ទិវាឯករាជ្យជាតិទី៧៥ លោកម៉ូឌី ប្រកាសពីមហិច្ឆតា ចង់ឲ្យឥណ្ឌាក្លាយជាមហាអំណាចទី៣នៃពិភពលោក
ចុះផ្សាយនៅថ្ងៃ៖
ស្តាប់ - ០៨:៤២
ថ្ងៃទី១៥សីហា គឺជាទិវាឯករាជ្យជាតិឥណ្ឌា។ អស់រយៈពេល៧៥ឆ្នាំកន្លងមកនេះ ឥណ្ឌាបានងើបចេញពីរបបទាសភាព នៃអាណានិគមរបស់អង់គ្លេស ហើយបានកសាងខ្លួនបន្តិចម្តងៗ ក្លាយជាមហាអំណាចអាស៊ីមួយដ៏សំខាន់។ ជាមួយនឹងចំនួនប្រជាជន ដែលនឹងឡើងលើសចិន ពោលគឺប្រមាណ១៤០០លាននាក់ នៅរវាងប៉ុន្មានឆ្នាំខាងមុខនេះ ឥណ្ឌាគឺជាទីផ្សារសេដ្ឋកិច្ចមួយដ៏ធំ នៃពិភពលោក។ តែទន្ទឹមគ្នានេះ ទំនោរនយោបាយផ្ទៃក្នុង បែបជាតិនិយមជ្រុល ដែលដឹកនាំដោយលោកនាយករដ្ឋមន្ត្រីណារិន្ទ្រ ម៉ូឌី កំពុងតែធ្វើឲ្យគេព្រួយបារម្ភជាខ្លាំងផងដែរ។
អង់គ្លេសបានចាប់ផ្តើមមានវត្តមាននៅឥណ្ឌា តាំងតែពីដើមសតវត្សទី១៧ម្លេះ តាមរយៈវត្តមានរបស់ក្រុមហ៊ុន East India Company (La compagnie des Indes orientales) ដែលធ្វើជំនួញនាំចេញគ្រឿងទេសរបស់ឥណ្ឌា នាំយកមកលក់នៅអឺរ៉ុប។ បន្តិចម្តងៗ ក្រុមហ៊ុននេះបានក្លាយជាអាណចក្រក្រុមហ៊ុនដ៏ធំ និងមានឥទ្ធិពលបំផុតនៅឥណ្ឌា។ ជាផ្លូវការ អ្នកប្រវត្តិសាស្ត្របានចាត់ទុកព្រឹត្តិការណ៍ប្រយុទ្ធគ្នា រវាងកងកម្លាំងរបស់ក្រុមហ៊ុន East India Company ជាមួយនឹងកងទាហានរបស់ស្តេចតំបន់បង់ហ្កាល់ នៅឆ្នាំ១៧៥៧ ថាជាពេលដែលអង់គ្លេស បានចាប់ផ្តើមដាក់អាណានិគមលើឥណ្ឌា។ បន្តបន្ទាប់មកទៀត កងទ័ពចក្រភពអង់គ្លេស បានវាយដណ្តើមគ្រប់គ្រងឧបទ្វីបឥណ្ឌាទាំងស្រុង។
ដូចយើងដឹងហើយ ឥណ្ឌាធំណាស់ ហើយមានប្រជាជនច្រើនក្រុម ដែលកាន់សាសនាផ្សេងៗគ្នា ភាគច្រើនគឺសាសនាហិណ្ឌូ សាសនាអ៊ីស្លាម សាសនាស៊ីក្ខ និងពុទ្ធសាសនាជាដើម។ ព្រឹត្តិការណ៍បះបោរ នៅឆ្នាំ១៨៥៧ អាចចាត់ទុកបាន ថាជាការរើបម្រះលើកដំបូងបង្អស់របស់ប្រជាជនឥណ្ឌា ប្រឆាំងនឹងការជិះជាន់នៃរបបអាណានិគមអង់គ្លេស។ ទាហានអង់គ្លេសបានកាប់សម្លាប់ប្រជាជនឥណ្ឌា អ្នកតស៊ូរើបំរះជាច្រើនម៉ឺននាក់ កាលជំនាន់នោះ។ សោកនាដកម្មនេះ ហាក់បានធ្វើឲ្យប្រជាជនឥណ្ឌាបាក់ស្បាត មួយរយៈធំ ហើយត្រូវទ្រាំរស់ក្រោមនឹមអាណានិគមតទៅទៀត។
ទាមទារឯករាជ្យដោយអហិង្សា
ផ្នត់គំនិតស្នេហាជាតិ ជាតិនិយមឥណ្ឌា បានរីកដុះដាលបន្តិចម្តងៗ នៅរវាងឆ្នាំចុងសតវត្សទី១៩ ជាមួយនឹងការបង្កើតចលនានយោបាយមួយ ឈ្មោះថា “គណបក្សខុនហ្ក្រេសឥណ្ឌា” នៅឆ្នាំ១៨៨៥។ ចលនានយោបាយជាតិនិយមនេះ រួមគ្នាដោយក្រុមអ្នកចេះដឹង ទាំងខាងអ្នកកាន់សាសនាអ៊ីស្លាម និងអ្នកកាន់សាសនាហិណ្ឌូ ហើយដែលក្នុងនោះ មានលោកណេរូ និងលោកម៉ាហាត្មៈ ហ្កាន់ធី ជាសមាជិកដ៏សំខាន់។
គឺលោកម៉ាហាត្មៈ ហ្កាន់ធី ដែលបានផ្តួចផ្តើមបង្កើតទ្រឹស្តី ក៏ដូចជាចលនារើបំរះបែបថ្មី ដែលមិនប្រើហិង្សា ពោលគឺធ្វើសកម្មភាពដោយសន្តិវិធី។ លោកម៉ាហត្មៈ ហ្កាន់ធី បានស្រង់គំនិត ដែលមានក្នុងប្រពៃណីជំនឿសាសនា របស់ប្រជាជនឥណ្ឌា ដូចជាការធ្វើសមាធិ ការដើរធម្មយាត្រា ដើរសមាទានធុត្តុង្គ ពីកន្លែងមួយទៅកន្លែងមួយ ដើម្បីប្រជាជនឥណ្ឌា បានដឹងឮ និងចូលរួមក្នុងការតស៊ូ ទាមទារឯករាជ្យដោយអហិង្សា។ វាជួនចំពេលដែល ចក្រភពអង់គ្លេសបានចុះខ្សោយកម្លាំងជាខ្លាំង បន្ទាប់ពីចប់សង្គ្រាមលោកលើកទី២ ទើបធ្វើឲ្យអង់គ្លេសសម្រេចចិត្តដកខ្លួនចេញពីឥណ្ឌា នៅឆ្នាំ១៩៤៧។
បានឯករាជ្យ តែត្រូវពុះចែកទឹកដី
បើតាមឯកសារប្រវត្តិសាស្ត្រខ្លះអះអាងថា អង់គ្លេសចង់បញ្ចៀសកុំឲ្យមានសង្គ្រាមស៊ីវីល រវាងក្រុមអ្នកកាន់សាសនាអ៊ីស្លាម និងអ្នកកាន់សាសនាហិណ្ឌូ នៅពេលដែលខ្លួនចាកចេញទៅ។ ហេតុដូច្នេះហើយ គេបានស្នើឲ្យពុះឥណ្ឌាជា២ មួយគឺឥណ្ឌាហិណ្ឌូ មួយទៀតគឺឥណ្ឌាអ៊ីស្លាម ដែលគេដាក់ឈ្មោះថ្មីហៅថា បាគីស្ថាន។ ឥណ្ឌាឯករាជ្យ នៅកណ្ដាល មានប្រជាជនកាន់សាសនាហិណ្ឌូភាគច្រើន ចំណែកថ្មី ឈ្មោះប្រទេសប៉ាគីស្ថាន កាន់សាសនាអ៊ីស្លាម មានពីរផ្នែក គឺប៉ាគីស្ថានខាងលិច និងប៉ាគីស្ថានខាងកើត ដែលបច្ចុប្បន្នគឺប្រទេសបង់ក្លាដែសនេះឯង ដែលបានប្រកាសឯករាជ្យនៅឆ្នាំ១៩៧១។
ការពុះចែកឥណ្ឌាជាចំរៀក នៅឆ្នាំ១៩៤៧នេះ គឺជាប្រវត្តិសាស្ត្រឈឺចាប់ខ្លាំងណាស់ ព្រោះវាបានបង្កឲ្យមានជម្លោះបែងចែកពូជសាសន៍និងសាសនា រវាងអ្នកកាន់សាសនាហិណ្ឌូ និងសាសនាអ៊ីស្លាម។ ប្រជាជនត្រូវបែងចែកគ្នា បែកបងបែកប្អូន ធ្វើចំណាកស្រុករើផ្ទះសំបែង ព្រោះត្រូវជ្រើសរើស ថាត្រូវទៅនៅខាងណា ខាងប៉ាគីស្ថាន ឬខាងឥណ្ឌា។ ជម្លោះហិង្សារវាងអ្នកកាន់សាសនាទាំង២នេះ បានសម្លាប់មនុស្សយ៉ាងហោច១លាននាក់ នៅក្នុងអំឡុងពេលនោះ។
យ៉ាងណាមិញ លោកម៉ាហាត្មៈ ហ្កាន់ធី បានជំទាស់នឹងការពុះចែកប្រទេសបែបនេះ។ លោកបានថ្លែងថា វាផ្ទុយពីគំនិតតស៊ូទាមទារសិទ្ធិសេរីភាព និងឯករាជ្យរបស់ប្រជាជនឥណ្ឌាទាំងមូល ដែលចង់រួមរស់ក្នុងមហាគ្រួសារតែមួយ មានភាពម្ចាស់ការខ្លួនឯង តែទីបំផុត ឥណ្ឌាបានឯករាជ្យ តែបែរជាបែកបាក់បងប្អូនខ្លួនឯងទៅវិញ។ ហេតុដូច្នេះហើយ បានជាគេមិនឃើញមានរូបលោក ក្នុងរូបថតផ្លូវការជាមួយថ្នាក់ដឹកនាំឥណ្ឌា នៅថ្ងៃប្រកាសឯករាជ្យ ១៥សីហា១៩៤៧ទេ ព្រោះលោកមហាត្មៈ ហ្កាន់ធី បានបដិសេធមិនទៅចូលរួម។ លោកបានសម្រេចចិត្តទៅធ្វើសមាធិ និងបង្អត់អាហារខ្លួនឯង នៅក្រុងកាល់គូតា រហូតទាល់តែមានជនហិណ្ឌូជាតិនិយមជ្រុលម្នាក់ បានសម្លាប់លោកនៅថ្ងៃទី៣០មករា១៩៤៨ ដោយចោទថាលោក កាន់ជើងអ្នកកាន់សាសនាអ៊ីស្លាមជ្រុលពេក។
លោកម៉ូឌី៖ ឥណ្ឌាគឺជាអនាគតមហាអំណាចលំដាប់ទី៣
៧៥ឆ្នាំកន្លងមកនេះ ឥណ្ឌាបានប្រឹងប្រែងខិតខំកសាងខ្លួន រហូតក្លាយជាតួអង្គដ៏សំខាន់មួយនៅក្នុងតំបន់អាស៊ី។នៅក្នុងសុន្ទរកថា ពីវិមានក្រហម កណ្តាលក្រុងញូដេលី នៅថ្ងៃទី១៥សីហា លោកណារិន្ទ្រ ម៉ូឌី បានយកឱកាសនេះ ថ្លែងសារបំផុតគំនិតស្នេហាជាតិ ឲ្យប្រជាជនឥណ្ឌា ជាពិសេសយុវជន ឲ្យរួមគ្នានៅពីក្រោយគាត់ រួមកម្លាំងពួតដៃគ្នាកសាងឥណ្ឌា។ លោកប្រកាសថា ក្នុងរវាង២៥ឆ្នាំទៀត ឥណ្ឌាត្រូវតែក្លាយជាប្រទេសអភិវឌ្ឍន៍ មានឧស្សាហកម្មនាំមុខ។ លោកម៉ូឌី បានប្រកាសថា រដ្ឋាភិបាលលោកនឹងរៀបចំបង្កើតឲ្យមានការប្រកួតប្រជែង ផ្ទៃក្នុង រវាងរដ្ឋមួយទៅរដ្ឋមួយរបស់ឥណ្ឌា ដើម្បីបំផុស និងជ្រោងគំនិតឆ្នៃប្រឌិត ក៏ដូចជាការអភិវឌ្ឍន៍ មិនថាក្នុងវិស័យថាមពល វិស័យឧស្សាហកម្ម និងបច្ចេកវិទ្យាអេឡិចត្រូនិកជាដើម។
ជាការពិត នេះគឺជាសុន្ទរកថាមានខ្លឹមសារនយោបាយ ដែលលោកណារិន្ទ្រ ម៉ូឌីចង់ឲ្យប្រជាជនឥណ្ឌាទាំងអស់គាំទ្រនិងកោតសរសើរលោក។ ក៏ប៉ុន្តែ សេដ្ឋកិច្ចឥណ្ឌាកំពុងបោះពួយខ្លាំងណាស់ ប៉ុន្មានឆ្នាំចុងក្រោយនេះ។ បច្ចុប្បន្ននេះ ឥណ្ឌាជាមហាអំណាចសេដ្ឋកិច្ចអាស៊ីលំដាប់ទី៣ ហើយលំដាប់ពិភពលោកគឺទី៦។ បន្តិចទៀត ប្រជាជនឥណ្ឌានឹងឡើងដល់ ១៤០០លាននាក់ លើសចិន ក្លាយជាប្រទេសធំមានទីផ្សារធំបំផុត។ បើតាមអ្នកវិភាគបរទេសជាច្រើន គឺថាជាការពិតនៅរវាងឆ្នាំ២០៥០ ឥណ្ឌាអាចនឹងឡើង ក្លាយជាមហាអំណាចសេដ្ឋកិច្ចលំដាប់ទី៣ បន្ទាប់ពីអាមេរិក និងចិន។
យោងតាមតារាងរបស់ធនាគារពិភពលោក បច្ចុប្បន្ននេះ ឥណ្ឌាស្ថិតនៅក្នុងចំណោមប្រទេស ដែលមានចំណូលដុលមធ្យម ពោលគឺ ចន្លោះពី១០៨៦ ដល់ ៤២៥៥ដុល្លារ សម្រាប់ប្រជាជនម្នាក់។ តាមការព្យាការណ៍ សេដកិច្ចឥណ្ឌាឆ្នាំ២០២៣នេះ អាចមានកំណើនដល់ទៅ៧% ដែលជាកំណើនខ្ពស់បំផុត ប្រៀបធៀបទៅប្រទេសសេដ្ឋកិច្ចនាំមុខទាំងអស់។ តែយ៉ាងណា ទំហំសេដ្ឋកិច្ចឥណ្ឌាអាចរីកចម្រើនខ្លាំង ក្លាយជាមហាអំណាចទី៣មែន តែចំណូលដុលរបស់ប្រជាជនអាចមិនមានខ្ពស់ ដូចប្រទេសអភិវឌ្ឍន៍ផ្សេងៗទៀតទេ។
លាងជម្រះភាពអាម៉ាស់នៃប្រវត្តិសាស្ត្រ
ទំនោរជាតិនិយមជ្រុល បែបផ្តាច់ការ របស់លោកណារិន្ទ្រ ម៉ូឌីនេះ គឺមិនមែនប្រទេសធំៗផ្សេងទៀត នៅអឺរ៉ុប ឬសហរដ្ឋអាមេរិក មើលមិនឃើញនោះទេ។ តែសម្រាប់ពេលនេះ គេត្រូវការឥណ្ឌា ដើម្បីយកកម្លាំងមកទប់ឥទ្ធិពលរបស់ចិន។ ឥណ្ឌាក្រោមការដឹកនាំរបស់លោកណារិន្ទ្រ ម៉ូឌី មិនមែនប្រឹងតែលើវិស័យសេដ្ឋកិច្ចទេ តែឥណ្ឌាថែមទាំងចង់ក្លាយជាមហាអំណាចធំ ក្នុងវិស័យយោធា និងនយោបាយការបរទេសសកលលោកផងដែរ។
មហិច្ឆតាធំមួយទៀតរបស់លោកណារិន្ទ្រ ម៉ូឌី គឺនាំឥណ្ឌាឲ្យក្លាយជាសមាជិកអចិន្ត្រៃយ៍នៃក្រុមប្រឹក្សាសន្តិសុខរបស់អង្គការសហប្រជាជាតិ ស្មើមុខជាមួយ អាមេរិក ចិន បារាំង រុស្ស៊ី និងជាពិសេសអង់គ្លេស។ បានអង្គុយកៅអីទន្ទឹមជាមួយអង់គ្លេស ក្នុងនាមជាមហាអំណាចពិភពលោក វាគឺជាជោគជ័យដ៏ធំបំផុតរបស់ឥណ្ឌា ក្នុងការស្រោចស្រង់កិត្តិយសជាតិ លាងសំអាតភាពអាម៉ាស់ក្នុងសម័យអាណានិគមអង់គ្លេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ