អឺរ៉ុបបន្ថែមទណ្ឌកម្មលើរុស្ស៊ី និងផ្តើមបញ្ជូនជំនួយយោធាឱ្យអ៊ុយក្រែន
ចុះផ្សាយនៅថ្ងៃ៖
ស្តាប់ - ០៧:៤៥
នៅទីបំផុត ក្រុមបស្ចឹមលោកនិងសហភាពអឺរ៉ុប បានសម្រេចដាក់ទណ្ឌកម្មថ្មីបន្ថែម ដោយបានព្រមព្រៀងគ្នាដករុស្ស៊ីចេញពីប្រព័ន្ធប្រតិបត្តិការធនាគារ Swift។ ជាងនេះទៅទៀត ក្រុមលោកខាងលិចបាននាំ គ្នាបញ្ជូនអាវុធ និងសម្ភារៈបរិក្ខារយោធាជាច្រើនទៅជួយអ៊ុយក្រែន។
ចាប់ពីពេលនេះទៅ រុស្ស៊ីនឹងនៅក្រៅប្រព័ន្ធហិរញ្ញវត្ថុហើយ ! នេះជាពាក្យរបស់អ្នកទទួលខុសត្រូវអាមេរិក នៅព្រឹកថ្ងៃអាទិត្យទី ២៧កុម្ភៈ ព្រោះនៅល្ងាចមិញ ក្រុមប្រទេសលោកខាងលិច (អាមេរិក បារាំង អាល្លឺម៉ង់ អង់គ្លេស កាណាដា អ៊ីតាលី និងសហភាពអឺរ៉ុប) បានអនុម័តបន្ថែមទណ្ឌកម្មលើរុស្ស៊ី ដោយសម្រេចដកធនាគាររុស្ស៊ីចេញពីប្រព័ន្ធប្រតិបត្តិការធនាគារ Swift។
ការផ្តាច់ពីប្រព័ន្ធSwift ជាអាវុធនុយក្លេអ៊ែរនៃវិស័យហិរញ្ញវត្ថុ និងជាអាវុធមុខពីរ ដែលអាចនាំផលវិបាកឱ្យបស្ចឹមលោកវិញខ្លះដែរ ដោយអាចធ្វើឱ្យការផ្តោះប្តូរហិរញ្ញវត្ថុ ពាណិជ្ជកម្មត្រូវរអាក់រអួល និងប៉ះពាល់ដល់ជីវភាពប្រជាជនផង។ អ្នកវិភាគខ្លះបានពន្យល់ទៀតថាវាអាចនឹងធ្វើឱ្យលុយដុល្លារធ្លាក់ថ្លៃផង ដោយរុស្ស៊ីត្រូវងាកទៅប្រើរូបិយបណ្ណផ្សេងក្រៅពីដុល្លារសម្រាប់ដោះដូរពាណិជ្ជកម្ម។ ហេតុដូច្នេះហើយបានជាបណ្តាប្រទេសនៅអឺរ៉ុបជាពិសេសអាល្លឺម៉ង់ដែលរំពឹងលើហ្កាសរុស្ស៊ីដល់ទៅ៧០% រារែកមិនចង់ប្រើវិធីនេះដាក់ទណ្ឌកម្មលើរុស្ស៊ី។
ប៉ុន្តែប្រឈមនឹងទង្វើរុស្ស៊ី អាល្លឺម៉ង់បានជំនះភាពមានៈរបស់ខ្លួន ដោយយល់ព្រម ផាត់គ្រប់ធនាគារ និងស្ថាប័នហិរញ្ញវត្ថុរុស្ស៊ីដែលជាប់ទណ្ឌកម្មអន្តរជាតិពីមុន ចេញពីប្រព័ន្ធSwift។ ប្រព័ន្ធSwift ដែលជាបណ្តុំធនាគារជាង១១០០០ ក្នុងនោះ៣០០ជាធនាគាររុស្ស៊ី បានប្រកាសប្រតិបត្តិតាមទណ្ឌកម្មនេះ ប្រឆាំងនឹងធនាគាររុស្ស៊ី ភ្លាមនៅប៉ុន្មានថ្ងៃខាងមុខ។
នេះជាទណ្ឌកម្មដ៏ធ្ងន់ធ្ងរបំផុតដែលវាយសំពងរុស្ស៊ីខ្លាំងណាស់។ ប៉ុន្តែវិធានការនេះ មិនផ្តល់ផលមិនភ្លាមៗទេ ! ទណ្ឌកម្មអឺរ៉ុបនិងលោកខាងលិច អាចមានឥទ្ធិពលក្នុងរយៈពេលមធ្យម និងយូរទៅមុខ។ ពុំទាន់មានប្រតិកម្មជាផ្លូវការទេ មកពីខាងរុស្ស៊ី តបនឹងទណ្ឌកម្មថ្មីនេះទេ។ ប៉ុន្តែរុស្ស៊ីបានត្រៀមលក្ខណៈប្រើប្រព័ន្ធធនាគារផ្ទាល់ខ្លួនមានឈ្មោះថា Mir សម្រាប់ប្រឈមនឹងទណ្ឌកម្មអន្តរជាតិ តែតើវាអាចដំណើរបានប៉ុនណា ? ប្រព័ន្ធធនាគាររុស្ស៊ីMIR នេះអាចប្រើប្រាស់បានតែក្នុង២០ប្រទេសទេ សម្រាប់ពេលនេះ។
អាល្លឺម៉ង់ បារាំង ហូឡង់ ... បញ្ជូនអាវុធឱ្យអ៊ុយក្រែន
នៅពេលសង្គ្រាមផ្ទុះឡើងភ្លាម សហភាពអឺរ៉ុប នៅស្ទាក់ស្ទើរចិត្តមិនចង់បញ្ជូនអាវុធទៅជួយអ៊ុយក្រែនភ្លាម ដោយខ្លាចក្រែងអាវុធទាំងអស់ធ្លាក់ទៅក្នុងកណ្តាប់ដៃរុស្ស៊ី។ តែពេលនេះ អ៊ុយក្រែនបានបង្ហាញឆន្ទៈតស៊ូគួរឱ្យទុកចិត្ត ក្នុងការការពារអធិបតេយ្យភាពជាតិ ទើបក្រុមលោកខាងលិចចាប់ផ្តើមសម្រេចបញ្ជូនអាវុធឱ្យ។
សហរដ្ឋអាមេរិកបានប្រកាសផ្តល់ជំនួយយោធាគិតជាទឹកប្រាក់សរុបចំនួន ៣៥០លានដុល្លារ។ ចំណែកខាងអឺរ៉ុបវិញ គួរឱ្យកត់សម្គាល់ខ្លាំងជាងគេបំផុត គឺប្រទេសអាល្លឺម៉ង់ ! តាំងពីសម័យសង្គ្រាមលោកមក អាល្លឺម៉ង់ប្រកាន់ជំហរដាច់ខាតមិនបញ្ជូនអាវុធជាជំនួយក្នុងជម្លោះណាទេ ប៉ុន្តែពេលនេះអាល្លឺម៉ង់បានផ្តាច់ប្រពៃណី ប្រកាសផ្តល់ជំនួយដល់អ៊ុយក្រែននូវរ៉ុកកែតបាញ់រថក្រោះចំនួន ១០០០ដើម មីស៊ីលបាញ់ពីដីទៅអាកាសចំនួន៥០០ និងកាំភ្លើងត្បាល់៩គ្រឿង ព្រមទាំងរថពាសដែក សម្រាប់ជម្លៀសនិងការពារឥស្សរជននានា។
ហូឡង់ ផ្តល់មីស៊ីលStinger ២០០ ដើម និងកាំភ្លើងសម្រាប់ឱ្យពលរដ្ឋអ៊ុយក្រែនការពារខ្លួន។ សាធារណរដ្ឋឆែក សម្រេចជួយផ្តល់អាវុធតម្លៃសរុប៧,៦លានអឺរ៉ូ។ ប៊ែលហ្សិក ឱ្យកាំភ្លើងមីត្រៃយេត ២ពាន់ដើមនិងប្រេង៣៨០០តោន។ អ៊ីតាលីជួយពង្រឹងសន្តិសុខទ្វីប និងជំនួយមនុស្សធម៌១១០លានអឺរ៉ូ ព្រមទាំងសម្ភារៈបរិក្ខារយោធា ជាពិសេសក្នុងវិស័យដោះមីន និងការពារខ្លួន។ ចំណែកបារាំង បានសម្រេចពង្រឹងកម្លាំងយោធានៅសមរភូមិអូតង់/ណាតូ នៅប្រទេសរ៉ូមានី អេស្តូនី និងផ្តល់អាវុធយុទ្ធភណ្ឌការពារដល់អាជ្ញាធរអ៊ុយក្រែន។
បិទព្រំដែនអាកាស
បន្ថែមពីលើនេះ និងជាបន្តបន្ទាប់ បណ្តាប្រទេសអឺរ៉ុបជាច្រើន និងសម្ព័ន្ធមិត្ត បាននាំគ្នាបិទព្រំដែនអាកាសមិនឱ្យយន្តហោះរុស្ស៊ី ក្រុមហ៊ុនអាកាសចរណ៍រុស្ស៊ី រាប់ទាំងយន្តហោះឯកជន ហោះហើរឆ្លងកាត់។ ហ្វាំងឡង់ប្រទេសជាប់របងរុស្ស៊ី ព្រមទាំងដាណឺម៉ាក ក៏បានប្រកាសបិទព្រំដែនអាកាសជាមួយរុស្ស៊ីដែរ មិនឱ្យក្រុមហ៊ុនអាកាសចរណ៍រុស្ស៊ីឆ្លងកាត់ទៀតទេ។ បារាំង អ៊ីតាលី អាល្លឺម៉ង់សម្រេចមិនឱ្យក្រុមហ៊ុនអាកាសចរណ៍រុស្ស៊ីឆ្លងកាត់ ដែនអាកាសខ្លួនរយៈពេលបីខែ គិតចាប់ពីថ្ងៃអាទិត្យនេះតែម្តង។ សហភាពអឺរ៉ុបអាចសម្រេចបិទដែនអាកាសអឺរ៉ុបទាំងមូល មិនឱ្យយន្តហោះរុស្ស៊ីចូលដែរ នៅក្នុងជំនួបប្រជុំវិសាមញ្ញល្ងាចនេះ។
អ៊ុយក្រែនព្រមចរចា តែមិនទៅធ្វើនៅបេឡារុស្ស៊ី
ការចរចាជាដំណោះស្រាយមួយល្អប្រសើរជាងគេបំផុត និងល្អជាងធ្វើសង្គ្រាម ឆ្ងាយណាស់ ប៉ុន្តែតើគេអាចចរចាដូចម្តេចបើភាគីម្ខាងមានកាំភ្លើងនៅសៀតផ្កានោះ ?! ហើយសំណើសុំចរចារបស់រុស្ស៊ី ពិតជាមែនដោយសារសម្ពាធនិងគំនាបរបស់សហគមន៍អន្តរជាតិទេ។
សម្រាប់អ៊ុយក្រែន សំណើចរចាលើកដំបូងរបស់រុស្ស៊ីមិនប្រាកដប្រជាទេ រុស្ស៊ីធ្វើព្យុះធ្វើភ្លៀង ដើម្បីឱ្យអ៊ុយក្រែនសុំចុះចូល។ ហើយនៅថ្ងៃអាទិត្យនេះរុស្ស៊ីបានស្នើជាថ្មី ដោយថែមទាំងបញ្ជាក់ថា ប្រតិភូក្រសួងការបរទេស និងការពារជាតិរុស្ស៊ីបានទៅដល់ក្រុងមីនស្ក៍ ប្រទេសបេឡារុស្ស៊ីហើយ ដើម្បីចរចា។ តែជាថ្មីម្តងទៀត តំណាងអ៊ុយក្រែនយល់ថា នេះគ្រាន់តែជាតាកតិចរបស់លោកពូទីន ដែលចង់ឃោសនាបំប៉ោងនយោបាយឈ្លានពានតែប៉ុណ្ណោះ។
យ៉ាងណាក៏ដោយ ក៏លោកប្រធានាធិបតីអ៊ុយក្រែន ហ្សេឡេនស្គី នៅតែចង់ចរចាដែរ គ្រាន់តែបដិសេធដាច់ខាតមិនទៅចរចានៅបេឡារុស្ស៊ីទេ ព្រោះប្រទេសនេះបានគាំទ្រឱ្យមានការឈ្លានពានអ៊ុយក្រែន ប្រទេសបានព្រមឱ្យរុស្ស៊ីដាក់រុកកែតហើយបាញ់មកលើអ៊ុយក្រែន។ លោកហ្សេឡេនស្គី បានបញ្ជាក់ជំហរច្បាស់លាស់ថា អ៊ុយក្រែនព្រមចរចា បើជាការចរចាដោយពិតៗ មិនមែនជាការដាក់ឱសានវាទឱ្យអ៊ុយក្រែនធ្វើតាមនោះ។
ចំណែកខាងអាល្លឺម៉ង់ នាយករដ្ឋមន្ត្រីបានប្រកាសបង្ហើបទ្វារចរចារុស្ស៊ីដែរ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ