អ៊ុយក្រែនរុស្ស៊ី ចោទដាក់គ្នាថាទម្លាក់គ្រាប់បែកមន្ទីរឃុំឃាំងមួយឲ្យស្លាប់មនុស្សជាង៥០នាក់
ចុះផ្សាយនៅថ្ងៃ៖
ស្តាប់ - ០៦:១២
ថ្ងៃសុក្រ មានព្រឹត្តិការណ៍ទម្លាប់គ្រាប់បែកទៅលើមន្ទីរឃុំឃាំងមួយកន្លែង បណ្តាលឲ្យស្លាប់មនុស្សជាង៥០នាក់និងរបួបរាប់សិបនាក់ ដែលសុទ្ធតែជាអតីតសមាជិកកងកម្លាំងអាហ្សូវ (Azov)។ អ៊ុយក្រែន និង រុស្ស៊ី បានចោទគ្នាទៅវិញទៅមក ថាជាអ្នកនៅពីក្រោយអំពើឃាតកម្មនេះ។ សូមជ្រាបថា កន្លែងទម្លាក់គ្រាប់បែកនេះ គឺឋិតនៅប៉ែកអាគ្នេយ៍អ៊ុយក្រែន ដែលជាតំបន់ផ្តាច់ខ្លួនគាំទ្ររុស្ស៊ី។ មួយរយៈមុន កងទ័ពទាហានអ៊ុយក្រែន ប្រមាណជា២៥០០នាក់ ដែលតស៊ូប្រយុទ្ធការពារតំបន់នេះលែងបាន ក៏បានសុំចុះចាញ់ ហើយត្រូវ រុស្ស៊ី ចាប់ឃុំឃាំងនៅតំបន់ អូលេនីវកា (Olenivka) ជាកន្លែងកើតហេតុការណ៍ធ្លាក់គ្រាប់បែកពីថ្ងៃទី២៩កក្កដា។
អ៊ុយក្រែននិងរុស្ស៊ី ទម្លាក់កំហុសដាក់គ្នាទៅវិញទៅមក
ភាគីរដ្ឋអំណាចក្រុងកៀវ, ទាំងប្រធានាធិបតីនិងទាំងក្រសួងការពារជាតិអ៊ុយក្រែន គឺសុទ្ធតែចោទថាការទម្លាក់គ្រាប់បែកសម្លាប់អ្នកទោសក្នុងមន្ទីរឃុំឃាំងទាំងជាង៥០នាក់ ជាស្នាដៃរុស្ស៊ី។ អ៊ុយក្រែន តាមរយៈប្រធានាធិបតី Zelensky គឺបានចាត់ទុកថា នេះជាឧក្រិដ្ឋកម្មសង្គ្រាមបង្កឡើងដោយរុស្ស៊ី។ បើតាមភ្នាក់ងារស៊ើបការសម្ងាត់របស់អ៊ុយក្រែន, «ការវាយប្រហារលើមន្ទីរឃុំឃាំងនេះ គឺធ្វើឡើងដោយក្រុមទាហានស៊ីឈ្នួល Wagner របស់ភាគីខាងរុស្ស៊ី»។
ផ្ទុយទៅវិញ ភាគីរបបក្រុងម៉ូស្កូ ចោទថា អ៊ុយក្រែនទៅវិញទេ ដែលជាអ្នកប្រព្រឹត្ត និងជាអ្នកដែលត្រូវទទួលខុសត្រូវចំពោះអំពើឃាតកម្មនេះ។ ក្រសួងការពារជាតិរុស្ស៊ី បានច្រានចោលការចោទប្រកាន់ និងថែមវាយបកថាការទម្លាក់គ្រាប់បែកនោះ គឺជាស្នាដៃរបស់អ៊ុយក្រែនយ៉ាងជាក់ច្បាស់។ រុស្ស៊ីហ៊ានថាដូច្នេះ គឺសំអាងលើភស្តុតាងជាបំណែកគ្រាប់បែក។ ទូរទស្សន៍រដ្ឋរុស្ស៊ី ក៏បង្ហាញរូបភាព ដោយធ្វើឲ្យមានភាពមិនច្បាស់ ដែលគេអាចស្គាល់បានថាជាសាកសពមនុស្ស។ តាមកញ្ជាក់ទូរទស្សន៍រដ្ឋរុស្ស៊ី ក៏មានផ្សព្វផ្សាយពីហេតុការណ៍នេះ ដោយបង្ហាញពីរូបភាពទីកន្លែងមន្ទីរឃុំឃាំងឆេះខ្ជេចខ្ជី មានធ្យូងខ្មៅរោល គ្រែដេករបស់អ្នកទោសដាច់ បាក់បែក ខ្ជាត់ខ្ជាយ ហើយនិងមានបំណែកសំបកគ្រាប់បែក ជាច្រើនបំបែក ទៀតផង។ បើតាមរុស្ស៊ី, បំណែកគ្រាប់បែកនោះ គឺជាប្រភេទគ្រាប់បែកកាំជ្រួចប្រព័ន្ធ Himars របស់សហរដ្ឋអាមេរិក។ (អាមេរិកដែលគេដឹងហើយថាបានជួយជ្រោមជ្រែងអ៊ុយក្រែនក្នុងសង្គ្រាមនេះ។)
ចំណែកបណ្តាញសារព័ត៌មានអឺរ៉ុបវិញ ដូចជា Reuters, AP, AFP ក៏បានផ្សាយរូបពីវិនាសកម្មដែលវែកមកឃាតករមិនទាន់ឃើញនេះដែរ។ បើតាមទីភ្នាក់ងារសារព័ត៌មានបារាំង គឺ AFP បានទទួលស្គាល់ថាខ្លួនមិនទាន់មានប្រភពឯករាជ្យជាក់លាក់ណាមួយនៅឡើយទេ ដើម្បីអះអាងពីរឿងនេះ។ បើតាមវិទ្យុបារាំងជាភាសាបារាំង គឺការបើកអង្កេតឲ្យឯករាជ្យក្នុងករណីនេះ ក៏ប្រហែលជាមិនអាចទៅរួចដែរ ព្រោះដែនដីម្តុំកន្លែងកើតហេតុនោះ ប្រឈមនឹងហានិភ័យសុវត្ថិភាពខ្លាំងណាស់។
ក្នុងការពិតថានរណានៅក្រោយការទម្លាក់គ្រាប់បែកនេះ នៅតែស្រពិចស្រពិល ហើយភាពមិនច្បាស់លាស់ ក៏រាប់តាំងពីចំនួនអ្នកស្លាប់។ ខាងរុស្ស៊ី ថាមានស្លាប់ប្រមាណ៤០នាក់ ហើយរបស់ជាង៧៥នាក់។ ខាងអ៊ុយក្រែនថាស្លាប់ជាង៥០នាក់។ ចំណែកអាជ្ញាធរនៅតំបន់ផ្តាច់ខ្លួន Donetsk ដែលគាំទ្ររុស្ស៊ីវិញ គឺថាគេររាប់ឃើញមានស្លាប់៥៣នាក់។
ទោះបីយ៉ាងណាក្តី សម្រាប់ពេលនេះ រុស្ស៊ី គឺគណៈកម្មាការស៊ើបអង្កេតរបស់ក្រុងម៉ូស្កូថា អ៊ុយក្រែនប្រឌិតរឿងទម្លាក់កំហុសលើម៉ូស្កូ គឺជារឿងអាស្រូវ និងចាត់ទុកថានេះជាការញ៉ុះញ៉ុងបង្កហេតុ ដែលជាអំពើគួរអៀនខ្មាសបំផុត ហើយនិងថា កងកម្លាំងទាហានអ៊ុយក្រែន បានសម្លាប់ទាហានដែលចុះចូលគាំទ្ររុស្ស៊ី គឺជាបំភ័យដល់ទាហានផ្សេងៗទៀត។
ពីចំណែកខ្លួន មេបញ្ជាការអ៊ុយក្រែនថា អ៊ុយក្រែន មិនដែលយកជនស៊ីវិល ឬអ្នកទោសសង្គ្រាម ជាផ្ទាំងស៊ីបនោះទេ ហើយនិងអះអាងថាអ៊ុយក្រែនតែងតែគោរពគោលការណ៍វិធានច្បាប់និងបទដ្ឋានសិទ្ធិមនុស្សអន្តរជាតិ។
តើរឿងទម្លាក់គ្រាប់បែកនៅពេលនេះ អាចធ្វើឲ្យរអាក់រអួលដល់ដំណើរការដឹកបញ្ចូនស្រូវសាឡីឬទេ?
សង្គ្រាមឈ្លានអានរុស្ស៊ីលើអ៊ុយក្រែន ធ្វើឲ្យការនាំចេញស្រូវសាឡីចេញពីទៅបរទស ផ្គត់ផ្គង់ពិភពលោក គឺត្រូវកក់ស្ទះ ហើយបង្កឲ្យមានវិបត្តិស្រូវសាឡីជាខ្លាំងប៉ុន្មានខែចុងក្រោយនេះ។ សម្រាប់ពេលនេះ បើតាមរដ្ឋបាលទីក្រុងកៀវ គឺលោកប្រធានាធិបតីអ៊ុយក្រែន ផ្ទាត់តែម្តង អះអាងថាការនាំចេញនឹងចាប់ផ្តើមឡើងវិញនៅប៉ុន្មានថ្ងៃខាងមុខ។
ថ្ងៃសុក្រ លោក Volodymyr Zelensky ក៏បានអញ្ជើញទៅដោយផ្ទាល់នៅ Tchornomorsk នៅសមុទ្រខ្មៅ ដែលមានការសម្របសម្រួលក្នុងការដឹកជញ្ចូនដោយនាវារបស់តួកគី។ នេះគឺដោយផ្អែកទៅលើកិច្ចព្រមព្រៀងជាមួយរុស្ស៊ី កាលពីថ្ងៃទី២២កក្កដា សប្តាហ៍មុន។លោក Zelensky បានថ្លែងថា យើងត្រៀមខ្លួនសព្វគ្រប់រួចរាល់។ យើងបានផ្តល់សញ្ញាទៅបណ្តាដៃគូសហការ មានដូចជា អង្គការសហប្រជាជាតិ និងប្រទេសតួកគី ហើយកងទាហានអ៊ុយក្រែនដែលទទួលបន្ទុករក្សាសន្តិសុខ ហើយនៅតែចាំការឆ្លើយតបពីតួកគីនិងអង្គការសហប្រជាជាតិវិញតែប៉ុណ្ណោះ ថាអាចចាប់ផ្តើមដឹកស្បៀកស្រូវសាឡី ពេលណាម៉ោងណា។
បើតាមរដ្ឋមន្ត្រីខាងហេដ្ឋារចនាសម្ព័ន្ធដឹកជញ្ជូនអ៊ុយក្រែន គឺខណៈនេះ មាននាវាចំនួន១៧បានប្រមូលលើកដាក់ស្រូវសាឡីលើនាវារួចស្រេចហើយនៅកំពង់ផែ Tchornomorsk និងកំពង់ផែ Odessa។ ក្នុងនោះ មានវានា១០គ្រឿង ត្រៀមខ្លួនស្រេច សម្រាប់ចេញដំណើរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ