អាមេរិក៖រុស្ស៊ីកំពុងបង្កើនការរៀបចំចូលឈ្លានពានអ៊ុយក្រែនក្រោមទ្រង់ទ្រាយធំនៅពាក់កណ្តាលខែកុម្ភៈនេះ
ចុះផ្សាយនៅថ្ងៃ៖
ស្តាប់ - ០៦:១៧
វិបត្តិអ៊ុយក្រែនកំពុងបន្តជាសំណុំរឿងក្តៅរវាងក្រុមបស្ចិមប្រទេស និងរុស្ស៊ី។ តាមក្រុមអ្នកទទួលខុសត្រូវអាមេរិក រុស្ស៊ីកំពុងបង្កើនការរៀបចំចូលឈ្លានពានអ៊ុយក្រែនក្រោមទ្រង់ទ្រាយធំ។ ព័ត៌មាននេះបានធ្លាក់មក ចំពេលដែលសហភាពអឺរ៉ុបកំពុងបន្តប្រើយន្តការការទូតដើម្បីដោះស្រាយវិបត្តិ។ ប្រធានាធិបតីបារាំងលោកម៉ាក្រុងក្នុងនាមជាប្រធានប្តូរវេនសហភាពអឺរ៉ុបបានជួបសន្ទនាតាមទូរស័ព្ទក្នុងថ្ងៃសៅរ៍ ទី៥ កុម្ភៈជាមួយនាយករដ្ឋមន្រ្តីអង់គ្លេស និងប្រមុខអង្គការអូតង់។ កិច្ចសន្ទនាបានធ្វើឡើងមុននឹងលោកម៉ាក្រុងធ្វើដំណើរទៅកាន់រុស្ស៊ី និងអ៊ុយក្រែននៅថ្ងៃចន្ទ ទី៧ និងថ្ងៃអង្គារ ទី៨ កុម្ភៈ។
អ្វីដែលក្រុមអ្នកទទួលខុសត្រូវអាមេរិកបានលើកឡើងជាព័ត៌មានរបស់ក្រសួងស៊ើបការណ៍សម្ងាត់អាមេរិក។ តាមក្រុមអ្នកទទួលខុសត្រូវអាមេរិក មានទាហានរុស្ស៊ីចំនួន ១១០ ០០០នាក់កំពុងឈរជើងនៅតាមព្រំដែនអ៊ុយក្រែន និងនៅពេលខាងមុខ រុស្ស៊ីអាចនឹងបន្ថែមទ័ពឲ្យដល់ចំនួន ១៥០ ០០០នាក់ដែលគ្រប់គ្រាន់ដើម្បីវាយអ៊ុយក្រែនក្រោមទ្រង់ទ្រាយធំនៅពាក់កណ្តាលខែកុម្ភៈនេះ។ ក្រសួងស៊ើបការណ៍សម្ងាត់អាមេរិកបានបញ្ជាក់នៅក្នុងសេចក្តីសន្និដ្ឋានរបស់ខ្លួនថា រុស្ស៊ីបាន និងកំពុងដាក់ពង្រាយកម្លាំងទ័ព និងគ្រឿងសព្វាវុធកាន់តែច្រើននៅជុំវិញអ៊ុយក្រែន។
នៅប៉ែកខាងជើង ខាងកើត និងខាងត្បូងអ៊ុយក្រែន ពិសេសនៅតំបន់គ្រីមេដែលរុស្ស៊ីបានក្រសោបយកពីអ៊ុយក្រែនក្នុងឆ្នាំ ២០១៤ រុស្ស៊ីបានដាក់ពង្រាយទ័ពចំនួន ៨០កងវរសេនាតូច និងបន្ថែមចំនួន ១៤កងវរសេនាតូចទៀតដោយដកយកពីកន្លែងផ្សេងទៀត ពិសេសពីតំបន់ Vladivostok ដែលស្ថិតនៅចុងបូព៌ារុស្ស៊ី។ បន្ថែមពីនេះ មានកម្លាំងទ័ពពិសេសរុស្ស៊ីប្រមាណជា ១ ៥០០នាក់នឹងត្រូវទៅដល់ព្រំដែនអ៊ុយក្រែន រុស្ស៊ីនៅមួយសប្តាហ៍ខាងមុខ។ ក្រៅពីវត្តមានទ័ពជើងគោក រុស្ស៊ីបានដាក់ពង្រាយយន្តហោះចម្បាំង យន្តហោះទម្លាក់គ្រាប់បែក គ្រាប់មីស៊ីល និងខែលប្រឆាំងយន្តហោះនៅតាមព្រំដែនអ៊ុយក្រែន។ បន្ទាប់មក នៅមានកម្លាំងទ័ពជើងទឹកដែលរុស្ស៊ីបានដាក់ពង្រាយយ៉ាងច្រើននៅក្នុងសមុទ្រខ្មៅ។
ប្រធានាធិបតីរុស្ស៊ីលោកពូទីនគ្រោងសេណារីយ៉ូចំនួនពីរ?
សម្រាប់អាមេរិក អ៊ុយក្រែនប្រហែលចៀសមិនផុតពីការចូលឈ្លានពានរបស់រុស្ស៊ីទេ។ តែក្រសួងស៊ើបការណ៍សម្ងាត់អាមេរិកក៏មិនភ្លេចលំអិតទេថា ខ្លួនក៏មិនអាចអះអាងដោយសុទិដ្ឋិនិយមថា តើប្រធានាធិបតីរុស្ស៊ីលោកពូទីនបានសម្រេចចិត្តហើយឬក្នុងការវាយប្រហារ ឬមិនវាយប្រហារអ៊ុយក្រែន។ អ្វីដែលក្រសួងស៊ើបការណ៍សម្ងាត់អាមេរិកបានមើលឃើញពេលនេះ លោកពូទីនបានបង្ហាញចេញនូវគ្រប់សេណារីយ៉ូទាំងអស់ ពិសេសសេណារីយ៉ូចំនួនពីរ។ សេណារីយ៉ូទី១ គឺការវាយក្រសោបយកត្រឹមតំបន់ដុនបាស់ដែលស្ថិតនៅប៉ែកខាងកើតអ៊ុយក្រែន។ តំបន់ដុនបាស់ជាតំបន់ដែលកំពុងមានជម្លោះប្រដាប់អាវុធរវាងអ៊ុយក្រែន និងក្រុមអ្នកទាមទារផ្តាច់ទឹកដីនិយមដែលគាំទ្ររុស្ស៊ី។
សេណារីយ៉ូទី២ គឺសេណារីយ៉ូចាស់ដៃដោយការវាយប្រហារលើអ៊ុយក្រែនទាំងមូលដែលឈានទៅទម្លាក់ប្រធានាធិបតីអ៊ុយក្រែនបច្ចុប្បន្នលោកវ៉ូឡូឌីមៀរ ហ្សេឡេនស្គីតែក្នុងរយៈពេល ៤៨ម៉ោង។ នៅក្នុងសេណារីយ៉ូទី២ នេះ ក្រសួងស៊ើបការណ៍សម្ងាត់អាមេរិកមើលឃើញពីការអាចបាត់បង់ជីវិតមនុស្សយ៉ាងច្រើន ក្នុងនោះ អាចមានស្លាប់ជនស៊ីវិលពី ២៥ ០០០ ទៅ ៥០ ០០០នាក់ អាចមានស្លាប់ទ័ពអ៊ុយក្រែនពី ៥ ០០០ ទៅ ២៥ ០០០នាក់ និងអាចមានស្លាប់ទ័ពរុស្ស៊ីពី ៣ ០០០ ទៅ ១០ ០០០នាក់។ បន្ទាប់មក ក៏នឹងអាចមានជនភៀសខ្លួនចន្លោះពី ១លានទៅ ៥លាននាក់ ពិសេសភៀសខ្លួនទៅកាន់ប្រទេសប៉ូឡូញ។
បស្ចិមប្រទេស និងរុស្ស៊ីបន្តទុកផ្លូវការទូតឲ្យនៅចំហ
តាមពិតទៅ នេះមិនមែនជាលើកទី១ដែលអាមេរិកបានលើកឡើង និងបានព្រមានពីការវាយប្រហារអ៊ុយក្រែនឆាប់ៗរបស់រុស្ស៊ី ខណៈដែលរុស្ស៊ីកំពុងត្រៀមកម្លាំងទ័ព និងសព្វាវុធគ្រប់ធុននៅតាមព្រំដែនអ៊ុយក្រែន។ មួយវិញទៀត ប្រទេសលោកខាងលិចផ្សេងទៀត រួមទាំងអង្គការអូតង់ផងក៏បានមើលឃើញដូចអាមេរិកដែរ។ អ៊ីចឹងហើយបានជាកន្លងមក ក្រុមបស្ចិមប្រទេស ពិសេសអាមេរិកបានប្រកាសដាក់ទ័ពរបស់ខ្លួនចំនួន ៨ ៥០០នាក់ឲ្យប្រុងជើងការ និងបានបញ្ជូនទ័ពចំនួន ៣ ០០០នាក់បន្ថែមទៅកាន់អឺរ៉ុបខាងកើត ពិសេសទៅកាន់ប៉ូឡូញដើម្បីពង្រឹងកម្លាំងអូតង់។
តែក្នុងពេលជាមួយគ្នា និងក្រៅពីបង្ហាញសាច់ដុំដាក់គ្នា យន្តការក្នុងការកាត់បន្ថយភាពតានតឹង និងស្វែងរកដំណោះស្រាយតាមផ្លូវទូតក៏កំពុងបន្តមាន ពិសេសពីសហភាពអឺរ៉ុប។ ជាក់ស្តែងក្នុងថ្ងៃសៅរ៍ ទី៥ កុម្ភៈ ប្រធានាធិបតីបារាំងលោកម៉ាក្រុងក្នុងនាមជាប្រធានប្តូរវេនសហភាពអឺរ៉ុបបានជួបសន្ទនាតាមទូរស័ព្ទជាមួយនាយករដ្ឋមន្រ្តីអង់គ្លេសលោកបូរីស ចនស៊ុន និងប្រមុខអង្គការអូតង់លោកយែន ស្តុលទែនប៊ែរ។ ជាមួយលោកស្តុលទែនប៊ែរ លោកម៉ាក្រុងបានទទូចពីភាពចាំបាច់ក្នុងការបន្តការងារតាមកិច្ចសន្ទនា។ តាមលោកម៉ាក្រុង នៅពេលដែលគេសម្រេចមិនជ្រលក់មាត់រកគ្នា គេមិនអាចដោះស្រាយបានជម្លោះណាមួយទេ។
គឺដោយយល់ឃើញពីភាពចាំបាច់ និងឲ្យតម្លៃលើកិច្ចសន្ទនាដែលលោកម៉ាក្រុងនឹងទៅជួបប្រធានាធិបតីរុស្ស៊ីលោកពូទីនផ្ទាល់ក្នុងក្រុងមូស្គូនៅថ្ងៃចន្ទ ទី៧ កុម្ភៈ និងទៅជួបប្រធានាធិបតីអ៊ុយក្រែនលោកវ៉ូឡូឌីមៀរ ហ្សេឡេនស្គីផ្ទាល់ក្នុងទីក្រុងគៀវនៅថ្ងៃអង្គារ ទី៨ កុម្ភៈ។ សរុបមកវិញ ផ្លូវទូតនៅមិនទាន់បានបិទនៅឡើយទេ ទាំងខាងបស្ចិមលោក និងទាំងខាងរុស្ស៊ី។ ត្រង់ថា តើផ្លូវទូតនេះអាចនឹងឈានទៅកាត់បន្ថយភាពតានតឹង និងរកបានដំណោះស្រាយ ឬអត់ជារឿងមួយដែលគេត្រូវរង់ចាំមើលបន្តទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ