កាតា៖ក្រុមប្រទេសនាំឧស្ម័នចេញបើកជំនួបកំពូលនៅក្នុងបរិបទនៃវិបត្តិអ៊ុយក្រែន
ចុះផ្សាយនៅថ្ងៃ៖
ស្តាប់ - ០៦:១៤
ក្រុមប្រទេសនាំឧស្ម័នចេញបើកជំនួបកំពូលចាប់ពីថ្ងៃអាទិត្យ ទី២០ កុម្ភៈនៅក្នុងប្រទេសកាតា។ នៅក្នុងថ្ងៃដំបូង ជំនួបកំពូលបានចាប់ផ្តើមត្រឹមថ្នាក់រដ្ឋមន្រ្តី និងបន្តដោយថ្នាក់ប្រមុខរដ្ឋ និងប្រមុខរដ្ឋាភិបាលនៅថ្ងៃអង្គារ ទី២២ កុម្ភៈ។ កម្មវត្ថុនៃជំនួបកំពូល គឺនិយាយពីស្ថានភាពឧស្ម័នក្នុងលោកដោយពិនិត្យមើលការផ្គត់ផ្គង់ និងតម្រូវការ។ តែអ្វីជាការកត់សម្គាល់ ជំនួបកំពូលលើកនេះបានធ្វើឡើងនៅក្នុងបរិបទនៃវិបត្តិអ៊ុយក្រែនដែលក្រុមបស្ចិមប្រទេសកំពុងបារម្ភពីការវាយប្រហារអ៊ុយក្រែនរបស់រុស្ស៊ី។
សព្វថ្ងៃនេះ គេបានឮ និងស្គាល់ឈ្មោះអង្គការនៃក្រុមប្រទេសផលិតប្រេង ឬក្រុមប្រទេសនំាប្រេងចេញដែលហៅកាត់ Opep។ តែបើគេនិយាយពីថាមពល គឺមានទាំងប្រេង និងឧស្ម័ន។ តាមពិតទៅ ក្រុមប្រទេសផលិតឧស្ម័ន ឬក្រុមប្រទេសនាំឧស្ម័នចេញទើបបានបង្កើតឡើងក្នុងខែឧសភា ឆ្នាំ ២០០១ ក្រោមឈ្មោះ« Gas Exporting Countries Forum »ឬប្រែថា វេទិកានៃក្រុមប្រទេសនាំឧស្ម័នចេញ។ នៅក្នុងវេទិកានេះ មានប្រទេសសមាជិកពេញសិទ្ធិចំនួន ១៣ ប្រទេស និងប្រទេសអ្នកសង្កេតការណ៍ចំនួន ៧ប្រទេស
សមាជិកពេញសិទ្ធិទាំង ១៣ប្រទេសមាន ៥ប្រទេសមកពីអាហ្រ្វិក ៤ប្រទេសមកពីតំបន់មជ្ឈិមបូព៌ា ៣ប្រទេសមកពីអាមេរិកខាងត្បូង និង ១ប្រទេសមកពីអឺរ៉ុប។ ចំណែក ៧ប្រទេសដែលជាប្រទេសអ្នកសង្កេតការណ៍មាន ២ប្រទេសមកពីអាស៊ីកណ្តាល ១ប្រទេសមកពីអឺរ៉ុប ១ប្រទេសមកពីអាមេរិកខាងត្បូង ១ប្រទេសមកពីអាហ្រ្វិក និង ២ប្រទេសមកពីតំបន់មជ្ឈិមបូព៌ា។ តែអ្វីជាការកត់សម្គាល់ នៅក្នុងចំណោមប្រទេសសមាជិកនៃវេទិកាក្រុមប្រទេសនាំឧស្ម័នចេញ មានភាគច្រើនក៏ជាសមាជិកនៃក្រុមប្រទេសនំាប្រេងចេញហៅកាត់ Opep ដែរ មានន័យថា ប្រទេសទាំងនោះមានទាំងប្រេង និងឧស្ម័ន។ សមាជិកទាំង ១៣ប្រទេសនៃវេទិកាក្រុមប្រទេសនាំឧស្ម័នចេញតំណាងឲ្យជាង ៧០% នៃចំនួនស្តុកឧស្ម័នក្នុងលោក។
សហភាពអឺរ៉ុបស្វែងរកការផ្គត់ផ្គង់ឧស្ម័នក្រៅពីរុស្ស៊ី
ជំនួបកំពូលនៃវេទិកាក្រុមប្រទេសនាំឧស្ម័នចេញបានរៀបចំឡើងក្នុងពេលដែលឧស្ម័នកំពុងឡើងថ្លៃ និងចំពេលអឺរ៉ុបកំពុងព្យាយាមស្វែងរកប្រភពផ្គត់ផ្គង់ឧស្ម័នពីប្រទេសផ្សេងក្រៅពីរុស្ស៊ី។ សព្វថ្ងៃនេះ អឺរ៉ុបបានពឹងផ្អែកខ្លាំងលើឧស្ម័នរុស្ស៊ី។ មានឧស្ម័នចំនួន ៤០% របស់អឺរ៉ុបបាននាំចូលពីរុស្ស៊ីនិងមានតែ ៥% ដែលអឺរ៉ុបនាំចូលពីកាតា។ បើរុស្ស៊ីវាយប្រហារចូលឈ្លានពានអ៊ុយក្រែនដូចដែលបស្ចិមលោកបារម្ភ នោះនឹងនាំឲ្យការផ្គត់ផ្គង់ឧស្ម័នរបស់រុស្ស៊ីជួបភាពរអាក់រអួល។ ដូច្នេះគេអាចនិយាយបានថា ដើម្បីអាចបន្តផ្គត់ផ្គង់លើតម្រូវការរបស់ខ្លួន និងដើម្បីបញ្ជៀសពីការពឹងផ្អែកខ្លាំងលើឧស្ម័នរុស្ស៊ី អឺរ៉ុបកំពុងស្វែងរកទិញឧស្ម័នពីប្រទេសផ្សេង ពិសេសពីប្រទេសសមាជិកនៃវេទិកាក្រុមប្រទេសនាំឧស្ម័នចេញ។
តែមានបញ្ហាមួយចំនួនកំពុងចោទឡើង ទី១ មានប្រទេសខ្លះនៅក្នុងចំណោមប្រទេសសមាជិកនៃវេទិកាក្រុមប្រទេសនាំឧស្ម័នចេញបានបញ្ជាក់ថា ពួកគេមិនអាចបង្កើនផលិតកម្មឧស្ម័នបន្ថែម ឬអាចបង្កើនបន្ថែមបានតិចតួចប៉ុណ្ណោះ និងទី២ មានប្រទេសខ្លះទៀតបានលើកឡើងថា ដើម្បីអាចផ្គត់ផ្គង់ឧស្ម័នឲ្យអឺរ៉ុបយូរអង្វែងបាន ពួកគេត្រូវបោះទុនវិនិយោគបន្ថែមក្នុងទឹកប្រាក់ដ៏ច្រើនសម្បើមដើម្បីធ្វើអាជីវកម្មលើអណ្តូងឧស្ម័នផ្សេងទៀតក្នុងគោលដៅបង្កើនផលិតកម្ម។ នៅក្នុងករណីនេះ ប្រទេសទាំងនោះបានទាមទារឲ្យអឺរ៉ុបចុះកិច្ចសន្យាទិញឧស្ម័នរបស់ពួកគេក្នុងរយៈពេលយូរ។
ចំណោទនៅត្រង់ថា សហភាពអឺរ៉ុបស្ទាក់ស្ទើរក្នុងការចុះកិច្ចសន្យារយៈពេលយូរសម្រាប់ ១០ឆ្នាំ ១៥ឆ្នាំ ឬ ២០ឆ្នាំ។ តែភាពស្ទាក់ស្ទើរនេះអាចធ្វើឲ្យសហភាពអឺរ៉ុបពិចារណាជាថ្មី បើវិបត្តិអ៊ុយក្រែននឹងក្រឡាប់ចាក់ក្នុងផ្លូវអាក្រក់ ព្រោះបើសង្រ្គាមផ្ទុះមែន អឺរ៉ុបប្រហែលជាគ្មានជម្រើសអ្វីផ្សេងក្រៅពីទិញឧស្ម័នរបស់ប្រទេសផ្សេងទេ។
កាតាចង់ធ្វើជាអន្តរការីក្នុងវិបត្តិអ៊ុយក្រែន និងក្នុងសំណុំរឿងនុយក្លេអ៊ែរអ៊ីរ៉ង់?
គេអាចនិយាយជារឿងចៃដន្យដែលជំនួបកំពូលនៃវេទិកាក្រុមប្រទេសនាំឧស្ម័នចេញរៀបចំឡើង ខណៈដែលសង្រ្គាមពាក្យសម្តីកំពុងបន្តមានយ៉ាងផុសផុលរវាងរុស្ស៊ី និងបស្ចិមលោក ពិសេសអាមេរិកនៅក្នុងវិបត្តិអ៊ុយក្រែន។ តែដោយរុស្ស៊ីជាប្រទេសសមាជិកម្នាក់នៃវេទិកាក្រុមប្រទេសនាំឧស្ម័នចេញ ប្រទេសកាតាក្នុងនាមជាម្ចាស់ផ្ទះរៀបចំវេទិកាក្រុមប្រទេសនាំឧស្ម័នចេញឆ្នាំ ២០២២ ចង់យករឿងអ៊ុយក្រែនទៅដាក់ក្នុងរបៀបវារៈនៃជំនួបកំពូល។ ពិតណាស់ គោលដៅស្នូល និងប្រពៃណីនៃជំនួបកំពូលរបស់វេទិកាក្រុមប្រទេសនាំឧស្ម័នចេញ គឺពិនិត្យមើលស្ថានភាពរួមនៃសន្តិសុខឧស្ម័នក្នុងលោកដោយផ្តោតសំខាន់លើតម្រូវការ និងការផ្គត់ផ្គង់។
តែក្នុងពេលដែលវិបត្តិអ៊ុយក្រែនកំពុងលេចត្រដែតខ្លាំង កាតាចង់ឆក់យកឱកាសនៃជំនួបកំពូលរបស់វេទិកាក្រុមប្រទេសនាំឧស្ម័នចេញដើម្បីស្នើខ្លួនធ្វើជាអន្តរការីនៅក្នុងវិបត្តិអ៊ុយក្រែនពេលនេះ។ ក្រៅពីវិបត្តិអ៊ុយក្រែន កាតាក៏ចង់ឆ្លៀតយកឱកាសនេះដើម្បីធ្វើជាអន្តរការីនៅក្នុងសំណុំរឿងនុយក្លេអ៊ែរអ៊ីរ៉ង់ ខណៈដែលកិច្ចចរចាដើម្បីស្រោចស្រង់កិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ ២០១៥ កំពុងឈានដល់ដំណាក់ការចុងក្រោយរវាងអ៊ីរ៉ង់ និងក្រុមប្រទេសហត្ថលេខីនៃកិច្ចព្រមព្រៀងឆ្នាំ ២០១៥។ ចូរកុំភ្លេចថា អ៊ីរ៉ង់ក៏ជាប្រទេសសមាជិកនៃវេទិកាក្រុមប្រទេសនាំឧស្ម័នចេញដូចរុស្ស៊ីដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ