វិបត្តិអ៊ុយក្រែន៖ប្រធានាធិបតីរុស្ស៊ីលោកពូទីនបានជ្រើសយកផ្លូវផ្គើន និងតតាំងទល់នឹងបស្ចិមលោក
ចុះផ្សាយនៅថ្ងៃ៖
ស្តាប់ - ០៧:០៤
វិបត្តិអ៊ុយក្រែនដែលរុស្ស៊ី និងបស្ចិមប្រទេសបានប្រឈមមុខដាក់គ្នាអស់ជាច្រើនសប្តាហ៍បានឈានដល់ផ្លូវរបត់មួយដោយនៅយប់ថ្ងៃចន្ទ ទី២១ កុម្ភៈ ប្រធានាធិបតីរុស្ស៊ីលោកពូទីនបានប្រកាសទទួលស្គាល់ជាផ្លូវការនូវឯករាជភាពរបស់ដែនដីអប្បគមចំនួនពីររបស់អ៊ុយក្រែននៅប៉ែកខាងកើត គឺដូនែតស្ក៍ និងលូហ្កាន់ស្ក៍។ ទន្ទឹមគ្នានេះ លោកពូទីនក៏បានចេញបញ្ជាឲ្យដាក់ពង្រាយកម្លាំងទ័ពរុស្ស៊ីដើម្បីរក្សាសន្តិភាពនៅក្នុងដែនដីអប្បគមទាំងពីរ។ សហគមន៍អន្តរជាតិបានបញ្ចេញប្រតិកម្មបរិហារ និងថ្កោលទោសចាស់ដៃលើទង្វើរបស់លោកពូទីន។
ការសម្រេចចិត្តរបស់ប្រធានាធិបតីរុស្ស៊ីលោកពូទីនបានធ្វើឡើងនៅក្នុងសុន្ទរកថាតាមកញ្ចក់ទូរទស្សន៍ថ្លែងទៅកាន់ប្រជាជាតិជិត ១ម៉ោងក្នុងយប់ថ្ងៃចន្ទ ទី២១ កុម្ភៈ។ នៅក្នុងសុន្ទរថា លោកពូទីនបានរម្លឹកពីមេរៀនប្រវត្តិសាស្រ្តដែលបញ្ជាក់ថា ប្រទេសអ៊ុយក្រែនសព្វថ្ងៃគ្រាន់ជាប្រទេសសិប្បនិម្មិត និងមិនអាចកាត់ផ្តាច់ពីរុស្ស៊ីបាន។ ធ្ងន់ធ្ងរជាងនេះ លោកពូទីនថែមទាំងបានចាត់ទុកអ៊ុយក្រែនជាអាយ៉ង និងស្ថិតក្រោមអាណានិគមនិយមរបស់អាមេរិក។ បន្ទាប់មក លោកពូទីនបានចោទជាថ្មីលើរបបដឹកនាំអ៊ុយក្រែនពីបទប្រល័យពូជសាសន៍លើពលរដ្ឋរុស្ស៊ី និងពលរដ្ឋអ្នកនិយាយភាសារុស្ស៊ីនៅអ៊ុយក្រែន ពិសេសនៅក្នុងតំបន់ដូនែតស្ក៍ និងលូហ្កាន់ស្ក៍នៅប៉ែកខាងកើតដែលជាតំបន់ស្ថិតក្រោមការកាន់កាប់របស់ក្រុមអ្នកទាមទារផ្តាច់ទឹកដីនិយមគាំទ្ររុស្ស៊ី។
តាមលោកពូទីន រុស្ស៊ីគ្មានជម្រើសអ្វីផ្សេងក្រៅពីទទួលស្គាល់ជាផ្លូវការនូវឯករាជភាពរបស់តំបន់ទាំងពីរ និងថា រុស្ស៊ីគួរណាស់តែត្រូវទទួលស្គាល់តាំងពីយូរមកហើយ។ ទន្ទឹមនឹងទទួលស្គាល់នូវឯករាជភាពរបស់តំបន់ទាំងពីរ លោកពូទីនក៏បានបញ្ជាឲ្យដាក់ពង្រាយទ័ព និងសាងសង់មូលដ្ឋានទ័ពនៅក្នុងតំបន់ទាំងពីរក្រោមហេតុផលថា ដើម្បីរក្សាសន្តិភាពនៅក្នុងតំបន់ទាំងពីរនោះ។ មានក្រិត្យប្រធានាធិបតីចំនួនពីរត្រូវបានលោកពូទីនចុះហត្ថលេខា ហើយនៅថ្ងៃអង្គារ ទី២២ កុម្ភៈ សភារុស្ស៊ីត្រូវឲ្យសច្ចាប័ន្រលើកិច្ចព្រមព្រៀងចំនួនពីររវាងរុស្ស៊ី និងដែនដីអប្បគមទាំងពីរសម្រាប់រយៈពេល ១០ឆ្នាំ។
បស្ចិមលោកបរាជ័យនៅចំពោះមុខលោកពូទីនក្នុងសំណុំរឿងអ៊ុយក្រែន?
អស់រយៈពេលជាច្រើនសប្តាហ៍ដែលបស្ចិមប្រទេស ពិសេសលោកម៉ាក្រុងក្នុងនាមជាប្រធានាធិបតីបារាំង និងជាប្រធានប្តូរវេនសហភាពអឺរ៉ុបបានជួបលោកពូទីនច្រើនដងដោយមានការជួបផ្ទាល់ និងជួបតាមទូរស័ព្ទដើម្បីព្យាយាមស្វែងរកដំណោះស្រាយឲ្យវិបត្តិអ៊ុយក្រែន។ ជាក់ស្តែងក្នុងថ្ងៃអាទិត្យ ទី២០ កុម្ភៈ លោកម៉ាក្រុងបានជួបសន្ទនាតាមទូរស័ព្ទជាមួយលោកពូទីនដល់ទៅ ២ដង។ លោកម៉ាក្រុងប្រាប់ថានៅក្នុងជំនួប លោកបានទទួលការយល់ព្រមពីលោកពូទីនក្នុងការបន្តដោះស្រាយបញ្ហាតាមផ្លូវចរចា និងថា លោកពូទីនសុខចិត្តមានជំនួបជាមួយប្រធានាធិបតីអាមេរិកលោកបៃដិនទៀតផង។ តែអ្វីៗបែរជាបានក្រឡាប់ចាក់ក្នុងយប់ថ្ងៃចន្ទ ទី២១ កុម្ភៈដែលលោកពូទីនបានប្រកាសទទួលស្គាល់ជាផ្លូវការនូវឯករាជភាពរបស់តំបន់ដូនែតស្ក៍ និងលូហ្កាន់ស្ក៍ស្ថិតប៉ែកខាងកើតអ៊ុយក្រែន។
គេអាចនិយាយបានថា បស្ចិមប្រទេសអសមត្ថភាព ឬពិបាកនិយាយជាមួយលោកពូទីន។ តែបើតាមមើលទៅ គឺបស្ចិមប្រទេសដែលកំពុងចាញ់បោកលោកពូទីន និងកំពុងត្រូវបានលោកពូទីនបង្វិលក្បាលស្រេចនឹងចិត្ត។ មែនទែនទៅ លោកពូទីនបានដឹង និងបានសម្រេចចិត្តរួចហើយនូវសេណារីយ៉ូដែលលោកត្រូវធ្វើ និងផ្លូវដែលលោកត្រូវដើរ។ ការចរចា និងការជួបសន្ទនាជាបន្តបន្ទាប់ជាមួយប្រធានាធិបតីបារាំង ឬនាយករដ្ឋមន្រ្តីអាល្លឺម៉ង់គ្រាន់ជាឆាកមួយដែលលោកពូទីនធ្វើឲ្យល្អមើលតែប៉ុណ្ណោះ។
វាមិនមែនជារឿងចៃដន្យទេដែលលោកពូទីនបានដាក់ពង្រាយទ័ពជាច្រើនម៉ឺននាក់ និងសព្វាវុធគ្រប់ធុននៅព័ទ្ធជុំវិញអ៊ុយក្រែន ហើយវាក៏មិនមែនជាចៃដន្យដែរដែលលោកពូទីនធ្វើសមយុទ្ធទ្រង់ទ្រាយធំជាមួយប្រទេសបេឡារុសនៅជាប់ព្រំដែនអ៊ុយក្រែន៕
បស្ចិមប្រទេសគ្មានផ្លូវផ្សេងក្រៅពីបន្តប្រើទណ្ឌកម្មប្រឆាំងរុស្ស៊ី?
នៅចំពោះមុខមហិច្ឆតារបស់មនុស្សខ្លាំងរុស្ស៊ីលោកពូទីនពេលនេះ សន្លឹកបៀរដែលបស្ចិមលោកធ្លាប់បានប្រើ និងអាចបន្តប្រើប្រឆាំងរុស្ស៊ី គឺទណ្ឌកម្ម។ ត្រង់ចំណុចនេះ លោកពូទីនបានដឹងច្បាស់ ព្រោះលោកធ្លាប់បានទទួល និងកំពុងបន្តទទួលមកដល់សព្វថ្ងៃ។ ចូរកុំភ្លេចថា មហិច្ឆតារបស់លោកពូទីនចំពោះអ៊ុយក្រែនមិនមែនទើបមាននៅលើកនេះទេ។ ក្នុងឆ្នាំ ២០១៤ លោកពូទីនបានក្រសោបយកតំបន់គ្រីមេរបស់អ៊ុយក្រែន និងដែលកាលណោះ រុស្ស៊ីក៏បានទទួលទណ្ឌកម្មពីបស្ចិមលោកដូចគ្នា។ ដូច្នេះសម្រាប់លោកពូទីន ទទួលទណ្ឌកម្មបន្ថែមទៀតក៏វាមិនថ្វីដែរឲ្យតែលោកសម្រេចបាននូវមហិច្ឆតារបស់ខ្លួន។
មហិច្ឆតានោះគឺបន្តច្រឹបយកដែនដីអ៊ុយក្រែនមួយតំបន់ម្តងៗ។ ឥឡូវនេះ សហរដ្ឋអាមេរិក សហភាពអឺរ៉ុប ប្រទេសបារាំង អាល្លឺម៉ង់ និងប្រទេសលោកខាងលិចមួយចំនួនកំពុងសិក្សា និងរៀបចំទណ្ឌកម្មប្រឆាំងរុស្ស៊ី។ គេនៅមិនទាន់ដឹងថា តើជាប្រភេទទណ្ឌកម្មអ្វីខ្លះទេ។ តែលោកពូទីនបានរង់ចាំស្វាគមន៍នូវទណ្ឌកម្មគ្រប់ប្រភេទ។ តើនឹងមានអ្វីកើតឡើងបន្តទៀតនៅពេលខាងមុខ?។ គេអាចឆ្លើយនឹងសំណួរនេះដោយត្រូវរង់ចាំមើលថា តើរុស្ស៊ីនឹងបញ្ជូនទ័ពទៅកាន់តំបន់ដូនែតស្ក៍ និងលូហ្កាន់ស្ក៍ក្នុងទ្រង់ទ្រាយ និងរូបភាពបែបណា ព្រោះចូរកុំភ្លេចថា វត្តមានទ័ពរុស្ស៊ីនៅក្នុងតំបន់ទាំងពីរប្រៀបដូចជាការប្រឈមមុខដាក់គ្នាផ្ទាល់រវាងទ័ពអ៊ុយក្រែន និងទ័ពរុស្ស៊ី។ នៅក្នុងករណីនេះ ហានិភ័យនៃការផ្ទុះសង្រ្គាមមានច្រើន។
តើអាចនៅមានដំណោះស្រាយផ្លូវទូតទៀតដែរ ឬអត់?។ គេពិបាកផ្តល់ចម្លើយចំពោះសំណួរនេះ។ អ្វីដែលគេអាចនិយាយបាន ការប្រកាសទទួលស្គាល់ជាផ្លូវការនូវឯករាជភាពរបស់ដែនដីដូនែតស្ក៍ និងលូហ្កាន់ស្ក៍របស់លោកពូទីនមានន័យស្មើនឹងការរលាយអស់នូវគ្រប់កិច្ចព្រមព្រៀងដែលមានកន្លងមកទាក់ទងនឹងតំបន់ទាំងពីរ ពិសេសកិច្ចព្រមព្រៀងក្រុងមីនស្ក៍ឆ្នាំ ២០១៥ និងកិច្ចចរចាទម្រង់ណរម៉ង់ឌីរវាងបារាំង អាល្លឺម៉ង់ រុស្ស៊ី និងអ៊ុយក្រែន។ ឃើញថា ផ្លូវទូតនៅក្នុងដំណោះស្រាយវិបត្តិអ៊ុយក្រែនរួញកាន់តែតូច។ តែក្នុងថ្ងៃអង្គារ ទី២២ កុម្ភៈ រុស្ស៊ីបានធានាពីការត្រៀមខ្លួនចរចាគ្រប់ពេលដោយរក្សាទុកដដែលនូវគម្រោងជំនួបជាមួយប្រមុខការទូតអាមេរិកលោកប៊្លីនកិននៅថ្ងៃព្រហស្បតិ៍ ទី២៤ កុម្ភៈក្នុងទីក្រុងហ្សឺណែវ ប្រទេសស៊្វីស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ