ប្រឈមនឹងការរិះគន់ថាមិនថ្កោលទោសរុស្ស៊ី លោកនាយករដ្ឋមន្ត្រីឥណ្ឌា មកទស្សនកិច្ចនៅអឺរ៉ុប
ចុះផ្សាយនៅថ្ងៃ៖
ស្តាប់ - ០៧:១១
លោកនាយករដ្ឋមន្ត្រីឥណ្ឌា ណារិន្ទ្រ ម៉ូឌី នឹងធ្វើដំណើរទៅទស្សនកិច្ចនៅអឺរ៉ុប ចាប់ពីថ្ងៃចន្ទ ទី២ឧសភា។ ជាទស្សនកិច្ច ដែលគេរំពឹងថា សំណុំរឿងសង្គ្រាមនៅអ៊ុយក្រែន គឺជាបញ្ហាស្នូលដែលបណ្តាប្រទេសអឺរ៉ុប នឹងលើកយកទៅនិយាយជាមួយលោកនាយករដ្ឋមន្ត្រីឥណ្ឌា។ ដូចយើងបានដឹងមកហើយ ថាឥណ្ឌាមិនបានប្រកាសថ្កោលទោសរុស្ស៊ី ចំពោះអំពើឈ្លានពានលើអ៊ុយក្រែន និងបានបោះឆ្នោតអនុប្បវាទនៅអង្គការសហប្រជាជាតិ ថែមទៀត។ ជាងនេះទៀត មិនត្រឹមតែមិនបានចូលរួមក្នុងទណ្ឌកម្មសេដ្ឋកិច្ច របស់សហគមអន្តរជាតិ ដែលដាក់ទៅលើរុស្ស៊ី ឥណ្ឌាបែរជាបានបង្កើតការទិញទំនិញប្រេងរបស់រុស្ស៊ី ផងដែរ។
សំណុំរឿងសង្គ្រាមនៅអ៊ុយក្រែន ជាបញ្ហាធំ
លោកនាយករដ្ឋមន្ត្រីឥណ្ឌា នឹងមកធ្វើទស្សនកិច្ចនៅអឺរ៉ុប ដោយចាប់ផ្តើមពីថ្ងៃចន្ទទី២ឧសភា ជាមួយនឹងដំណើរទៅដល់ទីក្រុងប៊ែរឡាំង បន្ទាប់មកទៀត ទៅទីក្រុងកូប៉េនហាហ្ក ប្រទេសដាណឺម៉ាក ដើម្បីចូលរួមប្រជុំក្នុងជំនួបកំពូល ឥណ្ឌា-អឺរ៉ុបខាងជើង មុននឹងបញ្ចប់ដំណើរនៅទីក្រុងប៉ារីស ដែលលោកណារិន្រ្ទ ម៉ូឌី នឹងជួបលោក ម៉ាក្រុងនៅថ្ងៃទី៤ឧសភា។
មុនពេលចេញដំណើរឡើងយន្តហោះ លោក ណារិន្ទ្រ ម៉ូឌី បានថ្លែងថា ទស្សនកិច្ចរបស់លោកនៅអឺរ៉ុប នាពេលនេះ គឺវាស្ថិតក្នុងបរិបទមួយ ដែល អឺរ៉ុបកំពុងតែប្រឈម នឹងបញ្ហាជាច្រើនដែលត្រូវតែដោះស្រាយនិងជំនះឲ្យបាន។ លោកបានបន្ថែមថា អ្វីដែលជាកម្មវត្ថុធំនៃទស្សនកិច្ចលោក គឺការរឹតចំណង ការពង្រឹង ស្មារតីសហប្រតិបត្តិការជាមួយគ្នា រវាងឥណ្ឌា និងក្រុមប្រទេសអឺរ៉ុប ព្រោះអឺរ៉ុបគឺជាមិត្តជាគូកន ដ៏សំខាន់នៅក្នុងការប្រឹងប្រែងរបស់ឥណ្ឌា ដើម្បីសន្តិភាព និងភាពរីកចម្រើនថ្កុំថ្កើន។
ដូច្នេះ តាមការរំពឹងទុក ក្រៅពីបញ្ហាសេដ្ឋកិច្ច ពាណិជ្ជកម្ម គឺបញ្ហាសង្គ្រាមនៅអ៊ុយក្រែន នឹងស្ថិតនៅជាប់ជានិច្ច ក្នុងការជជែកគ្នា រវាងលោកនាយករដ្ឋមន្ត្រីឥណ្ឌា ជាមួយថ្នាក់ដឹកនាំប្រទេសអឺរ៉ុប។ ថ្ងៃចន្ទនេះ លោក ម៉ូឌី នឹងទៅដល់ទីក្រុងប៊ែរឡាំង ដើម្បីជួបជាមួយលោក អូឡាហ្វ ស្ហុលស៍ ប្រមុខរដ្ឋាភិបាលអាល្លឺម៉ង់។ កាសែត Indian Express ចេញផ្សាយនៅថ្ងៃចន្ទនេះ ក៏បានចុះផ្សាយដែរ ថា លោក អូឡាហ្វ ស្ហុលស៍ បានបញ្ជាក់ថា សង្គ្រាមឈ្លានពានដែលរុស្ស៊ីកំពុងធ្វើនៅអ៊ុយក្រែន គឺជាសំណុំរឿងធំបំផុត ដែលលោកនឹងលើកមកជជែកជាមួយលោកណារិន្ទ្រ ម៉ូឌី។
ស្មាមួយអំរែក២
គួរបញ្ជាក់ថា ឥណ្ឌាកំពុងស្ថិតនៅ ក្នុងកាលៈទេសៈមួយ លំបាក ចន្លោះរវាងរុស្ស៊ី ដែលជាមិត្តដ៏សំខាន់ និង ក្រុមប្រទេសលោកខាងលិច មានអាមេរិក មានអឺរ៉ុបជាដើម ដែលក៏គឺជាសម្ព័ន្ធមិត្ត សេដ្ឋកិច្ច និងយុទ្ធសាស្ត្រ សម្រាប់ឥណ្ឌា។ ឥណ្ឌា បានបដិសេធ មិនប្រកាសថ្កោលទោសរុស្ស៊ីទេ ហើយក៏បានបោះឆ្នោតអនុប្បវាទ មិនគាំទ្រសេចក្តីសម្រេចចិត្តរបស់អង្គការសហប្រជាជាតិ ដែលថ្កោលទោសរុស្ស៊ីថែមទៀត។ តាមពិតវាជាគោលជំហរ ដែលឥណ្ឌាតែងតែព្យាយាមប្រកាន់ខ្ជាប់ ក្នុងនាមជាប្រទេសមិនចូលបក្សសម្ព័ន្ធ។ ចលនាមិនចូលបក្សសម្ព័ន្ធនេះ គឺមានតាំងតែពីជំនាន់សង្គ្រាមត្រជាក់ រវាងអាមេរិក និងសហភាពសូវៀត ហើយដែលឥណ្ឌាគឺជាអ្នកដឹកនាំ ផ្តួចផ្តើមគំនិត។
ចំណោទមួយទៀត សម្រាប់ឥណ្ឌា គឺថារុស្ស៊ី ជាអ្នកផ្គត់ផ្គង់អាវុធដ៏សំខាន់ណាស់ សម្រាប់ខ្លួន។ ប៉ុន្មានឆ្នាំចុងក្រោយនេះ ថ្វីបើឥណ្ឌាបានព្យាយាម ងាកទៅទិញគ្រឿងសព្វាវុធ ពីអ្នកផ្សេង មានដូចជាបារាំង អ៊ីស្រាអែល និងអាមេរិកក៏ដោយ តែឥណ្ឌានៅតែរំពឹងខ្លាំង ទៅលើគ្រឿងសព្វាវុធរុស្ស៊ី។ យោងតាមតួលេខរបស់អង្គការ Stimson ៨៥% នៃគ្រឿងសព្វាវុធ ដែលឥណ្ឌាមានរាល់ថ្ងៃនេះ គឺបានមកពីអតីតសហភាពសូវៀត និងពីរុស្ស៊ី។ មូលហេតុចម្បងមួយ ដែលធ្វើឲ្យឥណ្ឌា នៅតែបន្តទិញសម្ភារៈយោធារុស្ស៊ី គឺតម្លៃ។ លោក Michael Kugelman អ្នកជំនាញផ្នែកអាស៊ីខាងត្បូង នៅ Wilson Center បានលើកឧទាហរណ៍មួយ ស្តីពីប្រព័ន្ធខែលម៊ីស៊ីល S400 ដែលឥណ្ឌាទិញពីរុស្ស៊ី គឺក្នុងតម្លៃថោកខ្លាំងណាស់ គ្មានអ្នកលក់ណាផ្សេង អាចលក់ក្នុងតម្លៃនេះបានទេ។
ទាក់ទិននឹងតម្លៃថោកនេះដែរ យើងបានឃើញហើយ កាលពីដើមខែមីនា នៅពេលរុស្ស៊ីចាប់ផ្តើមរងទណ្ឌកម្មសេដ្ឋកិច្ចពីក្រុមប្រទេសលោកខាងលិច ពិបាកលក់ប្រេង ឥណ្ឌាបានទិញប្រេងរុស្ស៊ីចំនួន៥លានធុងបារីលភ្លាម ក្នុងតម្លៃដែលរុស្ស៊ីលក់ឡៃឡុង។ ត្រង់ចំណុចនេះ លោក Michael Kugelman បានលើកឡើងថា ថាមពិតរឿងគោលជំហរមិនចូលបក្សសម្ព័ន្ធ ដែលឥណ្ឌាតែងតែអះអាងនោះ វាគ្មានន័យអ្វីទេ ព្រោះធាតុពិតឥណ្ឌាស្វែងរកតែប្រយោជន៍តែប៉ុណ្ណោះ ត្រង់ណាចំណេញគឺទៅត្រង់នោះហើយ ដោយមិនខ្វល់ពីគោលការណ៍ មនសិកា ឧត្តមគតិអ្វីទេ។
ពន្យល់អឺរ៉ុប ឲ្យយល់ពីគោលជំហររបស់ឥណ្ឌា
លោក Vinay Kwatra រដ្ឋលេខាធិការក្រសួងការបរទេសឥណ្ឌា បានប្រាប់អ្នកកាសែត នៅព្រឹកថ្ងៃចន្ទនេះថា លោកនាយករដ្ឋមន្ត្រីឥណ្ឌា ទៅជួបថ្នាក់ដឹកនាំប្រទេសអឺរ៉ុបនាពេលនេះ គឺដើម្បីជជែក ព្រមទាំងពន្យល់ពីគោលជំហររបស់ឥណ្ឌា ទាក់ទិននឹងសំណុំរឿងអ៊ុយក្រែន។ ដូច្នេះវាមានន័យថា លោក ណារិន្ទ្រ ម៉ូឌី ដឹងថាគោលជំហររបស់ខ្លួន ដែលនៅតែរាប់អានស្និទ្ធស្នាលជាមួយរុស្ស៊ី គឺវាកំពុងតែធ្វើឲ្យគេមិនសប្បាយចិត្ត។
ចំណុចសំខាន់មួយទៀតដែរ ដែលឥណ្ឌាមិនអាចប្រហែសបាន គឺទំនាក់ទំនងខ្លួនជាមួយអាមេរិក។ ចូរកុំភ្លេចថា អ្វីដែលឥណ្ឌាបារម្ភបំផុត គឺចិន។ ពុំនោះ មិនមែនឥណ្ឌា សុខចិត្តព្រមចូលរួមជាមួយអាមេរិក នៅក្នុងសម្ព័ន្ធចតុភាគី ក្នុងតំបន់ឥណ្ឌូប៉ាស៊ីហ្វិក ជាមួយអូស្ត្រាលី និងជប៉ុនទេ។ ចង់មិនចង់ ឥណ្ឌាបានក្បត់ គោលការណ៍មិនចូលបក្សសម្ព័ន្ធ ដែលខ្លួនតែងតែអះអាងរួចទៅហើយ ដោយសារតែចង់ទប់ឥទ្ធិពលវាទទីរបស់ចិន។
នៅក្នុងវិបត្តិសង្គ្រាមនៅអ៊ុយក្រែននេះ វាបានរំលេចឲ្យឃើញនូវបញ្ហាប្រឈម២ សម្រាប់ឥណ្ឌា គឺទីមួយ ចិន និងរុស្ស៊ី អាចកាន់តែកៀកកើយគ្នា រួមកម្លាំងគ្នាខ្លាំង ដើម្បីប្រឆាំងអាមេរិក ហើយអាចអូសទាញប៉ាគីស្ថាន អាហ្វហ្កានីស្ថាន ទៅជាមួយផង ដែលធ្វើឲ្យឥណ្ឌាបារម្ភខ្លាំង។ ហើយទី២ គឺថាបើឥណ្ឌានៅតែប្រឹងតោងរុស្ស៊ីពេក ក៏វាអាចធ្វើឲ្យអាមេរិក អន់ចិត្ត ធ្វើឲ្យខាតប្រយោជន៍ឥណ្ឌា ដែលត្រូវការអាមេរិកជួយ ក្នុងយុទ្ធសាស្ត្រទប់ទល់ជាមួយចិនដែរ។
ឥណ្ឌា អាចធ្វើជាអាជ្ញាកណ្តាលសម្របសម្រួល?
គួរកត់សំគាល់ដែរ ថាឥណ្ឌាក៏អាចឆក់យកឱកាស ដែលខ្លួនស្និទ្ធស្នាលទាំងសងខាង ហើយស្នើខ្លួនធ្វើជាអាជ្ញាកណ្ដាល រវាងរុស្ស៊ី និងសម្ព័ន្ធមិត្តលោកខាងលិច ដើម្បីដោះស្រាយវិបត្តិនៅអ៊ុយក្រែន។ លោក Michael Kugelman បានពន្យល់ថា ឥណ្ឌាស្ថិតនៅក្នុងឋានៈមួយ ដែលស្និទ្ធជាមួយរុស្ស៊ីខ្លាំង ជាងប្រទេសដ៏ទៃទៀត ដែលកំពុងតែព្យាយាមធ្វើជាអាជ្ញាកណ្តាលបញ្ចុះបញ្ចូលរុស្ស៊ី ដែលមានដូចជា បារាំង តួកគី និងអ៊ីស្រាអែល ជាដើម។ ដូច្នេះ ឥណ្ឌា គួរឆក់យកចំណុចមានប្រៀបនេះ ដើម្បីស្តារទំនុកចិត្ត និងទំនាក់ទំនង ជាមួយសម្ព័ន្ធមិត្តលោកខាងលិចវិញ។
មួយវិញទៀត ឥណ្ឌាកន្លងមក តែងតែមិនសូវសប្បាយចិត្តទេ ដែលគេមិនសូវផ្តល់តម្លៃឲ្យខ្លួន ក្នុងនាមជាមហាអំណាចម្នាក់នឹងគេដែរ។ បើឥណ្ឌា អាចជួយចូលរួមដោះស្រាយកិច្ចការធំរបស់ពិភពលោក ជាក់ស្តែងបញ្ហាវិបត្តិសង្គ្រាមនៅអ៊ុយក្រែន ដែលរុស្ស៊ី និងក្រុមប្រទេសលោកខាងលិច កំពុងតែប្រឈមមុខដាក់គ្នានេះ វាគឺអាចជាមុខមាត់ និងជាជោគជ័យធំសម្បើមណាស់ សម្រាប់ឥណ្ឌា ក៏ដូចជាសម្រាប់លោកណារិន្ទ្រ ម៉ូឌី ផ្ទាល់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ