អង់គ្លេសចោទរុស្ស៊ីពីការព្យាយាមរំលំមេដឹកនាំអ៊ុយក្រែនសព្វថ្ងៃដើម្បីលើកបន្តុបមេដឹកនាំថ្មីនិយមរុស្ស៊ី
ចុះផ្សាយនៅថ្ងៃ៖
ស្តាប់ - ០៧:២២
សំណុំរឿងរវាងបស្ចិមលោក និងរុស្ស៊ីទាក់ទងនឹងអ៊ុយក្រែនកំពុងបន្តយ៉ាងក្តៅគគុក។ នៅថ្ងៃសៅរ៍ ទី២២ មករា អង់គ្លេសតាមរយៈប្រមុខការទូតលោកស្រីលី ត្រឺសបានចោទរុស្ស៊ីពីបទព្យាយាមផ្តួលរំលំរបបដឹកនាំអ៊ុយក្រែនសព្វថ្ងៃដើម្បីលើកបន្តុបរបបដឹកនាំថ្មីជាមួយនឹងមេដឹកនាំថ្មីដែលនិយមរុស្ស៊ី។ សហរដ្ឋអាមេរិកបានសម្តែងក្តីបារម្ភជាពន់ពេកចំពោះព័ត៌មានរបស់អង់គ្លេសពេលនេះ។ តែរុស្ស៊ីបានអំពាវនាវឲ្យអង់គ្លេសបញ្ឈប់ការផ្សព្វផ្សាយនូវព័ត៌មានមិនពិត និងគ្មានសមហេតុផល។
តាមរយៈសេចក្តីប្រកាសព័ត៌មានមួយ ប្រមុខការទូតអង់គ្លេសលោកស្រី លី ត្រឺសបានបរិហារពីវិសាលភាពនៃសកម្មភាពរបស់រុស្ស៊ីក្នុងការធ្វើឲ្យអ៊ុយក្រែនចុះខ្សោយ។ ដោយមិននិយាយចំឈ្មោះប្រធានាធិបតីរុស្ស៊ីលោកពូទីន លោកស្រីលី ត្រឺសបានបញ្ជាក់ច្បាស់ៗថា រដ្ឋាភិបាលក្រុងមូស្គូកំពុងព្យាយាមលើកបន្តុបមេដឹកនាំអ៊ុយក្រែនម្នាក់ដែលមាននិន្នាការរករុស្ស៊ី។ នៅក្នុងន័យនេះ និងដើម្បីអាចសម្រេចគោលដៅរបស់ខ្លួនបាន រុស្ស៊ីត្រូវចូលឈ្លានពានអ៊ុយក្រែន និងកាន់កាប់អ៊ុយក្រែន នេះជាការបញ្ជាក់បន្ថែមរបស់ប្រមុខការទូតអង់គ្លេស។ លោកស្រីលី ត្រឺសមិនបានប្រាប់ពីប្រភពព័ត៌មានដែលលោកស្រីទទួលបានទេ តែបានត្រឹមអះអាងពីព័ត៌មានដែលអង់គ្លេសមានក្នុងដៃ។
កាន់តែច្បាស់ជាងនេះ ក្រសួងការបរទេសអង់គ្លេសបានលើកឡើងនូវឈ្មោះឥស្សរជនអ៊ុយក្រែនមួយចំនួនដែលរុស្ស៊ីអាចជ្រើសតាំងជាមេដឹកនាំថ្មីនៅអ៊ុយក្រែន។ ឥស្សរជនអ៊ុយក្រែនទាំងនោះរួមមាន ទី១ លោកយ៉េវហ្គេនី មួរ៉ាយ៉េវ អតីតអ្នកតំណាងរាស្រ្ត ទី២ លោកស៊ែរហ្គី អាប៊ូហ្សូស អតីតឧបនាយករដ្ឋមន្រ្តីទី១ និងអតីតនាយករដ្ឋមន្រ្តីស្តីទី ទី៣ លោកអង់ឌ្រី គ្លូយ៉េវ អតីតនាយករដ្ឋបាលប្រធានាធិបតីក្នុងជំនាន់ប្រធានាធិបតីលោកវ៉ិចទ័រ អ៊ីយ៉ានូកូវ៉ិច ទី៤ លោកវូឡូឌីមៀរ ស៊ីកូវ៉ិច អតីតលេខាធិការរងនៃក្រុមប្រឹក្សាសន្តិសុខ និងការពារជាតិ ឬមួយក៏លោកមីកូឡា អាហ្សារ៉ូវ អតីតនាយករដ្ឋមន្រ្តី។
ក្នុងចំណោមឥស្សរជនអ៊ុយក្រែនខាងលើ មានអ្នកខ្លះកំពុងមានទំនាក់ទំនងជាមួយក្រសួងស៊ើបការណ៍សម្ងាត់រុស្ស៊ីដែលកំពុងចូលរួមរៀបចំផែនការវាយប្រហារអ៊ុយក្រែន នេះបើតាមក្រសួងការបរទេសអង់គ្លេសដោយមិនភ្លេចបន្ថែមថា អតីតអ្នកតំណាងរាស្រ្តអ៊ុយក្រែនលោកយ៉េវហ្គេនី មួរ៉ាយ៉េវត្រូវបានគេចាត់ទុកជាមនុស្សម្នាក់ដែលរុស្ស៊ីចង់ជ្រើសតាំងជាមេដឹកនាំថ្មីនៅអ៊ុយក្រែន។
ព័ត៌មានលើកឡើងដោយអង់គ្លេសអាចបញ្ជាក់ពីព័ត៌មានរបស់សហរដ្ឋអាមេរិក
ព័ត៌មានទម្លាយដោយអង់គ្លេសពេលនេះហាក់បានឆ្លើយតបនឹងព័ត៌មានមួយចំនួនដែលអាមេរិកបានលើកឡើង។ តាមពិត អាមេរិកមិនបានចោទរុស្ស៊ីចំៗពេកដូចអង់គ្លេសទេ។ តែក្នុងថ្ងៃព្រហស្បតិ៍ ទី២០ មករា អាមេរិកបានដាក់ទណ្ឌកម្មលើឥស្សរជនអ៊ុយក្រែនចំនួន ៤នាក់ ក្នុងនោះមាន ២នាក់ជាតំណាងរាស្រ្ត។ មួយវិញទៀត ក្នុងចំណោមឥស្សរជនអ៊ុយក្រែនទាំង ៤នាក់ក៏មានឈ្មោះវូឡូឌីមៀរ ស៊ីកូវ៉ិច ដែលក្រសួងការបរទេសអង់គ្លេសបានលើកឡើងដែរ។ វូឡូឌីមៀរ ស៊ីកូវ៉ិច ជាអតីតលេខាធិការរងនៃក្រុមប្រឹក្សាសន្តិសុខ និងការពារជាតិអ៊ុយក្រែន។
តាមក្រសួងសេដ្ឋកិច្ចអាមេរិក ឥស្សរជនអ៊ុយក្រែនទាំង ៤នាក់នេះត្រូវបានក្រសួងស៊ើបការណ៍សម្ងាត់រុស្ស៊ីយកឲ្យធ្វើការដើម្បីជ្រើសរើសអតីតអ្នកទទួលខុសត្រូវ និងអ្នកទទួលខុសត្រូវក្នុងរដ្ឋាភិបាលអ៊ុយក្រែនបច្ចុប្បន្នសម្រាប់រៀបចំផែនការចូលកាន់កាប់រដ្ឋាភិបាលថ្មីនៅអ៊ុយក្រែនដែលនិយមរុស្ស៊ី។ តើព័ត៌មានដែលលើកឡើងដោយអង់គ្លេសពេលនេះអាចបញ្ជាក់កាន់តែច្បាស់ពីការត្រៀមចូលឈ្លានពានអ៊ុយក្រែនពីសំណាក់រុស្ស៊ីដែរ ឬទេ?។ ប្រមុខការទូតអង់គ្លេសលោកស្រីលី ត្រឺសមិនបាននិយាយដល់ចំណុចនេះទេ និងបានព្រមានត្រង់ដាក់ប្រធានាធិបតីរុស្ស៊ីលោកពូទីន។
លោកស្រីលី ត្រឺសយល់ថា គ្រប់ទង្វើឈ្លានពានផ្លូវយោធារបស់រុស្ស៊ីចូលអ៊ុយក្រែនជាកំហុសយុទ្ធសាស្រ្តចម្បង និងព្រមានសងសឹករុស្ស៊ីវិញក្នុងតម្លៃខ្ពស់បំផុត។ តែរុស្ស៊ីតាមរយៈក្រសួងការបរទេសបានបរិហារលើការចោទប្រកាន់របស់អង់គ្លេស និងអំពាវនាវឲ្យអង់គ្លេសបញ្ឈប់ការផ្សព្វផ្សាយនូវព័ត៌មានមិនពិត និងគ្មានភស្តុតាង។
ការចរចាកំពុងបន្តមាន តែស្ថានការណ៍ហាក់កាន់តែឡើងតានតឹង
អ្វីជាការកត់សម្គាល់ ការចោទរុស្ស៊ីពីសំណាក់អង់គ្លេសពេលនេះបានធ្វើឡើង មួយថ្ងៃក្រោយពីមានជំនួបទ្វេភាគីរវាងប្រមុខការទូតអាមេរិក និងរុស្ស៊ីនៅក្នុងទីក្រុងហ្សឺណែវ។ ជំនួបមិនបានទទួលលទ្ធផលធំដុំទេ តែភាគីទាំងពីរសន្យាជួបគ្នាជាថ្មីនៅសប្តាហ៍ក្រោយទៀត។ សំណួរដែលគេអាចសួរពេលនេះគឺថា តើមាននៅសល់ច្រកដំណោះស្រាយតាមផ្លូវចរចាដែរ ឬទេ ហើយបើមាន តើនៅសល់ច្រកអ្វីខ្លះ?។ គ្រប់ភាគីទាំងអស់ មិនថាភាគីពាក់ព័ន្ធដោយផ្ទាល់ ឬក៏ភាគីពាក់ព័ន្ធដោយប្រយោលទេ គឺប្រហែលជាគ្មានភាគីណាមួយចង់បង្កសង្រ្គាមទេ។
រហូតមកដល់ពេលនេះ និងដើម្បីកាត់បន្ថយភាពតានតឹង គ្រប់ភាគីទាំងអស់បាន និងកំពុងព្យាយាមចរចា និងបន្តការចរចា ពិសេសអាមេរិក និងរុស្ស៊ីដែលជាតួឯកដូចគ្នា។ បរិយាកាសដែលល្អមកដល់ពេលនេះ គឺអាមេរិក និងរុស្ស៊ីយល់ព្រមបន្តអង្គុយចរចាទល់មុខគ្នា។ តែបរិយាកាសដែលហាក់មិនល្អមកដល់ពេលនេះ គឺស្ថានភាពហាក់ដូចជាមិនបានធូរស្រាល និងដូចជាកំពុងបន្តក្តៅងំកាន់តែខ្លាំង។ អ្វីដែលច្បាស់មកទល់ពេលនេះ អាមេរិក និងរុស្ស៊ីកំពុងបន្តរក្សាជំហររៀងៗខ្លួនដោយគ្មានអ្នកណាសុខចិត្តធ្វើសម្បទានឲ្យអ្នកណា ហើយក៏គ្មានអ្នកណាយល់ព្រមធ្វើសម្បទានឲ្យអ្នកណាមុនដែរ។
រុស្ស៊ីចង់ឲ្យអង្គការអូតង់ដកទ័ពចេញពីក្នុងបណ្តាប្រទេសសមាជិកដែលស្ថិតជាប់ព្រំដែនខ្លួន និងស្នើឲ្យអូតង់កុំទទួលអ៊ុយក្រែនជាសមាជិកថ្មី។ រុស្ស៊ីចង់ឲ្យអូតង់សន្យាជាលាយលក្សណ៍អក្សរលើសំណើរបស់ខ្លួន។ ពីខាងអាមេរិកវិញ អាមេរិកបានសន្យាធ្វើតាមរុស្ស៊ី តែតម្រូវឲ្យរុស្ស៊ីដកទ័ពទាំងអស់របស់ខ្លួនចេញព្រំដែនជាមួយអ៊ុយក្រែន។ នៅសប្តាហ៍ក្រោយ ប្រមុខការទូតអាមេរិក និងរុស្ស៊ីសន្យាជួបគ្នាជាថ្មី ហើយក្នុងសប្តាហ៍ក្រោយដដែល ប្រមុខការពារជាតិអង់គ្លេស និងរុស្ស៊ីក៏គ្រោងជួបគ្នានៅក្នុងទឹកដីរុស្ស៊ី។ បើជំនួបក្នុងកម្រិតប្រមុខការពារជាតិអង់គ្លេស និងរុស្ស៊ីកើតឡើងមែន វាជាជំនួបលើកទី១ គិតតាំងពីឆ្នាំ ២០១៣។
តែគេនៅមិនទាន់ដឹងថា តើក្រោយអង់គ្លេសចោទរុស្ស៊ី ជំនួបថ្នាក់រដ្ឋមន្រ្តីការពារជាតិរវាងប្រទេសទាំងពីរអាចនឹងបន្តមាន ឬអត់ទេ។ សរុបមកវិញ ដំណោះស្រាយតាមផ្លូវចរចានៅបន្តមានដែលជោគជ័យ ឬបរាជ័យអាស្រ័យទាំងស្រុងលើឆន្ទៈរបស់ភាគីនីមួយៗ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ