តើការបោះឆ្នោតប្រជាមតិភ្ជាប់ទឹកដីអ៊ុយក្រែនទៅក្នុងរុស្ស៊ីនឹងជះឥទ្ធិពលប៉ុណ្ណាលើសង្រ្គាមអ៊ុយក្រែន?
ចុះផ្សាយនៅថ្ងៃ៖
ស្តាប់ - ០៩:៣៨
រដ្ឋអំណាចគ្រប់គ្រងទឹកដីអ៊ុយក្រែនចំនួន ៤ ដែលលើកបន្តុបដោយម៉ូស្គូ បានចាប់ផ្តើម ការបោះឆ្នោតប្រជាមតិ ស្តីពីការភ្ជាប់ខ្លួនទៅក្នុងទឹកដីរុស្ស៊ី ពីថ្ងៃសុក្ររហូតដល់ថ្ងៃទី ២៧កញ្ញា។ ការរៀបចំបោះឆ្នោតប្រជាមតិ ដើម្បីភ្ជាប់តំបន់ខាងកើត និងខាងត្បូងរបស់អ៊ុយក្រែន ទៅក្នុងទឹកដីរុស្ស៊ី បានធ្វើឲ្យរុស្ស៊ី រងការរិះគន់ ថ្កោលទោសខ្លាំងពីសំណាក់អ៊ុយក្រែន និងក្រុមប្រទេសលោកខាងលិច នៅក្រុមប្រឹក្សាសន្តិសុខរបស់អង្គការសហប្រជាជាតិ។ តួកគីដែលធ្លាប់ដាក់ខ្លួនជាអាជ្ញាកណ្តាល សម្របសម្រួលភាគីជម្លោះអ៊ុយក្រែន រុស្ស៊ី ក៏បានចេញមុខថ្កោលទោស និងចាត់ទុកការបោះឆ្នោតប្រជាមតិ នៅតំបន់កាន់កាប់ដោយកងទ័ពរុស្ស៊ី ថា ការខុសច្បាប់។ នៅក្រោយមានការប្រកាសរៀបចំការបោះឆ្នោតប្រជាមតិដើម្បីភ្ជាប់ទឹកដីអ៊ុយក្រែន ទៅក្នុងរុស្ស៊ី ប្រទេសចិនបានដកខ្លួនឃ្លាតឆ្ងាយពីរុស្ស៊ី និងបានអំពាវនាវឲ្យមានការគោរពបូរណភាពទឹកដីរបស់ប្រទេសមួយ។
ដូចការប្រកាសកាលពីថ្ងៃអង្គារ អាជ្ញាធរគ្រប់គ្រងតំបន់ភាគខាងកើត និងភាគខាងត្បូងរបស់អ៊ុយក្រែន ដែលកំពុងស្ថិតក្រោមការកាន់កាប់របស់កងទ័ពរុស្ស៊ី បានរៀបចំ ចាប់ពីថ្ងៃនេះ រហូតដល់ថ្ងៃអង្គារ ទី២៧ កញ្ញា ការបោះឆ្នោត ប្រជាមតិ ស្តីពីការភ្ជាប់ខ្លួនទៅក្នុងទឹកដីរុស្ស៊ី។
តើការបោះឆ្នោតប្រជាមតិ ធ្វើនៅតំបន់ណា និងប្រព្រឹត្តទៅយ៉ាងដូចម្តេចខ្លះ?
ការបោះឆ្នោតប្រជាមតិស្តីពីការភ្ជាប់ខ្លួន ទៅក្នុងសហព័ន្ធរុស្ស៊ី រៀបចំនៅក្នុងតំបន់ចំនួន៤ ដែលមានពីរ ស្ថិតនៅភាគខាងកើតអ៊ុយក្រែន គឺតំបន់ ដូនែត និងលូហ្កន់ស៍ ដែលក្រុមឧទ្ទាមផ្តាច់ទឹកដីនិយមរុស្ស៊ី គ្រប់គ្រងតាំងពីឆ្នាំ ២០១៤ ហើយនិងតំបន់ចំនួន ២ទៀត នៅភាគខាងត្បូងអ៊ុយក្រែនគឺតំបន់ខឺសិន (Kherson) និងហ្សាប៉ូរីចា (Zaporijjia) ដែលកងទ័ពរុស្ស៊ី វាយដណ្តើមចូលកាន់កាប់ នៅក្រោយសង្រ្គាមឈ្លានពានអ៊ុយក្រែន នៅខែកុម្ភៈ ដើមឆ្នាំនេះ។
តាមការចុះផ្សាយរបស់ប្រព័ន្ធផ្សព្វផ្សាយរុស្ស៊ី ការបោះឆ្នោតនឹងប្រព្រឹត្តទៅពីថ្ងៃនេះ រហូតដល់ថ្ងៃទី ២៧ កញ្ញាសប្តាហ៍ក្រោយ ប៉ុន្តែ នៅក្នុងរយៈពេល ៤ថ្ងៃ ដំណើរការបោះឆ្នោតត្រូវប្រព្រឹត្តទៅ នៅតាមផ្ទះ ដោយសារហេតុផលអសន្តិសុខ និងការប្រយុទ្ធគ្នានៅតែបន្តនៅឡើយ។ មានន័យថា នៅក្នុង៤ថ្ងៃដំបូង អាជ្ញាធរគ្រប់គ្រងតំបន់ទាំង៤ខាងលើនឹងដើរទៅប្រមូលយកសន្លឹកឆ្នោត ពីផ្ទះមួយ ទៅផ្ទះមួយ។ មានតែថ្ងៃចុងក្រោយ គឺថ្ងៃទី ២៧កញ្ញាប៉ុណ្ណោះ ទើបគេបើកការិយាល័យបោះឆ្នោត នៅក្នុងតំបន់ដូនែត លូហ្កន់ស៍ ខឺសិន និងហ្សាប៉ូរីចា ដើម្បីឲ្យប្រជាជនអាចទៅបោះឆ្នោតជាទូទៅ។
ដើម្បីជំរុញ ឲ្យមានការចូលរួមបោះឆ្នោតច្រើន លើកនេះ អាជ្ញាធរនៅក្នុងទឹកដីរុស្ស៊ី បានបង្កើតការិយាល័យបោះឆ្នោត ជាច្រើនកន្លែងផងដែរ ដើម្បីអនុញ្ញាតឲ្យប្រជាជនអ៊ុយក្រែន ដែលរត់ភៀសខ្លួនទៅក្នុងទឹកដីរុស្ស៊ី ដោយសារសង្រ្គាម អាចបោះឆ្នោត បញ្ចេញមតិនឹងគេដែរ។
នៅក្នុងការបោះឆ្នោតប្រជាមតិ ដើម្បីភ្ជាប់ខ្លួនទៅនឹងទឹកដីរុស្ស៊ី ប្រជាជនរស់នៅក្នុងតំបន់ដែលកាន់កាប់ដោយកងទ័ពរុស្ស៊ី និងក្រុមឧទ្ទាមនិយមរុស្ស៊ី ត្រូវបានសួរសំណួរពីរផ្សេងគ្នា។ នៅក្នុងតំបន់ដូនែត និងលូហ្កន់ស៍ ដែលពួកឧទ្ទាមផ្តាច់ទឹកដី គាំទ្រដោយរុស្ស៊ី បានប្រកាសឯករាជ្យ នៅក្រោយ សង្រ្កាមរុស្ស៊ី ឈ្លានពានអ៊ុយក្រែន ប្រជាជនត្រូវឆ្លើយថា តើព្រម ឬមិនព្រម ក្នុងការភ្ជាប់ខ្លួនទៅក្នុងសហព័ន្ធរុស្ស៊ី។ ចំណែកនៅក្នុងតំបន់ភាគខាងត្បូង គឺខឺសិន និងហ្សារីប៉ូចា ដែលកងទ័ពរុស្ស៊ីទើបចូលកាន់កាប់នៅដើមឆ្នាំនេះ អ្នកទៅបោះឆ្នោត ត្រូវបានគេសួរថា តើពួកគេ ចង់បំបែកខ្លួនពីអ៊ុយក្រែន ដើម្បី បង្កើតរដ្ឋឯករាជ្យ និងភ្ជាប់ខ្លួនទៅក្នុងទឹកដីរុស្ស៊ីដែរឬទេ។
អាជ្ញាធរគ្រប់គ្រងតំបន់ភាគខាងកើតអ៊ុយក្រែន ចាត់ទុកការបោះឆ្នោតប្រជាមតិ លើកនេះ ថា ជាព្រឹត្តិការណ៍ប្រវត្តិសាស្រ្តដែលគេបានទន្ទឹងរង់ចាំជាយូរមកហើយ ដើម្បី អាចវិលត្រលប់ទៅរួមរស់ជាមួយមាតុភូមិរុស្ស៊ីឡើងវិញ។ នៅពេលមិនទាន់មានលទ្ធផលអ្វីនៅឡើយ អតីតប្រធានាធិបតី រុស្ស៊ី និងបច្ចុប្បន្នជាអនុប្រធានក្រុមប្រឹក្សាសន្តិសុខជាតិរុស្ស៊ី លោកមេដវេឌេវ បាននិយាយថា តំបន់ដែលរៀបចំការបោះឆ្នោតប្រជាមតិនឹងចូលភ្ជាប់ខ្លួនមកក្នុងទឹកដីរុស្ស៊ី។
ការបោះឆ្នោតប្រជាមតិភ្ជាប់ទឹកដីអ៊ុយក្រែនទៅក្នុងសហព័ន្ធរុស្ស៊ី គឺជារឿងអាម៉ាស និងខុសច្បាប់?
ការបោះឆ្នោតប្រជាមតិនៅតំបន់៤របស់អ៊ុយក្រែន មានរូបភាពដូចបេះបិទទៅនឹងការបោះឆ្នោតប្រជាមតិ កាលពីឆ្នាំ ២០១៤ ដែលបានអនុញ្ញាតឲ្យរុស្ស៊ី កាត់យកទឹកដីគ្រីមេ របស់អ៊ុយក្រែន ទៅបញ្ចូលក្នុងផែនទីរបស់រុស្ស៊ី។ សហគមន៍អន្តរជាតិមិនត្រឹមតែបរិហាររិះគន់ និងមិនទទួលស្គាល់តែប៉ុណ្ណោះទេ ប៉ុន្តែ ការកាត់យកទឹកដីគ្រីមេ របស់អ៊ុយក្រែន បានធ្វើឲ្យរុស្ស៊ីជាប់រងទណ្ឌកម្មរបស់ប្រទេសលោកខាងលិច រហូតមក។
ដូចក្នុងករណីគ្រីមេ ភាគីរុស្ស៊ី តាមរយៈ ប្រមុខការបរទេសលោកឡាវ្រូវ បានចេញមុខការពារ ដំណើរការបោះឆ្នោតប្រជាមតិ នៅក្នុងតំបន់ដែលទាំងបួន ខាងលើ ដោយថា វាជារឿងចាំបាច់ ដើម្បីការពារប្រជាជននិយាយភាសារុស្ស៊ី ដែលកំពុងរស់នៅក្នុងទឹកដី អ៊ុយក្រែន។ តាមរដ្ឋមន្រ្តីការបរទេស រុស្ស៊ី ប្រជាជននិយាយភាសារុស្ស៊ី ដែលកំពុងរស់នៅតំបន់ដូនែត លូហ្កន់ស៍ ខឺសិន និងហ្សារីប៉ូចា កំពុងប្រឈមនឹងការគំរាមកំហែងសន្តិសុខពីសំណាក់រដ្ឋាភិបាលអ៊ុយក្រែន ដែលលោកចាត់ទុកជាមេដឹកនាំផ្តាច់ការ ណាហ្ស៊ីថ្មី។
ប៉ុន្តែ នៅក្នុងកិច្ចប្រជុំរបស់ក្រុមប្រឹក្សាសន្តិសុខកាលពីថ្ងៃម្សិលមិញ ការនិយាយការពារខ្លួនរបស់ភាគីរុស្ស៊ី មិនបានធ្វើឲ្យប្រទេសដទៃទៀត ទទួលយកនោះទេ។ អគ្គលេខាធិការអង្គការសហប្រជាជាតិ លោកអង់តូនីញ៉ូ ហ្គូទែរស៍ បានដាស់តឿនរុស្ស៊ីកុំឲ្យរៀបចំការបោះឆ្នោតប្រជាមតិ ដែលមានគោលដៅកាត់យកទឹកដីអ៊ុយក្រែន ឲ្យសោះ ព្រោះថា ការភ្ជាប់ទឹកដីរបស់ប្រទេសមួយ មកធ្វើជាទឹកដីសម្បត្តិរបស់ខ្លួន ជាមួយការគំរាម ឬការប្រើកម្លាំងបាយ គឺជារឿងផ្ទុយនឹងច្បាប់អន្តរជាតិ។
ខុសច្បាប់អន្តរជាតិ ព្រោះថា ការបោះឆ្នោតប្រជាមតិមិនបានធ្វើឡើង ទៅតាមការប្រាថ្នាចង់បានរបស់ប្រជាជននោះទេ។ ការបោះឆ្នោតប្រជាមតិបានរៀបចំឡើងនៅក្នុងបរិបទមួយដែលកំពុងកើតមានភាពតានតឹង ការប្រយុទ្ធគ្នាក៏កំពុងកើតមាន នៅក្នុងតំបន់ដែលកំពុងរៀបចំការបោះឆ្នោតប្រជាមតិលើកនេះដែរ។ សម្រាប់អ្នកជំនាញសំណុំរឿងអ៊ុយក្រែន បើទោះបីជារុស្ស៊ី ប្រកាសថា នឹងមានប្រជាជនភាគច្រើនបោះឆ្នោត គាំទ្រឲ្យគេភ្ជាប់តំបន់តំបន់ដូនែត លូហ្កន់ស៍ ខឺសិន និងហ្សារីប៉ូចា ទៅក្នុងទឹកដីរុស្ស៊ី ប៉ុន្តែ គេមិនអាចជឿជាក់លើលទ្ធផលនេះបានទេ ព្រោះគេដឹងរួចទៅហើយថា ដំណើរការបោះឆ្នោតប្រជាមតិ មិនអាចប្រព្រឹត្តិទៅដោយរលូន សេរីយុត្តិធម៌បានទេដរាបណា ប្រជាជនអ៊ុយក្រែន ដែលរស់នៅក្រោមការកាន់កាប់របស់ទាហានរុស្ស៊ី រងការគាបសង្កត់ផ្លូវកាយផ្លូវចិត្ត។ មន្រ្តីការពារសិទ្ធិមនុស្សធ្លាប់បានទទួលដំណឹងហើយថា មន្រ្តីអ៊ុយក្រែននៅក្នុងតំបន់កាន់កាប់ដោយទាហានរុស្ស៊ី ត្រូវបាត់ខ្លួន ឬត្រូវទាហានរុស្ស៊ី ចាប់ធ្វើទារុណកម្ម ដោយសារតែពួកគេប្រឆាំងមិនធ្វើតាមការចង់បានរបស់ទាហានរុស្ស៊ី។
លោកពូទីន ទន្ទឹងចង់បានអ្វី ពីការបោះឆ្នោតប្រជាមតិដើម្បីភ្ជាប់ទឹកដីអ៊ុយក្រែន ទៅរុស្ស៊ី?
ការបោះឆ្នោតប្រជាមតិស្តីពីការភ្ជាប់តំបន់ចំនួន៤របស់អ៊ុយក្រែន ទៅក្នុងទឹកដីរុស្ស៊ី ធ្វើឡើងនៅមួយថ្ងៃក្រោយ ប្រធានាធិបតី រុស្ស៊ី លោកពូទីនប្រកាសប្រើគ្រប់មធ្យោបាយដែលលោកមាននៅក្នុងដៃ ដើម្បីការពារដែនដីរុស្ស៊ី។ តាម អនុប្រធានក្រុមប្រឹក្សាសន្តិសុខជាតិ លោកមេដវេឌេវ គ្រប់មធ្យោបាយដែលលោកពូទីនលើកឡើង មានផងដែរ អាវុធនុយក្លេអ៊ែរយុទ្ធសាស្រ្តរបស់រុស្ស៊ី។
ចង់ ឬមិនចង់ ការបោះឆ្នោតប្រជាមតិ ដើម្បីកាត់យកទឹកដីអ៊ុយក្រែន មួយភាគបន្ថែមទៀត មកដាក់ក្នុងផែនដីរុស្ស៊ី គឺជាយុទ្ធសាស្រ្តមួយទៀតរបស់លោកពូទីន ដើម្បីបញ្ឆេះសង្រ្គាមអ៊ុយក្រែន បន្ទាប់ពីកងទ័ពរុស្ស៊ី ចាញ់ដៃក្នុងការប្រយុទ្ធជាមួយកងទ័ពអ៊ុយក្រែន ដែលបានទទួលសព្វាវុធ ទំនើបៗពីប្រទេសលោកខាងលិច។
ដោយបើកភ្លើងខៀវឲ្យគេរៀបចំការបោះឆ្នោតប្រជាមតិ យ៉ាងប្រញាប់ប្រញាល់ នៅក្នុងទឹកដីអ៊ុយក្រែនដែលទាហានរុស្ស៊ី កំពុងចូលកាន់កាប់ លោកពូទីនចង់បញ្ជូនសារពីរ។ សាទី១ គឺសម្រាប់ក្រុមប្រទេសលោកខាងលិច ដើម្បីឲ្យឈប់ជួយផ្តល់អាវុធទៅអ៊ុយក្រែនតទៅទៀត។ មានន័យថា នៅក្រោយ តំបន់ទាំង៤ របស់អ៊ុយក្រែន ប្រកាសភ្ជាប់ខ្លួន មកក្នុងដែនដីរបស់រុស្ស៊ី រាល់ការវាយប្រហារលើតំបន់ទាំង៤ ពីសំណាក់អ៊ុយក្រែន ដែលទទួលសព្វាវុធពីលោកខាងលិច អូតង់ នឹងត្រូវចាត់ទុកជាការវាយប្រហារលើដែនដីរបស់រុស្ស៊ី។ នៅពេលនោះ គឺលោកពូទីននឹងមានហេតុផល ប្រើគ្រប់មធ្យោបាយ ដើម្បីវាយប្រហារវិញ ដែលនៅក្នុងនោះ មានផងដែរ សិទ្ធិប្រើអាវុធនុយក្លេអ៊ែរ ដើម្បី ការពារទឹកដីរុស្ស៊ី ពីការវាយប្រហារពីខាងក្រៅ។
ទី២ ដោយរៀបចំប្រជាមតិកាត់យកទឹកដីអ៊ុយក្រែន ជាង១៥%ទៀតមកដាក់ក្នុងកម្មសិទ្ធិរបស់រុស្ស៊ី លោកពូទីនចង់បញ្ជូនសារទៅប្រជាជនរុស្ស៊ី ថា រុស្ស៊ីកំពុងរងការគំរាមកំហែង ការវាយប្រហារពីបរទេស។ ដូច្នេះ លោកពូទីននឹងអាចសម្រេចផែនការ ក្នុងការបញ្ចុះបញ្ចូល រើសចំនួនទ័ព បន្ថែម ដើម្បីទៅធ្វើសង្រ្គាមនៅអ៊ុយក្រែន។
លោកពូទីនទំនងចង់ប្រើយុទ្ធសាស្រ្តកាត់យកទឹកដីបន្ថែមទៀតរបស់អ៊ុយក្រែនមកបញ្ចូលក្នុងសហព័ន្ធរុស្ស៊ី ដើម្បីបំបាក់ទឹកចិត្ត កុំឲ្យប្រទេសលោកខាងលិច នៅតែហ៊ាន ជួយផ្តល់អាវុធដល់អ៊ុយក្រែន ដើម្បីធ្វើសង្រ្គាមប្រយុទ្ធជាមួយរុស្ស៊ី ព្រោះថា ធ្វើដូច្នេះ វានឹងអាចជំរុញឲ្យរុស្ស៊ីប្រើអាវុធនុយក្លេអ៊ែរ។
ប៉ុន្តែ ភាគីអ៊ុយក្រែន វាយតម្លៃថា លោកពូទីននឹងមិនសម្រេចក្តីប្រាថ្នានោះទេ។ លទ្ធផលឆ្នោតប្រជាមតិនឹងមិនធ្វើឲ្យអ៊ុយក្រែនផ្លាស់ប្តូយុទ្ធសាស្រ្ត។ អ៊ុយក្រែននៅតែបន្តប្រយុទ្ធតទៅទៀតដើម្បីដណ្តើមទឹកដីរបស់ខ្លួនមកវិញ។
នៅក្នុងកិច្ចប្រជុំរបស់ក្រុមប្រឹក្សាសន្តិសុខរបស់អង្គការសហប្រជាជាតិ កាលពីថ្ងៃព្រហស្បតិ៍ រដ្ឋមន្រ្តីការបរទេសអ៊ុយក្រែន លោកDmytro Kouleba បាននិយាយថា មធ្យោបាយល្អបំផុតដើម្បីទប់ស្កាត់ការសម្លាប់រង្គាលរបស់រុស្ស៊ី គឺការបញ្ជូនអាវុធឲ្យអ៊ុយក្រែន។
អាមេរិកតាមរយៈរដ្ឋមន្រ្តីការបរទេសលោកអង់តូនី ប្លីងកិន បានអំពាវនាវឲ្យសហគមន៍អន្តរជាតិថ្កោលទោស ការឈ្លានពានរបស់រុស្ស៊ី នៅអ៊ុយក្រែន និងថា វាសំខាន់ណាស់ ដែលប្រទេសមួយ មិនអាចមានសិទ្ធិគូសវាសកំណត់ព្រំដែនរបស់ប្រទេសដទៃ ដោយការប្រើកម្លាំងបាយ។
ការបោះឆ្នោតប្រជាមតិដើម្បីកាត់យកទឹកដីអ៊ុយក្រែនបន្ថែមទៀត មកដាក់ក្នុងទឹកដីរុស្ស៊ី មិនមែនជាឧបសគ្គទៅរារាំង ឲ្យគេឈប់ជួយប្រជាជនអ៊ុយក្រែន ពីសង្រ្គាមឈ្លានពានរបស់រុស្ស៊ីនោះទេ។ ផែនការរបស់លោកពូទីន នឹងទៅបង្កឲ្យមានការផ្ទុះសង្រ្គាមធំមួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ