយជាង ៧ខែហាក់មិនទាន់បានត្រៀមខ្លួនដើម្បីបិទបញ្ចប់នៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ