សម្ព័ន្ធមិត្តលោកខាងលិចប្រកាសដាក់ទណ្ឌកម្មធ្ងន់លើរុស្ស៊ី ខណៈអ៊ុយក្រែនបង្ហាញការខកចិត្ត
ចុះផ្សាយនៅថ្ងៃ៖
ស្តាប់ - ០៧:៥៧
ជាមួយនឹងការប្រកាសថ្កោល ក្រុមប្រទេសលោកខាងលិច បានសន្យាថានឹងដាក់ទណ្ឌកម្មសេដ្ឋកិច្ចដ៏ធ្ងន់ ដើម្បីវាយបំបាក់សេដ្ឋកិច្ចរុស្ស៊ី។ វិធានការទណ្ឌកម្ម ដែលត្រូវបានប្រធានាធិបតីអ៊ុយក្រែន ចាត់ទុកថាមិនគ្រប់គ្រាន់ ក្នុងការដាក់សំពាធទៅលើរុស្ស៊ី និងលោកពូទីននោះឡើយ។ ជាងនេះទៀត ពន្លឺនៃអន្តរាគមន៍យោធាពីប្រទេសលោកខាងលិច មកជួយអ៊ុយក្រែនដោយផ្ទាល់ គឺសូន្យតែម្តង។
ទណ្ឌកម្មបិទផ្លូវវិស័យធនាគារ និហិរញ្ញវត្ថុរុស្ស៊ី
ឆ្លងកាត់ការប្រជុំកាលពីយប់ថ្ងៃព្រហស្បតិ៍ទី២៤កុម្ភៈ សហភាពអឺរ៉ុប បានព្រមព្រៀងដាក់ចេញ នូវទណ្ឌកម្មមួយចំនួន ដែលសំដៅវាយទៅលើវិស័យធនាគារហិរញ្ញវត្ថុរុស្ស៊ី ព្រមទាំងទំនិញយុទ្ធសាស្ត្រមួយចំនួនផងដែរ។ ជាបឋម ទណ្ឌកម្មនេះនឹងបិទផ្លូវ មួយផ្នែកធំ មិនឲ្យក្រុមហ៊ុនរុស្ស៊ី ទាំងរដ្ឋ ទាំងឯកជន អាចចូលមកទីផ្សារហិរញ្ញវត្ថុអឺរ៉ុប ដើម្បីសុំកម្ចី វិនិយោគ ឬយកទៅសងបំណុលបានឡើយ។
បន្ទាប់មកទៀត ទណ្ឌកម្មអឺរ៉ុប នឹងវាយទៅលើវិស័យដឹកជញ្ជូន វិស័យអាកាសចរណ៍រុស្ស៊ី ព្រមទាំងទំនិញគ្រឿងផ្សំបច្ចេកវិទ្យាអេឡិចត្រូនិក ដែលប្រើប្រាស់ទាំងក្នុងវិស័យស៊ីវិល និងវិស័យយោធា តួយ៉ាងដូចជា ឧបករណ៍សឺមីកុងឌុកទ័រ ជាដើម។ តាមការអះអាង របស់លោកស្រីប្រធានគណកម្មការអឺរ៉ុប ការបិទផ្លូវ មិនឲ្យរុស្ស៊ីអាចទទួលបានទំនិញបច្ចេកវិទ្យាយុទ្ធសាស្ត្រទាំងនេះ គឺនឹងប៉ះពាល់ខ្លាំងណាស់ ដល់សេដ្ឋកិច្ចរុស្ស៊ី។ ទណ្ឌកម្មនេះនឹងធ្វើឲ្យសេដ្ឋកិច្ចរុស្ស៊ីមានឱនភាព មានអតិផរណាខ្ពស់ ហើយនិងទាញទំលាក់សមត្ថភាពឧស្សាហកម្មរុស្ស៊ី។
នៅព្រឹកថ្ងៃសុក្រ រដ្ឋមន្ត្រីសេដ្ឋកិច្ចនៃប្រទេសសមាជិកសហភាពអឺរ៉ុប ត្រូវប្រជុំគ្នាបន្តទៀត ដើម្បីលំអិតលើវិធានការទណ្ឌកម្មនីមួយៗ។ លោក រដ្ឋមន្ត្រីសេដ្ឋកិច្ចបារាំងបានអះអាងថា សហភាពអឺរ៉ុប ចង់កាត់ផ្តាច់ចំណង រវាងរុស្ស៊ី និងទីផ្សារហិរញ្ញវត្ថុពិភពលោកតែម្តង។ ទាក់ទិននឹងទណ្ឌកម្ម ជាលក្ខណៈបុគ្គលវិញ គឺគេនឹងមានការបង្កកទ្រព្យសម្បត្តិ និងហាមឃាត់ការធ្វើដំណើរ ទៅលើបុគ្គលមួយចំនួន ដែលស្និទ្ធនឹងរដ្ឋអំណាចរបស់រុស្ស៊ី។ បញ្ជីរាយនាមលំអិត គឺនឹងធ្វើក្នុងពេលឆាប់ៗនេះ។
អឺរ៉ុបខ្វែងគំនិតគ្នា រឿងទណ្ឌកម្មខ្លាំង ឬខ្សោយ
លោក ហ្សេឡិនស្គី ប្រធានាធិបតីអ៊ុយក្រែន បានបង្ហាញការខកចិត្តខ្លាំងណាស់ ដែលឃើញក្រុមប្រទេសលោកខាងលិច បានតែប្រកាសឈឺឆ្អាលថាជួយអ៊ុយក្រែន តែជាក់ស្តែងគ្មាននរណាម្នាក់ ដាច់ចិត្តបញ្ជូនកម្លាំងមកជួយប្រយុទ្ធ តទល់ជាមួយរុស្ស៊ីឡើយ។ អ៊ុយក្រែនឯកោតែម្នាក់ឯង។ ជាងនេះទៀត លោកហ្សេឡិនស្គី បានលើកឡើងថា ទណ្ឌកម្មសេដ្ឋកិច្ចដែលក្រុមប្រទេសលោកខាងលិច បានដាក់ទៅលើរុស្ស៊ី គឺវាមិនគ្រប់គ្រាន់ឡើយ។ រុស្ស៊ីមិនរសើបនោះទេ។ យ៉ាងណាមិញ ឯកអគ្គរដ្ឋទូតរុស្ស៊ីប្រចាំនៅស៊ុយអែដ បាននិយាយចំអកថា រុស្ស៊ីមិនទៅឈឺក្បាលហាលថ្ងៃ ជាមួយនឹងទណ្ឌកម្មរបស់អឺរ៉ុបនេះទេ។
យោងតាមប្រភពពីមន្ត្រីអឺរ៉ុប ដែលចូលរួមប្រជុំកាលពីយប់ថ្ងៃព្រហស្បតិ៍ គឺថាអឺរ៉ុបនិយាយគ្នាមិនត្រូវទេ បានជាកំណត់បានតែទណ្ឌកម្មបែបស្រាលៗបែបនេះ។ ក្នុងចំណោមប្រទេសអឺរ៉ុប មានប្រទេសខ្លះ ដូចជាអាល្លឺម៉ង់ អ៊ីតាលីជាដើម គឺគេគិតថា កុំអាលដាក់ទណ្ឌកម្មធ្ងន់ពេកនាពេលនេះ ទុកខ្លះសម្រាប់សង្កត់បន្ថែម នៅពេលក្រោយ។ ពោលគឺត្រូវកំណត់ជំហានទណ្ឌកម្ម ពីខ្លាំងទៅខ្សោយ ដោយអាស្រ័យទៅតាមស្ថានការណ៍វិវឌ្ឍន៍។ តែទន្ទឹមគ្នានេះ ប្រទេសផ្សេងទៀតដូចជាប៉ូឡូញ បានបង្ហាញការខកចិត្តណាស់ ដែលឃើញទណ្ឌកម្មខ្សោយបែបនេះ ព្រោះស្ថានការណ៍វាធ្ងន់រួចទៅហើយ។
ជាក់ស្តែង ទាក់ទិននឹងវិធានការធ្ងន់មួយ ដែលគេធ្លាប់បានលើកឡើងកន្លងមក ថាចង់ដករុស្ស៊ី ចេញពីប្រព័ន្ធប្រតិបត្តិការធនាគារអន្តរជាតិ ហៅកាត់ថា SWIFT ។ ក្នុងការប្រជុំយប់មិញនេះ គឺគ្មានការសម្រេចណាមួយទេ ទាក់ទិននឹងចំណុចនេះ ព្រោះដោយសារតែមានប្រទេសដូចជាអាល្លឺម៉ង់ ជំទាស់។ មន្ត្រីអឺរ៉ុបអះអាងថា ទាក់ទិននឹងប្រព័ន្ធ SWIFT គឺអឺរ៉ុបតែម្នាក់ឯង មិនអាចសម្រេចបានឡើយ គឺទាល់តែមានការព្រមព្រៀងពីដៃគូផ្សេងទៀត ដូចជាអាេមរិក និងជប៉ុនជាដើម ព្រោះវាជាប្រព័ន្ធរួម។ សម្រាប់ពេលនេះ ទាំងជប៉ុនទាំងអាមេរិកនៅស្ងាត់ទាំងអស់គ្នា។
ហើយទណ្ឌកម្មជាលក្ខណៈបុគ្គល ដាក់ទៅលើបុគ្គលលោកពូទីនផ្ទាល់តែម្តង ក៏គេមិនទាន់អាចសម្រេចបានដែរ។ ក្រុមប្រទេសដែលចង់ ដាក់ទណ្ឌកម្មជាដំណាក់នេះ គឺគេចង់បន្តទុកផ្លូវចំហរបន្តិច ដើម្បីឈានឈ្ពោះទៅរកការចរចាដោយសន្តិវិធី ជាមួយរុស្ស៊ី ព្រោះថាការពិតជាក់ស្តែង វាជាដំណោះស្រាយតែមួយគត់។ គេមិនអាចលើកទ័ពទៅច្បាំងជាមួយរុស្ស៊ីទេ។ ដូច្នេះមានតែការចរចាប៉ុណ្ណោះ។ យ៉ាងណាមិញ កាលពីយប់ម្សិលមិញនេះ លោកម៉ាក្រុង បានទូរស័ព្ទទៅនិយាយជាមួយលោកពូទីនម្តងទៀត ដើម្បីបញ្ជាក់ពីជំហរ របស់អឺរ៉ុបដែលថ្កោលទោសការឈ្លានពានមកលើអ៊ុយក្រែន។
ប្រទេសអឺរ៉ុបនឹងរកសំពាធ ដោយសារទណ្ឌកម្មខ្លួនឯង
ទំនាក់ទំនងសេដ្ឋកិច្ច រុស្ស៊ីជាមួយអឺរ៉ុប គឺវាជំពាក់វាក់វិនសម្បើមណាស់។ និយាយឲ្យងាយស្តាប់ គឺវារំពឹងគ្នា ហុចផលឲ្យគ្នាទៅវិញទៅមក។ អ្វីដែលអឺរ៉ុប រំពឹងរុស្ស៊ី គឺក្នុងវិស័យថាមពល ព្រោះអឺរ៉ុបទិញប្រេងរុស្ស៊ី និង ឧស្ម័នហ្កាសរុស្ស៊ី។ អឺរ៉ុបក៏នាំចូលស្រូវសាឡី និងគ្រាប់ធុញ្ញជាតិផ្សេងទៀត ពីរុស្ស៊ី ព្រមទាំងធនធានរ៉ែមួយចំនួនផងដែរ។
បច្ចុប្បន្ននេះ តម្លៃសាំង តម្លៃហ្កាស បានឡើងខ្ពស់ខ្លាំងរួចទៅហើយនៅអឺរ៉ុប។ បញ្ហានេះបានធ្វើឲ្យប៉ះពាល់ខ្លាំងណាស់ ដល់ជីវភាពរបស់ប្រជាជនតាមបណ្តាប្រទេសអឺរ៉ុបខ្លះ ហើយដែលអាចបង្កជាការតវ៉ា ប្រឆាំងរដ្ឋាភិបាល កើតជាវិបត្តិនយោបាយ។ ដូច្នេះមានការបារម្ភខ្លាំងណាស់ថា រុស្ស៊ីប្រាកដជាដាក់ទណ្ឌកម្មឆ្លើយតបវិញ ជាក់ជាមិនខាន ដែលធ្វើឲ្យប្រទេសអឺរ៉ុបខ្លះអាចជួបការលំបាក។ ជាក់ស្តែអាល្លឺម៉ង់ តែម្តងដែលរំពឹងខ្លាំង លើហ្កាសរបស់រុស្ស៊ី។ យ៉ាងណាមិញ អាល្លឺម៉ង់ប្រឆាំងមិនចង់ដករុស្ស៊ីចេញពីប្រព័ន្ធ SWIFT នេះ ក៏ដោយសារតែអាល្លឺម៉ង់បង់លុយជាដុល្លារ ឲ្យរុស្ស៊ីតាមប្រព័ន្ធនេះឯង។
ដូច្នេះ លោកពូទីន ដឹងពីចំណុចខ្សោយទាំងអស់នេះ បានជាហ៊ានផ្គើន ឈ្លានពានអ៊ុយក្រែន។ លោកពូទីនដឹងថា អឺរ៉ុបមិនរួមកម្លាំងសាមគ្គីគ្នាទេ ព្រោះថាមានប្រទេសខ្លះនៅខ្លាច ខ្លាចរងសំពាធសេដ្ឋកិច្ច។ ហើយបើនិយាយពីការចូលរួម បញ្ជូនទ័ពមកជួយអ៊ុយក្រែននោះ គឺវាកាន់គ្មានសោះតែម្តង។ ជាងនេះទៀត សេដ្ឋកិច្ចរុស្ស៊ីអាចមានបង្អែកចិន ចាំជួយទប់ ថែមទៀត។
ប្រជាជនអ៊ុយក្រែន ៥លាននាក់ អាចនឹងភៀសខ្លួនចាកចេញពីប្រទេស
សម្រាប់ពេលនេះ អ្នកដែលរងការលំបាកបំផុត គឺប្រជាជនអ៊ុយក្រែន ដែលបានរត់ភៀសខ្លួន ចេញពីសមរភូមិ និងគ្រាប់ប្លោងរបស់រុស្ស៊ី។ យោងតាមឧត្តមស្នងការដ្ឋាន ទទួលបន្ទុកជនភៀសខ្លួន នៃអង្គការសហប្រជាជាតិ គិតចាប់ពីថ្ងៃព្រសហ្បតិ៍ម្សិលមិញមក មានប្រជាជានអ៊ុយក្រែន យ៉ាងហោច១សែននាក់ហើយ ដែលបានរត់ភៀសខ្លួន ចេញពីផ្ទះសម្បែង។ ប្រជាជនអ៊ុយក្រែនកាន់តែច្រើន បានរត់ភៀសខ្លួន ចេញទៅតាមប្រទេសជាប់ព្រំដែនខាងលិច ដូចជាប៉ូឡូញ ហុងគ្រី និងរូម៉ានីជាដើម។
ប៉ូឡូញបានបើកព្រំដែន ឲ្យជនភៀសខ្លួនអ៊ុយក្រែនចូលទៅ តែមិនទាន់មានទីតាំងត្រឹមត្រូវឲ្យគ្នាស្នាក់នៅទេ។ អ្នកខ្លះសម្រាកនៅតាមកៅអីបង់ ក្នុងស្ថានីយ៍រថភ្លើង។ ហុងគ្រី ដែលជាប្រទេសត្បិតត្បៀតខ្លាំង ក៏បានប្រកាសដែរ ថានឹងបើកព្រំដែនទទួល។ ដោយឡែក អាជ្ញាធរប្រទេសរូម៉ានី បានបង្ហាញការព្រួយបារម្ភ ថាគេក៏គ្មានលទ្ធភាពទទួលជនភៀសខ្លួនអ៊ុយក្រែនដែរ គឺមានតែទឹកចិត្តតែអត់លទ្ធភាព។
សង្គ្រាមឈ្លានពាន ទើបតែចាប់ផ្តើមបានមួយថ្ងៃប៉ុណ្ណោះ ដូច្នេះបញ្ហាចលាចល ការរត់ភៀសខ្លួនរបស់ប្រជាជនអ៊ុយក្រែន នឹងកាន់តែមានច្រើនជាងនេះ។ អង្គការសហប្រជាជាតិប៉ាន់ស្មានថា យ៉ាងហោចណាស់ ប្រជាជនអ៊ុយក្រែន៥លាននាក់ អាចនឹងត្រូវរត់ភៀសខ្លួនចេញពីប្រទេស។ឆ្លើយតបនឹងបញ្ហាប្រឈមនេះ រដ្ឋមន្ត្រីក្រសួងមហាផ្ទៃអឺរ៉ុប នឹងជួបប្រជុំគ្នានៅចុងសប្តាហ៍នេះហើយ ដើម្បីចាត់វិធានការជួយផ្នែកមនុស្សធម៌ ដល់ជនភៀសខ្លួនអ៊ុយក្រែន។ ចំណែកអង្គការសហប្រជាជាតិ បានប្រកាសបញ្ចេញប្រាក់ចំនួន ២០លានដុល្លារ ដើម្បីចំណាយភ្លាមៗ ជួយដល់ជនភៀសខ្លួនអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ