សង្គ្រាមអ៊ុយក្រែន៖ អាមេរិក អង់គ្លេស សម្រេចឈប់ទិញប្រេង និងហ្កាសរុស្ស៊ី ខណៈអឺរ៉ុបប្តេជ្ញាកាត់បន្ថយ
ចុះផ្សាយនៅថ្ងៃ៖
ស្តាប់ - ០៧:១៨
ទណ្ឌកម្មសេដ្ឋកិច្ចលើរុស្ស៊ី កំពុងតែត្រូវបានគេដាក់សង្កតបន្ថែមយ៉ាងធ្ងន់ ដើម្បីវាយផ្កាប់ឆ្នាំងបាយ របស់របបលោកពូទីន។ កាលពីយប់ថ្ងៃអង្គារម្សិលមិញ លោកចូ បៃដិន បានប្រកាសហាមឃាត់ ការនាំចូលទំនិញថាមពល របស់រុស្ស៊ី មានប្រេង ហ្កាស និងធ្យូងថ្មជាដើម។ ប៉ុន្មាននាទីក្រោយមក រដ្ឋាភិបាលអង់គ្លេសក៏បានប្រកាសដូចគ្នា ថានឹងឈប់ទិញប្រេងរបស់រុស្ស៊ី។ ដោយឡែក សហភាពអឺរ៉ុប ដែលរំពឹងខ្លាំងនឹងប្រភពថាមពលនាំចូលពីរុស្ស៊ីនោះ បានប្រកាសថានឹងប្រឹងប្រែងកាត់បន្ថយ ការនាំចូល ដើម្បីធ្វើយ៉ាងណា វាយសំពងលើប្រភពចំណូលរបស់រុស្ស៊ី។ តែទន្ទឹមគ្នានេះ ការធ្វើពហិការទល់នឹង ប្រេង និងហ្កាស របស់រុស្ស៊ីនេះ កំពុងតែធ្វើឲ្យតម្លៃថាមពលឡើងថ្លៃខ្លាំងណាស់ ហើយដែលប៉ះពាល់យ៉ាងខ្លាំង ដល់ជីវភាពប្រជាជនទូទៅ។
ប្រេង និងហ្កាស គឺជាប្រភពចំណូលដ៏សំខាន់បំផុត របស់រុស្ស៊ី។ ការឈប់ទិញប្រេង ឈប់ទិញហ្កាសរបស់រុស្ស៊ី គឺត្រូវបានមតិមួយចំនួនលើកឡើង ជាច្រើនថ្ងៃមកហើយថាត្រូវតែធ្វើ ដើម្បីសំពងវាយបំបែកឆ្នាំងបាយរបស់របបលោកពូទីន ជាក់ស្តែងក្នុងចំណោមមតិសាធារណៈអាមេរិក និងអ្នកនយោបាយសមាជិកសភាអាមេរិកផងដែរ។
ហេតុដូច្នេះហើយ បានជាលោក ចូ បៃដិន បានសម្រេចកាលពីអង្គារម្សិលមិញ ថាចាប់ពីពេលនេះទៅ នឹងឈប់នាំចូលប្រេង ហ្កាស ធ្យូងថ្ម និងទំនិញកែច្នៃផ្សេងទៀត ដែលបានមកពីប្រេងកាតរបស់រុស្ស៊ី។ ក្រុមហ៊ុនទាំងអស់ មានពេល៤៥ថ្ងៃ ដើម្បីបិទបញ្ចប់កិច្ចសន្យាជាមួយរុស្ស៊ី។ ភ្លាមៗក្រោយការប្រកាសនេះបន្តិច រដ្ឋមន្ត្រីក្រសួងថាមពលអង់គ្លេស ក៏បានប្រកាសដែរ ថារដ្ឋាភិបាលអង់គ្លេស សម្រេចបញ្ឈប់ការនាំចូលប្រេង និងហ្កាសរុស្ស៊ី ឲ្យបានទាំងស្រុងពីនេះ ដល់ដំណាច់ឆ្នាំ២០២២។
ក្រោយការប្រកាសរបស់អាមេរិក និងអង់គ្លេស ក្រុមហ៊ុនប្រេងធំៗ មាន Shell BP ExxonMobil និង Eni នាំគ្នាសម្រេចដកចេញពីទីផ្សាររុស្ស៊ី។
វិធានការទណ្ឌកម្មទៅតាមលទ្ធភាពរៀងៗខ្លួន
ធាតុពិតទៅ បើអាមេរិក និងអង់គ្លេស សម្រេចធ្វើបែបនេះ គឺមកពីធាតុពិត ប្រទេសពីរនេះ នាំចូលប្រេង និងហ្កាសរុស្ស៊ី មិនច្រើនប៉ុន្មានទេ។ ប្រទេសទាំង២នេះ គឺសុទ្ធតែជាអ្នកផលិតប្រេង ផលិតហ្កាសខ្លួនឯងដែរទៀតផង។ អាមេរិកនាំចូលប្រេងពីរុស្ស៊ីប្រមាណតែ៨%ទេ នៃតម្រូវការក្នុងស្រុក ហើយហ្កាសវិញ គឺសឹងតែគ្មានសោះតែម្តង។ ដូច្នេះហើយ បើឈប់នាំចូលរបស់រុស្ស៊ី ក៏គេមិនខ្វះអីប្រើដែរ។
ដោយឡែក គឺក្រុមប្រទេសសហភាពអឺរ៉ុបទេ ដែលពិបាក ព្រោះអឺរ៉ុបរំពឹងខ្លាំងណាស់ ទៅលើប្រេង និងហ្កាស របស់រុស្ស៊ី។ ជាមធ្យម អឺរ៉ុបត្រូវការប្រេងពីរុស្ស៊ី ប្រមាណជា៣០% ហើយហ្កាសវិញ ដល់ទៅ៤៥%ឯណោះ។ ហើយក្នុងចំណោមប្រទេសសមាជិកសហភាពអឺរ៉ុបទៀតសោត ក៏មានកម្រិតមិនស្មើគ្នាដែរ។ ជាក់ស្តែង បារាំង នាំចូលប្រេងពីរុស្ស៊ី ខ្ទង់តែជាង១០% ហើយហ្កាសវិញ ខ្ទង់២០%។ តែប្រទេសអឺរ៉ុបផ្សេងទៀត ជាក់ស្តែងអាល្លឺម៉ង់ គឺរំពឹងខ្លាំងណាស់ ទៅលើប្រេង និងហ្កាសរបស់រុស្ស៊ី។ យោងតាមតួលេខផ្លូវការ គឺអាល្លឺម៉ង់ នាំចូលប្រេងពីរុស្ស៊ីចំនួន ៤២% រីឯហ្កាសវិញ ដល់ទៅ៥៥%ឯណោះ។ ប្រទេសមួយចំនួនទៀត ដូចជាអូទ្រីស ហុងគ្រី សាធារណៈរដ្ឋឆេក ក៏រំពឹងខ្លាំងណាស់ លើប្រភពថាមពលនាំចូលពីរុស្ស៊ី។ ហេតុដូច្នេះហើយ បានជាគេពិបាកខ្លាំងណាស់ ក្នុងការរកគោលជំហររួម នៅអឺរ៉ុប ទាក់ទិននឹងការទិញប្រេង ទិញហ្កាសរុស្ស៊ីនេះ។
យ៉ាងណាក៏ដោយ យើងមិនអាចនិយាយបានថា ក្រុមប្រទេសលោកខាងលិចកំពុងតែបែកបាក់គ្នានោះទេ។ ប៉ុន្មានថ្ងៃមកនេះ គឺបានជជែកគ្នាសម្បើមណាស់ ដើម្បីរកគោលជំហររួម រវាងអឺរ៉ុប អង់គ្លេស និង អាមេរិក។ ការដែលអាមេរិក និងអង់គ្លេស សម្រេចបោះជំហានតែ២នាក់នាពេលនេះ គឺវាជាវិធានាការ ដែលផ្អែកលើលទ្ធភាព និងសមត្ថភាពរៀងៗខ្លួន។ ពោលគឺអ្នកណាអាចធ្វើអ្វីបាន ធ្វើសិន ព្រោះថាបើចាំមានគោលជំហររួម គឺមិនងាយទេ។ យ៉ាងណាមិញ មន្ត្រីរដ្ឋាភិបាលអាមេរិក អះអាងថាអាមេរិកបានពិភាក្សាគ្នាច្បាស់ណាស់ជាមួយភាគីអឺរ៉ុប។ អាមេរិកសម្រេចឈប់នាំចូលប្រេងនិងហ្កាសរុស្ស៊ីតែម្នាក់ឯងមែន តែអាមេរិកមិនបង្ខំ មិនរំពឹង ឲ្យអឺរ៉ុបធ្វើតាមទេ ព្រោះអាមេរិកដឹងថាអឺរ៉ុបមានការលំបាកខ្លាំង មិនអាចអត់ប្រេង អត់ហ្កាសរុស្ស៊ីបានទេនាពេលនេះ។ ពោលគឺអឺរ៉ុប អាចធ្វើទៅតាមលទ្ធភាពរបស់អឺរ៉ុប។
អឺរ៉ុបលំបាកខ្លាំង ព្រោះរំពឹងខ្លាំងលើប្រភពថាមពលរុស្ស៊ី
ត្រឹមនិយាយថាចង់ឈប់នាំចូល វាស្រួលទេ តែការពិតជាក់ស្តែង សួរថា បើមិននាំចូលរបស់រុស្ស៊ី តើទៅយករបស់អ្នកណាមកជំនួស? ទំហំនៃបរិមាណ ប្រេង និងហ្កាស ដែលអឺរ៉ុបនាំចូលពីរុស្ស៊ី គឺវាច្រើនណាស់។ មិនអាចទៅរកអ្នកលក់ណាផ្សេង អាចមកជំនួសរុស្ស៊ីបានងាយៗទេ។
គណកម្មការអឺរ៉ុប បានប្រកាសថានឹងកាត់បន្ថយការនាំចូលមែន តែគឺជាផែនការរយៈពេលវែង ដែលប្រទេសសមាជិកទាំងត្រូវអនុវត្ត។ គេបានគិតសម្លឹងងាកទៅប្រទេសអ្នកផលិតផ្សេងទៀត ដូចជា ន័រវែស អាមេរិក កាតា អារ៉ាប៊ីសាអូឌីត និង អាល់ហ្សេរីជាដើម ដើម្បីទិញបន្ថែម យកមកជំនួសចន្លោះប្រហោង។ តែបញ្ហាចោទ គឺវាទាក់ទិននឹងសមត្ថភាពផលិតរបស់ប្រទេសទាំងនោះ ថាអាចដំឡើងបាន តាមតម្រូវការដែរឬទេ។
ប្រទេសន័រវែស បានបញ្ជាក់ឲ្យដឹងថា សមត្ថភាពផលិតហ្កាសរបស់គេ គឺដល់ចំណុចខ្ពស់បំផុតហើយ មិនអាចផលិតឲ្យបានច្រើនជាងនេះទេ ហើយបើចង់បន្ថែការផលិត គឺត្រូវតែវិនិយោគសាងសង់ហេដ្ឋារចនាសម្ព័ន្ធបន្ថែម ដូច្នេះ មិនមែន១ឆ្នាំ២ឆ្នាំរួចរាល់នោះទេ។ បច្ចុប្បន្ននេះ អឺរ៉ុបទិញហ្កាសពីរុស្ស៊ី គឺជាហ្កាសមកតាមបំពង់ឧស្ម័នតែម្តង។ បើចង់ទិញពីប្រទេសផ្សេងទៀត គឺទាល់តែទិញហ្កាសដែលគេបំលែងឲ្យទៅជាទឹករាវ ច្រកធុងស៊ីទែនដាក់តាមកប៉ាល់មក។ បញ្ហាចោទ គឺហេដ្ឋារចនាសម្ព័ន្ធស្តុកទុកហ្កាសរាវប្រភេទនេះ ដែលអឺរ៉ុបគ្មាន។ នៅអឺរ៉ុបមានកំពង់ផែតិចណាស់ ដែលមានហេដ្ឋារចនាសម្ព័ន្ធអាចធ្វើវាបាន។ នៅបារាំងមានតែ៣ទីតាំងទេ ហើយនៅអាល្លឺម៉ង់ មានតែមួយហើយ ហើយសង់មិនទាន់រួចរាល់ផងទេ។ ដូច្នេះមានន័យថា សម្រាប់ពេលនេះ ការនាំចូលហ្កាសពីប្រទេសផ្សេង ក្រៅពីរុស្ស៊ី គឺលំបាកខ្លាំងណាស់ សម្រាប់អឺរ៉ុប។
រកវិធីពង្រឹងឯករាជ្យភាពថាមពល
សម្រាប់កាលៈទេសៈពេលនេះ អឺរ៉ុបបានគូសវាផែនការមួយចំនួន ដូចជា ការកាត់បន្ថយការប្រើប្រាស់ សន្សំសំចៃ ងាកទៅរកប្រភពថាមពលផ្សេងៗទៀត ដូចជា អ៊ីដ្រូហ្សែន ប៊ីយូម៉េតានជាដើម។ គេនឹងបង្កើតយន្តការជួយគ្នាទៅវិញទៅមក ដើម្បីបំពេញស្តុក។ វាក៏ជាឱកាសមួយ ដើម្បីជំរុញ ការវិនិយោគថាមពលស្អាតស្អំដែរ។ ដោយសារតែវិបត្តិនេះ ប្រេង និងហ្កាស ឡើងថ្លៃខ្លាំងណាស់នៅអឺរ៉ុប ដែលប៉ះពាល់ដល់ជីវភាពមនុស្ស។ រដ្ឋាភិបាលប្រទេសអឺរ៉ុប នឹងចេញវិធានាការបន្ថែមទៀត ដើម្បីជួយទប់តម្លៃ ឬជួយជាប្រាក់ដោយផ្ទាល់ទៅដល់ប្រជាជន ឬអាចកាត់បន្ថយពន្ធនាំចូលជាដើម។
គណកម្មការអឺរ៉ុប អះអាងថា ប្រឹងលំបាកនៅពេលនេះ គឺអឺរ៉ុបអាចនឹងឈប់ទិញហ្កាសរបស់រុស្ស៊ីទាំងស្រុង នៅរវាងឆ្នាំ២០៣០។ នេះគឺជាការប្រឹងប្រែង ដែលចាំបាច់ ព្រោះអឺរ៉ុប ដឹងខ្លួនច្បាស់ណាស់ ថាត្រូវតែរកវិធីដោះខ្លួន ឲ្យមានឯករាជ្យ ឈប់រំពឹងលើប្រេង និងហ្កាសរបស់រុស្ស៊ី។ ពុំនោះទេ គឺរុស្ស៊ីនៅតែអាចដាក់សំពាធ បានរហូតទៅថ្ងៃមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ