រុស្ស៊ី-អ៊ុយក្រែន៖ហេតុអ្វីបានជារុស្ស៊ីទទួលបរាជ័យនៅក្នុងសង្រ្គាមផ្លេកបន្ទោរនៅអ៊ុយក្រែន?
ចុះផ្សាយនៅថ្ងៃ៖
ស្តាប់ - ០៧:០៩
សង្រ្គាមរុស្ស៊ីឈ្លានពានអ៊ុយក្រែនដែលបានចាប់ផ្តើមក្នុងថ្ងៃទី២៤ កុម្ភៈបានឈានចូលដល់ ១០០ថ្ងៃ។ នៅ ១០០ថ្ងៃក្រោយមក សង្រ្គាមដែលរុស្ស៊ីគិតថាជាសង្រ្គាមផ្លេកបន្ទោរបាន និងកំពុងក្លាយជាសង្រ្គាមរ៉ាំរ៉ៃ អូសបន្លាយ។ ក្រៅពីរុស្ស៊ី និងអ៊ុយក្រែនដែលជាតួអង្គផ្ទាល់ សង្រ្គាមនៅលើទឹកដីអឺរ៉ុបមួយនេះបានធ្វើឲ្យសណ្តាប់ធ្នាប់ពិភពលោកក្រឡប់ចាក់ និងច្របូកច្របល់។ ប្រមុខការទូតអាមេរិកលោកអង់តូនី ប៊្លីនកិនបានយល់ឃើញក្នុងថ្ងៃពុធ ទី១ មិថុនាថា សង្រ្គាមរុស្ស៊ីឈ្លានពានអ៊ុយក្រែនអាចនឹងបន្តមានជាច្រើនខែទៀត។
សង្រ្គាមរុស្ស៊ីឈ្លានពានអ៊ុយក្រែនឈានដល់ ១០០ថ្ងៃ។ តាំងពីថ្ងៃដំបូងមកដល់ ១០០ថ្ងៃ ប្រធានាធិបតីរុស្ស៊ីលោកពូទីនមិនដែលប្រើពាក្យ « សង្រ្គាម » ទេដោយបានហៅជា « ប្រតិបត្តិការយោធាពិសេស »។ នៅរុស្ស៊ី អ្នកណាហ៊ានហៅ « ប្រតិបត្តិការយោធាពិសេស » នេះថាជាសង្រ្គាមនឹងត្រូវដេកក្នុងគុករហូតដល់ ១៥ឆ្នាំ។ ហេតុផលនៃការបើកប្រតិបត្តិការយោធាពិសេសនៅអ៊ុយក្រែនក្នុងថ្ងៃទី២៤ កុម្ភៈត្រូវបានលោកពូទីនបញ្ជាក់ថា គឺដើម្បីកំចាត់របបណាហ្ស៊ីសម័យថ្មី។ ពិតណាស់ លោកពូទីនមិនបានប្រាប់ពីរយៈពេលនៃ « ប្រតិបត្តិការយោធាពិសេស » ទេ។ តែលោកធ្លាប់បានគិតថា រុស្ស៊ីប្រើពេលត្រឹមតែ ៤៨ម៉ោងនឹងអាចទម្លាក់រដ្ឋាភិបាលអ៊ុយក្រែនដែលលោកហៅជារបបណាហ្ស៊ីសម័យថ្មីដូចបកចេក។
កម្មវត្ថុ និងផែនការរបស់លោកពូទីន គឺវាយយកអ៊ុយក្រែនទាំងមូល និងបង្កើតរដ្ឋាភិបាលថ្មីមួយដែលចំណុះឲ្យរុស្ស៊ី។ តែការពិតជាក់ស្តែងដែលគ្រប់គ្នាបានឃើញពេលនេះ រដ្ឋាភិបាលក្រុងកៀវមិនមែនជាសាច់ជ្រូក និងជាចេកទុំដូចដែលលោកពូទីនបានគិតឯណា។ នៅ ១០០ថ្ងៃក្រោយមក រដ្ឋាភិបាលក្រុងកៀវមិនរលំ ហើយពលរដ្ឋអ៊ុយក្រែនគ្រប់រូបក៏កំពុងបន្តតស៊ូយ៉ាងស្វិតស្វាញជាទីបំផុតដើម្បីការពារទឹកដីរបស់ខ្លួន។ តែគេក៏មិនត្រូវភ្លេចពីការចូលរួមជួយជ្រោមជ្រែងរបស់ក្រុមប្រទេសលោកខាងលិចទាំងលុយកាក់ និងគ្រឿងសព្វាវុធ។
ការប្តេជ្ញាចិត្តរបស់អ៊ុយក្រែននេះបានធ្វើឲ្យរុស្ស៊ីថយមួយជំហានយ៉ាងវែងទៅក្រោយដោយបានដកកម្លាំងទ័ពចេញពីទីក្រុងធំៗ ដូចជាក្រុងកៀវ និងបានផ្តោតលើការវាយប្រហារនៅតំបន់បែកខាងកើត ពិសេសតំបន់ដុនបាស់។ ដូច្នេះគេអាចនិយាយបានថា លោកពូទីនបានទទួលបរាជ័យនៅក្នុងសង្រ្គាមផ្លេកបន្ទោរ និងកំពុងប្រែក្លាយសង្រ្គាមមួយនេះជាទៅសង្រ្គាមរ៉ាំរ៉ៃ អូសបន្លាយដោយគេមិនដឹងចប់នៅថ្ងៃណាទេ។
រុស្ស៊ីមើលស្រាលអ៊ុយក្រែន និងភ្ញាក់ផ្អើលពីប្រតិកម្មរបស់បស្ចិមលោក
រុស្ស៊ីមើលស្រាលអ៊ុយក្រែនជារឿងពិតមិនអាចប្រកែកបានទេ។ តែអ្នកដែលរុស្ស៊ីបានមើលស្រាលជាងនេះ និងនឹកស្មានមិនដល់ គឺប្រតិកម្មរបស់សហគមន៍អន្តរជាតិ ពិសេសប្រតិកម្មរបស់ក្រុមប្រទេសលោកខាងលោកខាងលិច។ តាំងពីថ្ងៃរុស្ស៊ីផ្តើមសង្រ្គាមឈ្លានពានអ៊ុយក្រែនមកដល់ ១០០ថ្ងៃ បស្ចិមលោកបានឲ្យលុយ និងស្រោចអាវុធលើអ៊ុយក្រែនយ៉ាងច្រើនសម្បើម។ កាយវិការនេះកំពុងបន្តមាន និងបន្តមាន ដរាបណារុស្ស៊ីបន្តសង្រ្គាមលើអ៊ុយក្រែន។ ជាមួយរុស្ស៊ីវិញ បស្ចិមលោកបានស្រោច និងកំពុងបន្តស្រោចទណ្ឌកម្មសេដ្ឋកិច្ចដោយបិទខ្ទប់លើសឹងគ្រប់ច្រកទាំងអស់។ ចុងក្រោយថ្មីៗនេះ សហភាពអឺរ៉ុបបានវាយចំផ្លូវដង្ហើមរបស់លោកពូទីនដោយកាត់បន្ថយការទិញប្រេងរុស្ស៊ីបណ្តើរៗរហូតទៅឈប់ទិញទាំងស្រុងតែម្តង។
ជាងពេលណាៗទាំងអស់ មនុស្សខ្លាំងរុស្ស៊ីលោកពូទីនត្រូវបានបស្ចិមលោកចាត់ទុកជាមនុស្សផ្តាច់ការ ឬឧក្រិដ្ឋជនសង្រ្គាមដែលពិបាករាប់រក មិនគួររាប់រក និងលែងរាប់រកបានទៀតឡើយ។ ក្រៅពីទទួលទណ្ឌកម្មចាស់ដៃ និងអាប់អោនកិត្តិយស សង្រ្គាមអ៊ុយក្រែនមួយនេះក៏កំពុងធ្វើឲ្យលោកពូទីនបាត់បង់ទាហាន និងសព្វាវុធដ៏ច្រើនក្រាស់ក្រែល។ យោងតាមប្រភពបស្ចិមលោក សង្រ្គាម ១០០ថ្ងៃបានធ្វើឲ្យស្លាប់ទាហានរុស្ស៊ីប្រមាណ ១៥ ០០០នាក់ បាត់បង់រថក្រោះចំនួន ១ ៥៥២គ្រឿង រថពាសដែកចំនួន ៤២៨គ្រឿង យន្តហោះចម្បាំងប្រមាណជា ៣០គ្រឿង ឧទ្ធម្ភាគចក្រចំនួន ៤៣គ្រឿង ដ្រូនចំនួន ៧៥គ្រឿង និងបាត់បង់នាវាមុជទឹកចំនួន ៩គ្រឿង។
នៅខាងអ៊ុយក្រែន ការបាត់បង់មានតិចជាងទាំងចំនួនទាហាន និងគ្រឿងសព្វាវុធ។ មានការលើកឡើងថា អ៊ុយក្រែនបានបាត់បង់រថក្រោះចំនួន ១៨៥គ្រឿង រថពាសដែកចំនួន ៩៣គ្រឿង យន្តហោះចម្បាំងចំនួន ២២គ្រឿង ឧទ្ធម្ភាគចក្រចំនួន ១១គ្រឿង និងបាត់បង់នាវាមុជទឹកចំនួន ១៨គ្រឿង។ តែការបាត់បង់នឹងបន្តមានទាំងខាងរុស្ស៊ី និងអ៊ុយក្រែន ព្រោះផ្លូវឆ្ពោះទៅបិទបញ្ចប់សង្រ្គាមទាំងស្រុងហាក់នៅឆ្ងាយនៅឡើយ។
សណ្តាប់ធ្នាប់ពិភពលោកក្រឡាប់ចាក់ និងវិលវល់ដោយសង្រ្គាមអ៊ុយក្រែន
តាំងពីក្រោយការបិទបញ្ចប់សង្រ្គាមលោកលើកទី២ មក នេះជាលើកទី១ ដែលទឹកដីអឺរ៉ុបបានស្គាល់សង្រ្គាមទ្រង់ទ្រាយធំបែបនេះ។ ពិតណាស់ សង្រ្គាមនេះពាក់ព័ន្ធផ្ទាល់រវាងរុស្ស៊ី និងអ៊ុយក្រែន តែបស្ចិមលោកក៏បានចូលរួមធ្វើសង្រ្គាមមួយនេះដោយប្រយោលដើម្បីប្រឆាំងនឹងរុស្ស៊ីតាមរយៈការជួយផ្តល់លុយកាក់ និងអាវុធយ៉ាងច្រើនសម្បើមឲ្យអ៊ុយក្រែន។ វាមិនមែន ឬនៅមិនទាន់ជាសង្រ្គាមលោកលើកទី៣ ក៏ពិតមែន តែវាជារូបភាពនៃសង្រ្គាមលោកលើកទី៣ ដែលគ្មានអ្នកណាអាចនិយាយផ្ទុយពីនេះបានឡើយ។ តាមរយៈសង្រ្គាមឈ្លានពានអ៊ុយក្រែន លោកពូទីនប្រហែលបន្តទទួលបានប្រជាប្រិយភាពធំធេងនៅរុស្ស៊ី។
តែនៅលើឆាកអន្តរជាតិ សង្រ្គាមមួយនេះហាក់កំពុងពុះចែកពិភពលោកជាបីប្លុកធំ ប្លុកទី១ ក្រុមប្រទេសដែលគាំទ្ររុស្ស៊ីផ្កាប់មុខ ប្លុកទី២ ក្រុមប្រទេសឈរនៅកណ្តាល និងប្លុកទី៣ ក្រុមប្រទេសដែលប្រឆាំងរុស្ស៊ីដែលភាគច្រើនជាក្រុមប្រទេសលោកខាងលិច។ អ្វីដែលច្បាស់ សង្រ្គាមរុស្ស៊ីឈ្លានពានអ៊ុយក្រែនកំពុងធ្វើឲ្យសណ្តាប់ធ្នាប់ពិភពលោកក្រឡាប់ចាក់ និងច្របូកច្របល់។ អ្វីដែលរឹតតែច្បាស់ សង្រ្គាមមួយនេះកំពុងទាញប្លុបប្រជាធិបតេយ្យ និងប្លុកផ្តាច់ការឲ្យប្រឈមមុខដាក់គ្នា។ តែផលវិបាកធំជាងគេសម្រាប់ពិភពលោកពីសង្រ្គាមមួយនេះ គឺភាពរអាក់រអួលនៅក្នុងវិស័យពាណិជ្ជកម្មអន្តរជាតិដែលប៉ះពាល់ដល់កំណើនសេដ្ឋកិច្ច វិស័យស្បៀង និងថាមពល រួមសង្វាក់ផ្គត់ផ្គង់។
ចង់ ឬមិនចង់ សង្រ្គាមមួយនេះនឹងរុញសេដ្ឋកិច្ចពិភពលោកដែលកំពុងយ៉ាប់យឺន និងផុយស្រួយស្រាប់ដោយវិបត្តិកូវី១៩ ឲ្យធ្លាក់កាន់តែជ្រៅថែមទៀត។ វិបត្តិខ្វះស្បៀងជាក្តីកង្វល់ខ្លាំងជាងគេរបស់អង្គការសហប្រជាជាតិនាពេលសព្វថ្ងៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ