ប្រទេសក្រីក្រត្អូញត្អែរនៅសន្និបាត អ.ស.ប.អំពីភាពអសកម្មរបស់ប្រទេសអ្នកមានក្នុងការជួយដោះស្រាយវិបត្តិអាកាសធាតុ
ចុះផ្សាយនៅថ្ងៃ៖
ស្តាប់ - ០៧:៥១
វិបត្តិអាកាសធាតុកាន់តែធ្ងន់ធ្ងរ ដែលបានស្តែងឡើង តាមរយៈគ្រោះធម្មជាតិកាចសាហាវ បាននិងកំពុងធ្វើបាបប្រទេសក្រីក្រកាន់តែខ្លាំងឡើង។ ជាក់ស្តែងគ្រោះទឹកជំនន់ ដ៏ធ្ងន់ធរបំផុត ដែលបានជន់លេចមួយភាគបី នៃប្រទេសប៉ាគីស្ថាននាពលេថ្មីៗនេះ។ នៅអង្គសន្និបាតនៃអង្គការសហប្រជាជាតិ នាយករដ្ឋមន្ត្រីនៃប្រទេសប៉ាគីស្ថាន និងនាយករដ្ឋមន្ត្រីបង់ក្លេដែស ដែលសុទ្ធតែជាប្រទេសរងគ្រោះខ្លាំងបំផុត ដោយវិបត្តិអាកាសធាតុនោះ បានថ្លែងសុន្ទរកថា ថ្អូញថ្អែរ លាយឡំដោយកំហឹង ថាប្រទេសពួកគេកំពុងរងគ្រោះ ខណៈក្រុមប្រទេសអ្នកមាន ដែលជាអ្នកបញ្ចេញឧស្ម័នកាបូនិក បែរជាមិនយកចិត្តទុកដាក់ជួយផ្នែកហិរញ្ញវត្ថុ។
ទឹកជំនន់នៅប៉ាគីស្ថាន គ្រាន់តែជាចំណុចចាប់ផ្តើមប៉ុណ្ណោះ
លោក Shehbaz Sharif នាយករដ្ឋមន្ត្រីប៉ាគីស្ថាន បានយកវេទិកាអង្គសន្និបាតប្រចាំឆ្នាំរបស់អង្គការសហប្រជាជាតិ ដើម្បីថ្លែងសុន្ទរក បង្ហាញភាពក្តុកក្តួល និងទុក្ខលំបាករបស់ប្រជាជនប៉ាគីស្ថាន ជាច្រើនលាននាក់ ដែលកំពុងតែរងគ្រោះ ដោយវិបត្តិអាកាធាតុរបស់ផែនដីយើង។ ក្នុងសំឡេងក្តុកក្តួល លាយឡំនឹងកំហឹងផង លោកនាយករដ្ឋមន្ត្រីប៉ាគីស្ថាន បានលើកឡើងថា ប៉ាគីស្ថានមិនដែលជួបគ្រោះទឹកជំនន់ ជន់លិចខ្លាំងដល់ម្លឹងទេ។ មួយភាគបី នៃផ្ទៃដីប៉ាគីស្ថាន ពោលគឺស្មើនឹងផ្ទៃដីប្រទេសអង់គ្លេសទាំងមូល ដែលត្រូវទឹកជន់លិច។ មនុស្សស្លាប់ប្រមាណ១៦០០នាក់។ បច្ចុប្បន្ននេះ ប្រជាជនប៉ាគីស្ថាន ចំនួនប្រមាណ៧លាននាក់ បានបាត់បង់ផ្ទះសំបែង ហើយត្រូវភៀសខ្លួន រស់នៅក្នុងជំរំបណ្តោះអាសន្ន ក្នុងលក្ខខណ្ឌសុខភាពនិងអនាម័យ យ៉ាងលំបាកលំបិនបំផុត។
លោកនាយករដ្ឋមន្ត្រីប៉ាគីស្ថានបានបន្ថែម ប៉ាគីស្ថានជាប្រទេសក្រីក្រ មានប្រជាជន២២០លាននាក់ ហើយបញ្ចេញឧស្ម័នកាបូនិក តែ០,៨%ប៉ុណ្ណោះ។ តែហេតុអ្វី បានជាប្រជាជនប៉ាគីស្ថានត្រូវជាអ្នករងទុក្ខបែបនេះ? ក្នុងទឹកមុខយ៉ាងមាំ លោកបានសង្កត់ធ្ងន់ថា សោកនាដកម្ម គ្រោះហន្តរាយធម្មជាតិនៅប៉ាគីស្ថាននាពេលនេះ គឺគ្រាន់តែជាចំណុចចាប់ផ្តើមតូចមួយប៉ុណ្ណោះ។ ពិភពលោកយើង គ្មាននរណាអាចចៀសផុតបានទេ ទៅថ្ងៃអនាគត ល្គឹកណាយើងមិនរួមគ្នាដោះស្រាយទេនោះ។ លោកបានអំពាវនាវ ឲ្យថ្នាក់ដឹកគ្រប់ប្រទេស ជាពិសេសប្រទេសអ្នកមានធំៗ ត្រូវតែស្ទុះស្ទារឡើង រួមគ្នាដោះស្រាយ ព្រោះនិយមន័យនៃពាក្យថា សន្តិសុខជាតិ វាបានប្រែប្រួលហើយ។ សន្តិសុខជាតិមិនមែនតែរឿងការពារប្រទេសពីសង្គ្រាម ឬពីការវាយប្រហារណាមួយនោះទេ តែអំណេះតទៅ សន្តិសុខជាតិ សម្រាប់គ្រប់ប្រទេស គឺធ្វើយ៉ាងណាទប់ទល់ជាមួយការគ្រោះមហន្តរាយធម្មជាតិ ដែលកាន់តែធ្ងន់ធ្ងរ ដោយសារតែការកើនឡើងកំដៅផែនដី។
ក្រុមប្រទេសអ្នកមាន ត្រូវតែទទួលខុសត្រូវ
ក្រោយចេញពីអង្គសន្និបាតអង្គការសហប្រជាជាតិ លោកស្រី Sheikh Hasina នាយករដ្ឋមន្ត្រីបង់ក្លាដែស បានប្រាប់អ្នកកាសែតដោយចំៗ ថាក្រុមប្រទេសអ្នកមាន មិនធ្វើអ្វីសោះ មិនព្រមទទួលខុសត្រូវទាល់តែសោះ ចំពោះចំណែកដ៏ធំធេងដែលខ្លួនបានធ្វើឲ្យផែនដីឡើងកំដៅ ហើយបង្កជាវិនាសកម្មធម្មជាតិ ដល់ប្រទេសក្រីក្រ។ លោកស្រីបានបញ្ជាក់ថា បង់ក្លាដែស មិនខុសពីប្រទេសក្រីក្រ កូនកោះតូចតាចផ្សេងទៀត គឺប្រឈមខ្លាំងណាស់ដោយសារបញ្ហាវិបត្តិអាកាសធាតុ ជំនន់ទឹកភ្លៀងខ្លាំងផង ព្រមទាំងកំពស់ទឹកសមុទ្រឡើងលិចថែមទៀត។
មិនមែនតែប្រឈមខ្លាំងនឹងគ្រោះមហន្តរាយធម្មជាតិប៉ុណ្ណោះទេ តែបង់ក្លាដែសកំពុងលំបាក ទទួលបន្ទុកតែម្នាក់ឯង រឿងជនភៀសខ្លួនរ៉ូហ៊ីងយ៉ា ប្រមាណជាត៧សែននាក់ទៀត។ លោកស្រីនាយករដ្ឋមន្ត្រីបង់ក្លាដែស លើកឡើងថារាល់ថ្ងៃ នៅតែគ្មានដំណោះស្រាយ ខណៈរបបសិកភូមានៅតែបដិសេធ មិនផ្តល់ឲ្យនូវលក្ខខណ្ឌធានាសុវត្ថិភាពជូនជនរ៉ូហ៊ីងយ៉ា។ តែយ៉ាងណាលោកស្រីអះអាងថា ទោះលំបាកម្តេចម្តា ប្រទេសលោកស្រីប្រឹងប្រែងតស៊ូរកដំណោះស្រាយជានិច្ច មិនថាក្នុងសំណុំរឿងជនភៀសខ្លួនរ៉ូហ៊ីងយ៉ា ឬក្នុងសំណុំរឿងវិបត្តិអាកាសធាតុឡើយ។
លោកស្រី Sheikh Hasina បានលើកឡើងថា ប្រទេសលោកស្រី ប្រជាជនលោកស្រីដែលក្រក្រលំបាកនោះ បានបញ្ចេញឧស្ម័នកាបូនិកតិចបំផុត។ ផ្ទុយទៅវិញប្រទេសអ្នកមានឧស្សាហកម្មធំៗ រីកចម្រើនទេ ដែលជាអ្នកធ្វើឲ្យផែនដីនេះឡើងកំដៅ។ ដូច្នេះប្រទេសទាំងនេះត្រូវតែទទួលខុសត្រូវ គោរពការសន្យារបស់ខ្លួន ក្នុងការប្រមូលថវិកា ជួយដល់ប្រទេសក្រីក្រដែលប្រឈមខ្លាំង ដើម្បីដោះស្រាយបញ្ហា។ តែផ្ទុយទៅវិញ ប្រទេសអ្នកមានគេមិនខ្វល់ គេគិតតែពីហោប៉ាវរបស់គេ គិតតែពីរកចំណូលចង់មានថែម ដោយមិនខ្វល់ពីប្រទេសក្រីក្រ មិនខ្វល់ពីវិបត្តិអាកាសធាតុ។ លោកស្រីបានបរិហារថា ក្រុមប្រទេសអ្នកមាន និយាយបានតែមាត់ តែជាក់ស្តែងមិនធ្វើអ្វីសោះ មិនព្រមគោរពការសន្យារឿងកញ្ចប់ថវិកាជួយប្រទេសក្រីក្រទាល់តែសោះ។
"មិនសុំទានទេ តែសុំយុត្តិធម៌"
ការសន្យា ដែលក្រុមប្រទេសអ្នកមាន បានអះអាងថានឹងប្រមូលប្រាក់ ចំនួន១០ម៉ឺនលានដុល្លារក្នុងមួយឆ្នាំ ទៅជួយប្រទេសក្រីក្រនោះ មិនទាន់មានស្រមោលថវិកាជាក់ស្តែងនៅឡើយទេ។ ហេតុដូច្នេះហើយបានជាក្រុមប្រទេសក្រីក្រ ស្ថិតនៅប៉ែកខាងត្បូង ក្រុមប្រទេសកូនកោះ បានបង្ហាញការខឹងសម្បារ។ នៅអង្គការសហប្រជាជាតិ កាលពីថ្ងៃម្សិលមិញ លោករដ្ឋមន្ត្រីការបរទេសប៉ាគីស្ថាន បានប្រាប់អ្នកកាសែត ប៉ាគីស្ថានមិនមែនជាអ្នកបង្កវិបត្តិអាកាសធាតុទេ តែប៉ាគីស្ថានកំពុងតែរងគ្រោះ ដោយសារតែការរីកចម្រើនឧស្សាហកម្ម របស់ប្រទេសអ្នកមាន។ ប៉ាគីស្ថានដង្ហើយរកថវិកានេះ គឺមិនមែនជាការសុំទានគេទេ តែប៉ាគីស្ថានចង់បានយុត្តិធម៌ ចង់ឲ្យប្រទេសអ្នកមានទទួលខុសត្រូវចំពោះផលប៉ះពាល់ ដែលខ្លួនបានធ្វើមកលើប៉ាគីស្ថាន ក៏ដូចជាប្រទេសក្រីក្រផ្សេងទៀត។
កញ្ចប់ថវិកា១០ម៉ឺនលានដុល្លារក្នុងមួយឆ្នាំនេះ គឺគេបានសន្យាកាលពីឆ្នាំ២០២០ តែពិភពលោកយើង បានជួបបញ្ហា វិបត្តិសេដ្ឋកិច្ចដោយសារតែកូវីដ១៩ ហើយឥឡូវនេះ វិបត្តិសង្គ្រាមអ៊ុយក្រែន ដែលកំពុងតែធ្វើឲ្យទំនិញឡើងថ្លៃ មានអតិផរណាថែមទៀត។ ដូច្នេះបញ្ហាប្រមូលថវិកានេះ គឺជារឿងលំបាកខ្លាំងណាស់។ សន្និសីទCOP27 នឹងចាប់ផ្តើមបើកទ្វារនៅប្រទេសអេហ្ស៊ីប នៅដើមខែវិច្ឆិកា ហើយសំណុំរឿងធំគឺកញ្ចប់ថវិកានេះឯង ដែលប្រទេសទាំងអស់ត្រូវជជែកគ្នា។ គិតមកត្រឹមពេលនេះ ក្រុមប្រទេសអ្នកមាន បានបញ្ជាក់ថា គេសុំពេលនិយាយជជែកគ្នា រហូតដល់ឆ្នាំ២០២៤ ដើម្បីរៀបចំយន្តការ បែងចែកចំណែក អ្នកណាជួយប៉ុន្មាន ហើយយកថវិកាទៅណាខ្លះ។
ជួយសហគមន៍ជនជាតិដើម ក្នុងការអភិរក្សាព្រៃឈើ
បញ្ហាថវិកានេះ ក៏ជាចំណុចទាមទារផងដែរ ពីក្រុមសហគមន៍ជនជាតិដើម ដែលរស់រំពឹងនឹងធនធានធម្មជាតិ។នៅចុងសប្តាហ៍នេះ នៅក្រៅក្របខណ្ឌសន្និបាតអង្គការសហប្រជាជាតិ ក្រុមសហគមន៍ជនជាតិដើមភាគតិចទូទាំងពិភពលោក បានរៀបចំកម្មវិធីជួបជុំគ្នាដ៏ធំ នៅទីក្រុងញូយ៉ក ដើម្បីរន្ធាន់ឲ្យសហគមអន្តរជាតិ ត្រូវគិតគូរយល់ពីតម្លៃ សារៈសំខាន់របស់សហគមន៍ជនជាតិដើម ដែលរស់ក្នុងព្រៃ ហើយបានចូលរួមចំណែកយ៉ាងខ្លាំង ក្នុងការថែរក្សាអភិរក្សព្រៃឈើ ដែលជាសួតរបស់ផែនដីយើង។
លោក Uyukar Domingo Peas តំណាងសហគមនជនជាតិដើមមួយក្រុមនៅក្នុងព្រៃអាម៉ាហ្សូន ប្រទេសអាក្វាទ័រ បានថ្លែងថា គឺ “សេដកិច្ចមូលធននិយម” ដែលបានបំផ្លាញធម្មជាតិ បំផ្លាញព្រៃឈើ។ លោកមានគម្រោងប្រមូលថវិកាចំនួន១៩លានដុល្លារ ឲ្យបានក្នុងរវាង១០ឆ្នាំ ដើម្បីយកមកទ្រទ្រង់ បង្កើតតំបន់អភិរក្សធំមួយ ដែលមានផ្ទៃដីចំនួន៣៥លានហិកតាក្នុងព្រៃអាម៉ាហ្សូន។ ហើយលោកក៏សង្ឃឹមថា ប្រទេសទាំង៩ដែល ដែលមានចំណែកព្រៃអាម៉ាហ្សូន នឹងចូលរួមក្នុងគម្រោងនេះ។ លោកបានសង្កត់ធ្ងន់ថា ផែនដី គឺជាមាតុភូមិយើងទាំងអស់គ្នា ដែលយើងត្រូវតែជួយសង្គ្រោះ គោរពថែរក្សា និងការពារ។ មនុស្សយើង ត្រូវតែឈប់វិនិយោគដើម្បីមានបានតែខ្លួនឯងតទៀតទៅ តែត្រូវងាកមកវិនិយោគ ដើម្បីបម្រើប្រយោជន៍រួម បម្រើមនុស្សជាតិ ពោលគឺជាគម្រូសេដ្ឋកិច្ចថ្មី ដែលមានឈ្មោះថា Bioeconomie ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ