ហេតុអ្វីក្រុមឧទ្ទាមហ៊ូទីនៅយេម៉ែនវាយប្រហារអេមីរ៉ាតអារ៉ាប់រួមនៅពេលនេះ?
ចុះផ្សាយនៅថ្ងៃ៖
ស្តាប់ - ០៧:៣៤
សង្រ្គាមនៅយេម៉ែនបានក្លាយជាព័ត៌មានក្តៅគគុក នៅថ្ងៃអង្គារទី១៨មករា បន្ទាប់ពី ក្រុមឧទ្ទាមហ៊ូទី នៅប្រទេសយេម៉ែនបានបើកការវាយប្រហារសំដៅព្រលានយន្តហោះ នៅអាប៊ូ ដាប៊ី របស់អេមីរ៉ាត អារ៉ាប់រួម ដោយសម្លាប់មនុស្ស៣នាក់ កាលពីថ្ងៃចន្ទ។ ជាការសងសឹកវិញ សម្ព័ន្ធយោធាដឹកនាំដោយអារ៉ាប៊ី សាអូឌីតបានបើកប្រតិបត្តិការវាយប្រហារទៅលើរដ្ឋធានីសាណា របស់យេម៉ែនដែលកាន់កាប់ដោយពួកឧទ្ទាមហ៊ូទី នៅថ្ងៃចន្ទដដែល។ តាមទូរទស្សន៍យេម៉ែន គ្រប់គ្រងដោយក្រុមឧទ្ទាមហ៊ូទី ការវាយប្រហាររបស់សម្ព័ន្ធអារ៉ាប់ ដឹកនាំដោយអារ៉ាប៊ី សាអូឌីតបានសម្លាប់មនុស្ស១៤នាក់។
ប្រតិកម្មរបស់ក្រុមប្រទេសអារ៉ាប់ ប្រទេសលោកខាងលិច និងអង្គការសហប្រជាជាតិ បានធ្លាក់មកជាបន្តបន្ទាប់ នៅក្រោយ ក្រុមឧទ្ទាមហ៊ូទី នៅយេម៉ែន បានវាយប្រហារទៅលើទីតាំងស្តុកប្រេងនៅទីក្រុងអាប៊ូ ដាប៊ី របស់ប្រទេសអេមីរ៉ាត អារ៉ាប់រួម កាលពីថ្ងៃចន្ទម្សិលមិញ។ សហរដ្ឋអាមេរិក តាមរយៈទីប្រឹក្សាសន្តិសុខរបស់សេតវិមានបាននិយាយថ្កោលទោសការវាយប្រហារភេរវកម្មទៅលើទីក្រុងអាប៊ូដាប៊ី។ លោកJack Sollivan បាននិយាយថា អាមេរិកនឹងសហការជាមួយសម្ព័ន្ធមិត្តអេមីរ៉ាតអារ៉ាប់រួម និងអារ៉ាប៊ី សាអូឌីតដើម្បីធ្វើឲ្យពួកឧទ្ទាមហ៊ូទីសងថ្លៃខូចខាតកាលពីថ្ងៃចន្ទ។
ជាការសងសឹកភ្លាម សម្ព័ន្ធអារ៉ាប់ ដឹកនាំដោយអារ៉ាប៊ី សាអូឌីតបានបើកការវាយប្រហារផ្លូវអាកាសទៅលើរដ្ឋធានីសាណារបស់យេម៉ែន ដែលគ្រប់គ្រងដោយក្រុមឧទ្ទាមហ៊ូទី។ អ្នកនាំពាក្យរបស់សម្ព័ន្ធយោធាអារ៉ាប់ ឧត្តមសេនីយ៍ Turki Al-Maliki បាននិយាយនៅថ្ងៃចន្ទថា យន្តហោះចម្បាំង F15 បានបាញ់បំផ្លាញជើងទ្របាញ់មីស៊ីលបាលីស្ទីក ដែលក្រុមឧទ្ទាមហ៊ូទីបានប្រើកាលពីថ្ងៃចន្ទ។ ការវាយប្រហារកាលពីថ្ងៃចន្ទ សំដៅផងដែរផ្ទះរបស់មេដឹកនាំហ៊ូទី នៅភាគខាងជើងយេម៉ែន ដោយបានសម្លាប់មនុស្សយ៉ាងតិច ១៤នាក់។
តាំងពីសង្រ្គាមផ្ទុះឡើងនៅយេម៉ែន នៅ ៧ឆ្នាំមកនេះ អេមីរ៉ាត អារ៉ាប់រួម និងអារ៉ាប៊ី សាអូឌីត បានក្លាយជាផ្ទាំងស៊ីបសងសឹកពីក្រុមឧទ្ទាម ហ៊ូទីនៅយេម៉ែន ព្រោះប្រទេសទាំងពីរ នាំមុខ គេក្នុងសម្ព័ន្ធអារ៉ាប់ ដែលបើកប្រតិបត្តិការយោធា នៅយេម៉ែន ដើម្បីជួយគាំទ្រកងទ័ពរដ្ឋាភិបាលយេម៉ែន ដែលជាគូសត្រូវខ្លាំងរបស់ក្រុមឧទ្ទាមហ៊ូទី។ ប៉ុន្តែ នៅពេលអារ៉ាប៊ី សាអូឌីត ឧស្សាហ៍រងគ្រាប់ផ្លោង និងមានការស្លាប់បាត់បង់ជីវិតមនុស្ស នៅក្នុងការវាយប្រហារដោយយន្តហោះដ្រូនរបស់ពួកឧទ្ទាម ហ៊ូទី ពីទឹកដីយេម៉ែន គេមិនសូវដែលលឺមានការចុះផ្សាយពីខាងអេមីរ៉ាតអារ៉ាប់រួម ស្តីពីការវាយប្រហារណាមួយ របស់ក្រុមហ៊ូទី ក្នុងទឹកដីរបស់ខ្លួននោះទេ។ នេះជាលើកទី១ ដែលមានការអះអាងជាផ្លូវការពីខាងអាជ្ញាធរអេមីរ៉ាត អារ៉ាប់រួម ថា មានការវាយប្រហាររបស់ពួកយេម៉ែនទៅលើអាប៊ូ ដាប៊ី ទឹកដីរបស់ខ្លួន។ ហើយនេះក៏ជាលើកទី១ដែរ ដែលអេមីរ៉ាត អារ៉ាប់រួម ខាតបង់ ជីវិតមនុស្ស ស៊ីវិល ដោយសារការវាយប្រហាររបស់ក្រុមឧទ្ទាមហ៊ូទី។
តាមទីភ្នាក់ងារព័ត៌មាន អេមីរ៉ាត អារ៉ាប់រួម ការវាយប្រហាររបស់ក្រុមហ៊ូទី បានកាលពីថ្ងៃចន្ទ សំដៅ កន្លែងស្តុកប្រេង មួយកន្លែង និងការដ្ឋានសាងសង់ព្រលានយន្តហោះ នៅទីក្រុងអាប៊ូដាប៊ី។ ជាអកុសល បុគ្គលិកបរទេស៣នាក់ ដែលជាជនជាតិប៉ាគីស្ថាន និងឥណ្ឌាបានស្លាប់នៅក្នុងហេតុការណ៍វាយប្រហារកាលពីថ្ងៃចន្ទ។
ហេតុអ្វីពួកឧទ្ទាមហ៊ូទី នៅយេម៉ែន សំដៅ វាយប្រហារទីក្រុងអាប៊ូដាប៊ី របស់អេមីរ៉ាត អារ៉ាប់រួម?
មានហេតុផលមួយចំនួនដែលធ្វើឲ្យក្រុមឧទ្ទាមហ៊ូទី នៅយេម៉ែន វាយប្រហារសងសឹកអេមីរ៉ាត អារ៉ាប់រួម។
ហេតុផលទី១គឺក្រុមឧទ្ទាមហ៊ូទី ចង់ផ្តល់មេរៀន ដល់អេមីរ៉ាត អារ៉ាប់រួម។ អេមីរ៉ាត អារ៉ាប់រួម ដែលកំពុងប្រែក្លាយខ្លួនជាមជ្ឈមណ្ឌលពាណិជ្ជកម្ម ជាប្រទេសគុជ គោលដៅទេសចរណ៍ នៅមជ្ឈឹមបូព៌ា បានដកខ្លួន ខ្លះពីសង្រ្គាមនៅ យេម៉ែន ព្រោះតែមិនចង់ជួបអសន្តិសុខ ដោយសារការវាយប្រហារ ដ្រូន មីស៊ីលពីក្រុមឧទ្ទាមយេម៉ែន ដូចដែលក្រុមនេះឧស្សាហ៍ធ្វើទៅលើអារ៉ាប៊ី សាអូឌីត។
តាមអ្នកនាំពាក្យរបស់ក្រុមឧទ្ទាម ហ៊ូទី នៅប៉ុន្មានឆ្នាំមកនេះ ក្រុមឧទ្ទាមបានអត់ធ្មត់មិនវាយប្រហារទៅលើអេមីរ៉ាត អារ៉ាប់រួមនោះទេ ព្រោះថា អេមីរ៉ាត អារ៉ាប់រួម បានដកកងទ័ព ចេញពីយេម៉ែន ពោលគឺមិនបានសកម្មដូច អារ៉ាប៊ី សាអូឌីត ដែលនៅតែបន្តការវាយប្រហារផ្លូវអាកាស ទៅលើក្រុមហ៊ូទីនោះទេ។
ប៉ុន្តែ នៅប៉ុន្មានខែចុងក្រោយនេះ អេមីរ៉ាត អារ៉ាប់រួម បានប្តូរជំហររបស់ខ្លួន។ តាមសមាជិកការិយាល័យនយោបាយហ៊ូទីដែលដកស្រង់សំដីដោយកាសែតអាមេរិក New York Times ក្រុមហ៊ូទី ដែលពេលនេះបានចូលគ្រប់គ្រងទឹកដីមួយភាគធំរបស់យេម៉ែន ជាពិសេសរដ្ឋធានី សាណា បានសម្រេចវាយប្រហារអេមីរ៉ាត អារ៉ាប់រួម នៅក្រោយបរាជ័យ បាត់បង់តំបន់គ្រប់គ្រងមួយរបសខ្លួន ដែលមានឈ្មោះថា Chabwa។ ពួកឧទ្ទាមហ៊ូទីបានចោទប្រកាន់អេមីរ៉ាត អារ៉ាប់រួមថា បានផ្តល់ជំនួយអាវុធ ដល់ក្រុមប្រដាប់អាវុធ ឈ្មោះថា Geant ឬប្រែថា យក្ស ដើម្បីវាយដណ្តើមកាន់កាប់តំបន់Chabwa ដែលធ្លាប់ស្ថិតក្រោមដៃរបស់ក្រុមឧទ្ទាមហ៊ូទី។
មួយវិញទៀត ការវាយប្រហាររបស់ក្រុមហ៊ូទីទៅលើអេមីរ៉ាត អារ៉ាប់រួមលើកនេះ កើតឡើងនៅតែប៉ុន្មានថ្ងៃ ក្រោយដែលក្រុមឧទ្ទាមបានរឹបអូសយកបានកប៉ាល់ដឹកទំនិញ ដែលមានបំពាក់ទង់ជាតិអេមីរ៉ាត អារ៉ាប់រួម។ អាជ្ញាធរអេមីរ៉ាត អារ៉ាប់រួមដែលបានចេញមុខថ្កោលទោស សកម្មភាពរឹបអូសរបស់ក្រុមឧទ្ទាមហ៊ូទី បែបចោរសមុទ្រ បានអះអាងថា កប៉ាល់ របស់អេមីរ៉ាត អារ៉ាប់រួម បានដឹកសម្ភារៈសម្រាប់មន្ទីរពេទ្យនៅយេម៉ែន។ ប៉ុន្តែ ក្រុមឧទ្ទាមហ៊ូទី វិញ នៅពេលបានចូលរឹបអូសកប៉ាល់ បានបង្ហាញ កេសអាវុធ និងសម្ភារៈយោធា ប៉ុន្តែ មិនមែនគ្រឿងបរិក្ខាពេទ្យដូចការអះអាងរបស់អេមីរ៉ាតអារ៉ាប់រួមនោះទេ។
ម្យ៉ាងវិញទៀតដែរ គេមិនដឹងថា តើវាជាការចៃដន្យ ឬជាការគ្រោងទុកពីមុននោះទេ។ ក្រុមឧទ្ទាមហ៊ូទី នៅយេម៉ែនដែលគាំទ្រ ដោយប្រទេសអ៊ីរ៉ង់ បានបើកការវាយប្រហារទៅលើអេមីរ៉ាត អារ៉ាប់រួម នៅក្នុងបរិបទមួយដែលអេមីរ៉ាតអារ៉ាប់រួម ដែលមិនសូវជាចុះសម្រុងជាមួយអ៊ីរ៉ង់ហើយ នៅបានទៅចាប់ចងសម្ព័ន្ធមេត្រីភាព គ្នាឡើងវិញ ជាមួយអ៊ីស្រាអែល ដែលជាសត្រូវសួរពូជរបស់អ៊ីរ៉ង់។
នៅក្រោយការវាយប្រហារទៅលើទីក្រុងអាប៊ូដាប៊ី របស់អេមីរ៉ាត អារ៉ាប់រួម អ៊ីស្រាអែលបានចេញមុខចោទប្រកាន់សាជាថ្មីថា បើសិនគ្មានអ៊ីរ៉ង់ បើកភ្លើងខៀវទេ នោះ ក្រុមឧទ្ទាមហ៊ូទី នៅយេម៉ែន ក៏មិនអាចប្រើមីស៊ីលបាលីស្ទីក និងយន្តហោះដ្រូន ដែលខ្លួនបានទទួលពីអ៊ីរ៉ង់ សម្រាប់យកទៅវាយប្រហារលើអេមីរ៉ាត អារ៉ាប់រួមនោះដែរ។
សហគមន៍អន្តរជាតិបំភ្លេច មិនខ្វល់សង្រ្គាមសម្លាប់មនុស្សនៅយេម៉ែន ?
ការវាយប្រហារ ពួកឧទ្ទាមហ៊ូទី ដែលបានសម្លាប់មនុស្ស៣នាក់ ទឹកដីអេមីរ៉ាត អារ៉ាប់រួម បានរងការថ្កោលទោសពីប្រទេសលោកខាងលិច។ ប៉ុន្តែ នៅពេល អារ៉ាប៊ី សាអូឌីតវាយប្រហារទៅលើយេម៉ែន ដើម្បីទប់ស្កាត់ក្រុមឧទ្ទាមហ៊ូទី កុំឲ្យចូលកាន់អំណាចនៅយេម៉ែន រហូតសម្លាប់ជីវិតប្រជាជនស៊ីវិល រហូតមក គេកម្រនឹងលឺប្រទេសលោកខាងលិច ស្តីបន្ទោស ថ្កោលទោសអារ៉ាប៊ី សាអូឌីត ឬអេមីរ៉ាត អារ៉ាប់រួម ដែលបើកប្រតិបត្តិការយោធា ធ្វើសង្រ្គាមនៅយេម៉ែន។
សង្រ្គាមស៊ីវិលនៅយេម៉ែន ៧ឆ្នាំ មកនេះ បានសម្លាប់ជីវិតមនុស្សជិត ៤សែននាក់ បំផ្លាញ ហេដ្ឋារចនាសម្ព័ន្ធ ខ្ទេចខ្ទីរ និងបានធ្វើឲ្យប្រជាជនយេម៉ែនជាច្រើនលាននាក់ ត្រូវធ្លាក់ខ្លួនក្នុងគ្រោះអត់ឃ្លាន ខ្វះចំណីអាហារូបត្ថម្ភ។
ការចរចាដើម្បីស្តារសន្តិភាព នៅយេម៉ែន ក្រោមការជ្រោមជ្រែងរបស់អង្គការសហប្រជាជាតិ បានបរាជ័យជាបន្តបន្ទាប់។ ជាលទ្ធផល ការប្រយុទ្ធគ្នាដណ្តើមទឹកដីគ្នារវាងកងទ័ពរដ្ឋាភិបាលយេម៉ែន ដែលគាំទ្រដោយសម្ព័ន្ធយោធាអារ៉ាប់ ដឹកនាំដោយអារ៉ាប៊ីសាអូឌីត ហើយពួកឧទ្ទាមហ៊ូទីនៅតែ បន្ត ហើយកាន់តែខ្លាំងក្លា នៅប៉ុន្មានខែចុងក្រោយនេះ។ រាល់លើក ភាគីប្រយុទ្ធទាំងពីរបាននិយាយទម្លាក់កំហុសគ្នាទៅវិញ ទៅមក ថាជាអ្នកទទួលខុសត្រូវលើការសម្លាប់ជីវិតប្រជាជនស៊ីវិល។ អារ៉ាប៊ី សាអូឌីត បាននិយាយការពារប្រតិបត្តិការយោធារបស់ខ្លួន នៅទឹកដីយេម៉ែន ដើម្បី ទប់ស្កាត់ការពង្រីកឥទ្ធិពលរបស់ក្រុមឧទ្ទាមហ៊ូទី នៅយេម៉ែន ព្រោះក្រុមនេះគាំទ្រដោយអ៊ីរ៉ង់។
មន្រ្តីអង្គការសហប្រជាជាតិ និងអង្គការការពារសិទ្ធិមនុស្សធ្លាប់រិះគន់ប្រតិបត្តិការរបស់សម្ព័ន្ធយោធាអារ៉ាប់ ដឹកនាំដោយអារ៉ាប៊ី សាអូឌីត ដែលគេចាត់ទុកថា អាចជាការប្រព្រឹត្តឧក្រិដ្ឋកម្មប្រឆាំងមនុស្សជាតិ ប៉ុន្តែ ប្រទេសផ្សេងទៀត ដូចជាអាមេរិក ប្រទេសនៅអឺរ៉ុបជាដើម មិនសូវដំឡើងសំឡេងរិះគន់អារ៉ាប៊ី សាអូឌីត ឬអេមីរ៉ាតអារ៉ាប់រួមនោះទេ។សម្រាប់ប្រទេសលោកខាងលិចដូចជាអាមេរិក បារាំង និងប្រទេសផ្សេងទៀតដែលនៅស្ងៀមមិនរិះគន់ មហាសេដ្ឋីប្រេង ដូចជាអារ៉ាប៊ី សាអូឌីត និងអេមីរ៉ាតអារ៉ាប់រួម ជាអតិថិជនទិញសព្វាវុធ ជាអ្នកលក់ផ្គត់ផ្គង់ប្រេង ដែលគេមិនចង់និយាយប៉ះពាល់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ