ចិនមានះ អនុវត្តគោលនយោបាយ « កូវីដសូន្យ » បើទោះបីជាសេដ្ឋកិច្ចជួបបញ្ហារាំងស្ទះខ្លាំងក៏ដោយ
ចុះផ្សាយនៅថ្ងៃ៖
ស្តាប់ - ០៧:៤៥
អស់រយៈពេលជាងមួយខែមកហើយ ដែលទីក្រុងសៀងហៃ បេះដូងសេដ្ឋកិច្ចរបស់ចិន ត្រូវបានរាំងខ្ទប់ទាំងស្រុង យ៉ាងតឹងតែងបំផុត ដើម្បីបង្អាក់ការឆ្លងរាលដាល ជម្ងឺកូវីដ១៩។ នៅរដ្ឋធានីប៉េកាំងឯនោះវិញ អាជ្ញាធរចិនបានបន្ថែមវិធានការរិតបន្តឹងកាន់តែខ្លាំងផងដែរ ខណៈដែលទីក្រុងមួយចំនួនទៀត ត្រូវបានបិទមួយផ្នែក ឬទាំងស្រុង។ កម្មវិធីប្រកួតកីឡា អាស៊ីហ្គេម ដែលគេគ្រោងធ្វើនៅប្រទេសចិន នៅខែកញ្ញាខាងមុខ ក៏ត្រូវបានគេសម្រេចលើកពេលដែរ។ វិធានការបិទខ្ទប់យ៉ាងតឹងតែងនេះ នៅតែត្រូវបានរដ្ឋាភិបាលចិន មានះអនុវត្តវា បើទោះបីជាមានមតិកាន់តែច្រើន បានលើកឡើងថា វាកំពុងតែបង្កការប៉ះពាល់ខ្លាំងសម្បើមណាស់ ទៅលើសេដ្ឋកិច្ចរបស់ចិន។
វិធានការ « កូវីដសូន្យ » របស់ចិន កំពុងតែប៉ះពាល់ខ្លាំងណាស់ មកលើដង្ហើមសេដ្ឋកិច្ចចិន។ ទីណាមានអ្នកឆ្លងកូវីដ ត្រឹមតែ ១ ឬ ២ករណី គឺអាជ្ញាធរចិន បិទខ្ទប់យ៉ាងតឹងតែង តាមសង្កាត់ ឬទីក្រុងទាំងស្រុងតែម្តង។ ជាក់ស្តែង នៅក្រុងសៀងហៃ ដែលត្រូវបិទខ្ទប់ទាំងស្រុង អស់ជាង១ខែមកហើយ។ ប្រជាជននៅសៀងហៃ ទាំង២៥លាននាក់ គ្មានពន្លឺថានឹងអាចចេញដើរហើរវិញ ដូចធម្មតាក្នុងពេលឆាប់ៗនេះទេ ព្រោះថាធ្វើតេស្តរាល់ថ្ងៃ មានអ្នកឆ្លងថ្មីជាប់ជាប្រចាំ។
នៅប៉េកាំង ក៏កំពុងតែភ័យណាស់ដែរ ខ្លាចថានឹងត្រូវបិទទាំងស្រុងដូចនៅសៀងហៃ។ សន្ទុះឆ្លងរាលដាលមិនស្រាកស្រាន អាជ្ញាធរចិននៅប៉េកាំង បានចេញបញ្ជាបិទស្ថានីយ៍រថភ្លើងក្រោមដីមួយចំនួននៅប៉េកាំង នឹងបិទហាងទំនិញ ភោជនីយដ្ឋានមួយចំនួនទៀតផង។ នេះនៅមិនរាប់ ទីក្រុងតូចៗមួយចំនួនទៀត ដែលត្រូវបិទខ្ទប់ មួយផ្នែក ឬទាំងស្រុងដែរ។
អ្នកជំនាញសេដ្ឋកិច្ចជាច្រើន បានរំពឹងថា ការព្យាករណ៍កំណើនសេដ្ឋកិច្ចចិន ប្រាកដជាធ្លាក់ចុះខ្លាំង ក្នុងឆ្នាំ២០២២នេះ។ ចិនបានកំណត់កម្មវត្ថុសម្រេចកំណើនសេដ្ឋកិច្ចចំនួន ៥.៥%។ ក៏ប៉ុន្តែ អ្នកជំនាញបានបារម្ភថា ចិនប្រហែលមិនអាចសម្រេចកម្មវត្ថុនេះទេ បើមើលស្ថានការណ៍បច្ចុប្បន្ន ដែលសេដ្ឋកិច្ចចិនរាំងស្ទះខ្លាំងណាស់។ អ្នកជំនាញនៅធនាគារ Nomura សង្ស័យថា វិធានការបិទខ្ទប់ទាំងស្រុងរបស់ចិននេះ អាចនឹងទាញទំលាក់កំណើនសេដ្ឋកិច្ចចិន ប្រហែលដល់ ២.៣ពិន្ទុ។
ឧបសគ្គប្រចាំថ្ងៃដ៏ធ្ងន់ ដោយសារតែវិធានការសុខាភិបាលតឹងតែង
ការធ្វើដំណើរជាទូទៅរបស់ប្រជាជន ព្រមទាំងការដឹកជញ្ជូនទំនិញគ្រប់សព្វបែបយ៉ាង គឺជួបការលំបាកខ្លាំងណាស់។ បើគ្មានមូលហេតុចាំបាច់បំផុត គឺចេញដើរហើរទៅណាមិនបានទេ។ ហាងទំនិញ ហាងម្ហូបអាហារបិទទ្វារ ពាណិជ្ជកម្មគ្មានដំណើរការ គ្មានចរន្តសេដ្ឋកិច្ច។ មួយវិញទៀត ដោយសារតែបញ្ហាដឹកជញ្ជូននេះ រោងចក្រ គ្មានសម្ភារៈ គ្មានវត្ថុធាតុដើមផលិត បើផលិតបានហើយក៏ពិបាកដឹកចែកចាយ មិនថានៅក្នុងស្រុក ឬនាំចេញទៅក្រៅប្រទេស។ វិស័យដឹកជញ្ជូនផ្គត់ផ្គង់ទំនិញរបស់ចិននាពេលនេះ កំពុងជួបបញ្ហាកកស្ទះ យឺតយ៉ាវខ្លាំងណាស់។ បន្ថែមពីនេះទៀត គឺបញ្ហាខ្វះបុគ្គលិកធ្វើការ ព្រោះថា ឲ្យតែមានឆ្លងកូវីដ ឬជាករណីប៉ះពាល់ផ្ទាល់ឬប្រយោលជាមួយអ្នកវិជ្ជមាន គឺនគរបាលនឹងមកយកដល់ផ្ទះ យកទៅទុកនៅកន្លែងធ្វើចត្តាឡីស័ក។
វិធានការបិទខ្ទប់ដ៏តឹងតែង នឹងយូរពេលទាំងនេះ ក៏កំពុងតែធ្វើឲ្យក្រុមហ៊ុនអន្តរជាតិធំៗ ពិបាកទ្រាំនឹងការលំបាកដែរ។ បញ្ហាទីមួយ គឺបុគ្គលិកបរទេស ដែលភាគច្រើននៅសៀងហៃ នៅប៉េកាំង ត្រូវសំងំក្នុងផ្ទះរហូត មិនអាចទៅណាបាន។ ចង់ចេញទៅណាមកណាឆ្ងាយៗ ត្រូវមានលទ្ធផលតេស្ត PCR យ៉ាងហូរបំផុត៤៨ម៉ោង។ បញ្ហាមួយទៀត គឺក្រុមហ៊ុនមិនអាចព្យាករណ៍អ្វីបាន ពោលគឺងងឹតសូន្យតែម្តង មិនដឹងថាពេលណាខែណា អ្វីៗនឹងវិលមកភាពប្រក្រតី សកម្មភាពជំនួញ ពាណិជ្ជកម្មអាចត្រលប់មកដូចដើមវិញទេ។
យោងតាមការសិក្សាធ្វើឡើងដោយ ការិយាល័យ ខុនសាល់ធីង Roland Berger កាលពីចុងខែមេសា គឺថាក្នុងចំណោមសាខាក្រុមហ៊ុនបរទេសចំនួន ៣៧២ ដែលមានវត្តមាននៅចិន គឺ៦០%បានព្យាករ ទំលាក់ប្រាក់ចំណូលក្នុងឆ្នាំ២០២២។ គេមិនដឹងថាតើថ្ងៃស្អែក នឹងមានបុគ្គលិកធ្វើការគ្រប់ឬអត់ នឹងមានទំនិញវត្ថុធាតុដើមគ្រប់គ្រាន់ ដើម្បីផលិតទៅតាមការបញ្ជាទិញឬអត់។ ទាំងអស់នេះ គឺជាការលំបាកប្រចាំថ្ងៃ សម្រាប់ក្រុមហ៊ុនសហគ្រាស ដែលធ្វើឲ្យបរិយាកាសធ្វើជំនួញនៅចិននាពេលនេះ គឺថាវាតានតឹងខ្លាំងណាស់។
គឺដោយហេតុនេះហើយ បានជាសភាពាណិជ្ជកម្មអឺរ៉ុបប្រចាំនៅប្រទេសចិន បានផ្ញើលិខិតមួយទៅកាន់រដ្ឋាភិបាលចិន កាលពីថ្ងៃទី៥ឧសភា ថ្មីៗនេះ សូមឲ្យរដ្ឋាភិបាលចិន ពិចារណាឡើងវិញ រឿងគោលនយោបាយកូវីដសូន្យ ដ៏តឹងតែងនេះ។ សភាពាណិជ្ជកម្មអឺរ៉ុប បានលើកជាអនុសាសន៍ ឲ្យរដ្ឋាភិបាលចិន ងាកទៅ ពង្រឹងការចាក់វ៉ាក់សាំងបង្កា ទៅលើមនុស្សចាស់ និងអ្នកងាយរកគ្រោះវិញ ចៀសវៀងកុំបិទខ្ទប់ទាំងស្រុងបែបនេះ។
លោកស៊ី ជីនពីង ប្តេជ្ញាបន្តអនុវត្តគោលនយោបាយ "កូវីដសូន្យ"
យោងតាមការចុះផ្សាយរបស់បណ្តាញព័ត៌មានចិន ស៊ីនហ័រ លោកស៊ី ជីនពីង បានថ្លែងកាលពីថ្ងៃព្រហស្បតិ៍ថា ត្រូវតែបន្តអនុវត្ត គោលនយោបាយកូវីដសូន្យ នេះតទៅទៀត ដោយគ្មាននរណាអាចមកបង្អាក់ ឬមកស្តីបន្ទោសបានទេ។ លោកប្រធានាធិបតីចិនបបានបន្ថែមទៀតថា រដ្ឋាភិបាលចិន នឹងប្រយុទ្ធដោយអង្គអាច ចំពោះមតិរិះគន់ ស្តីបន្ទោស ទាំងឡាយណា ដែលចោទមកលើគោលនយោបាយកូវីដសូន្យនេះ។
បើតាមការវិភាគ គោលជំហរ រឹងមានះ របស់លោកប្រធានាធិបតីចិននេះ គឺមានលក្ខណៈនយោបាយច្រើន។ រដ្ឋាភិបាលចិនបានអួតថា តាំងពីផ្ទុះកូវីដដំបូង រហូតដល់ឥឡូវ គឺមានអ្នកស្លាប់ លើស៥០០០នាក់បន្តិចបន្តួចប៉ុណ្ណោះ។ នេះគឺដោយសារតែការអនុវត្តដ៏មានប្រសិទ្ធភាពនៃគោលនយោបាយដ៏តឹងតែង។ គណបក្សកុម្មុយនីស្តចិន ចង់យកគោលនយោបាយនេះ ជានិម្មិតរូបនៃជោគជ័យ នៃរបបនយោបាយខ្លួន ដែលអាចការពារអាយុជីវិតប្រជាជនចិន មិនធ្វើដូចប្រទេសលោកខាងលិចផ្សេងៗ ដែលមិនបិទរិតត្បឹតខ្លាំង ហើយធ្វើឲ្យមានអ្នកស្លាប់ដោយកូវីដ រាប់ម៉ឺន រាប់សែននាក់។
លើកពេលរៀបចំការប្រកួត កីឡា អាស៊ីហ្គេម
ទូរទស្សន៍ CCTV បានផ្សាយតាមរយៈទំព័រ Weibo នៅព្រឹកថ្ងៃសុក្រនេះថា ក្រុមប្រឹក្សាកីឡាអូឡាំពិប្រចាំតំបន់អាស៊ី បានប្រកាសលប់ចោលការប្រកួតកីឡាអាស៊ីហ្គេម នៅប្រទេសចិន ចាប់ពីថ្ងៃទី ១០ ទៅដល់ ២៥កញ្ញា។ កាលបរិច្ឆេទថ្មី នឹងត្រូវគេជូនដំណឹងនៅពេលក្រោយ។ ទូរទស្សន៍ CCTV ក៏មិនបានបញ្ជាក់ពីហេតុផល នៃការលើកពេលប្រកួតនេះដែរ។
រដ្ឋាភិបាលចិន មិនបានប្រាប់ហេតុផលមែន តែវាប្រាកដណាស់ហើយ ដែលថាការលើកពេលរៀបចំការប្រកួតកីឡា អាស៊ីហ្គេមនេះ គឺវាមានហេតុផលពាក់ព័ន្ធជាមួយកូវីដនេះឯង។ ធម្មតាកម្មវិធីប្រកួតនេះ នឹងត្រូវធ្វើនៅទីក្រុង ហាំងចូវ ស្ថិតនៅចំងាយប្រមាណតែ២០០គីឡូម៉ែត្រ ពីទីក្រុងសៀងហៃប៉ុណ្ណោះ។ អ្នករៀបចំកម្មវិធី បានគ្រោងរៀបចំដាក់វិធានការសុខាភិបាលតឹងតែង ដោយយកគំរូតាមអ្វីដែលគេបានធ្វើ ក្នុងពេលប្រកួតកីឡាអូឡាំពិករដូវរងា នៅប៉េកាំង កាលពីដើមឆ្នាំនេះ។ ក៏ប៉ុន្តែ តាមការវិភាគ គឺកាលៈទេសៈពេលនេះ មិនដូចពេលប្រកួតកីឡាអូឡាំពិកនៅប៉េកាំាងទេ។ កាលនោះ កូវីដមិនទាន់ឆ្លងខ្លាំងទេ ខុសពីពេលនេះ។ ហេតុដូច្នេះហើយ បានជារដ្ឋាភិបាលចិន បានសម្រេច មិនប្រថុយឲ្យមានគណប្រតិភូកីឡាបរទេសរាប់ម៉ឺននាក់មក ហើយមានមនុស្សពពាក់ពពូនចូលរួមមើលការប្រកួតឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ