លោកអគ្គលេខាធិការ អ.ស.ប.៖ ពិភពលោកត្រូវតែរួមគ្នា បិទបញ្ចប់ “សករាជនៃថាមពលហ្វូស៊ីល”
ចុះផ្សាយនៅថ្ងៃ៖
ស្តាប់ - ០៧:១២
កាលពីថ្ងៃសុក្រ ទី១៧មិថុនា លោកចូ បៃដិន បានដឹកនាំការប្រជុំមួយ ដែលមានឈ្មោះថា “វេទិកានៃប្រទេសសេដ្ឋកិច្ចនាំមុខ ស្តីពីថាមពលនិងបរិស្ថាន” ។ ដោយមានការចូលរួម ពីថ្នាក់ដឹកនាំជាង២០ប្រទេស លោកចូ បៃដិន មានបំណងយកឱកាសនេះ ទាញសញ្ញាអាសន្ន ឲ្យគ្រប់ប្រទេស កុំបង្វែរអាទិភាព លើការពង្រីកពង្រឹង ប្រភពថាមពលបៃតងស្អាតស្អំ ព្រោះវាមិនត្រឹមតែជាដំណោះស្រាយប្រយុទ្ធនឹងការកើនឡើងកំដីផែនដីប៉ុណ្ណោះទេ តែវាគឺជា មធ្យោបាយការពារសន្តិសុខថាមពល។ សន្តិសុខថាមពលពិភពលោកបច្ចុប្បន្ន ដែលកំពុងប្រឈមនឹងការគំរាម ដោយសារតែសង្គ្រាមឈ្លានពានរបស់រុស្ស៊ី ទៅលើអ៊ុយក្រែន។
រដ្ឋាភិបាលលោកចូ បៃដិន កំពុងព្យាយាម លាងសំអាតកិត្តិយសសហរដ្ឋអាមេរិក ដែលកាលពីក្នុងអាណត្តិលោកដូណាល់ ត្រាំ បានចុះស្រអាប់ខ្លាំងសម្បើមណាស់ នៅក្នុងវិស័យបរិស្ថាន ប្រយុទ្ធប្រឆាំងនឹងការកើនឡើងកំដៅផែនដីនេះ។ លោក ចូ បៃដិន បានផ្តោតអាទិភាព ចង់ឲ្យសហរដ្ឋអាមេរិក វិលត្រលប់មកលើឆាកអន្តរជាតិ ក្លាយជាមេដឹកនាំ ជាអ្នកផ្តួចផ្តើមគំនិត និងផ្តល់សន្ទុះនៅក្នុងវិស័យនេះវិញ ក្នុងនាមអាមេរិកជាមហាអំណាចសេដ្ឋកិច្ចលំដាប់ទី១។
ទន្ទឹមគ្នានេះទៀត ពិភពលោកយើង កំពុងស្ថិតនៅក្នុងដំណាក់កាលមួយលំបាក នាពេលបច្ចុប្បន្ននេះ ដោយសារតែបញ្ហាតម្លៃថាមពលឡើងថ្លៃ ថ្លៃសាំង ថ្លៃហ្កាស និងតម្លៃចរន្តអគ្គិសនីជាដើម ឡើងថ្លៃខ្ពស់ បង្កការលំបាកដល់សេដ្ឋកិច្ច និងជីវភាពប្រជាជន។
ថាមពលស្អាតស្អំ ជួយឲ្យមានសន្តិសុខថាមពល
នៅក្នុងកិច្ចប្រជុំតាមប្រព័ន្ធវីដេអូខុនហ្វឺរិនស៍ កាលពីថ្ងៃសុក្រម្សិលមិញ លោកចូ បៃដិន បានថ្លែងទៅកាន់ថ្នាក់ដឹកនាំរដ្ឋាភិបាលនៃប្រទេសចំនួន២២ផ្សេងទៀត ដែលមានវត្តមាន ថាសង្គ្រាមឈ្លានពាន ដែលរុស្ស៊ី បានធ្វើទៅលើអ៊ុយក្រែន បានបង្កឲ្យមានវិបត្តិតម្លៃថាមពល។ ជាងនេះទៀត វាក៏បានធ្វើឲ្យយើងឃើញនូវ ភាពងាយប្រឈមគ្រោះថ្នាក់ នៃសន្តិសុខថាមពលរបស់ពិភពលោកយើងដែរ ព្រោះថាពិភពលោករំពឹងខ្លាំង លើថាមពលប្រេងឥន្ធនៈ និងហ្កាសរបស់រុស្ស៊ី ដែលអ្នកនាំចេញលក់លំដាប់ទី២។ រុស្ស៊ីយកចំណុចខ្សោយនេះ មកចង និងដាក់សំពាធលើពិភពលោក ដើម្បីមហិច្ឆតាភូមិសាស្ត្រនយោបាយរបស់ខ្លួន។
លោកចូ បៃដិន បានថ្លែងអំពាវនាវ ឲ្យប្រទេសទាំងអស់ ដែលមានសេដ្ឋកិច្ចនាំមុខ ត្រូវរួមគ្នា ពង្រឹងវិស័យថាមពលស្អាតស្អំ ថាមពលកកើតឡើងវិញ ដើម្បីចូលរួមកាត់បន្ថយការបញ្ចេញឧស្ម័នកាបូនិក ដែលជាប្រភពធ្វើឲ្យផែនដីឡើងកំដៅ។ មិនត្រឹមតែប៉ុណ្ណោះ ថាមពលស្អាតស្អំ គឺជាមធ្យោបាយឲ្យពិភពលោកយើងមានសន្តិសុខថាមពល មិនរំពឹងតែទៅលើប្រេង ឬហ្កាសរបស់ប្រទេសណាមួយ។
បិទបញ្ចប់ “សករាជនៃថាមពលហ្វូស៊ីល”
លោកអគ្គលេខាធិការអង្គការសហប្រជាជាតិ បានថ្លែងថា “ថាមពលដែលបានមកពីរ៉ែហ្វូស៊ីល មានដូចជាប្រេង ហ្កាស និងធ្យូងថ្មជាដើមនេះ គឺវាលែងមាននន័យខ្លឹមសារនយោបាយ និងសេដ្ឋកិច្ច តទៀតហើយ សម្រាប់ថ្ងៃអនាគត។ គំរូសេដ្ឋកិច្ច ដែលរំពឹងលើថាមពលប្រភេទនេះ គឺវាហួសសម័យហើយ បន្ទាប់ពីពិភពលោកយើង បានយល់ បានដឹងថាវាបានបង្កផលវិបាកអ្វីខ្លះ មកលើអាកាសធាតុ និងអាយុជីវិតរបស់មនុស្សជាតិ។
លោក អង់តូនីញ៉ូ ហ្គូតទែរស៍ បានចោទថា ក្រុមឧស្សាហកម្មថាមពលហ្វូស៊ីល បានយកពិភពលោកយើងជាចំណាប់ខ្មាំង មិនខុសពីក្រុមឧស្សាហកម្មថ្នាំជក់ទេ ដែលតែងតែអះអាងដោយកុហកថា ខ្លួនគ្មានចំណែកទទួលសខុសត្រូវនៅក្នុងវិបត្តិសុខភាព និងអាកាសធាតុរបស់ពិភពលោកឡើយ។ គំរូសេដ្ឋកិច្ច និងហិរញ្ញវត្ថុ នៃពិភពលោក ត្រូវក្រុមឧស្សាហកម្មនេះ ដាក់សំពាធ បោកបញ្ឆោត កេងប្រវញ្ច ដូចយកកាំបិតមកភ្ជង់នឹងបំពង់ក ឲ្យពិភពលោកបន្តប្រើប្រាស់ថាមពលហ្វូស៊ីលតទៅទៀត។
អ្វីដែលជាការព្រួយបារម្ភធំនាពេលនេះរចនា គឺគេខ្លាចថា កម្មវត្ថុឈានទៅពង្រីកថាមពលបៃតង ដែលស្អាតស្អំ មិនបញ្ចេញឧស្ម័នពុល មិនអាចសម្រេចទៅ បាន។ ដោយសារតែតម្លៃថាមពលឡើងថ្លៃ ក្នុងពេលនេះ រដ្ឋាភិបាលប្រទេសមួយចំនួន ដោយមានការជំរុញ ញុះញង់ពីវិស័យឧស្សាហកម្មថាមពល បានងាកទៅបង្កើនការវិនិយោគ លើវិស័យថាមពលហ្វូស៊ីល បូមប្រេង និងជីកយករ៉ែធ្យូងថ្មជាដើម ដើម្បីបំពេញតម្រូវការភ្លាមៗ។ វាគឺជាដំណោះស្រាយ ដែលសំឡឹងឃើញតែចុងច្រមុះ ហើយធ្វើឲ្យបាត់បងការយកចិត្តទុកដាក់ លើអាទិភាពនៃការអភិវឌ្ឍន៍ថាមពលបៃតង។ លោកអគ្គលេខាធិការអង្គការសហប្រជាជាតិ បានអំពាវនាវថា ក្នុងនាមថ្នាក់ដឹកនាំទាំងអស់គ្នា ដែលជាអ្នកការពារអាយុជីវិត និងអនាគតរបស់ប្រជាពលរដ្ឋ គឺត្រូវតែរួមគ្នា បិទបញ្ចប់សករាជនៃថាមពលហ្វូស៊ីល ឲ្យបាន។ បិទបញ្ចប់សករាជថាមពលហ្វូស៊ីល ហើយធ្វើបដិវត្តថាមពលបៃតងវិញ។
រវាងតថៈភាពលំបាកនៃសេដ្ឋកិច្ចរាល់ថ្ងៃ និងអនាគតនៃភពផែនដីទៅថ្ងៃក្រោយ
កំឡុងពេលនេះ តថៈភាពសេដ្ឋកិច្ចនៅគ្រប់ទីកន្លែង គឺប្រឈមជាមួយតម្លៃថាមពល ប្រេងឥន្ធនៈឡើងថ្លៃខ្លាំង។ តម្លៃថ្លៃខ្លាំងមែន តែតម្រូវការនៅតែមាន ដោយសារតែមិនអាចចៀសបាន។ ដូច្នេះហើយ បានជាក្រុមហ៊ុនឧស្សាហកម្មថាមពលហ្វូស៊ីល យកលេសនេះ ជំរុញឲ្យបន្ថែមការផលិតឲ្យបានច្រើន វិនិយោគបន្ថែមទៀត ដើម្បីយកមកបង្គ្រប់តម្រូវការទីផ្សារ។
រដ្ឋាភិបាលប្រទេសទាំងអស់ ទោះសហរដ្ឋអាមេរិកក៏ដោយ កំពុងតែប្រឈមនឹងជម្រើស ដែលកាន់តែពិបាក ដោយសារតម្លៃប្រេងឥន្ធនៈឡើងថ្លៃ ដែលធ្វើឲ្យប្រជាពលរដ្ឋតវ៉ារិះគន់។ ថាមពលដែលបានមកពី ប្រភពស្អាតស្អំ នៅមិនទាន់ទូលំទូលាយ មិនទាន់គ្រប់គ្រាន់។ ហេតុដូច្នេះហើយ បានជាមានការអំពាវនាវ ឲ្យប្រឹងប្រែងសំរុក វិនិយោគលើវិស័យថាមពលបៃតង ដើម្បីផលិតចរន្តអគ្គីសនី ជំនួសថាមពលហ្វូស៊ីល។ អ្វីៗ វាអាស្រ័យលើភាពក្លាហាន និងការហ៊ានលះបង់ របស់រដ្ឋាភិបាលនីមួយៗ ដោយមានការចូលរួមពីប្រជាពលរដ្ឋផងដែរ។ កម្មវិធីសន្និសីទ COP27 នៅប្រទេសអេហ្ស៊ីប នៅខែវិច្ឆិកាខាងមុខនេះ គឺជាឱកាសដ៏សំខាន់ណាស់ ដើម្បីបង្ហាញថាប្រទេសធំៗទាំងអស់ មានភាពក្កាហានកម្រិតណា ក្នុងការកាត់បន្ថយការបញ្ចេញឧស្ម័នផ្ទះកញ្ចក់។
យ៉ាងណាក៏ដោយ មានដំណឹងវិជ្ជមានមួយចុងក្រោយនៅថ្ងៃទី១៨មិថុនា គឺរដ្ឋាភិបាលចិន បានប្រកាសថា នឹងហាមឃាត់គំរោងវិនិយោគថ្មីៗ ក្នុងវិស័យឧស្សាហកម្មធុនធ្ងន់ នៅតាមតំបន់មួយចំនួន ដើម្បីកាត់បន្ថយការបំពុលបរិស្ថាននិងអាកាសធាតុ។ ថាមពលប្រភេទថ្មី មានដូចជាថាមពល ដើរចំហាយទឹក ប៊ីយូម៉ាស និងថាមពលដើរដោយរស្មីព្រះអាទិត្យជាដើម គឺជាអាទិភាព នៃវិស័យថាមពលរបស់ចិន។ បន្ថែមពីនេះ ចិនបានកំណត់កម្មវត្ថុថាពីនេះដល់ឆ្នាំ២០៣០ ៥០%នៃរថយន្តដែលលក់នៅទីផ្សារចិន គឺត្រូវតែជារថយន្តដែលដើរដោយថាមពលប្រភេទថ្មី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ