កំណើនសេដ្ឋកិច្ចចិននៅមាំល្អ ក្នុងត្រីមាសទី១ដើមឆ្នាំ តែអាចគ្រោះថ្នាក់ដោយសារតែកូវីដ
ចុះផ្សាយនៅថ្ងៃ៖
ស្តាប់ - ០៧:០៦
នៅត្រីមាសទី១ដើមឆ្នាំ២០២២នេះ កំណើនសេដ្ឋកិច្ចចិន មានសន្ទុះប្រមាណ ៤,៨% ។ នេះបើផ្អែកតាមតួលេខផ្លូវការ ផ្សាយដោយការិយាល័យស្ថិតិជាតិចិន។ គួរបញ្ជាក់ថា តួលេខនៃកំណើនសេដ្ឋកិច្ចចិន តែងតែត្រូវពិភពលោក តាមដានយ៉ាងម៉ដ្ឋចត់ជាប្រចាំ ព្រោះថាសេដ្ឋកិច្ចចិន មានទម្ងន់ខ្លាំងណាស់ មកលើសេដ្ឋកិច្ចសកលលោក។ បើនៅ៣ខែដើមឆ្នាំនេះ ទោះជាសេដ្ឋកិច្ចចិនមានកំណើន តែវាជាកំណើនមួយ ដែលមានកម្រិតទាប បើប្រៀបធៀបទៅឆ្នាំមុនៗ។ ជាងនេះទៀត ប្រមាណមួយខែមកនេះ វិធានការបិទខ្ទប់ដ៏តឹងតែង នៅតាមទីក្រុងធំៗនានា ដើម្បីទប់ស្កាត់ការឆ្លងរាលដាលកូវីដ បានធ្វើឲ្យរាំងស្ទះខ្លាំងណាស់ ដល់សេដ្ឋកិច្ចចិន។ មានឧបសគ្គជាច្រើន ដែលសេដ្ឋកិច្ចចិនត្រូវឆ្លងកាត់ នៅក្នុងត្រីមាសខាងមុខ។
កំណើន ៤,៨% ក្នុងត្រីមាសទី១
ការិយាល័យស្ថិតិជាតិចិន បានចេញផ្សាយតួលេខនៅព្រឹកថ្ងៃចន្ទនេះ ថាចំណូលដុលក្នុងស្រុករបស់ចិន បានកើនឡើង ចំនួន ៤,៨% នៅត្រីមាសទី១ ដើមឆ្នាំនេះ បើប្រៀបធៀបទៅក្នុងរយៈពេល១ឆ្នាំ។ នេះ ជាតួលេខផ្លូវការរបស់រដ្ឋាភិបាលចិន ។ ដោយឡែក បើតាមអ្នកជំនាញឯករាជ្យ ដែលទីភ្នាក់ងារព័ត៌មានបារាំង បានសាកសួរ គឺសេដ្ឋកិច្ចមានកំណើន ប្រមាណ ៤,៣% ក្នុងរយៈពេល៣ខែដើមឆ្នាំនេះ។
យោងតាមតួលេខផ្លូវការ តួលេខកំណើនសេដ្ឋកិច្ចពីត្រីមាសមួយ ទីត្រីមាសមួយទៀត គឺថាមានការថយចុះបន្តិច។ បើប្រៀបធៀបទៅត្រីមាសទី៤ ចុងឆ្នាំ២០២១ សេដ្ឋកិច្ចចិនមានកំណើន ប្រមាណ១,៣% ពោលគឺថយចុះបន្តិច។ ត្រីមាសទីបួនចុងឆ្នាំ២០២១ មានកំណើន ១,៦ % បើប្រៀបធៀបទៅត្រីមាសទី៣។
ជារួម យើងសង្កេតឃើញថា សេដ្ឋកិច្ចចិនមានលំនឹង និងស្ទុះឡើងជាប្រចាំបើទោះបីជាមិនខ្លាំងណាស់ណា។ យោងតាមអាជ្ញាធរចិន នៅក្នុងខែ៣កន្លងមកនេះ កម្លាំងផលិតកម្មឱស្សាហកម្មចិន បានស្ទុះឡើងប្រមាណ៥% ក្នុងរវាង១ឆ្នាំចុងក្រោយនេះ។ គឺសន្ទុះកំណើនផ្នែកឧស្សាហកម្មនេះហើយ ដែលបានទាញសេដកិច្ចចិន ឲ្យមានកំណើនដែរ។
កូវីដកៀបសង្កត់សេដ្ឋកិច្ចចិនកាន់តែខ្លាំង
ប្រមាណមួយខែមកនេះ កូវីដបានវិលត្រលប់មកកៀបសង្កត់ចិនខ្លាំងណាស់។ រដ្ឋាភិបាលចិន នៅតែអនុវត្ត “ វិធានការកូវីដសូន្យ” យ៉ាងតឹងតែងបំផុត។ មានទីក្រុងធំៗរបស់ចិនច្រើនណាស់ ដែលកំពុងតែអនុវត្តវិធានការ ទាំងខ្លាំងទាំងបង្គួរ។ នៅប៉េកាំង បើទោះមិនមានការបិទខ្ទប់ទាំងស្រុងមែន តែអាជ្ញាធរចិន បានចេញវិធានការ ហាមឃាត់មួយចំនួន មិនឲ្យប្រជាជនធ្វើចរាចរណ៍ ចេញចូលច្រើនពេកទេ។ ដោយឡែក គឺនៅ ឆិនចិន និងសៀងហៃ ដែលជាទីក្រុងសេដ្ឋកិច្ច ដ៏សំខាន់បំផុតរបស់ចិន ដែលកំពុងតែត្រូវបទខ្ទប់ទាំងស្រុង ច្រើនសប្តាហ៍មកហើយ។
នៅសៀងហៃ មនុស្សប្រមាណ២៤លាននាក់ ត្រូវសំងំក្នុងផ្ទះចេញទៅណាមិនបានទេ។ មួយថ្ងៃៗ មានអ្នកឆ្លងកូវីដ ថ្មី ច្រើនម៉ឺននាក់ណាស់។ ជាងនេះទៀត ព្រឹកនេះ អាជ្ញាធរសុខាភិបាលបានប្រកាសថា មានមនុស្សចាស់អាយុខ្ទង់៩០ឆ្នាំ ចំនួន៣នាក់នៅសៀងហៃ បានស្លាប់ដោយសារកូវីដ។ ដំណឹងនេះ ប្រាកដជានឹងរុញឲ្យរដ្ឋាភិបាលចិន បន្តអនុវត្តវិធានការបិទខ្ទប់នេះ យូរថ្ងៃទៅមុខទៀត។
យោងតាមការវិភាគ ការបិទខ្ទប់ទាំងស្រុងនៅតាមទីក្រុងធំៗ ដូចជាឆិនចិន និងសៀងហៃនេះ ប្រាកដជាជះឥទ្ធិពលអាក្រក់ ទៅលើសេដ្ឋកិច្ចចិន ក្នុងត្រីមាសទី២នៃឆ្នាំនេះ។ វិធានការបិទខ្ទប់ទាំងស្រុង កូវីដសូន្យ នេះ បានធ្វើឲ្យរាំងស្ទះខ្លាំងណាស់ ដល់វិស័យដឹកជញ្ជូនការធ្វើដំណើរ វិស័យផ្គត់ផ្គង់នាំចេញទំនិញ ទេសចរណ៍ ភោជនីយ៍ដ្ឋាន ហើយបានធ្វើឲ្យសហគ្រាសមួយចំនួន ចាប់ផ្តើមក្ស័យធុន បិទទ្វារបណ្តើរបណ្តើរហើយ។
លោក Rajiv Biswas អ្នកវិភាគទីផ្សារនៅ IHS Market បានលើកឡើងថា ការបិទខ្ទប់ទាំងស្រុង ប៉ុន្មានសប្តាហ៍មកនេះ បានធ្វើឲ្យការចំណាយរបស់ប្រជាជន ធ្លាក់ចុះខ្លាំងណាស់ ជាក់ស្តែងក្នុងវិស័យភោជនីយ៍ដ្ឋាន និងពាណិជ្ជកម្មទូទៅ ។ ការបិទខ្ទប់នៅសៀងហៃ ក្នុងខែមេសានេះ ប្រាកដជានឹងវាយបំបាក់ សកម្មភាពចំណាយចាយវាយរបស់ប្រជាជននៅសៀងហៃ ហើយវានឹងធ្វើឲ្យសេដ្ឋកិច្ចមិនដំណើរការ។
ឧបសគ្គចិន ដែលសេដ្ឋកិច្ចចិនត្រូវឆ្លងកាត់
បរិបទពេលនេះ គឺលំបាកទាំងអស់គ្នា បើទោះបីសេដ្ឋកិច្ចចិននៅមានលំនឹងមែន តែក៏ចាប់ផ្តើមរង្គោះរង្គើខ្លះដែរ។ រដ្ឋាភិបាលចិន បានចេញវិធានការរិតបន្តឹងផ្លូវច្បាប់ជាច្រើន ទាក់ទិននឹងវិស័យអចលនទ្រព្យ វិស័យបច្ចេកវិទ្យា។ បន្ថែមពីនេះ សង្រ្គាមនៅអ៊ុយក្រែន កំពុងចោទជាបញ្ហា ដែលអ្នកវិនិយោគក៏កំពុងបារម្ភ ថាចិនអាចនឹងរងទណ្ឌកម្មពីក្រុមប្រទេសលោកខាងលិច។
អត្រាអ្នកអត់ការងារធ្វើនៅតាមទីក្រុង មានចំនួន៥,៨% ក្នុងខែមីនា ពោលគែបានបានកើនឡើង ខណៈនៅខែមករាមានចំនួន ៥,៥%។ អត្រាវិនិយោគមូលធននឹង មានត្រឹមតែ ៩,៣%ទេ ក្នុងរវាង៣ខែចុងក្រោយ ខណៈដែលខែធ្នូ មានចំនួន១២,២%។ អាជ្ញាធររដ្ឋាភិបាលចិន បានទទួលស្គាល់ខ្លួនឯង ថាសេដ្ឋកិច្ចចិនមានឧបសគ្គប្រឈមច្រើនណាស់។ យ៉ាងណាមិញ ក្នុងឆ្នាំ២០២២នេះ រដ្ឋាភិបាលចិន បានព្យាករណ៍ថា សេដ្ឋកិច្ចអាចមានកំណើន ប្រមាណតែ៥,៥%ទេ។ ពោលគឺជាកំណើនដ៏ទាបបំផុត បើគិតរាប់ពីទសវត្សឆ្នាំ៩០មក។
លោក Larry Hu អ្នកគ្រប់គ្រងភាគហ៊ុននៅការិយាល័យ Macquarie បានលើកឡើងថា វិធានការរាំងខ្ទប់ដោយសារកូវីដ ការចុះខ្សោយខ្លាំងនៃវិស័យអចលនទ្រព្យសំណង់ គឺសុទ្ធតែជាឧបសគ្គធំៗនៃសេដ្ឋកិច្ចចិន ក្នុងឆ្នាំ២០២២នេះ។ វិស័យសំណង់ មានទំងន់ប្រមាណជាង១ភាគ៤នៃសេដ្ឋកិច្ចចិន។ បន្ថែមពីនេះទៀត ការទិញទំនិញប្រើប្រាស់ នៅទីផ្សារក្នុងស្រុកចិន ក៏ចុះថយខ្លាំងណាស់ដែរ។ ការនាំចេញរបស់ចិន បានកើនឡើងមែន តែការចំណាយក្នុងស្រុក លើការប្រើប្រាស់ ទិញទំនិញគ្រប់សព្វ គឺបានចុះថយ។ ប្រការនេះគឺវាមិនល្អប៉ុន្មានទេ សម្រាប់ទីផ្សារចិនខ្លួនឯង និងសម្រាប់ការនាំចេញទំនិញរបស់បរទេស ដែលនាំមកលក់នៅក្នុងប្រទេសចិន។
ប៉ុន្មានថ្ងៃចុងក្រោយនេះ គេឃើញលោកនាយករដ្ឋមន្ត្រីចិន បានដឹកនាំការប្រជុំញឹកញាប់ណាស់ ទាក់ទិននឹងបញ្ហាសេដ្ឋកិច្ចនេះ។ កាលពីថ្ងៃទី១៥មេសា ធនាគារកណ្តាលចិន បានប្រកាសទម្លាក់កម្រិតប្រាក់បម្រុង ចាប់ពីថ្ងៃទី២៥មេសាទៅ។ វិធានការនេះ ដើម្បីជំរុញធានាគាររបស់ចិនទាំងអស់ ឲ្យបញ្ចេញប្រាក់ ផ្តល់កំចី ឲ្យបានច្រើន យកទៅជ្រោងសេដ្ឋកិច្ច ។ យោងតាមតួលេខ គឺគេរំពឹងថា នឹងអាចចាក់បញ្ចូលប្រាក់ ចំនួន៥៣០ពាន់លានយាន់ ដែលស្មើនឹង ៧៧ពាន់លានអឺរ៉ូ ទៅក្នុងសេដ្ឋកិច្ចចិន។ ស្ថានភាពសេដ្ឋកិច្ចចិនក្នុងពេលនេះ គឺថាវាផ្ទុយស្រឡះ ពីឆ្នាំ២០២១ ដែលកាលនោះ សន្ទុះសេដ្ឋកិច្ចបានឡើងដល់ទៅ ជាង១៨% ព្រោះទើបតែងើបចេញពីវិបត្តិកូវីដឆ្នាំ២០២០។ តែយ៉ាងលើកនេះ យើងឃើញថា កូវីដបន្តកៀបសង្កត់ បង្អាក់ការចំណាយ ព្រមជាមួយឧបសគ្គមកពីបរិបទអន្តរជាតិថែមទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ